“In Zîngah Tunge Finga Thu Hre Thei Awm?”
“In Zîngah Tunge Finga Thu Hre Thei Awm?”
“In zîngah tunge finga thu hre thei awm? Thuhnuairawlh tak leh fing takin a thiltihte awm dân ṭhatin entîr rawh se.”—JAK. 3:13.
1, 2. Mi finga ngaih mi tam takte chungchângah eng nge i sawi theih?
TUNGE fing tak zeta i ngaih? I nu leh pate, kum upa tawhte, a nih loh leh college-a zirtîrtute em ni? I lo chawr chhuahna leh i dinhmun chuan mi fing nia i ngaih chu a hril thei. Amaherawhchu, Pathian chhiahhlawhte chuan Pathian thil thlîr dân chu an ngaihven hmasa ber a ni.
2 Khawvêlin mi finga a ngaih zawng zawngte hi Pathian mit hmuhah an fing vek kher lo. Entîr nân, Joba chuan thufing tak sawi nia inngaite chu a bia a; mahse, heti hian thu tlûkna a siam a ni: “In zîngah mi fing ka hmu chuang lo,” tiin. (Job. 17:10) Pathian hriatna pawm duh lotute chungchângah tirhkoh Paula chuan: “Finga inngaiin mi âah an lo chang a,” tiin a ziak a ni. (Rom 1:22) Tin, zâwlnei Isaia kaltlangin Jehova ngei chuan heti hian a sawi bawk: “Mahni ngaiha fingte leh mahni mithmuha bengvârte chu an chung a pik e!” tiin.—Is. 5:21.
3, 4. Mi chu fing tak zet tûr chuan eng nge ngai?
3 Mite mi fing nihtîrtu leh Pathian lawm hlawhtîrtu chu kan hriat a ngai tih a chiang hle. Thufingte 9:10 chuan hetiang hriat thiam theihna hi min pe a ni: “LALPA ṭih hi finna bul a ni a, mi thianghlima hriatna hi hriat thiamna a ni,” tiin. Mi fing chuan Pathian ṭihna dik tak leh a tehnate zahna a neih a ngai a ni. Amaherawhchu, Pathian a awm tih leh a kawngte pawm ngawt aia tam a ngai a. Zirtîr Jakoba chuan he mi chungchângah hian kan ngaihtuahna a chawk tho a ni. (Jakoba 3:13 chhiar rawh.) “A thiltihte awm dân ṭhatin entîr rawh se,” tia a sawi chu chhinchhiah rawh. Finna dik tak chu nî tina i thiltihah leh i thusawiah a lang tûr a ni.
4 Finna dik takah chuan thu tlûkna ṭha siam leh hriatna leh hriat thiamnate hlawhtling taka hman a tel a ni. Chutiang finna kan nei tih chu kan thiltih engin nge târ lang ang? Jakoba chuan mi fingte thiltiha lang tûr thil tam tak a sawi chhuak a ni. * Kan rinpuite leh kohhran pâwna mite nêna inlaichînna ṭha tak nei tûra min ṭanpui thei tûr chu eng nge nia a sawi?
Mi Fing Tak Tak Chu An Thiltihin A Târ Lang
5. Engtin nge mi fing tak tak chu a nun ang?
5 Jakoba’n finna leh awm dân ṭha, a nih loh leh nungchang ṭha a thlunzawm chu sawi nawn tlâk a ni. Jehova ṭih hi finna bul a nih avângin, mi fing chuan Pathian kawng leh a tehnate mila nun chu a tum tlat ṭhîn. Finna dik tak nei sâin kan piang lo va. Mahse, Bible zir ziahna leh ngun taka ngaihtuahna aṭangin chu finna chu kan nei thei a ni. Hei hian Ephesi 5:1-in: “Pathian awm dân latute ni rawh u,” tia min fuihna chu zâwm tûrin min ṭanpui ang. Jehova mizia nêna inmila kan nun zawh poh leh kan thiltihah finna kan lantîr tam lehzual dâwn a ni. Jehova kawngte chu mihringte kawng aiin a sâng zâwk hle si a. (Is. 55:8, 9) Chuvângin, Jehova thil tih dân hmang kan entawn hian, pâwn lam mite chuan keimahnia thil danglam bîk tak chu an hmu ang.
