Missionary Ropui Ber Chu Entawn Rawh
Missionary Ropui Ber Chu Entawn Rawh
“Mi zirtute ni rawh u, kei pawh Krista zirtu ka ni ang bawk hian.”—1 KOR. 11:1.
1. Engvângin nge Isua chu kan entawn ang?
TIRHKOH Paula chuan Missionary ropui ber, Isua Krista chu a entawn a. A Kristianpuite chu: “Mi zirtute ni rawh u, kei pawh Krista zirtu ka ni ang bawk hian,” tiin a fuih bawk a ni. (1 Kor. 11:1) Isua’n a zirtîrte ke silsaka inngaihtlâwmna a tihhmuh hnu khân, an hnênah: “In chunga ka tih ang hian nangni pawhin in tih vena tûrin ka tihhmuh che u a ni,” a ti a. (Joh. 13:12-15) Tûn laia Kristiante kan nih angin, kan thusawi, kan thiltih, leh kan lantîr miziaah Isua Krista entawn tûrin mawhphurhna kan nei a ni.—1 Pet. 2:21.
2. Governing Body-in missionary anga a ruat lo che a nih pawhin, eng rilru put hmang nge i neih theih?
2 Thuziak hmasaah khân, missionary chu chanchin ṭha hril tûra tirh—mi dangte hnêna chanchin ṭha thlentu a ni tih kan hre tawh a. He mi chungchângah hian, Paula chuan zawhna rilru la tak ṭhenkhat a siam a ni. (Rom 10:11-15 chhiar rawh.) Paula zawhna siam: “Thu hriltu awm lovin engtin nge an hriat ang?” tih hi chhinchhiah teh. Tichuan Isaia hrilh lâwkna la chhuakin: “Thil ṭha chanchin lâwmawm thlentute ke chu a va mawi êm!” tih a sawi a ni. (Is. 52:7) Ram danga missionary anga rawngbâwl tûrin ruat leh tirh chhuah ni lo mah la, chanchin ṭha hriltu ṭhahnemngai tak anga Isua entawnin, chanchin ṭha hriltu rilru put hmang chu i nei thei a. Ni kum khân, Lalram thuchhuahtu mi 6,957,852-te chuan ram 236-ah ‘chanchin ṭha hriltu hna an thawk’ a ni.—2 Tim. 4:5.
“Engkim Kalsanin Kan Zui Ta Chia”
3, 4. Vânah Isua’n eng nge a kalsan a, amah zuitu ni tûrin eng nge kan tih ang?
3 Leia a chanvo hlen chhuah nân, Isua chuan vân lam nun leh ropuina chu kalsanin, “bâwih angah a insiam a, amah leh amah a intitlâwm ta zâwk a.” (Phil. 2:7) Krista entawna kan thiltih eng pawh chu Isua leia a lo kal laia a thiltih nên chuan khaikhin rual a ni lo. Mahse, Setana khawvêla kan thil neihte chu ît taka hawi kîr leh lovin, a hnungzuitu angin kan nghet reng thei a ni.—1 Joh. 5:19.
4 Ṭumkhat chu, tirhkoh Petera’n Isua hnênah: “Ngai teh, keinin engkim kalsanin kan zui ta chia,” a ti a. (Mt. 19:27) Isua’n a hnung zui tûra a sâwm khân, Petera te, Andria te, Jakoba te, leh Johana te chuan an lênte kalsanin an zui nghâl a ni. Sangha man hna chu kalsanin, rawngbâwlna chu an hna pui berah an nei a. Chanchin Ṭha Luka ziakin a sawi dânin, Petera chuan: “Ngai teh, keinin kan in leh lo kalsanin kan zui ta chia,” a ti a ni. (Lk. 18:28) Kan zînga a tam zâwk chuan Isua zui tûrin, “kan in leh lo” zawng zawng kan kalsan kher a ngai lo va. Amaherawhchu, Krista zuitu leh Jehova chhiahhlawh dik tak ni tûr chuan ‘mahni hrehawm kan pawisak loh’ a ngai thung a ni. (Mt. 16:24) Chutiang nun kawng chuan hlâwkna tam tak a nei. (Matthaia 19:29 chhiar rawh.) Krista entawna chanchin ṭha hrilh duhna chuan kan thinlung a tilâwm a, a bîk takin Pathian leh a Fapa duh tak lama tuemaw hîpna kawnga tihtheih tlêm tê kan neih hunah kan thinlung a tilâwm lehzual a ni.
