“Rilru Dik Tak Nei Apiang” Chuan Chanchin Ṭha An Pawm
“Rilru Dik Tak Nei Apiang” Chuan Chanchin Ṭha An Pawm
“Chatuana nun duhna rilru dik tak nei apiang chu ringtu an lo ni ta a.”—TIRH. 13:48, NW.
1, 2. Kristian hmasate chuan chanchin ṭha hrilh chungchânga Isua thu hrilh lâwk chu engtin nge an thlen famkimtîr?
ISUA thu hrilh lâwk, Ram chanchin ṭha khawvêl zawng zawnga hrilh a nih tûr thu Kristian hmasate’n an thlen famkimtîr dân phûrawm tak mai chu Bible-a tirhkohte bu-ah a chuang a. (Mt. 24:14) Thuhriltu taima takte chuan an hnung lo la zui tûrte tân entawn tûr an hnutchhiah tia sawi theih a ni. Isua zuitute’n Jerusalema ṭhahnemngai taka thu an hrilh avângin, mi sâng tam tak chu kum zabi khatnaa Kristian kohhranah an lawi lût a, chûng zîngah chuan ‘puithiamte zînga mi tam takte’ pawh an tel a ni.—Tirh. 2:41; 4:4; 6:7.
2 Hmân lai missionary-te chuan mi tam tak dangte chu Kristian lo ni tûrin an ṭanpui a. Entîr nân, Philipa chu Samari-ah a kal a, chutah chuan, mipuite chuan a thusawi an ngaithla a ni. (Tirh. 8:5-8) Paula chuan mi hrang hrangte chu hmun hrang hrangah a zin kualpui a, Kristian thuchah chu Kupra-ah te, Asia Minor ram ṭhenkhatah te, Makedonia-ah te, Grik-ah te, leh Italy-ah te an hril a. Thu a hrilhna khawpuiahte chuan Judate leh Grik mi tam takte chu ringtu an lo ni. (Tirh. 14:1; 16:5; 17:4) Tita chuan Kret-ah rawng a bâwl a. (Tit. 1:5) Petera chu Babulon-ah thu hrilin a buai hle a, C.E. 62-64 vêla a lehkha thawn hmasa ber a ziah lai chuan, Kristiante thuhrilh rawngbâwlna chuan Ponto ramah te, Galatia ramah te, Kappadokia ramah te, Asia ramah te, Bithunia ramah te hriat a hlawh hle tawh a ni. (1 Pet. 1:1; 5:13) Chûng hun lai chu hun phûrawm tak a va ni êm! Kum zabi khatnaa Kristian thuhriltute chuan ṭhahnem an ngaih êm avângin, an hmêlhmate pawhin “khawvêl chawk buaitute” niin an sawi hial a ni.—Tirh. 17:6; 28:22.
3. Lalram thu puangtute’n tûn laia an thu hrilhnaah eng nge an seng a, chu chuan engtin nge a awmtîr che?
3 Tûn lai hunah pawh hian, Kristian kohhran chu hmuh theih khawpin a ṭhangchho va. Jehova Thuhretute kum tin report i han chhiar a, khawvêl puma an thil hlen chhuahte han hmuh chu i phûrpui hle a ni lâwm ni? Kum 2007 rawngbâwl kum chhûnga Lalram puang chhuaktute’n Bible zirpui maktaduai ruk chuang an nei chuan a ti hlim hle che a ni lâwm ni? Chu bâkah, ni kuma Isua Krista thih Hriatrengna inkhâwma tel mi mataduai sâwm vêlte chu Jehova Thuhretu ni lo mah se, anni chuan chu inkhâwmna pawimawh taka tel tûr khawpin chanchin ṭha an ngaihven a ni. Hei hian hnathawh tûr tam tak a la awm tih a târ lang.
4. Tute’n nge Lalram thuchah chu pawm?
4 Kum zabi khatna ang bawkin, tûn laiah pawh, “chatuana nun duhna rilru dik tak nei apiang” chuan thutak chu an pawm a. (Tirh. 13:48, NW) Jehova chuan chutiang mite chu a inawpna pâwl lamah a hîp a ni. (Hagaia 2:7 chhiar rawh.) He lâk khâwmna hna akima thawhpui tûr hian Kristian rawngbâwlnaah eng ang rilru put hmang nge kan neih ngai?