6. Engvângin nge thuhnuairawlhna chu Pathian kan anzia lantîrtu a nih a, he miziaah hian engte nge tel?
6 Jakoba chuan Jehova kan an theih dân kawng khat chu ‘thuhnuairawlh tak leh fing tak’ nih hi a ni tih a sawi. Thuhnuairawlhnaah chuan nunnêmna tel mah se, chu mi rualin Kristian chuan inbûk tâwk taka thil tihtîr thei nungchang ṭhatna leh nghehna a nei thei a ni. Chakna nasa tak nei mah se, Pathian chu a nunnêm a, pan kan hlau lo. Pathian Fapa chuan a Pa ang bawka thuhnuairawlhna a târ lan avângin: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, . . . chawlhna in hmu ang,” tiin a sawi thei a ni.—Mt. 11:28, 29; Phil. 2:5-8.
7. Engvângin nge Mosia chu thuhnuairawlhna kawnga entawn tûr ṭha tak anga kan ngaih theih?
7 Bible chuan thuhnuairawlhna, a nih loh leh zaidamna kawnga langsâr tak mi dangte chungchâng chu min hrilh a. Chûng zînga pakhat chu Mosia a ni. Mawhphurhna sâng tak a nei a; mahse, “lei chunga mihring zawng zawnga zaidam lâwtlak” a ni. (Num. 11:29; 12:3) Jehova’n A duhzâwng ti thei tûra Mosia chakna a pêk chu hre chhuak teh. Jehova chuan a thiltumte ti puitling tûra mi inngaitlâwmte hman chu a duh a ni.
8. Mihring ṭha famkim lote hi engtin nge ‘thuhnuairawlh tak leh fing tak’ an nih theih?
8 Mihring ṭha famkim lote hi ‘thuhnuairawlh tak leh fing tak’ an ni thei tih a chiang hle. Keini ve thung hi le? Engtin nge he mizia lantîrna kawngah hma kan sâwn theih ang? Thuhnuairawlhna hi Jehova thlarau rah zînga mi a ni. (Gal. 5:22, 23) Pathianin thuhnuairawlhna lantîr lehzual thei tûrin min ṭanpui dâwn tih ring tlat chungin, Pathian thlarau kan dîl thei a, a thlarau rah lantîr tûrin ṭan kan la thei bawk a ni. Fakna hla phuahtuin: “[Pathianin] thuhnuairawlhte chu ama kawng chanchin a zirtîr bawk ang,” tia min tiam avângin thuhnuairawlhna lantîr duhna lian tak kan nei a ni.—Sâm 25:9.
9, 10. Thuhnuairawlhna dik tak târ lang tûr chuan eng nge ngai a, engvângin nge?
9 Amaherawhchu, he mi kawnga hma sâwn tûr chuan ṭan lâk tak zet a ngai thei a. Kan zînga ṭhenkhat chuan enkawl chhoh kan nih dân avângin thuhnuairawlh kan duh lo mai thei. Chu bâkah, kan bul vêla mite chuan “mite an awm dân ang zêla thungrulh tûr” tih sawiin, thuhnuairawlh lo tûrin min fuih thei bawk. Mahse, chu chu a finthlâk tak zet em? In inah kâng mei chhuak ta se, a ṭhelh nân khâwnvârtui i leih dâwn nge tui vâwt i leih zâwk dâwn? Meialha khâwnvârtui leih chuan a tialh zual sauh dâwn a, tui vâwt leih erawh chuan a tithi dâwn a ni. Chutiang chiah chuan, Bible chuan: “Chhânna nêmin thinur a tikiang ṭhîn a, ṭawng huatthla la erawh chuan thinur a chawk tho ṭhîn,” tiin min zilh a ni. (Thuf. 15:1, 18) Kohhran chhûngah a ni emaw, pâwn lamah a ni emaw pawh ni se, thinurna a lo chhuah leh hunah thuhnuairawlh taka chhâng lêtin finna dik tak kan lantîr thei ang em le?—2 Tim. 2:24.
