Mi Dangte Chu Jehova Thlîr Dân Angin I Thlîr Ve Em?
Mi Dangte Chu Jehova Thlîr Dân Angin I Thlîr Ve Em?
“Taksaah hian inṭhenna rêng rêng a awm lova, a pêngte hian inang taka an inbuaipui tawn ṭheuh zâwkna tûrin.”—1 KOR. 12:24, 25.
1. Thlarau lam paradis-a i han awm hmasak ber ṭum chuan engtin nge i awm?
KHAWVEL suaksual kan chhuahsan a, Jehova mite zînga kan han tel ṭan hian, an zînga awm hmangaihna leh mi dangte ngaihsakna dawn chu nuam kan ti hle ang tih a rinawm. Setana thununna hnuaia awm mi nunrâwng, mi huat hmang, leh elrel hmang te lakah chuan an va danglam tak êm! Remna leh inpumkhatna awmna thlarau lam paradis-ah kan lo awm ta a ni.—Is. 48:17, 18; 60:18; 65:25.
2. (a) Engin nge mi dangte kan thlîr dân nghawng thei? (b) Eng nge kan tih ngai mai thei?
2 Amaherawhchu, hunte a han ral zêl chuan kan ṭhat famkim lohna avângin unaute kan hmu khaw lo ṭan thei a. Chu chuan kan unaute thlarau lam miziate en aiin, an dik lohna lai ringawt min hmuhtîr thei a ni. A awlsam zâwnga sawi chuan, anni chu Jehova thlîr dân angin kan thlîr lo tihna a ni a. Hetiang thil hi kan chungah a thleng a nih chuan, kan thlîr dân chhût chiang a, Jehova thlîr dân nêna inmiltîr a hun tawh tihna a ni.—Ex. 33:13.
Jehova’n Kan Unaute A Hmuh Dân
3. Bible chuan Kristian kohhran chu eng nên nge a tehkhin?
3 Tirhkoh Paula chuan 1 Korinth 12:2-26-a chhinchhiah angin, hriak thih Kristian kohhran chu “pêng tam tak” nei taksa nên a tehkhin a. Taksa pêng hrang hrangte chu a danglam ṭheuh angin, kohhrana mi tinte chu an mizia leh an theihnate a inang lo thluah a ni. Mahse, anni chu Jehova’n a pawm ṭheuh va. Mi tinte chu a hmangaihin a ngaihlu vek a ni. Chutiang bawkin, Paula pawhin kohhrana mite chu “inang taka . . . inbuaipui tawn ṭheuh . . . tûrin” min fuih a. Mi dangte mizia chu kan mizia nên a inan loh theih avângin hei hi a harsa mai thei.
4. Engvângin nge kan unaute kan thlîr dân chu kan siam ṭhat a ngaih mai theih?
4 Kan unaute chak lohna chauh hmuh kan duh pawh a ni hial thei. Chutiang mi kan nih chuan hmun zîm tê chauh lâk theihna thlalâkna hmangtu ang kan ni ang. Jehova thlîr dân erawh chu, mi leh a chhehvêla thil awmte la thei thlalâkna ṭha tak ang a ni. Keini chuan kan duh lohna laite chauh en kan chîng mai thei a; mahse, Jehova erawh chuan a mize ṭhate pawh a en tel vek a ni. Jehova an kan tum zawh poh leh kohhranah hmangaihna leh inpumkhatna thinlung kan awmtîr zual sauh thei a ni.—Eph. 4:1-3; 5:1, 2.
5. Engvângin nge mi dangte sawisêl chu thil dik a nih loh?
5 Isua chuan mihring ṭha famkim lote’n mite sawisêl duhna thinlung an nei fo tih a hre chiang hle a. Heti hian a zilh a ni: “Sawisêl suh u, sawisêla in awm loh nân,” tiin. (Mt. 7:1) Atîra ṭawngkam hmanah chuan, Isua chuan Mizo Bible-a lehlin angin: “Sawisêl suh u,” a ti mai lo. A thu ngaithlatu tam takte’n mi dangte sawisêl an hrât a ni tih a hriat avângin: “Sawisêl tawh suh u,” a ti zâwk a ni. Chutiang chu kan chîng a ni thei ang em? Chutiang tih duhna kan nei a nih chuan, mite sawisêla kan awm loh nân inthlâk danglam tûrin kan thawkrim tûr a ni. Jehova’n a hman a mi ruatte sawisêltu emaw, kohhranah an awm tûr a ni lo titu emaw chu chu tunge maw kan nih le? Unaupa pakhat chuan chak lohna ṭhenkhat a nei pawh a ni thei; mahse, Jehova’n a pawm zêl si chuan keini’n kan lo hnâwl chu a dik thei dâwn em ni? (Joh. 6:44) Jehova chuan a kohhrana mite chu a kaihruai a, thil thlâk danglam ngai a awm a nih chuan a hun ruatah a thlâk mai dâwn a ni tih kan ring tak zet em?—Rom 14:1-4 chhiar rawh.
6. Engtin nge Jehova chuan a chhiahhlawhte a thlîr?
6 Jehova mak danglamna pakhat chu Kristian tinte khawvêl thara an ṭhat famkim huna an thil tihtheih tûrte a hmu thei vek hi a ni. Thlarau lama hmasâwnna an lo siam tawhte chu a hre bawk a. Chuvângin, mi tinte tisa lam chak lohna chauh a en chhan tûr a awm lo. Sâm 103:12-ah chuan heti hian kan chhiar a ni: “Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a,” tiin. Chu mi avâng chuan kan va lâwm tak êm!—Sâm 130:3.
