Jehova Chuan Ṭanpuina Dîla Kan Au Thâwm A Ngaithla

“LALPA mit chuan mi felte lam a en ṭhîn a. A beng chuan an au hre tûrin a ngaithla reng ṭhîn.”​—⁠SAM 34:⁠15.

1, 2. (a) Tûn laia mi tam takte’n eng nge an tawrh? (b) Engvângin nge chu chu mak kan tih loh?

LUNGNGAIH manganna i tâwk em? I tâwk a nih chuan i mal lo ve. Maktaduai tam takte chuan he khawvêl suaksual taka an nî tin nuna nêksâwrna an hmachhawnte chu an tuar hrâm hrâm a ni. Ṭhenkhat tân chuan tawrh zawh rual niin a lang lo. Anni chuan: “Ka chau va, ka sil ûrh a; ka thinlung nawm lohna avângin ka rûm vak vak a. Ka thin hi a phu hlawp hlawp a, thahrui ka nei ta lo va: ka mit vârna lah chuan mi awm lohsan ta bawk a,” tia ziaktu Davida tawrh ang chu an tuar ve a ni.​—⁠Sâm 38:​8, 10.

² Kristian kan nih angin, nuna lungngaih manganna kan tawnte hi mak kan ti lo. ‘Nau veina’ chu Isua lo kal lehna chhinchhiahna sawi lâwk zînga mi a ni tih kan hre thiam a ni. (Mk. 13:8; Mt. 24:⁠3) Heta ‘nau veina’ tia lehlin Grik thu mal hian chhiatna leh lungngaih manganna dangte pawh a kâwk thei bawk ang. Chu chuan ‘hun khirh taka’ awmte tawrh nasatzia chu a va sawifiah êm!​—⁠2 Tim. 3:⁠1.

Jehova Chuan Kan Lungngaih Manganna A Hre Thiam

3. Pathian mite chuan eng nge an hriat chian êm êm?

³ Jehova mite chuan hêng lungngaih mangannate lak ata hi hum an ni bîk lo tih an hre thiam a, dinhmun chuan zual lam a pan zêl dâwn tih pawh an hre thiam bawk. Mihring nâwlpuite hmachhawn dinhmun ṭha lote bâkah hian, Pathian chhiahhlawhte chuan an rinna tihchhiat tum “khingpui Diabola” chu an hmachhawn bawk a ni. (1 Pet. 5:⁠8) “Mi mi sawi chhiatna hian ka lung a tichhia a; nasa takin ka lungngai bawk a: tichuan mi khawngaihtu tûr ka zawng a, nimahsela tumah an awm si lo va; mi thlamuantu tûrte ka zawng bawk a, nimahsela tumah ka hmu si lo,” tih sawitu Davida rilru ang put chu a awl hle ang.​—⁠Sâm 69:⁠20.

4. Lungngaih manganna kan tawn hunah engin nge min hnêm?

⁴ Davida chuan ṭanpuitu tumah a nei lo tihna a ni em? Ni lo. He fakna hlaa: “LALPAN pachhiate chu ngaithlain, a mi tângte [atîra ziakin a sawi angin, “a mi, mi tângte”] chu a hmusit si lo va,” tia a sawi zawm hi chhinchhiah rawh. (Sâm 69:33) Kan lungngaih manganna leh hrehawmnate bâwiha tâng ang maia inhriat châng kan nei thei a ni. Mite chuan kan dinhmun chu an rawn hre thiam chiah lo niin a lang thei a​—⁠an hre thiam lo tak tak pawh a ni thei ang. Mahse, Davida a hnem angin Jehova’n kan lungngaih mangannate a hre thiam tak zet tih hriatna chuan min hnêm ve thei a ni.​—⁠Sâm 34:⁠15.

