Khawi Aṭangin Nge Kan Lo Awm?

ENGVANGIN NGE A CHHANNA HMUH CHU THIL PAWIMAWH TAK A NIH? Mi tam tak chuan leia nunna hi tihpalh thilthua lo awm mai niin zirtîrna an dawng a. Awihawm loh khawpa a khât tâwka tihpalh thil thleng tlingkhâwmte aṭanga lo awm chanchhâwnna chuan rilru lam te, finna te, leh thlarau lam thil ngaihtuah theihna zawng zawngte nei thei mihring a siam chhuak nia zirtîr an ni bawk.

Mahse, han ngaihtuah lawk teh: Chanchhâwnna aṭanga lo awm leh Siamtu nei lo kan nih chuan, mihringte hi fahrah kan ni a tih theih ang a. Mihringte hian thurâwn lâkna tûr an aia fing zâwk an nei lo vang​—⁠kan buainate chingfel tûrin ṭanpuitu kan nei dâwn lo tihna a ni. Leilung chhiatna pumpelh tûr te, politics thila inngeih lohna chingfel tûr te, kan mi mal harsatnaa min kaihruai tûr tein mihring finnaah kan innghah a ngai dâwn a ni.

Hei hian rilrua thlamuanna a pe che em? A pe lo che a nih chuan, kawng dang ngaihtuah rawh. Chu chu a duhawm zâwk mai ni lovin, a âwm hliah hliah zâwk bawk a ni.

Bible Sawi Dân

Bible chuan mihringte hi Pathian siam an ni tih a zirtîr a. Ngaihsakna leh ngaihtuahna pawh nei lo chanchhâwnna avânga lo awm mai kan ni lo. Pa hmangaihna nei leh fing tak fate kan ni zâwk a. Bible-a hêng thusawi fiah takte hi chhinchhiah ang che.

Genesis 1:27. “Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni.”

Sâm 139:14. “I hnênah lâwm thu ka hrilh ang che; hlauhawm tak leh mak taka siam ka ni si a: i thiltihte hi mak tak a ni a; chu chu ka nunna hian a hre chiang hle a ni.”

Matthaia 19:​4-6. “Atîr ata an siamtu khân hmeichhia leh mipaa a siam leh, ‘He mi avâng hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,’ a ti tih in chhiar lo vem ni? Chutichuan pahnih an ni tawh lo va, tisa pum khat an ni tawh zâwk a ni. Chuvângin Pathianin a zawm tawh chu mihringin ṭhen suh se.”

Tirhkohte 17:​24, 25. “Pathian, khawvêl leh a chhûnga thil zawng zawng siamtu chu lei leh vân lal a nih avângin kuta sak inahte a awm lo va; thil tlachham angin mihring kuta rawngbâwlsakin a awm hek lo, amah ngei chu engkim hnêna nunnate, thâwknate leh thil zawng zawngte petu a ni zâwk e.”

Thu Puan 4:​10, 11. “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a.”

 Bible Chhânnate’n Rilrua Thlamuanna Dik Tak Min Neihtîr Dân

Pathian chu ‘leia chhûngkaw tinrêng hming chawi chhana’ a ni tih hriatna chuan mi dangte kan thlîr dân a thlâkthleng a. (Ephesi 3:​14-19) Chutiang hriatna chuan mahni leh kan buainate kan thlîr dân pawh a thunun bawk. Kan thil ngaihtuah dân chu heta târ lante angin a nghawng dâwn a ni.

Thutlûkna siam harsa tak kan hmachhawn hunah, mihring ngaih dân inkalh takte avângin a lutukin kan buai lo vang a. Bible thurâwnah ngaihngam takin kan innghat zâwk ang. Engvângin nge? A chhan chu “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân,” tih a nih vâng a ni.​—⁠2 Timothea 3:​16, 17.

Bible thurâwnte nunpui tûr chuan thawh rim leh mahni inthunun a ngai ngei mai. A châng chuan a kaihhruaina zâwm tûrin kan ngaihtuahna kalh chiaha thil kan tih pawh a ngai mai thei. (Genesis 8:21) Amaherawhchu, hmangaihna nghah tak kan Pa vâna miin min siam a ni tih kan pawm chuan, ani chuan kan zawh tûr kawng ṭha ber a hria tia thu tâwp siam chu a âwm hle dâwn a ni. (Isaia 55:⁠9) Chuvângin, A Thu chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tih min tiam a ni. (Thufingte 3:​5, 6) He zilhna thu hi kan nunpui chuan, harsatna leh thu tlûkna siam kan ngaih huna kan lungkhamna tawh tam takte chu paih bo a ni ang.

Inpâwng huatna kan hmachhawn hunah, hnam dang leh pian leh mûrna dang mite aia hlutna nei tlêm zâwk leh hnuaihnung zâwk anga inngaihna chuan min tibuai lo vang. Chu aimah chuan, a âwm tâwka mahni inzahna kan nei zâwk ang. Engvângin nge? Kan Pa, Pathian Jehova chuan ‘mi duhsak bîk a nei lo va . . . hnam tin zînga tupawh amah ṭiha fel taka ti apiang a lâwmzâwng mi an nih ṭhin’ avângin.​—⁠Tirhkohte 10:​34, 35.

He hriatna hian mi dangte pâwng huatna nei lo tûrin kan rilru a vêng bawk ang. Pathianin “lei chung zawng zawnga awm tûrin bul hmun khat vekin hnam tin mi a siam” avângin, hnam dang aia indahsân zâwk chhan tûr a awm lo tih chu kan hre thiam ang.​—⁠Tirhkohte 17:⁠26.

Siam kan ni tih leh min Siamtu chuan min ngaihsak tih hriatna chu rilrua thlamuanna dik tak neihna bul ber a ni a. Mahse, chhûngrila thlamuanna nei reng tûr chuan thil dang kan mamawh belh a ni. (w08 2/1)

[Phêk 4-naa thu lâk chhuah]

Mihringte hi chanchhâwnna avânga lo awm an ni em?

[Phêk 5-naa milem]

Min Siamtuin min ngaihsak tih hriatna chuan rilrua thlamuanna min pe thei