Duhsak Bîk Nei Lovin Thu Hril Rawh
5. Eng ang mite’n nge Jehova duhsakna dawng?
5 Kum zabi khatnaa Kristiante chuan “Pathianin mi duhsak bîk a nei lo . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn” tih an hre thiam a ni. (Tirh. 10:34, 35) Miin Jehova nêna inlaichînna ṭha a neih leh neih loh chu Isua tlanna inthawinaa rinna a lantîr leh tîr lohvah a innghat a ni. (Joh. 3:16, 36) Tin, Jehova chuan “mi zawng zawng chhandama awmah leh thutak hriaah a duh” a ni.—1 Tim. 2:3, 4.
6. Lalram thu puangtute chuan eng nge an tih loh vang a, engvângin nge?
6 Chanchin ṭha hriltu tân mite chu an hnam te, khawtlânga an dinhmun te, an lan dân te, an sakhaw vawn te, a nih loh leh thil dang dangte ṭanchhana ngaih dân lo pâwngpaw siam lâwk ngawt chu a dik lo vang. Han ngaihtuah lawk teh: Bible thutak hrilh hmasa ber tu che chuan i lakah thliarhranna a lantîr loh avângin i lâwm hle a ni lâwm ni? Chuti a nih chuan, a ngaithlatute nun chhanhim thei tûr thuchah chu engah nge sawi chhuak lova i awm ang?—Matthaia 7:12 chhiar rawh.
7. Thu kan hrilhnate chungchânga ngaih dân lo pâwngpaw siam lâwk ngawt chu engvângin nge kan pumpelh ang?
7 Jehova chuan Isua chu rorêl tûrin a ruat a; chuvângin, mi dangte tân ro kan rêlsak ngawt thei lo. Isua chuan rilrua ngaihtuahnate leh thil chhûtte a hriat theih laiin, keini erawh chuan Isua ang lo takin, ‘mita kan hmuh ang chauhva ro kan rêl’ emaw, ‘benga kan hriat ang maia kan zilhhau’ emaw ṭhin avângin, mi dangte rorêlsak theihna kan nei lo chu a âwm hle a ni.—Is. 11:1-5; 2 Tim. 4:1.
8, 9. (a) Saula chu Kristian a nih hmain eng ang mi nge a nih? (b) Tirhkoh Paula thiltawn chuan eng nge min zirtîr ang?
8 Mi chi hrang hrangte chu Jehova chhiahhlawh an lo ni a. Chûng zînga langsâr tak pakhat chu, a hnua tirhkoh Paula lo ni ta Tarsa khuaa mi Saula a ni. Pharisai Saula chu Kristiante nasa taka dodâltu a ni a. An kal sual nia a hriat tlat avângin chu chuan Kristian kohhran a tihduhdahtîr a ni. (Gal. 1:13) Mihringte thlîrna aṭang chuan, ani chu Kristian lo ni tûra beisei rual a ni lo. Mahse, Isua chuan Saula thinlunga ṭhatna awm chu a hmu a, hna danglam bîk tak thawk tûrin a thlang a ni. Chuvângin, Saula chu kum zabi khatna Kristian kohhrana phusa ber leh ṭhahnemngai berte zînga mi a lo ni ta a ni.
9 Tirhkoh Paula thiltawn chuan eng nge min zirtîr? Kan thu hrilhna bialah chuan, kan thuchah ken dodâl nia langte an awm mai thei a. An zînga a tu amah chu Kristian dik an lo nih beisei awm lo hle mah se, an hnênah thu kan hrilh loh phah tûr a ni lo. A châng chuan ngaithla duh miah lo tûr anga langte pawhin kan thusawi an ngaithla duh thei a. Kan hna thawh tûr chu mi zawng zawngte hnêna ‘bâng lova’ thu hrilh hi a ni.—Tirhkohte 5:42 chhiar rawh.