5. Ram danga pêmte chuan Bible thutak an zir hnua an tih duh mai theih tûr târ langtu thiltawn pakhat sawi rawh.
5 Brazil mi Valmir-a chu Suriname ram lai hâwla awm rangkachak lai chhuaktu a ni a. Bawlhhlawh taka khawsa leh zu ngawl vei a ni bawk. Khawpuia a awm laiin, Jehova Thuhretute chuan Bible an zirpui ṭan a. Nî tin a zir tlut tlut a, inthlâkthlengna tam tak siamin, baptisma a chang ta thuai a ni. A hnathawh chuan a rinna thar mila nun a tiharsa tih a hriat chuan, a sumdâwnna hlâwk tak chu hralhin, a chhûngte thlarau lam ro zawng hmu tûra ṭanpui nân Brazil ramah a kîr leh ta a ni. Bible thutak zir ram danga pêm lût tam takte chuan ram hausaa an hnathawhte chu inhuam taka kalsanin, an chhûngte leh mi dangte thlarau lama ṭanpui tûrin anmahni ramah an kîr leh a. Chutiang Lalram thuchhuahtute chuan chanchin ṭha hrilh duhna rilru dik tak chu an lantîr a ni.
6. Lalram thu puangtu mamawh zualna hmuna kan pêm theih loh chuan eng nge kan tih theih?
6 Thuhretu tam tak chu Lalram thu hriltu mamawh zualna hmunahte an pêm thei a. Ṭhenkhat phei chuan ram dangah rawng an bâwl a ni. Chutianga pêm thei dinhmunah chuan kan ding lo mai thei a; mahse, englai pawha kan rawngbâwlnaa theih tâwp chhuahin Isua kan entawn thei a ni.
Jehova Chuan Kan Mamawh Zirtîrna Min Pe
7. Lalram puang chhuaktute anga an thiamna tihmasâwn duhte tân eng school-te nge awm?
7 Isua chuan a Pa hnên aṭangin zirtîrna a dawng ang bawkin, tûn laia Jehova pêk zirtîrnate chu kan hmang ṭangkai thei a. Isua ngei chuan: “Zâwlneite lehkhabuah, ‘Pathian zirtîrin an awm vêk ang,’ tih ziak a ni,” a ti. (Joh. 6:45; Is. 54:13) Tûn laiah, Lalram puang chhuaktute anga mi thuam famkimtu a bîk taka ruahman school te a awm a. Rinhlelh rual lovin, kan tualchhûng kohhrana Theocratic Rawngbâwlna School chu kawng engemaw takin kan hlâwkpui ṭheuh a ni. Pioneer-te chuan Pioneer Rawngbâwlna School kal theihna chanvo an nei a. Hun rei tak chhûng pioneer thawkte chu chu school-ah chuan an kal nawn leh thei a ni. Upate leh kohhranho rawngbâwltute chu zirtîrna leh an rinpuite rawngbâwlsak dân an thiam lehzual nân Lalram Rawngbâwlna School-ah an kal a. Nupui nei lo upate leh kohhranho rawngbâwltu tam takte chuan thu hrilh rawngbâwlnaa mi dangte ṭanpui tûra anmahni thuamtu Ministerial Training School-ah an kal bawk a. Tin, ram danga missionary thawk tûra ruat unaupa leh unaunute chuan Watchtower Bible School of Gilead-ah zirtîrna an dawng bawk a ni.
