Krista Lo Awmna—I Tân Eng Awmzia Nge A Neih?
Krista Lo Awmna—I Tân Eng Awmzia Nge A Neih?
“I lo kal lehna leh khawvêl tâwpna chhinchhiahna chu engnge ni ang?—MT. 24:3.
1. Eng zawhna ngaihvenawm tak nge Isua tirhkohte chuan an zawh?
KUM sâng hnih dâwn kal taah khân, Oliv Tlângah Isua tirhkoh palite chuan an Pu hnênah zawhna pakhat an zâwt a. “Chûng chu engtikah nge a lo awm ang? i lo kal lehna leh khawvêl tâwpna chhinchhiahna chu engnge ni ang?” tiin an zâwt a ni. (Mt. 24:3) Chu zawhnaah chuan tirhkohte chuan ṭawngkam ngaihvenawm tak pahnih, “i lo kal lehna” tih leh “khawvêl tâwpna” tih chu an hmang a. Hêng ṭawngkamte hian eng nge a kawh?
2. Mizo Bible-a “tâwpna” tia lehlin syn·teʹlei·a tih thu mal awmzia hi eng nge ni?
2 A hmasain ṭawngkam hnuhnûng zâwk chu han ngaihtuah phawt ila. Atîra Grik ṭawngah chuan Mizo Bible-in “tâwpna” tia a lehlin ve ve thu mal pahnih (syn·teʹlei·a leh te’los) a awm a. Mahse, Grik ṭawngah chuan hêng thu mal pahnihte awmzia chu a inang lo deuh a ni. Matthaia 24:3-a hman syn·te·leiʹa tih thu mal awmzia chu “hun tâwp lam/tâwpna hun,” tihna a ni a, te’los erawh chu “tâwpna” tihna a ni. He thu mal pahnihte inan lohna hi Kingdom Hall-a thusawi hmanga hrilhfiah theih a ni a. Thusawi tâwp lam chu thusawituin ngaithlatute chu a sawi tawh thute hriat chhuahtîr nâna a sawi hun leh a hnua nunpui theih dân tûr a hrilhfiah hun tawi tê hi a ni a. Thusawi tâwpna erawh chu thusawituin platform a chhuahsan hun a ni. Chutiang bawkin, Bible thu aṭanga sawi chuan, syn·teʹlei·a tih thu mal chuan tâwpna hun pawh tiama chu mi thlen hma hun emaw chen chu a huam tel a ni.
3. Isua lal hun chhûnga thilthleng ṭhenkhat chu engte nge ni?
3 Tirhkohte’n an zawh pa·rou·siʹa * (Mizo Bible-a “lo kal lehna” tia lehlin) chu eng tihna nge ni? Krista pa·rou·siʹa, a nih loh leh, lo kal lehna chu kum 1914-a Isua vâna Lal a nih aṭang khân a inṭan a, mi suaksualte tiboral tûra a lo kalna tûr “hrehawm nasa tak” hun chhûng thleng a ni ang. (Mt. 24:21) Thil tam tak, he khawvêl suaksual ‘ni hnuhnûngte,’ thlante lâk khâwmnate, leh vân lam nuna an thawhlehnate chu Isua Lal anga a lo kal leh chhûngin a thleng a ni. (2 Tim. 3:1; 1 Kor. 15:23; 1 Thes. 4:15-17; 2 Thes. 2:1) “Tâwpna,” a awmzia chu “hun tâwp lam/tâwpna hun” (syn·te·leiʹas) chu Isua Lal anga a lo kalna (pa·rou·siʹa) nên hun thuhmun sawina a ni, a tih theih a ni.
