A Chhânnate Tih Tak Zeta Zawnna

“Ei zawn ‘dân’ tûr kan hmuh chhuah hnuah leh tûn hmaa ngaih pawh kan lo ngaihtuah phâk loh thil​—⁠air-condition te, sound system ṭha tak te, leh kum tluana thei tharlâm tak tak ei tûr te​—⁠hual vêla kan awm hnuah pawh kan nun ‘chhan’ kan ngaihtuah a la ngai cheu. Engah nge he inelna hahthlâk takah hian kan tel? Eng nge a tum chu?”​—⁠David G. Myers, Hope College, Holland, Michigan, U.S.A.-a psychology professor

ENGTIN nge he professor zawhna hi i chhân ang? Ṭhenkhat chuan a chhânna zawn nâna hun sên chu a manhla pawh an ring chiah lo mai thei. Amaherawhchu, hêng zawhnate ngaihthah tum chu i pheikhawk chhûnga lung tê awm ngaihthah tum ang a ni​—⁠pên zawm zêl thei mah la, kal a tihrehawm dâwn.

Nun hian awmzia a neih leh neih loh i ngaihtuah a nih chuan i mal lo ve. Mihringte chanchin zirna nasa berte zînga pakhat, World Values Survey sawi dânin ram tam takah chuan “nun awmzia leh a thiltum” ngaihtuahtu an pung telh telh a ni.

Rilrua thlamuanna dik tak nei tûr chuan hêng zawhna lian tham pathumte chhânna hi i zawn hmuh a ngai a ni.

Khawi aṭangin nge kan lo awm?

Nunin eng nge a tum?

Eng nge kan hmabâk tûr chu?

Hêng zawhna pawimawhte chhânna rin tlâk hi khawiah nge i hmuh theih ang? A dawta thuziak chuan ngaihruatna emaw, mihring finna emaw aṭanga chhânna ni lovin, Pathian Thu, Bible aṭanga chhânna chu a pe ang. Mahni Bible keuva a chhânnate mahni ngeia hmu tûrin kan sâwm a che u.  (w08 2/1)