10 A chunga sawi tâk ang khian khawvêl thlarauvin a thunun mi tam takte chu an zaidam lo va, anni chuan remna an duh hek lo. Mi tawrh hlelhawm leh chapo takte kan hmu ṭeuh zâwk a ni. Jakoba chuan chu chu a hria a, chutiang rilru put hmangin a tihchhiat loh nân kohhran chhûnga mite chu a vaukhân a. Chu vaukhânna aṭang chuan eng thil dangte nge kan zir theih?
Mi Fing Lote Mizia
11. Eng miziate nge finna dik tak nên inkalh?
11 Jakoba chuan finna dik tak nêna inkalh miziate chu chiang takin a ziak a. (Jakoba 3:14 chhiar rawh.) In îtsîkna leh inelna te chu tisa lam mizia a ni a, thlarau lam mizia a ni lo. Tisa lam thil ngaihtuahna avânga thilthleng hi ngaihtuah teh. “Kristian” pâwl paruk chuan Isua thaha phûm a nihna lai niâwm taka sak Jerusalem-a awm Church of the Holy Sepulchre pêng ṭhenkhat chu an thunun ṭheuh va. Anni chu an inel reng mai a ni. Kum 2006 khân Time chanchinbu chuan “puithiamte chu hun rei tak chhûng an inhnialin . . . mombati hûnna lian takte’n an invua” tih tûn hma lam dinhmun chu a sawi a ni. An inrin lohna a nasat êm avângin biak in chahbi pawh Mosolman pakhat an kawltîr hial a ni.
12. Finna a awm loh chuan eng thil nge lo thleng thei?
12 Chutiang inelna nasa tak chu Kristian dik kohhranah chuan a awm tûr a ni lo. Amaherawhchu, ṭhat famkim lohna chuan mi ṭhenkhat chu luhlul taka an mi mal ngaih dân vawntîr châng a nei thei a. Chu chuan engemaw chena inhnialna leh inhauna a thlen thei. Tirhkoh Paula chuan chutiang chu Korinth kohhranah a thleng tih a hria a; chuvângin, heti hian a ziak a ni: “Tisa mi in la nih fo avângin, in zîngah itsîkna leh inhnialna a awm ṭhin avâng hian tisa mi la niin mihring angin in la awm a ni lo vem ni?” tiin. (1 Kor. 3:3) Chu dinhmun lungngaihthlâk tak chu kum zabi khatnaa he kohhranah hian hun engemawti chhûng chu a awm a ni. Chuvângin, chutiang rilru put hmang chu tûn lai kohhrana a awm loh nân kan fîmkhur a ngai a ni.
13, 14. Mihring rilru put hmang a lo lan theih dân entîrnate pe rawh.
13 Engtin nge chutiang rilru put hmang chu a lo luh rûk theih? Thil hotê tê aṭangin a inṭan thei a ni. Entîr nân, Kingdom Hall sak a han nih chuan, hna kalpui dân tûr chungchângah ngaih dân inang lo a awm thei a. Unaupa pakhat chuan a ngaih dân pawmsak a nih loh chuan mi dangte laka phunnawiah a tlâk thei a, thu tlûkna siam chu a lang a pauvin a sawisêl pawh a ni thei. Chu hna thawhnaah pawh chuan a tel chhunzawm duh tawh lo hial thei bawk! Chutianga thil titu chuan hna thawh zawh chu thawh dân hmangah innghat lovin, kohhran inlungrualnaah a innghat zâwk a ni tih a theihnghilh a ni ngei ang. Jehova chuan nunnêmna chu mal a sâwm a, inelna erawh mal a sâwm lo.—1 Tim. 6:4, 5.