Hun Engemawti Chhûng Awh A Ni
4. Engtin nge Isua lo kal lehna chu Nova hun laia thilthlengte nên nân a inan?
4 He pa·rou·siʹa tih thu malin hun engemawti chhûng a awh a ni tih chu Isua’n a lo kal lehna chungchâng a sawi nên a inmil a. (Matthaia 24:37-39 chhiar rawh.) Isua’n a lo kal lehna chu Nova hun laia Tuilêt hun chhûng rei lo tê nên a khaikhin lo tih hi chhinchhiah rawh. Chu aia mah chuan Tuilêt thlen hma hun rei tak nên a khaikhin zâwk a ni. Chu hun chhûngah chuan, Nova lawng tuk hun leh thu hrilh hna a thawh hun pawh tiamin, a tâwpa Tuilêt a lo thlen tak tak thleng a tel a. Chûng chuan hun rei tak chhûng a awh a, kum sawmnga aia tam hial pawh a awh thei ang. Chutiang bawkin, Krista lo kal lehnaah chuan hrehawmna nasa tak pawh tiama chu mi thlen hmaa thilthlengte chu a tel a ni.—2 Thes. 1:6-10.
5. Engtin nge Thu Puan bung 6-a chhinchhiah thute chuan Isua lo kal lehna chu hun engemawti chhûng awh a ni tih a târ lan?
5 Bible hrilh lâwkna dangte chuan Krista lo kal lehna chu mi suaksualte tiboral tûra a lo kal tûr hun chauh ni lovin, hun engemawti chhûng awh a nihzia a finfiah a. Thu Puan bu chuan Isua chu sakawr vâr chunga chuang ang leh lallukhum pêk dawng angin a târ lang a. (Thu Puan 6:1-8 chhiar rawh.) Kum 1914-a Lal anga lallukhum khumtîr a nih hnu chuan, Isua chu “hneh chung leh hneh zêl” tûra chhuak ta anga sawi a ni. Tin, chanchin ziak chuan sakawr rawng chi dang dang chunga chuangte’n an zui tih a târ lang a. Hêng hrilh lâwknate hian indona, ṭâm, leh hri te a entîr a, chûng chu ‘ni hnuhnûngte’ tia koh hun engemawti chhûnga thleng a ni. He hrilh lâwkna thlen famkimna hi kan dam chhûng hian kan hmu a ni.
6. Thu Puan bung 12-na chuan Krista lo kal lehna chungchâng hriat thiamna eng nge min pêk?
6 Thu Puan bung 12 chuan vâna Pathian Ram din a nih chungchâng chu kimchang lehzualin a sawi a. Chutah chuan hmuh theih loh hmuna indona chhuak chungchâng kan chhiar a. Mikaela—vâna Isua Krista chelh nihna—leh a vântirhkohte chuan Diabola leh a ramhuaihote chu an do a ni. Chuvâng chuan, Diabol-Setana leh a hote chu leia paih thlâk an ni a. Chutah tak chuan chanchin ziak chuan, Diabola chu “hun tlêm tê chauh a nei tih a inhriat” avângin a thinur êm êm tih min hrilh a ni. (Thu Puan 12:7-12 chhiar rawh.) A nih chuan, vâna Krista Lalram din chu lei leh a chhûnga chêngte chunga ‘chung pikna’ pung chho zêl hian a zui a ni tih a chiang hle.
7. Fakna hla pahnihna chuan eng nge a sawi a, chutah chuan eng hun remchâng nge sawi lan a nih?
7 Fakna hla pahnihna chuan chutiang bawkin vân lam Zion Tlângah Isua chu Lala siam a nih thu a lo sawi lâwk a. (Sâm 2:5-9; 110:1, 2 chhiar rawh.) Amaherawhchu, he fakna hla pawh hian lei rorêltute leh an khua leh tuite hnênah Krista rorêlna hnuaia intukluhna hun remchâng pêk an nih thu a târ lang bawk a ni. Anni chu “fing tawh” tûr leh ‘thununa awm tawh’ tûra fuih an ni. Ni e, chu mi chhûnga Jehova leh Lala a ruata rawngbâwlin, “amaha [Pathiana] an rinna nghat zawng zawngte chu an eng a thâwl e.” Chuvâng chuan, lal thiltihtheihnaa Isua a lo kal leh chhûng hian anni chuan a ṭûl anga inthlâk thlengna hun remchâng an nei a ni.—Sâm 2:10-12.