‘Bâng Lova’ Thuhriltute Dawn Tûr Malsâwmnate
10. Engvângin nge mi hlauhawm tak nia langte hnêna thu hrilh chu kan ṭhulh loh vang? Tualchhûnga thiltawn ṭhenkhat sawi rawh.
10 Hmêl lan dân chuan mi a bum thei. Entîr nân, Ignacio-a * chuan South America ram pakhata lung ina a tân laiin, Jehova Thuhretute nên Bible an zir ṭan a. Tharum a thawh ṭhin avângin, mite’n an hlau hle a. Chuti chuan, an tânpuite hnêna an thil siam hralh chhuaktute chuan ba pe ṭha duh lote hnêna ba ṭhîng tûrin Ignacio-a chu an tîr ṭhîn a. Amaherawhchu, Ignacio-a chuan thlarau lama hma a han sâwn a, a thu zirte a han nunpui tâkah chuan, tûn hmaa tharum thawh hmang ṭhîn tak chu mi nunnêm tak a lo ni ta a ni. Tuman ba ṭhîng tûrin an tîr tawh ngai lo va, mahse, Ignacio-a chuan Bible thutak leh Pathian thlarauvin a mizia a thlâk danglam avângin a lungawi hle a. Tin, amah zirpui tûra theihtâwp chhuahtu Lalram thuchhuahtuin rilru zau tak a put avâng pawh chuan a lâwm hle bawk a ni.
11. Engvângin nge mite chu kan tlawh leh ṭhin?
11 Chanchin ṭha kan hrilh tawhte kan tlawhleh ṭhin nachhan pakhat chu, an dinhmun leh rilru put hmangte a inthlâk theih avâng leh a inthlâk bawk ṭhin avângin a ni. Kan tlawh hnuhnûn Thuhriltu 9:11 chhiar rawh.) Khawvêla thilthlengte chuan an hma lam hun chu ngun takin a ngaihtuahtîr thei a. Chutiang thilthlengte chuan tûn hmaa lo ngaihsak lo—a nih loh leh dodâl hial—tu chu kan thusawi a ngaihthlâktîr thei a ni. Chuvângin, hun remchâng apiangah mi dangte hnênah chanchin ṭha kan hril tûr a ni.
ber hnuah, ṭhenkhat chuan natna khirh tak an tuarin, hnathawh lai an chân, a nih loh leh an hmangaih takte an sûn pawh a ni thei. (12. Thu kan hrilhnate chu engtin nge kan thlîr ang a, engvângin nge?
12 Mihringte hian mi dangte thliar hran leh an chungchânga ngaih dân lo pâwngpaw siam lâwk ngawt chu kan hrât hle a. Mahse, Jehova chuan mite chu a mi malin a en a ni. Mi tinte ṭhatna lai chu a hmu a. (1 Samuela 16:7 chhiar rawh.) Kan rawngbâwlnaah hian chutianga tih chu kan tum tlat tûr a ni. Thiltawn tam tak chuan kan thu hrilh apiangte chunga a ṭha lam beiseinain rah ṭha a chhuahte chu a târ lang a ni.
13, 14. (a) Engvângin nge pioneer pakhat chuan rawngbâwlnaa a mi tawh hmeichhe pakhat chu a ngaihsak loh? (b) He thiltawn aṭang hian eng nge kan zir theih?
13 Pioneer thawk unaunu Sandra-i chu Caribbean thliarkârah in tin a kal a, chutah chuan vântlâng intihhlimna carnival-a nasa taka inhmang ṭhîn Ruth-i chu a va hmu a. Ruth-i chu ram pum carnival intihhlimna lalnua ṭum hnih lai thlantlin tawh a ni. Ani chuan Sandra-i thusawi chu a ngaihven hle a, Bible zirpui tûrin ruahmanna siam a ni a. Sandra-i chuan heti hian a sawi: “A ina ka han luh chuan, carnival thawmhnaw kimchang nêna Ruth-i thlalâk lian tak chu ka hmu nghâl a, chutih rual chuan a lâwmman dawnte pawh chu ka hmu bawk a ni. Mi lâr tak leh carnival-a nasa taka inhmang mi chu thutakah a tui rei lo vang tih ngaih dân dik lo ka nei a. Tichuan, ka va tlawh chhunzawm ta lo a ni,” tiin.
