Inbûk Tâwk Takin Nunnêmna Lantîr Rawh

“Nunnêm tûrtein anmahni hriat chhuahtîr leh rawh.”​—⁠TIT. 3:​1, 2.

1, 2. Bible-in nunnêmna chungchâng eng nge a sawi a, engvângin nge chu chu thil inâwm tak a nih?

HMANGAIHNAA khat kan Pa vâna mi Jehova finna chuan tâwpintai a nei lo. A thil siamte kan nih angin, kan nun a kaihhruai kan beisei a. (Sâm 48:14) Kristian tirhkoh Jakoba chuan “chung lam aṭanga finna lo chhuak . . . chu atîrin a thianghlim phawt a, chu mi hnuah chuan inrem a duh a, a nunnêm a, a tihnuam a, khawngaihna leh rah ṭhain a khat a, thlei bîk a nei lo va, a vervêk lo” tih min hrilh a ni.​—⁠Jak. 3:⁠17.

² Tirhkoh Paula chuan: “In dawhtheihzia [a nih loh leh nunnêmzia] mi zawng zawng hriat ni rawh se,” tiin min fuih a ni. * (Phil. 4:⁠5) Krista Isua chu Lalber leh Kristian kohhran lû a ni a. (Eph. 5:23) A kaihhruaina hnuaia intukluh leh mi dangte nêna kan indâwrnaa inbûk tâwk taka nunnêmna lantîr chu kan vai atân a va pawimawh tak êm!

3, 4. (a) Nunnêma thu kan âwih a hlâwkna sawi rawh. (b) Eng nge kan ngaihtuah ang?

³ Thuâwihna hmanga nunnêmna lantîr chu kan hlâwkpui a. Entîr nân: Firfiaka che hovin Britain ram beih an tumna hmuh chhuah a nih khân, tûn hmaa thlawhna chhûnga an thil ken luh ṭhinte ken phal a nih loh pawhin zin mite chuan thuâwih takin an zâwm a ni. Tin, motor kan khalh hian chêtsualna pumpelh nân phal chin aia khalh muan zâwk a ngaih châng a awm bawk.

⁴ Kan zînga tam takte tân chuan chutianga nunnêma thuâwih chu a awlsam lo. Min ṭanpuitu atân nunnêmna hmêlhmang pathum, nunnêm tûra min turtu, thuneitute chunga kan rilru put hmang, leh an laka kan intukluh chen tûr chu i lo ngaihtuah ang u.

Kan Nunnêm Nachhan

5. Mosia Dân hnuaiah engin nge bâwih chu a pu thuneihna hnuaia awm chhunzawm zêl thlantîr?

⁵ Kristian hun hmaa entîrna pakhat chuan nunnêm tûra turtu dik a thlûr bing a ni. Mosia Dân hnuaiah chuan Hebrai bâwihte chu an pute rawng an bâwlsak kum sarihnaah emaw, Jubili kumah emaw a thleng hmasa zâwk zâwkah chhuah an ni ṭhîn. Mahse, bâwih chuan a pu rawngbâwl chhunzawm zêl chu a thlang thei a ni. (Exodus 21:​5, 6 chhiar rawh.) Engin nge bâwih chu chutiang tihtîr ang? Hmangaihnain ani chu mi dangte hmangai tak a pu thuneihna hnuaia la awm chhunzawm zêl tûr chuan a tur thei a ni.

6. Engtin nge nunnêmnaah chuan hmangaihna a tel?

⁶ Chutiang bawkin Jehova kan hmangaihna chuan a hnêna kan nun pumpêk tûr leh chu mi mila nung tûrin min tur a ni. (Rom 14:​7, 8) Tirhkoh Johana chuan: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin a ziak a. (1 Joh. 5:⁠3) He hmangaihna hian mahni hma a sial lo. (1 Kor. 13:​4, 5) Mi dangte nêna kan indâwrnaah hian, ṭhenawmte hmangaihna chuan nunnêm taka an ṭhatna tûr zawng hmasa zâwk tûrin min tur a. Mahni hmasial tak nih ai chuan mi dangte ṭhatna tûr kan ngaihtuah zâwk a ni.​—⁠Phil. 2:​2, 3.