14 Entîrna dang leh chu, kum tam tak chhûng upa ni tawh pakhatin Pathian Thuin a phût tehnate a tlin lo a ni tih upa dangte’n an hmuh chhuah hunah a ni. Bial kantu chuan unaupain a bîk taka zilhna a lo dawng tawh a, a la insiam ṭha chuang lo tih a hmuh avângin unaupa chu upa a nihna paih thlâksak a remti a ni. Chu unaupa chuan engtin nge a ngaih ang? Upate’n thu khat vuaa thu tlûkna an siam leh inngaitlâwm tak leh thuhnuairawlh taka Pathian Lehkha Thu aṭanga zilhna an pêk chu pawmin, upa anga rawng a bâwl leh theihna tûrin Pathian thuin a phût tehnate chu tlin a tum ang em? A nih loh leh upa nihna chanvo a neih tawh loh avângin a thinurin, îtsîkna a nei zâwk ang em? Engvângin nge unaupa chuan upa nih a tlin si loh chuan upa anga a awm ang? Inngaihtlâwmna lantîr a, hriatthiamna neih chu a va finthlâk zâwk dâwn êm!
15. Engvângin nge Jakoba 3:15, 16-a thâwk khum zilhna thu chu pawimawh hle nia i hriat?
15 Chutiang chi rilru put hmang lan theihna kawng dangte pawh a awm. Mahse, eng ang dinhmun pawh lo thleng se la, chu chu pumpelh kan tum tlat tûr a ni. (Jakoba 3:15, 16 chhiar rawh.) Zirtîr Jakoba chuan chutiang rilru put hmang chu thlarau tel lo tisa lam thil a nih avângin “khawvêl” tiin a ko va. Ngaihtuahna nei lo ran nungte ang maia tisa lam ngaihtuahna aṭanga lo chhuak a nih avângin anni chu “ramsa” ang an ni. Thlarau lam Pathian hmêlma neih ang nungchang an lantîr avângin chutiang rilru put hmang chu “ramhuaia mi” a ni bawk. Chutiang miziate lantîr chu Kristiante tân a va inâwm lo êm!
16. Eng insiamremna nge kan neih ngai thei a, engtin nge hlawhtling taka kan insiamrem theih ang?
16 Kohhrana mi tinte tân mahni inen dik ṭheuh leh chutiang mizia ti bo tûra hma an lâk ṭheuh chu a ngai a ni. Kohhran enkawltute chuan, kohhrana zirtîrtu an nih angin rilru put hmang ṭha lo chu an paih bo a ngai tih an hre reng tûr a ni. Kan ṭhat famkim lohna leh he khawvêl thununna avâng hian chutianga paih bo mai chu thil awlsam erawh a ni lo. Chu chu tlâng âwih diak tak leh nâl taka lâwn tum nên tehkhin theih a ni. Thil vawn tûr a awm loh chuan, kan tawlh thla thei a. Amaherawhchu, Bible aṭanga kan hmuh zilhna thute nghet taka kan vawn leh khawvêl puma Pathian kohhran pêk chhuah ṭanpuina nên chuan hma lam kan pan zêl thei a ni.—Sâm 73:23, 24.
Mi Fingte Lantîr Tum Miziate
17. Mi fing chuan thil sual a hmachhawn hunah eng nge a tih vat ṭhin?
17 Jakoba 3:17 chhiar rawh. “Chung lam aṭanga finna lo chhuak” mize ṭhenkhat ngaihtuahna chu kan hlâwkpui thei a. Thianghlimnaah chuan kan chezia leh rilru put hmang thianghlim tak leh bawlhhlawh kai lohna chu a tel a ni. Thil sual chu kan hnâwl nghâl vat a ngai a. Chu chu amaha lo awm tûr a ni. Tuemawin a kut zungchalin i mit rawn khawih tum ta se. Vawilehkhatah i lû i lo thle vat emaw, i kutin i lo invêng vat emaw ngei ang. Chu chu i inngaihtuah buai ngai lovin i ti nghâl mai ṭhîn a ni. Thil sualti tûra thlêm kan nih hian chutiang chu kan chhân lêt dân tûr a ni a. Kan nungchang thianghlimna leh kan Bible zirtîr chhia leh ṭha hriatna chuan thil ṭha lo hnâwl nghâl vat tûrin min chêttîr tûr a ni. (Rom 12:9) Bible-ah chuan chutianga chêt la vattu Josefa leh Isua ang mite entawn tûr siam chu a chuang a ni.—Gen. 39:7-9; Mt. 4:8-10.