8. Unaupa ṭhenkhat chuan Jehova pêk zirtîrna chu engtiang khawpin nge an hlut?
8 Jehova Thuhretu tam takte chuan hêng school-tea kal thei tûrin insiamremna an nei a. Canada rama neih Ministerial Training School-a kal theih nân Yugu-a chuan a hnathawhna puin chawlh a phalsak loh avângin, a hna aṭang chuan a bâng a. Yugu-a chuan: “Ka inchhîr lo. Ka dîlna kha mi lo phalsak se chuan, company chunga rinawm lêt a, thawk reng tûrin min beisei mai thei a. Mahse, tûnah chuan Jehova hnên aṭanga kan dawn tûr chanvo eng pawh atân ka inpeih reng a ni,” tiin a sawi. Pathian pêk zirtîrna ṭangkaipui tûr chuan, mi tam takte chuan tûn hmaa an lo ngaihsân êm êm thilte chu inhuam takin an kalsan a ni.—Lk. 5:28.
9. Thlarau lama zirtîrna leh theih tâwp chhuahna sâwt theihzia târ langtu entîrna pakhat pe rawh.
9 Theih tâwp chhuahna nêna inkawp thlarau lam zirtîrna chu a sâwt hle a. (2 Tim. 3:16, 17) Guatemala rama Saulo-a chunga thilthleng hi han ngaihtuah teh. Ani chu rilru kim vak lovin a piang a, zirtîrtu pakhat chuan a nu hnênah a fapa a tihbeidawn sauh theih avângin, a fapa chu lehkha chhiar zirtîr lui lo tûrin a hrilh a. Saulo-a chuan lehkha chhiar pawh thiam lovin school chu a bânsan ta a. Amaherawhchu, Thuhretu pakhat chuan Apply Yourself to Reading and Writing tih brochure hmangin lehkha chhiar dân a zirtîr a. A tâwpah chuan Saulo-a chuan hma a sâwn êm avângin, Theocratic Rawngbâwlna School-ah thu a sawi thei hial a ni. A hnuah Saulo-a nu chuan in tina rawngbâwlnaah zirtîrtu chu a tâwk a. Saulo-a chuan lehkha a chhiar thiam thu a han hriat chuan, chawlhkâr leha rawn hruai tûrin a ti a ni. A chawlhkâr lehah chuan, zirtîrtu chuan Saulo-a hnênah: “Eng nge min zirtîr dâwn?” tiin a zâwt a. Saulo-a chuan What Does the Bible Really Teach? lehkhabua paragraph pakhat chu a han chhiar ṭan a. Zirtîrtu chuan: “A va mak êm! Tûnah chuan min zirtîr tawh zâwk a nih hi,” a ti a. Insûm zo lovin Saulo-a chu ṭap chungin a kuah ta vawng vawng mai a ni.
Thinlung Khawihtu Zirtîrna Chu
10. Bible thutak zirtîrna kawnga kan hman tûr hmanrua ṭha tak eng nge awm?
10 Isua chuan Jehova’n amah a zirtîr thute leh Pathian Thu ziaka kaihhruaina te ṭanchhanin a zirtîr a. (Lk. 4:16-21; Joh. 8:28) A fuihna zâwmin leh Pathian Lehkha Thu ṭanchhana zirtîrin, Isua chu kan entawn a ni. Chuvâng chuan kan vaiin thukhat vuain thu kan sawi a, kan ngaihtuah bawk a; chu chuan inpumkhatna a awmtîr a ni. (1 Kor. 1:10) “Bawi rinawm, fing tak” chuan kan zirtîrnaa inpumkhat tûr leh chanchin ṭha hriltute anga kan rawngbâwlna hlen tûra min ṭanpuitu Bible ṭanchhan thu leh hlate min pêk chhuah avângin kan va lâwm tak êm! (Mt. 24:45; 28:19, 20) Chûng zînga pakhat chu Bible Teach bu a ni a, tûnah ṭawng 179-in a hmuh theih tawh a ni.