7. Kan rawngbâwlnaah nunnêm taka insiam remnain eng hmun nge a chan?

⁷ Kan ṭawngkam chhuak emaw, kan thiltih emaw chuan mi dangte a titlu tûr a ni lo. (Eph. 4:29) Dik takin, hmangaihna chuan mi hrang leh hnam hrangte Jehova rawngbâwl tûra hma an  sâwnna dâl tûr thil engmah ti lo tûrin min tur ang. Chutianga ti tûr chuan nunnêm taka insiam rem a ngai fo ṭhîn. Entîr nân, make-up hman leh stocking bun chu nungchang ṭhat lohna nêna thlunzawmna leh mi dangte tihtlûk theihna hmuna awm missionary unaunute chuan chutiang thilte an hmang ṭhîn a nih pawhin hman luih an tum ṭâlh lo vang.​—⁠1 Kor. 10:​31-33.

8. Engtin nge Pathian hmangaihna chuan “tê ber” anga awm tûra min ṭanpui theih?

⁸ Jehova kan hmangaihna chuan chapo lo tûrin min ṭanpui a. Zirtîrte zînga ropui nih inchuha inhnialna a chhuah hnuah Isua chuan an zîngah naupang pakhat a dintîr a. Ani chuan: “Tupawh ka hming avânga he naupang tê hi lâwm apiang chu keimah mi lâwm an ni ang; tupawh kei mi lâwm apiang chu mi tîrtu lâwm an ni ang; inzavaia zînga tê ber hi a ni, ropui ni,” tiin a hrilhfiah a ni. (Lk. 9:48; Mk. 9:36) “Tê ber” anga awm chu harsa kan ti viau thei a. Kan rochun ṭhat famkim lohna leh chapo duhna rilru chuan challanna ûm tûrin min tur thei; mahse, inngaihtlâwmna chuan nunnêm tûrin min ṭanpui ang.​—⁠Rom 12:⁠10.

9. Nunnêm tûr chuan eng nge kan pawm ngai?

⁹ Nunnêm tûr chuan Pathian ruat mite thuneihna chu kan pawm ngei a ngai a ni. Kristian dik zawng zawngte chuan lû nihna thu bul pawimawh tak chu an pawm a. Tirhkoh Paula chuan Korinth khuaa mite hnênah chu thu bul chu chiang takin a sawi lang a ni: “Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni tih in hriat ka duh a ni,” tiin.​—⁠1 Kor. 11:⁠3.

10. Jehova thuneihna hnuaia nunnêm taka kan intukluhna chuan eng nge a târ lan?

¹⁰ Pathian thuneihna hnuaia nunnêm taka intukluhna chuan hmangaihna ngah tak Pa anga amah kan rinzia leh rinngheh tlatzia a târ lang a ni. Thilthleng zawng zawng hi a hre vek a, chûng mil zêl chuan lâwmman min pe ṭhîn. Chu mi hriat rengna chuan miin zahpah lo taka min cheibâwl hunah emaw, kan laka an thinrim hunah emaw min ṭanpui ang. Paula chuan: “A theih phawt chuan nangmahni lam tal, mi zawng zawng nên inremin awm rawh u,” tiin a ziak a. Ani chuan chu a thurâwn chu he kaihhruaina hian a nemnghet a ni: “Duh takte u, in phuba la suh ula, Pathian thinurna kian zâwk rawh u, ‘“Phuba rêng rêng keima lâk tûr a ni, keiman ka thungrûl ang,” Lalpain a ti,’ tih ziak a ni si,” tiin.​—⁠Rom 12:​18, 19.