18. Inrem duhna tih leh remna siamtu tih chu eng nge a awmzia?
18 Chung lam aṭanga finna lo chhuak chuan inrem duhna neih min phût tel bawk. Hetah hian invaivungna te, kawhmawh bâwlna te, a nih loh leh remna tihbuai te pumpelh chu a tel a ni. Jakoba chuan: “Felna rah chu remna siamtute tân remnain tuh a ni,” tia sawiin he mi chungchâng hi a sawi zau lehzual a. (Jak. 3:18) “Remna siamtute” tih ṭawngkam hi chhinchhiah teh. Kohhranah remna siamtu angin nge miin min hriat a, remna tichhetu ang zâwkin? Mi dangte nên inrem lohna kan nei ngunin, kan thinrim hma emaw, mi dangte kan tithinrim emaw em? Mi dangte’n kan nih ang anga min pawm kan phût nge, mi dangte duh lohzâwng miziate chu paih bo tûrin inngaitlâwm takin ṭan kan la zâwk? Mi dangte nêna remna siam tuma hma latu, mi dangte ngaidam nghâl ṭhîn leh an thil tihsual theihnghilh vat ṭhîntu kan ni em? Dik taka mahni inenfiahna chuan he mi chungchânga chung lam aṭanga finna lo chhuak lantîr tûra insiam ṭhatna kan neih a ngaih leh ngaih loh hmu tûrin min ṭanpui ang.
19. Engtin nge mi chu nunnêm tak anga hriat a nih theih?
19 Jakoba chuan nunnêmna chu chung lam aṭanga finna lo chhuak târ langtu zîngah a telh a. Bible thu bulte a tel lohnaah chuan keimahni duh dân chu zâwm tûra mi dangte nawr lui mai lo va, mi dangte mila insiamrem duh mi anga hriat kan ni em? Mi nunnêm tak leh biak nuam tak anga hriat kan ni em? Hêng hi nunnêm kan zir tih târ lanna a ni.
20. Pathian mizia kan sawiho tâk chiahte khi kan lantîr chuan eng rah nge kan seng ang?
20 Kohhrana unaute’n Jakoba ziak Pathian miziate nei tam lehzual tûra ṭan an lâk hian, kohhran chu a va nuam tak êm! (Sâm 133:1-3) Thuhnuairawlhna, remna, leh nunnêmna kan duhzia kan inlantîr tawn hian, inlaichhînna ṭha a awm ngei ang a, chu chuan “chung lam aṭanga finna lo chhuak” kan nei tih a finfiah chiang ang. A dawtah chuan mi dangte Jehova’n a thlîr dân anga thlîr dân zirnain he mi kawnga min ṭanpui theih dân kan en ang. (w08 3/15)
[Footnote]
^ par. 4 Jakoba chuan upaho, a nih loh leh kohhrana ‘zirtîrtute’ chungchâng a sawina a ni deuh ber tih a chhehvêla thu awmte chuan a târ lang. (Jak. 3:1) Hêng mite hi finna dik tak lantîrna kawngah entawn tlâk an ni ngei tûr a ni a; mahse, kan vaiin he zilhna aṭang hian kan inzir thei a ni.
I Hrilhfiah Thei Em?
• Engin nge Kristian chu tifing tak zet?
• Engtin nge chung lam aṭanga finna lo chhuak lantîrna kawngah hma kan sâwn theih?
• “Chung lam aṭanga finna lo chhuak” lantîr lote chuan eng mizia nge an neih?
• Eng miziate nge neih belh sauh i tum?
[Zirlai Atâna Zawhnate]
[Phêk 23-naa milem]
Engtin nge tûn laiah inhnialna a lo luh rûk theih?