11. Engtin nge Ethiopia rama unaunu chuan dodâlna chu Bible Teach bu hmanga a hneh?
11 Bible Teach bu hmanga Pathian Lehkha Thu zirna chuan dodâltute thinlung pawh a thlâkthleng thei a. Ṭum khat chu Ethiopia rama pioneer unaunu Lula-i chuan mi Bible a zirpui laiin, zirlai chhûngkhat nu pakhat chu lo kalin chaltlai takin chutianga zirna neih an ngaih loh thu a rawn sawi a. Lula-i chuan Bible Teach bu bung 15-naa pawisa lem tehkhin thu chu hmangin zaidam takin a chhûtpui a ni. Chu nu thinrim chu a lo reh a, a zir zawmtîr ta a. Zir leh hunah chuan a lo tel ve a, Bible zirpui a ngen bâkah, zirpui man pêk pawh a tum hial a nih kha! A hnu lawkah chuan chawlhkâr khatah vawi thum lai a zir a, thlarau lamah hma a sâwn chak êm êm a ni.
12. Naupangte pawhin Bible thutak thiam takin an zirtîr thei tih entîrna pakhat pe rawh.
12 Naupangte pawhin Bible Teach bu hmangin mi dangte an ṭanpui thei a. Hawaii rama kum 11 mi Keanu-a chuan school-ah he lehkhabu hi a chhiar a, a classmate pakhat chuan, “Engvângin nge kût nîte i hman ve loh?” tiin a zâwt a. Keanu-a chuan appendix topic “Kût Nîte Chu Kan Hmang Tûr A Ni Em?” tih aṭangin a chhânna chu a chhiarsak a ni. Tichuan, a chhûnga thu awmte ziakna chu keuvin, eng thu nge a ngaihven ber tih a zâwt a. Bible zirna chu an ṭan ta a ni. Rawngbâwl kum kalta chhûng khân, Jehova Thuhretute chuan Bible zirpui 6,561,426 an nei a, zirna tam takah Bible Teach bu hi hman a ni. Bible zirpuinaah he lehkhabu hi i hmang em?
13. Eng kawngin nge Bible zirna chuan mite chu nasa taka a thunun theih?
13 Bible Teach bu hmanga Pathian Lehkha Thu zirna chuan Pathian duhzâwng ti duhte chu nasa takin a thunun thei a. Norway rama special pioneer nupa tuak khat chuan Zambia ram mi chhûngkaw pakhat chu Bible an zirpui ṭan a. Zambia mi nupate chuan fanu pathum an nei tawhin, fa dang an duh tawh lo va. Chuvâng chuan nu ber a rai leh chuan nau tihtlâk zai an rêl ta a ni. Doctor an pan hma ni engemaw zât lekah, “Pathianin Nunna A Thlîr Dân” tih bung chu an zir a. Chu mi bunga nausên la piang lo lem chuan an nupa rilru chu a khawih êm avângin, nau tihtlâk loh chu an tum nghet ta a. Thlarau lama nasa taka hmasâwnin, an fapa thar hmingah chuan an mahni zirpuitu hming chu an puttîr ta a ni.
14. Kan zirtîrna mila nunnain rah ṭha a chhuah theihzia entîrna pe rawh.
14 Isua zirtîr dân kawng pawimawh tak pakhat chu a zirtîrna mila a nung hi a ni. Mi tam takin he mi chungchânga Isua entawntu Jehova Thuhretute nungchang ṭha chu an ngaisâng a. New Zealand rama sumdawng mi pakhat chu a car rawksak a ni a, a briefcase chu an rûksak a ni. Chu chu police nêna a report chuan, police chuan: “I thil hmuh leh theih dân kawng khat awmchhun chu Jehova Thuhretute zînga tuemaw berin a chhar chauhvin a ni ang,” a ti a. Chanchin bu semtu Thuhretu pakhat chuan briefcase chu a chhar ta tak tak a. Chu mi hriattîr a nih chuan a neitu chu unaunu in-ah a lo kal a. A tâna hlu tak lehkha pawimawhte a neih lêt leh chuan a thaw huai a ni. Chu unaunu chuan, “I thilpêk kîr leh che chu ka tih tûr dik tak a ni, Jehova Thuhretute zînga mi ka ni miau va,” a ti a. Chu sumdâwng pa chuan chu mi zînga police thusawi chu hre chhuakin, mak a ti hle a. Chiang takin, Kristian dikte chu Isua entawnin Bible-a an hmuh zirtîrna dik milin an nung a ni.—Heb. 13:18.