5. Lal Solomona chuan eng nge a rin ngheh?

⁵ Davida fapa Solomona chuan he mi chungchâng hi Jerusalema biak in hlannaah a târ lang a ni. (2 Chronicles 6:​29-31 chhiar rawh.) Ani chuan Jehova hnênah mi tin an “hri vei emaw, an lungngaihna emaw” tih tak zeta A hnên rawn thlentu apiangte ṭawngṭaina chu lo ngaithla tûrin a ngên a ni. Engtin nge Pathian chuan lungngai manganga awm hêng mite ṭawngṭaina hi a chhân ang? Solomona chuan chûng mite ṭawngṭaina chu Pathianin a ngaithla mai ni lovin, thil a tihsak ngei dâwn tih a rin nghehzia a târ lang a ni. Engvângin nge? “Mihring fate thinlung” a hriat chian avângin.

6. Engtin nge manganna chu kan tawrh theih ang a, engvângin nge?

⁶ Chutiang chuan keini pawhin ‘kan hri vei leh lungngaihna’ chungchângah kan mi mal lungngaih manganna chu ṭawngṭaiin Jehova hnênah kan thlen thei a. Kan lungngaih manganna a hre thiamin, min ngaihsak a ni tih kan hriatna chuan min thlamuan tûr a ni. Tirhkoh Petera chuan: “Anin a ngaihsak thin che u avângin in manganna  zawng zawng ama chungah nghat vek rawh u,” tia a sawi khân Pathianin min ngaihsakna chu a nemnghet a ni. (1 Pet. 5:⁠7) Kan chunga thilthleng chu Jehova chuan a ngaihsak a. Isua chuan hmangaihna nêna Jehova min enkawlna chu: “Chawngzawng pahnih dâr tangka pakhatah an hralh ṭhîn lo vem ni? nimahsela, an zînga pakhat mah in Pa [hriat] lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk a ni,” tiin a sawi uar a ni.​—⁠Mt. 10:​29-31.

Jehova Ṭanpuina Rinchhan Rawh

7. Eng ṭanpuina nge kan dawn ngei ang?

⁷ Lungngaih manganna kan tawh hunah Jehova chuan min ṭanpui a inhuamin, min ṭanpui thei bawk tih kan hre chiang hle thei a. “Pathian chu kan inhumhimna leh kan chakna, mangan laia ṭanpui vartu hnai reng a ni.” (Sâm 34:​15-18; 46:⁠1) Engtin nge Pathian chuan chu ṭanpuina chu min pêk? 1 Korinth 10:​13-in a sawi hi lo ngaihtuah teh: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tih hi. Jehova chuan kan harsatna tawrh tihbo nân thil awm dân chu a her danglam pawh a ni thei a, a nih loh leh tuar chhuak thei tûra kan mamawh chakna chu min pe pawh a ni thei bawk. A eng kawng emaw zâwk zâwk hian min ṭanpui a ni.

8. Engtin nge Pathian ṭanpuina chu kan dawn theih ang?

⁸ Chu ṭanpuina chu engtin nge kan dawn theih ang? “In manganna zawng zawng ama chungah nghat vek rawh u,” tia tih tûr min hrilh hi chhinchhiah rawh. A awmzia chu kan manganna zawng zawngte chu Jehova kutah kan hlân tihna a ni. Kan mamawhte chu rilru hah nâna hman loh tumin, chûng thilte min pe tûr chuan dawhthei takin amah kan rinchhan a. (Mt. 6:​25-32) Chutiang rinchhanna nei tûr chuan inngaihtlâwmna neih leh kan chakna emaw, kan finna emaw rinchhan loh a ngai. “Pathian kut chak tak hnuaiah” chuan intihnuaiin, kan dinhmun hniam tak chu kan hria a ni. (1 Petera 5:6 chhiar rawh.) Hei hian Pathian remtihnaa kan chunga thilthleng engpawh tuar chhuak thei tûrin min ṭanpui leh chhâwng a. Kan harsatna tawh zawng zawng chu tâwp nghâl se kan ti hle thei; mahse, Jehova chuan kan tâna chêt lâk hun tûr leh chêt lâk dân tûr a hria tih kan ring tlat a ni.​—⁠Sâm 54:7; Is. 41:⁠10.