11. Krista lû nihna hnuaia nunnêm taka kan intukluhzia engtin nge kan lantîr theih?

¹¹ Kristian kohhran chhûnga Pathian ruat thuneihna pawh chu kan intukluhna tûr dang pakhat a ni. Thu Puan bung 1-in Krista Isua chu kohhrante “arsi” a kut ding lama keng angin a târ lang a. (Thup. 1:​16, 20) A huap zau zâwnga sawi chuan, hêng ‘arsite’ hian kohhrana upahote, a nih loh leh kohhran enkawltute a entîr a ni. Chûng kohhran enkawltua ruatte chu Krista kaihhruaina hnuaiah an intulût a, anni chuan mi dangte ngilnei taka a dâwr dân chu an entawn a ni. A hun apianga thlarau lam chaw pe tûra Isua ruahmanna siam “bawi rinawm, fing tak” hnuaiah kohhrana mi zawng zawngte chu an intulût bawk. (Mt. 24:​45-47) Vawiin nîa he thuziak ngei nunpui kan duhna hian Krista lû nihna hnuaia a mi mala kan intukluhzia a târ lang a, chu chuan remna leh inpumkhatna a awmtîr a ni.​—⁠Rom 14:​13, 19.

Eng Chenin Nge Kan Intukluh Ang?

12. Engvângin nge nunnêm taka intukluhna chuan chintâwk a neih?

¹² Amaherawhchu, nunnêm taka intulût tih chu kan rinna emaw, Pathian thu bulte emaw ngaihthahna a ni lo. Kristian hmasate chu Isua hminga zirtîr tawh lo tûra sakhaw hruaitute’n thu an pêk khân anni chuan eng nge an tih? Petera leh tirhkoh dangte chuan: “Mihring thu aiin Pathian thu kan zâwm zâwk tûr a ni,” tiin huaisen takin an sawi a ni. (Tirh. 4:​18-20; 5:​28, 29) Tûn laiah pawh chutiang bawkin sawrkâr thuneitute’n kan chanchin ṭha hrilhna tihtâwp an tum hian remhre taka chinfel nân kan tihdân thlâk danglam mah ila, thuhrilh kan bâng chuang lo. In tin kala rawngbâwl khap a nih chuan, kawng danga in neitute biak pawh theih dân zawngin Pathian thupêk chu kan zâwm chhunzawm zêl ang. Chutiang bawkin ‘rorêltuten’ inkhâwmna neih an khap hunah a rûkin tlêm tê têin kan inhmu khâwm ṭhîn.​—⁠Rom 13:1; Heb. 10:​24, 25.

13. Isua’n thuneitute hnuaia intukluhna chungchângah eng nge a sawi?

 ¹³ Isua chuan Tlâng Chunga a Thusawiah thuneitute laka intukluh a ngaihzia a sawi chhuak a ni: “Tupawhin i lakah thupawi siamin i kawr lâk a tum chuan, i puan pawh lâktîr nghâl rawh. Tin, mêl khat kala phût luitu apiang che hnênah chuan mêl hnih kal rawh,” tiin. (Mt. 5:​40, 41) * Mi dangte ngaihtuahna leh ṭanpui duhna chuan phût chin aia tam ti tûrin min chêttîr bawk a ni.​—⁠1 Kor. 13:5; Tit. 3:​1, 2.

14. Engvângin nge kalpênna lakah kan intukluh loh vang?

¹⁴ Intukluh chu duh mah ila, kalpêngte lakah chuan kan intulût ngai tûr a ni lo. Thutak thianghlimna leh kohhran inpumkhatna vawng reng tûr chuan he mi chungchângah hian dinhmun chiang tak leh nghet tak kan neih a ngai a ni. Paula chuan “unau der” te chungchângah heti hian a ziak a: “Chanchin ṭha thutak chu in hnêna a awm reng theih nân dârkâr khat tê pawh intulûtin an thu kan zâwm lo,” tiin. (Gal. 2:​4, 5) Chutiang kalpênna chu a chhuak khât hle a, a lo chhuah hunah pawh Kristian inpumpêkte chuan dikna an ṭan tlat ang.