Chhinchhiahna Hriain
8, 9. Tuin nge Krista lo kal lehna leh chu mi awmzia chu hre thiam ang?
8 Pharisaite’n Lalram lo thlen hun tûr an zawh khân, Isua chuan anmahni an lo thlîr dân angin “hmuh theihin” a awm lo vang tih a hrilh a ni. (Lk. 17:20, 21) Ring lotute chuan an hre thiam lo vang. Engtin nge an hriat thiam tehlul ang? Isua chu nakina an Lal tûr a nih pawh an hre si lo. A nih chuan Krista lo kal lehna chhinchhiahna leh a pawimawhna chu tuin nge hre thiam ang?
9 Isua zirtîrte chuan chu chhinchhiahna chu “vân hnuai lehlama kâwl a phêta vân hnuai lehlam thlenga a êng ṭhîn ang hian” fiah takin an hmu dâwn tih a sawi zawm a ni. (Luka 17:24-29 chhiar rawh.) Matthaia 24:23-27 chuan Krista lo kal lehna chu chutiang thilthleng nên a thlunzawm leh chu a ngaihvenawm tak a ni.
Chhinchhiahna Hmutu Chhuan
10, 11. (a) Matthaia 24:34-a târ lan “chhuante” chungchângah tûn hmain eng ang hrilhfiahna nge pêk a nih? (b) Isua zirtîrte’n chiang taka an hriat angin “chhuante” zîngah chuan tute nge tel dâwn?
10 Tûn hma chuan, he magazine hian Matthaia 24:34-a târ lan “tûn lai chhuante” tih awmzia chu “Juda ring lotute chhuan” a nih thu a hrilhfiah a. * Thuziak dang zawng zawng pawhin Isua’n “chhuan” tih thu mal hi a ṭha lo zâwng sawi nâna a hman avâng leh thil ṭha lo sawina “sual tak” tih ang chite nêna a hman kawp deuh vek avângin, chutianga hrilhfiah chu a âwm hle a ni. (Mt. 12:39; 17:17; Mk. 8:38) Chuvâng chuan, tûn laia a thlen famkimnaah Isua chuan ring lotu “chhuan” suaksual, hun tâwp lam (syn·te·leiʹa) leh tâwpna (teʹlos) chhinchhiahna hmutute a sawina nia hriat a ni.
11 Isua’n “chhuan” tih ṭawngkam a ṭha lo zâwnga a hman hian, a hun laia mi suaksualte chungchâng emaw, anmahni biak nân emawa hmang a ni ṭhîn a. Mahse, Matthaia 24:34-a ‘chhuan’ tih thu mal a hman hian a hun laia mi suaksualte a sawina a ni kher em? Isua zirtîr palite chu anmahni “chauhvin” a hnênah an lo kal tih hre chhuak rawh. (Mt. 24:3) Isua’n “tûn lai chhuante” chungchâng a sawi laiin, a ṭha lo zâwnga sawina “sual tak” tih ang ṭawngkamte a hmang lo; chuvângin, tirhkohte chuan ‘chûng zawng zawng a thlen kim hma lohva’ ral lo tûr “chhuante” zîngah anmahni leh zirtîr dangte an tel tih chiang takin an hre thiam ngei ang.
12. Isua’n “chhuante” tih ṭawngkam chu tute tâna a hman nge tih a chung leh a hnuaia thu awmte chuan engtin nge a târ lan?
12 Eng ṭanchhanin nge chu thutâwp chu kan siam theih? A chung leh a hnuai lama thu awmte ṭha taka ngaihtuahna aṭangin a ni. Matthaia 24:32, 33-a târ lan a nih angin, Isua chuan: “Theipui kûngah hian a tehkhin thu zîr rawh u: A ṭang a lo no va, a hnah a lo chawr chuan nipui a thaw dâwn tih in hre ṭhin; chutiang bawkin nangni pawhin chûng zawng zawng chu in hmuh hun chuan amah chu a lo hnai tawh a, kawngka bul ngeiah a awm tih hria ang che u,” a ti a. (Marka 13:28-30; Luka 21:30-32 nên khaikhin rawh.) Tichuan, Matthaia 24:34-ah: “Tih tak meuhvin ka hrilh a che u, chûng zawng zawng chu a thlen kim hma loh zawng tûn lai chhuante hi an ral lo vang,” tiin kan chhiar a ni.