9. Davida chuan eng ang rit phurh nge Jehova chunga a ngah a ngaih?

⁹ Davida thu Sâm 55:​22-a chhinchhiah: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” tih hi hre chhuak rawh. Davida’n hêng thute a ziah lai hian lungngaih manganna nasa tak a tuar a ni. (Sâm 55:⁠4) He fakna hla hi a fapa Absaloma’n a lalna chhuhsak a tum laia Davida phuah nia hriat a ni a. A thurâwn petu zînga a rin ber Ahitophela chu phiarrûknaah a tel a. Davida chuan a nun chhanhim nân Jerusalem a tlân chhiatsan a ngai ta hial a ni. (2 Sam. 15:​12-14) Chutiang dinhmun manganthlâk tak hnuaiah pawh Davida chuan Pathian a ring tlat a, chuvâng chuan a beidawng lo a ni.

10. Lungngaih manganna kan tawh hunah eng nge kan tih ngai?

¹⁰ Lungngaih manganna kan tawh apianga Davida anga Jehova hnêna ṭawngṭai chu kan tân pawh a pawimawh hle. He mi chungchânga tirhkoh Paula’n ti tûra min fuih chu i lo ngaihtuah ang u. (Philippi 4:​6, 7 chhiar rawh.) Chutianga ṭawngṭai fan fanna chuan eng nge a thlen ang? “Pathian thlamuanna, rilru rêng rênga hriat sên loh khân, [kan] thinlung leh [kan] ngaihtuahnate chu Krista Isuaah chuan [min] vênsak ang.”

11. Engtin nge “Pathian thlamuanna” chuan kan thinlung leh kan ngaihtuahna chu a vênhim?

¹¹ Ṭawngṭaina chuan i dinhmun chu a her danglam ang em? A her danglam mai thei. Mahse, Jehova chuan kan ṭawngṭaina chu kan duh ang kawngin a chhâng ziah hran lo tih chu kan hriat a ngai a ni. Amaherawhchu, ṭawngṭaina chuan lungngaih mangannain min chîmpil loh nâna kan rilru vêng tûrin min ṭanpui thei a. “Pathian thlamuanna” chuan lungngaih manganna rit tak kan phurh hunah min thlamuan thei a ni. Râl laka khawpui vênghim tûra mawhphurhna pêk sipai rual ho khat ang maiin, “Pathian thlamuanna” chuan kan thinlung leh kan ngaihtuahna chu a vênghim ang. Chu chuan kan rinhlelhna te, hlauhna te, leh thil ṭha lo ngaihtuahna te chu hnehin, hmanhmawh tak leh âtthlâk taka thil ti lêt lo tûrin min vêng a ni.​—⁠Sâm 145:⁠18.

12. Miin rilrua thlamuanna a neih theih dân tehkhin thu pe rawh.

¹² Engtin nge lungngaih manganna tâwk chung  pawha rilrua thlamuanna kan neih theih ang? Kan dinhmun nêna inanna ṭhenkhat nei tehkhin thu pakhat lo ngaihtuah teh. Mi pakhat chuan mi hauh hmang tak manager hnuaiah hna a thawk a. Amaherawhchu, chu hnathawktu chuan a thawhna company neitu, mi ngilnei leh thil hre thiam tak hnênah chuan a rilru sawi chhuah theihna hun remchâng a nei a ni. A neitupa chuan thil awm dân chu a hriat thiam thu leh chu manager chu a bân thuai dâwn tih a lo tiam a. Chu chuan hna thawktu chu engtin nge a awmtîr? Hnathawktuin chu thutiam a rinna leh nakin lawka thilthleng tûr a hriatna chuan harsatna tlêm azâwng a la tawh belh ngai mah se, a hna thawh chhunzawm zêl chu a tum tlat a ni. Chutiang bawk chuan, Jehova chuan kan dinhmun a hria tih leh “he khawvêl lal hi paih chhuah” thuai min tiam a ni tih kan hre bawk a ni. (Joh. 12:31) A va thlamuanthlâk tak êm!