Mite Chunga Isua Rilru Put Hmang Entawn Rawh
15, 16. Engtin nge kan thuchah hrilh lamah mite kan hîp theih?
15 Mite chunga Isua rilru put hmang chuan a thuchah lamah anmahni a hîp a. Entîr nân, a hmangaihna leh a inngaihtlâwmna chuan mi hnuaihnungte chu a hîp a ni. Amah pantute chungah khawngaihna a lantîr a, ṭawngkam ngilnei takin mite chu a thlamuan a, dam lo tam tak a tidam bawk a ni. (Marka 2:1-5 chhiar rawh.) Thilmak chu kan ti thei lo va; mahse, hmangaihna te, inngaihtlâwmna te, leh khawngngaihnate chu kan lantîr thei a—chûng miziate chuan mite chu thutakah a hîp a ni.
16 Special pioneer Tariua-i chu South Pacific ram Kiribati thliarkâr pilril taka awm kum upa lam Beere-a inah a va lût a. Chu pa chuan a ngaihthla duh lo tih lantîr mah se, Tariua-i chuan a taksa pêng ṭhenkhat a zeng tih a hmuhin, a khawngaih êm êm a. “Dam lote leh tarte tâna Pathian thutiam chu i lo hre tawh em?,” tiin a zâwt a. Tichuan Isaia hrilh lâwkna thu chu a chhiarsak ta a ni. (Isaia 35:5, 6 chhiar rawh.) Chu pa chuan ngaihven takin: “Kum tak tak Bible ka lo chhiar tawhin, ka kohhrana missionary pawhin kum tam tak chhûng min tlawh reng tawh a; mahse, khati lai kha Bible-ah ka la hmu ngai lo rêng rêng,” a ti a. Beere-a nên chuan Bible zirna chu ṭan a ni ta a, thlarau lamah hma a sâwn hle a ni. Ni e, ani chu piangsual hle mah se, tûnah chuan baptisma a chang tawh a, chu hmun kilkhâwra awm group enkawltu a niin, chanchin ṭha hrilin chu thliarkâr pumah chuan a vâk chhuak thei a ni.
Krista Chu Entawn Zêl Rawh
17, 18. (a) Engtin nge chanchin ṭha hriltu hlawhtling tak i nih theih? (b) An rawngbâwlna la urhsûntute chuan eng thil nge an tawn ang?
17 Rawngbâwlnaa thiltawn hlimawm takte’n a târ lan fo angin, Isua lantîr miziate kan neih a, kan lantîr chuan chanchin ṭha hriltu hlawhtling tak kan ni thei a ni. Chuti a nih chuan, chanchin ṭha hriltu ṭhahnemngai takte anga Isua entawn chu a va inâwm êm!
18 Kum zabi khatnaa mi ṭhenkhat Isua zirtîrte an lo nih khân, Petera chuan: “Engnge kan hmuh ang le?” tiin a zâwt a. Isua chuan: “Mi tin inte emaw, unaute emaw, farnute emaw, pa emaw, nu emaw, fate emaw, ramte emaw ka hming avânga kalsan apiang chuan a leh za an hmu ang a, chatuana nunna an la chang bawk ang,” tiin a chhâng a ni. (Mt. 19:27-29) Missionary ropui ber, Isua Krista kan entawn zêl phawt chuan, chu chu kan thiltawn tûr a ni tih a chiang hle. (w08 2/15)
Engtin Nge I Chhân Ang?
• Engtin nge Jehova chuan chanchin ṭha hriltute ni tûra min zirtîr?
• Engvângin nge Bible Teach bu hi kan rawngbâwlna atân a ṭangkai?
• Mite chunga kan rilru put hmang chungchângah engtin nge Isua kan entawn theih?
[Zirlai Atâna Zawhnate]
[Phêk 23-naa milem]
Isua’n Petera te, Andria te, Jakoba te, leh Johana te a hnung zui tûra a sâwm khân, anni chu an tawi khaw muang lo