13, 14. Engvângin nge Isua sawi “chhuante” chu a zirtîrte chhuan sawina a ni kan tih theih?
13 Isua chuan nakin lawka thlarau thianghlima hriak thih tûr a zirtîrte chu a ni, “chûng zawng zawng” a lo thlen huna thu tâwp dik siam thei tûra a sawite chu. Chuvâng chuan a châng dawt chiaha mi: “Chûng zawng zawng chu a thlen kim hma loh zawng tûn lai chhuante hi an ral lo vang,” tia Isua sawi belhchhah chu a zirtîrte chungchâng sawina a ni ngei ang.
14 Ring lotute ang lo takin, Isua zirtîrte chuan chhinchhiahna an hmu chauh ni lovin, a awmzia pawh a hre dâwn a ni. Anni chuan chu chhinchhiahna hmêl hmang aṭang chuan an “zîr” ang a, a awmzia dik tak chu an “hre” dâwn a ni. “Amah chu a lo hnai tawh a, kawngka bul ngeiah a awm tih” an hre thiam ang. Juda ring lotute leh Kristian hriak thih rinawmte chuan Isua thusawite thlen famkimna chu kum zabi khatnaah hmu tlêm hle mah se, chutih laia a hnungzuitu hriak thihte chauh chuan hêng thilthlengte aṭang hian an zir thei a—a awmzia dik takte pawh an hre thei a ni.
15. (a) Isua sawi tûn lai “chhuante” zîngah chuan tute nge tel? (b) Engvângin nge ‘he chhuan’ tih ṭawngkam reizâwng chu kan chhût theih loh? (Phêk 25-a bâwm chu en rawh.)
15 Tûn laia thlarau lama hriat thiamna nei lote chuan Isua lo kal lehna chhinchhiahna chu an ‘hmu thei’ lo va. Anni chuan tûn hma angin engkim a awm pângngai angin a la awm reng niin an hria a ni. (2 Pet. 3:4) Kawng lehlamah chuan, hriak thih Krista unaute, tûn laia Johana pâwl chuan he chhinchhiahna hi kâwlphe ang maia fiahin an hria a, a awmzia dik tak chu an hre thiam a ni. A pâwl angin, hêng hriak thihte hi ‘chûng zawng zawng a thlen kim hma loh zawnga’ ral lo tûr tûn lai “chhuante” an ni. * Hei hian hrilh lâwk tawh hrehawm nasa tak a inṭan thlengin leiah hian hriak thih Kristian ṭhenkhat chu an la awm ang tih ngaih dân min pe a ni.
“Inring Rengin Awm Rawh U”
16. Krista zirtîr zawng zawngte chuan eng nge an tih ang?
16 Mahse, chhinchhiahna hriat mai aia tam a ngai a. Isua chuan: “In hnêna ka sawi hi mi zawng zawng hnêna sawi ka ni. Inring rengin awm rawh u,” tiin a sawi belh a ni. (Mk. 13:37) Hriak thih kan ni emaw, mipui tam tak zînga mi kan ni emaw pawh ni se, hei hi tûn laiah kan za atân a pawimawh ber a ni. Kum 1914-a Isua vâna Lala siam a nih aṭangin kum sawm kua a liam tawh a. Harsa hle mah se, inpeih reng leh inring rengin kan awm tûr a ni. Krista chu hmuh theih lovin Lal angin ro a rêl tih hriat thiamna chuan chu mi ti tûr chuan min ṭanpui a. Chu chuan kan “rin loh hunah” a hmêlmate tiboral tûrin a lo kal thuai dâwn tih min hriattîr bawk a ni.—Lk. 12:40.