13. Kan ṭawngṭai bâkah, eng dang nge kan tih ngai?

¹³ Chuti a nih chuan, kan harsatnate Jehova hnêna thlen chu a tâwk mai em? Tâwk lo. Chu aia tam tih a ngai a ni. Kan ṭawngṭaina nêna inmila kan chêt a ngai a. Lal Saula’n Davida tihlum tûra mi a va tirh khân, Davida chu: “Aw ka Pathian, mi dotute lakah mi chhanhim la: mi beitute lak ata hmun sângah mi hlâng ang che. Thil tisualtute lakah mi chhanhim la, thisen chhuah hmangte lakah mi chhandam ang che,” tiin a ṭawngṭai a ni. (Sâm 59:​1, 2) A ṭawngṭai bâkah Davida chuan a nupui thusawi chu ngaithlain, tlânchhe tûrin a ṭûl ang angin hma a la bawk a ni. (1 Sam. 19:​11, 12) Chutiang bawkin, kan lungngaih manganna tuar thei tûrin finna kan dîl thei a, dinhmun tiziaawm tûrin hma kan la thei bawk a ni.​—⁠Jak. 1:⁠5.

Tuar Chhuak Thei Tûra Chakna Kan Neih Theih Dân

14. Lungngaih manganna tawh hunah engin nge min ṭanpui thei?

¹⁴ Kan harsatnate chu a kiang nghâl lo mai thei a. Hun engemawti chhûng chu kan la tuar chhunzawm zêl hrih pawh a ni thei. Chutiang a nih chuan, engin nge tuar chhuak tûra min ṭanpui ang? A hmasa berah chuan, harsatna tâwk chung pawha rinawm taka Jehova rawng kan bâwl chhunzawm zêl hian, amah kan hmangaihna chu kan lantîr a ni tih hre chhuak rawh. (Tirh. 14:22) Setana’n Joba a puhna thu: “Joba chuan vâng awm lovin a ṭih che em ni? Amah chu a in nên, a neih zawng zawng nên, kil tinah i hung vêl a ni lâwm ni? A kut hnathawh mal i sâwm a, he ramah hian a lo neinung sâwt êm êm atin a ni. Tûnah hian i kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che,” tih chu hre reng rawh. (Job. 1:​9-11) Joba chuan a rinawmna avângin chu puhna chu dâwt hlâwm a ni tih a târ lang a ni. Keini pawhin lungngaih manganna dinhmun kan tawrh chhuah hian Setana chu dawthei a ni tih finfiah theihna hun remchâng kan nei ve a ni. Tin, kan chhelna chuan kan beiseina leh rinnghehna chu a tinghet sauh bawk.​—⁠Jak. 1:⁠4.

15. Eng entawn tûrte’n nge min tichak thei?

¹⁵ A pahnihnaah chuan, “in unau khawvêla awmhote chungah chuan chutiang tuarna chu a thleng ve a ni tih” hria ang che. (1 Pet. 5:⁠9) Ni e, “mihring tuar theih ang chauh lo chu thlêmna rêng rêng in chungah a thleng ngai lo.” (1 Kor. 10:13) Chuvângin, i harsatna tawh ringawt ngaihtuah lova mi dangte entîrna siamte ngun taka ngaihtuahna aṭangin, chakna leh huaisenna i nei thei a ni. (1 Thes. 1:​5-7; Heb. 12:⁠1) Lungngaih manganna nasa tak tuar chhuak tawh i hmêlhriatte thiltawn ngei chu ngaihtuah nân hun hmang rawh. Hringnun lamtlung thuziak chhuak tawhte chu i zawngin, i tawrh ang tuarte thiltawn inziahna chu i zawng tawh em? Chûng thilte chuan mi a tichak thei hle tih i hria ang.

16. Engtin nge Pathian chuan kan hrehawmna zawng zawngah min tihchak?

¹⁶ A pathumnaah chuan, Jehova chu “khawngaihnate Pa leh thlamuanna zawng zawng Pathian” a ni a, “Pathianin keimahni min thlamuanna ngeiin hrehawm eng anga awmte pawh chu  kan thlamuan ve theihna tûrin ani chuan kan hrehawmna zawng zawngah min thlamuan ṭhîn” tih hre reng rawh. (2 Kor. 1:​3, 4) Tûna kan hrehawm tawrh laiah chauh ni lovin, “kan hrehawmna zawng zawngah” min fuih tûr leh min tichak tûrin Pathian chu kan kiangah a ding reng tih theih tûr a ni. Hei hian mi dang “hrehawm eng anga awmte” pawh thlamuanna min pêktîr thei a. Paula chuan hêng thute a dikzia hi amah ngeiin a tawng a ni.​—⁠2 Kor. 4:​8, 9; 11:​23-27.