14 Hun engemawti hnuah chuan, Ruth-i chu Kingdom Hall-ah a lo lang hlawl mai a, inkhâwm bânah chuan Sandra-i hnênah, “Engvângin nge min zirpui tûra i lo kal tawh loh?” tiin a zâwt a. Sandra-i chuan pawi a tih thu sawiin Bible zirna neih chhunzawm leh dân a ruahman ta a. Ruth-i chuan hma a sâwn chak hle a, a carnival thlalâk chu a dah bo va, kohhran thiltih zawng zawngah tel ṭanin, a nun chu Jehova hnênah a pumpêk ta a ni. Sandra-i chuan atîra a lo ngaih dân chu a dik lo hle tih a pawm ta a ni.
15, 16. (a) Thuchhuahtu pakhatin a chhûngte hnêna thu a hrilhna chuan eng rah nge a chhuah? (b) Engvângin nge kan chhûngte tûn hma nun chuan an hnêna thu hrilh min ṭhulhtîr loh vang?
15 Ringtu ni lo chhûngte’n an dawng sawng duh dâwn lova an lan hunah pawh, an hnêna thu hrilhtu mi tam takte chuan rah ṭha an seng a ni. Entîr nân United States-a unaunu Joyce-i chungchâng hi ngaihtuah ta ila. A naupan lai aṭang tawhin an mâkpa chu jail a tâng zîng hle a. “Mite chuan ruihhlo a ngaih avâng te, rûk a rûk ṭhin avâng te, leh thil ṭha lo dang tam tak a tih bawk a vângin, a nun chuan awmzia rêng a nei loh thu an sawi a. Chutichung pawhin, kum 37 chhûng ngawt chu Bible thutak ka hrilh reng ṭhîn,” tiin Joyce-i chuan a sawi. An mâkpa ṭanpui tûra dawhthei taka a thawhrimna chu nasa taka malsâwm a ni; a tâwpa an mâkpain Jehova Thuhretute nêna Bible zir a, a nun a thlâkthleng tâk avângin. Tûn hnai lawk khân, Joyce-i mâkpa kum 50 mi chuan California, U.S.A.-a district inkhâwmpuiah Baptisma a chang a ni. “Ka hlim êm avângin ka ṭap a. A chunga ka beidawn ngai loh avângin ka lâwm hle!” tiin Joyce-i chuan a sawi.
16 I chhûngte tuemaw chu a tûn hma nun avângin Bible thutak chungchâng sawipui i hreh mai thei. Mahse, chutiang hrehna chuan Joyce-i chu an mâkpa a biak lohtîr chuang lo. Tihah chuan, mi dang rilru ngaihtuahna chu engtin nge miin a hriat theih ang? Chu mi chuan tih tak zetin thutak chu a zawng pawh a ni thei a. Chuvângin, chutiang mite hnênah zawn hmuh theihna hun remchâng chu pe ngei ngei ang che.—Thufingte 3:27 chhiar rawh.
Bible Zirtîrna Ṭanpuitu Ṭangkai Tak
17, 18. (a) Khawvêl pum puia thu dawnte chuan What Does the Bible Really Teach? lehkhabu hlutna chungchâng eng nge a târ lan? (b) He lehkhabu i hmannaah eng ang thiltawn ṭhate nge i neih?