Upate Chu An Nunnêm A Ngai

15. Kristian upate chuan an inhmuh khâwm hunah eng angin nge nunnêmna an lantîr theih?

¹⁵ Kohhran upate tâna thil tlin ngaite zînga pakhat chu nunnêmna hi a ni. Paula chuan “kohhran hotu chu . . . mi nunnêm” a nih a ngaih thu a sawi a. (1 Tim. 3:​2, 3) Hei hi upaa ruatte kohhran thil ngaihtuah tûra an inhmuh khâwm hunah a pawimawh lehzual a ni. Thutlûkna siam a nih hmain, upate chuan an ngaih dân fiah takin an sawi chhuak ṭheuh thei a; mahse, chuta tel apiangin thil engemaw tal an sawi kher erawh phût a ni chuang lo. Sawihona neih chhûng chuan mi dangin Bible thu bulte an han sawi lan tâkah mi mal ngaih dânte chu a inthlâkthleng thei a. Mi dangte ngaih dân pawm duh lova, mahni ngaih dân vawn tlat ai chuan upa puitling tak chuan nunnêm takin a ngaih dân a siam rem a ni. Sawihona neih ṭan tirh lamah chuan ngaih dân hrang hrang pawh an nei mai thei a; mahse, ṭawngṭaina nêna ngaihtuahna chuan upa thuhnuairawlh leh nunnêm takte chu inlungrual takin thutlûkna a siamtîr thei a ni.​—⁠1 Kor. 1:10; Ephesi 4:​1-3 chhiar rawh.

16. Kristian upa chuan eng rilru put hmang nge a lantîr ang?

¹⁶ Kristian upa chuan a thiltih engkimah theocratic kalhmang vawn tlat chu a tum tûr a ni. Chu rilru put hmang chu berâmte a vênnaah pawh a lantîr tûr a ni a, chu chuan mi dangte hnêna ngaihsakna leh hawihhâwmna lantîr tûrin a ṭanpui ang. Petera chuan: “In zînga Pathian pâwlho awm chu enkawl rawh u; tih tûr a nih vâng ni lovin, . . . châk chung zâwkin, hlêpna bawlhhlawh duh vâng ni hek lovin, rilrua duh tak zâwkin,” tiin a ziak a ni.​—⁠1 Pet. 5:⁠2.

17. Kohhran chhûnga mi zawng zawngte chuan an indâwr tawnnaah engtin nge nunnêm taka intukluhna an lantîr theih?

¹⁷ Kohhran chhûnga upa lamte chu naupang zâwkte ṭanpuina avângin an lâwm hle a. Kawng  leh lamah naupang zâwkte chuan kum upa zâwkte chu Jehova rawngbâwlnaa kum tam tak chhûng an thil lo tawn tawhte avângin an zah bawk a ni. (1 Tim. 5:​1, 2) Kristian upate chuan mawhphurhna pêk theih tûr unaupate chu zawngin, anni chu Pathian berâmte enkawl tûrin an zirtîr a. (2 Tim. 2:​1, 2) Kristian tinte chuan thlarauva thâwk khum Paula fuihna thu: “In hotute thu âwih ula, an thu thuin [nunnêm taka intulûtin] awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tih hi an hlut hle tûr a ni.​—⁠Heb. 13:⁠17.

Chhûngkaw Zînga Nunnêm Taka Intukluhna

18. Engvângin nge chhûngkuaa nunnêm taka intukluhna neih chu thil inâwm tak a nih?

¹⁸ Chhûngkuaah pawh nunnêm taka intukluhna neih a ngai a. (Kolossa 3:​18-21 chhiar rawh.) Bible chuan Kristian chhûngkuaa mi tinte mawhphurhna ṭheuh chu a târ lang a. Pa ber chu nupui tân lû leh fate kaihhruaina kawnga mawhphurtu ber a ni. Nupui chuan a pasal thuneihna chu a pawm tûr a ni a, naupangte chuan Lalpa lâwmzâwng angin thuâwih an tum tlat tûr a ni. Chhûngkaw zînga mi tinte chuan inbûk tâwk taka intulûtin chhûngkaw inpumkhatna leh remna chu an belhchhah thei bawk. Bible-ah chuan chu mi chungchâng tifiahtu tûr entîrnate chu a chuang a ni.