17. Engtin nge Bible chuan nuna lungngaih mangannate tuar thei tûra min ṭanpui theih?

¹⁷ Palina chu, Pathian Thu Bible kan nei hi a ni, chu chu “zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân.” (2 Tim. 3:​16, 17) Pathian Thu chuan ‘hna ṭha tinrêng thawk tûra min thuam’ bâkah, nuna lungngaih mangannate pawh min tawrh chhuahtîr thei bawk; ‘kim taka min thuam’ a, min ‘tihfamkim’ avângin. Atîra ziak thu mal ‘kim taka inthuam’ tih chu “mamawh zawng zawng inbel diam tawh” tihna a ni a. He thu mal hi hmân laia lawnga zin tûrte’n an zinna atâna thil mamawh zawng zawngte lawnga dah lûta zin chhuak tûra an inpeihna emaw, beisei ang thawk chhuak thei khâwl emaw sawi nâna hman a ni thei ang. Chutiang bawkin, Jehova chuan a Thu hmangin kan tawh theih dinhmun zawng zawngte chinfel nâna kan mamawh apiang chu min pe a ni. Chuvângin, “Pathianin lungngaih manganna ka tawrh a remtih chuan a ṭanpuinain ka tuar chhuak thei ang,” tiin kan sawi thei a ni.

Kan Lungngaih Manganna Zawng Zawng Ata Chhan Chhuahna

18. Eng thil rilrua vawnna hian nge rinawm taka tuar chhuak tûra min ṭanpui chhunzawm thei?

¹⁸ Panganaah chuan, Jehova’n mihringte hi an lungngaih manganna zawng zawng ata a chhuah zalên thuai dâwn tih thudik ropui tak rilrua vawn reng hi a ni. (Sâm 34:19; 37:​9-11; 2 Pet. 2:⁠9) A tâwpah chuan, Pathian chhan chhuahna chu tûna lungngaih manganna kan tawh mêkte ata chhan chhuahna mai ni lovin, vâna Isua hnêna awm a ni emaw, lei paradis-a awm a ni emaw chatuana nun neih theihna hun remchâng pawh a ni tel a ni.

19. Engtin nge rinawm taka tawrh chhuah chu thil theih a nih?

¹⁹ Chu mi hun a lo thlen hma chuan, he khawvêl suaksual lungngaih manganna hi kan la tawh chhoh zêl a ngai a. Hêng zawng zawngte awm tawh lohna hun chu kan va nghâkhlel tak êm! (Sâm 55:​6-8) Rinawm taka kan tuar chhuahna chuan Diabola chu dawthei a nihzia a târ lang a ni tih i hre reng ang u. Kan unaute pawhin kan tawrh ang fiahnate an tâwk ve tho a ni tih hre rengin, ṭawngṭaina leh kan Kristian inunauna aṭangin chakna i nei ang u. Pathian Thu ṭha taka hmangin, hna ṭha tinrêng thawk tûra kim taka inthuamin i famkim zêl bawk ang u. Hmangaihna leh “thlamuanna zawng zawng Pathian” enkawlna che i rinna a nghîn chu phal ngai suh. “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn” tih chu hre reng bawk ang che.​—⁠Sâm 34:15. (w08 3/15)

I Chhâng Thei Em?

• Engtin nge Davida chuan a lungngaih manganna tawh chu a ngaih?

• Eng thil a rin tlatna nge Lal Solomona’n a sawi chhuah?

• Jehova remtihna avânga lo awm dinhmunte tuar thei tûrin engin nge min ṭanpui thei?

[Zirlai Atâna Zawhnate]

[Phêk 21-naa milem]

Davida chuan a rit phurh chu ṭawngṭaiin Jehova chungah a nghat a, a dîl ang chuan hma a la zui bawk