17. Krista lo kal lehna hriatthiamna hian eng anga min awmtîr tûr nge ni a, eng nge tih kan tum ruh sauh tûr chu?
17 Krista lo kal lehna awmzia kan hriatthiamna chuan a hmanhmawh thlâkzia kan hriatna chu tizual tûrin min ṭanpui a. Isua chu a lo kal leh reng tawhin, kum 1914 aṭang khân vânah Lal angin hmuh theih lovin ro a rêl der tawh tih kan hria a ni. Nakin lâwkah chuan mi suaksualte chu a rawn tiboral thuaiin, he khawvêl pum hi a rawn thlâkthleng vek dâwn a. Chuvâng chuan, Isua’n: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna [teʹlos] chu a lo thleng ang,” tia a sawi lâwk hnaa thatho taka tel chu kan tum ruh sauh tûr a ni.—Mt. 24:14. (w08 2/15)
[Footnote-te]
^ par. 3 Kimchang zâwka sawihona atân chuan, Insight on the Scriptures, Volume 2, phêk 676-9-na chu en rawh.
^ par. 10 Vênnainsâng, November 1, 1995, (English) phêk 11-15, 19, 30, 31 chu en rawh.
^ par. 15 Thu Puan bua inlârna hmasa thlen famkimna leh tûn lai chhuan chu a inang niin a lang. (Thup. 1:10–3:22) Lalpa nîa he thilthleng hian kum 1914 aṭanga hriak thih mi rinawm hnuhnûng ber a thiha a thawh leh thleng a huap a ni.—Revelation—Its Grand Climax At Hand! tih bu phêk 24, paragraph 4-na chu en rawh.
Engtin Nge I Chhân Ang?
• Engtin nge Isua lo kal lehna chu hun engemawti chhûng a ni dâwn tih kan hriat?
• Tute’n nge Isua lo kal lehna chhinchhiahna leh chu mi awmzia chu hria?
• Matthaia 24:34-a târ lan tûn lai chhuante zîngah chuan tute nge tel?
• Engvângin nge “tûn lai chhuante” rei zâwng chiah chu kan chhût theih loh?
[Zirlai Atâna Zawhnate]
[Phêk 27-naa bâwm]
“Tûn Lai Chhuante” Rei Zâwng Hi Kan Chhût Thei Em?
“Chhuante” tih thu mal hian hun emaw, thilthleng eng emaw chhûnga dam rual apui apangte a kâwk fo va. Entîr nân, Exodus 1:6 chuan: “Tin Josefa leh a unaute zawng zawng leh chûng chhuanho zawng zawngte chu an thi ta vek a,” tiin min hrilh a. Josefa leh a unaute kum upat lam chu a inang lo va; mahse, hun khat chhûnga thiltawn inang chu an tawng ṭheuh a ni. “Chûng chhuanho” zîngah chuan Josefa aia piang hmasa a ute pawh an tel a. Ṭhenkhat chu Josefa aiin an dam rei zâwk a ni. (Gen. 50:24) “Chûng chhuanho” zînga mi dang, Benjamina angte chu Josefa pian hnua piang an ni a, a thih hnuah pawh an la dam mai thei a ni.
Chuvâng chuan hun engemawti chhûnga nung mite sawi nâna “chhuante” tih thu mal hman a nih hian, hun chu a lutuka rei a ni lo vang tih bâk chu a rei zâwng tûr chiah sawi theih a ni lo. Chuvâng chuan, Matthaia 24:34-a chhinchhiah a nih angin, Isua’n “chhuante” tih thu mal hmangin a zirtîrte chu ‘ni hnuhnûngte’ tâwp hun tûr chhût chhuah theihna a pe lo. Chu aimah chuan, Isua chuan “chu mi nî leh a hun” chu an hre dâwn lo tih a sawi uar zâwk a ni.—2 Tim. 3:1; Mt. 24:36.
[Phêk 28, 29-naa milemte]
Kum 1914-a Lallukhum khumtîr a nih hnu chuan, Isua chu ‘hnehtu’ anga entîr a ni