19, 20. (a) Intukluhna kawnga Elia leh Jehova entîrna siam chu khaikhin rawh. (b) Hêng entîrnate aṭang hian nu leh pate chuan eng nge an zir theih?

¹⁹ Entîr nân, Elia chungchâng hi lo en ta ila. Ani chu Israel puithiam lal mah ni se, a fapa Hophnia leh Phinehasa-te chu ‘Jehova hre lo’ “Beliala fapate” an ni a. Elia chuan a fapate’n in biakna puan in kawngka bula rawngbâwltu hmeichhiate an mutpui ṭhin thu pawh tiamin an chanchin ṭha lo takte chu a hria a. Ani chuan eng nge a tih? Jehova chunga sual an nih chuan, an tâna ngenpuitu tûr an awm dâwn lo tih a hrilh a. Mahse, a fate siam ṭha tûrin a thunun lo. Chuvângin, a fate chuan an kawng ṭha lo chu an zawh chhunzawm ta zêl a. A tâwpah Jehova chuan an phu ang ngeia an chungthu rêlin a tihlum ta a ni. Elia ngei pawh chu a fate thih thu a han hriat chuan a thi ve ta. A va lungchhiatthlâk êm! Elia chuan an thilsual tih chhunzawm zêl phalsakna hmanga an kawng sual zawh inâwm lo taka a ngaihzamsak chu a dik lo tih a chiang hle.​—⁠1 Sam. 2:​12-17, 22-25, 34, 35; 4:​17, 18.

²⁰ Chu mi nêna inang lo takin Pathianin a fa vântirhkohte a dâwr dân chu han ngaihtuah teh. Zâwlnei Mikaia chuan Jehova leh A vântirhkohte inhmuhkhâwmna inlârna ropui tak chu a hmu a. Jehova chuan vântirhkohte zînga Israel Lal sual Ahaba tlûkchhiatna thlen tûra thlêm theitu tûr an awm leh awm loh a zâwt a. Ani chuan an rawtna siam chi hrang hrangte chu a ngaihthlâksak a ni. Tichuan, vântirhkoh pakhat chuan a thlêm theih tûr thu a sawi a. Jehova chuan thlêm a tum dân chu a zâwt a. A lungawi tâwk avâng chuan chu vântirhkoh chu thlêm tûrin a tîr ta a ni. (1 Lal. 22:​19-23) Chu thuziak aṭang chuan chhûngkuaa mi tinte’n zir tûr an va nei tak êm! Kristian pasal leh pa ber chuan a nupui leh a fate ngaihtuahna leh rawtna pêkte chu a ngaihtuah tel tûr a ni. Kawng leh lamah chuan, nupui leh fate chuan an ngaih dân emaw, an duhzâwng emaw an hriattîr hnuah Bible-in thutlûkna siam tûra thuneihna a pêk pa ber an zahna avângin a laka an intukluh a ngai a ni.

21. A dawta thuziakah eng nge kan ngaihtuah ang?

²¹ Nunnêm taka intulût tûra Jehova min hriattîrna duhawm tak leh fing takte avângin kan va lâwm tak êm! (Sâm 119:99) A dawta thuziakah chuan inbûk tâwk taka nunnêmnain inneihnaa hlimna a thlen dân kan ngaihtuah ang. (w08 3/15)

[Footnote-te]

Engtin Nge I Chhân Ang?

• Nunnêm taka intukluhna chuan eng rah ṭhate nge a chhuah theih?

• Engtin nge kohhran upate chuan nunnêmna rilru put hmang an lantîr theih?

• Engvângin nge chhûngkaw nunah nunnêmna neih a pawimawh?

[Zirlai Atâna Zawhnate]

[Phêk 12-naa milem]

Upate chuan Krista’n mi dangte ngilnei taka a dâwr dân chu an entawn