17 Khawvêl ram hrang hrang aṭanga thu dawn
chuan mi rilru ṭha pu tam takin Bible zirna ṭanpuitu lehkhabu What Does the Bible Really Teach? tih lâwm takin an dawn thu a târ lang. United States-a pioneer thawk unaunu pakhat Penni chuan he lehkhabu hmang hian Bible zirna tam tak a ṭan a ni. Chûng zînga pahnihte chu an lawina sakhuaa inpe tak an ni a. Penni chuan Bible Teach bua Bible thutak awmte an dawn sawn ṭhat duh vak a ring lo va. Nimahsela, heti hian a ziak a ni, “Chiang tak, kawnghmang nei tak, leh tawifel taka ziah a nih avâng chuan hnialna leh ngaihtuah buaina awm lovin, an thu zir chu thutak a ni tih an pawm nghâl hmak a ni,” tiin.18 Britain rama thuchhuahtu pakhat Pat-i chuan Asia ram pakhat aṭanga râltlân hmeichhe pakhat chu Bible a zirpui ṭan a. Helho sipaite’n a hmuh leh tawh ngai hauh loh tûra a pasal leh a fapate an hruai bo hnuah chuan, chu nu chuan a awmna ram chu loh theih lohva a tlân bosan a ngai a ni. Thi tûra vau a ni a, a in lah hâlsak a ni bawk a, tin mipa rualin an pâwngsual bawk. Hêng thilthleng zawng zawngte avâng hian dam chhan tûr engmah nei lo niin a inhria a, vawi tam tak chu mahni intihhlum a tum hial a ni. Amaherawhchu, Bible a zirna chuan beiseina a pe a. Pat-i chuan: “Bible Teach bua hriat awlsam taka hrilhfiahnate leh tehkhin thute chuan a nun chu nasa takin a khawih a ni,” tiin a ziak. Ani chuan hma a sâwn chak hle a, baptisma chang lo thuchhuahtu nih a tling ta thuai a, inkhâwmpui neih leh hmasak bera baptisma chan a duh thu a sawi chhuak a ni. Pathian Thu-in mi rilru ṭha pute hnêna a pêk beiseina hriatthiamna leh hlutna nei tûra mite ṭanpui chu a va hlimawm êm!
“Thil Ṭha Tih I Ning Suh Ang U”
19. Engvângin nge thu hrilh chu a hmanhmawhthlâk?
19 Hun leh nite a han liam zêl rual hian, thu hril leh zirtîr siam tûra kan hna neih chu a hmanhmawhthlâk zual zêl a. Kum tinin rilru dik tak nei mi sâng têlte chuan kan thu hrilh chu an pawm a ni. Mahse, “LALPA ni ropui tak chu a hnai,” chu mi awmzia chu thlarau lam thim zînga la awmte chu “thah mai tûrte” an ni, tihna a ni.—Zep. 1:14; Thuf. 24:11.
20. Eng nge tih kan tum ṭheuh tûr?
20 Chutiang mite chu kan la ṭanpui thei a. Mahse, chutianga ṭanpui tûr chuan, kum zabi khatnaa Kristiante kan entawn chu a pawimawh hle a ni. Anni chuan “‘Isua chu Krista a ni,’ tiin zirtîr leh hrilh an bâng chuang lo.” (Tirh. 5:42) Dodâlna tâwk chung pawha chhelin, i ‘zirtîr thiamna’ ngaihsakin, leh thlei bîk nei lova mi zawng zawngte hnêna thu hrilin an entîrna siam chu zui ang che! “Thil ṭha tih i ning suh ang u,” kan chhel chuan Pathian malsâwmna nasa tak chu kan seng dâwn si a.—2 Tim. 4:2; Galatia 6:9 chhiar rawh. (w08 1/15)
[Footnote]
^ par. 10 Hming ṭhenkhatte chu thlâk danglam a ni.
Engtin Nge I Chhân Ang?
• Tute’n nge chanchin ṭha pawm?
• Engvângin nge kan thu hrilhnate chungchânga ngaih dân lo pâwngpaw siam ngawt chu kan tih loh vang?
• What Does the Bible Really Teach? tih lehkhabu aṭangin eng rah chhuah nge kan hmuh?
[Zirlai Atâna Zawhnate]
[Phêk 17-naa milemte]
Rilru ṭha pu mi sâng têlte chuan thu hrilh an pawm
[Phêk 20-naa milemte]
Chanchin ṭha hriltute chuan mite chungchângah ngaih dân an pâwngpaw siam lâwk ngawt lo