7. Jehova’n Davida a en dân aṭangin eng nge kan zir?
7 Jehova’n mite mize ṭha lai a hmuh theihzia langsâr tak mai chu Bible-ah kan hmu a ni. Pathian chuan Davida chu ‘a chhiahhlawh . . . a thupêkte pawm a, a mit hmuha thil ṭha chauh tih tuma a thinlung zawng zawnga amah zui ṭhîntu’ angin a sawi a. (1 Lal. 14:8) Davida chuan thil dik lo ṭhenkhat a ti tih chu kan hre ngei mai. Mahse, Jehova chuan Davida thinlung chu a dik a ni tih a hriat avângin, a ṭhatna lai chauh a en a ni.—1 Chro. 29:17.
Jehova Thlîr Dân Angin I Unaute Chu Thlîr Ve Rawh
8, 9. (a) Eng kawngin nge Jehova ang kan nih theih ang? (b) Engtin nge chu chu tehkhin theih a nih a, eng nge kan zir theih?
8 Jehova chuan mite ngaihtuahna a hre thei a, keini erawh chuan kan hre thei lo. Hei ringawt pawh hi sawisêl hrât kan nih lohna tûr chhan ṭha tak a ni. Mite’n thil an tih chhan chu kan hre vek lo. A tâwpa awm tawh lo tûr mihring ṭhat famkim lohna lam ringawt en lovin, Jehova entawn chu kan tum tûr a ni. He mi chungchânga amah ang nih tum chu thiltum ṭha tak a ni dâwn lâwm ni? Chutianga kan tihna chuan unaute nêna inlaichînna ṭha tak min neihtîr thei dâwn a ni.—Eph. 4:23, 24.
9 Entîr nân, in chhe tawh tak mai—tuidawnte pawh uai thla hnû tawh, tukverhte pawh chhe tawh tak, a ceiling te pawh ruahtuiin a tihchhiat tawh chu han ngaihtuah teh. Mi tam takte chuan chu in an han hmuh chuan tihchhiat law law mai ṭha zâwk tûrah an ngai mai thei; hmuh a hrehawm hle si a. Mahse, thlîr dân dang daih nei tuemaw chuan chu in chu a rawn hmu a. Ani chuan a pâwnlâng chhia piah lam chu enin, a rel a la nghet ṭha a, thawm ṭhat theih a ni tih a rawn hmu a ni. Chu in chu a lei a, a pâwnlâng chhia chu siam ṭhain, a thawm mawi ta a. A hnuah chuan, chu lai hmun kal pêlte chuan chu in mawizia chu an sawi ta hlawm a ni. Chu in siam ṭha tu emaw, thawm mawitu emaw ang chu kan ni ve thei em? Kan unaute pâwnlânga ṭhat lohna langte chauh chu ngaihtuah lovin, an mize ṭhate leh thlarau lama an ṭhan chhoh theih dânte kan hre thiam thei em? Kan hre thei a nih chuan, Jehova angin kan unaute chu an thlarau lam mawina avângin kan lo hmangaih thei ang.—Hebrai 6:10 chhiar rawh.
10. Engtin nge Philippi 2:3, 4-a thurâwn chuan min ṭanpui theih?
10 Tirhkoh Paula chuan kohhrana mi zawng zawngte nêna kan inlaichînnaa min ṭanpui thei tûr thurâwn min pe a. Kristiante chu: “Elrel leh inngaihhlut avânga engmah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se; mahni ta ta mai en lovin, mi dang ta pawh en ṭheuh zâwk rawh u,” tiin a fuih a ni. (Phil. 2:3, 4) Inngaihtlâwmna chuan mi dangte thlîr dân dik nei tûrin min ṭanpui ang. Mi dangte ngaihsakna lantîrna leh an ṭhatna laite hmuhsakna chuan anni chu Jehova thlîr dân anga thlîr tûrin min ṭanpui ang.
11. Eng inthlâkthlengnain nge kohhran ṭhenkhatte chu nghawng?
11 Tûn hnai deuh aṭang khân, khawvêl changkân chhohna chuan mi tam takte insawn kualna a thlen a. Khawpui ṭhenkhatah chuan ram hran hrana mite an awm nuk a. Kan awmna vênga rawn insawn mi thar ṭhenkhat chuan Bible thutakah tuina an neiin, kan rualin Jehova an rawn be ve ta a. Hêng mite hi “hnam tin zînga mi te, mi tin zînga mi te, ṭawng tin zînga mi te” an ni. (Thup. 7:9) Chutiang a nih avâng chuan, kan kohhran tam tak chu khawvêl pum pui aṭanga lo kalte awm khâwmna hmun a lo ni.
12. Eng angin nge mi dangte nên kan inthlîr tawn ang a, engvângin nge hei hian harsat châng a neih theih?
12 Kan awmna kohhranah chuan, mi dangte thlîr dân dik nei tûra kan fîmkhur lehzual a ngai thei a. Chu chuan tirhkoh Petera’n ‘unaute hmangaih tak tak tûr’ leh ‘thinlunga ṭhahnem ngai taka inhmangaih tawn’ tûra min fuihna hi ngun takin min ngaihtuahtîr a ni. (1 Pet. 1:22) Khawvêl hmun hrang hrang aṭanga lo kal khâwm mi tam tak awm khâwmna kohhrana hmangaihna dik tak neih chu a harsa mai thei. Kan Pathian biakpuite hnam tih dân chu kan hnam tih dân nên chuan a inang lo hle thei a, chutiang bawkin kan lehkha zir sân zâwng te, sum leh pai dinhmun te, leh pian leh mûrna te pawh a inang lo thei a ni. Mi ṭhenkhat ngaih dân leh che zia chu hriatthiam harsa i ti em? Chutiang tho chuan anni pawhin an ngai thei che asin. Chutichung pawh chuan, kan vai hian: “Unauhote chu hmangaih rawh u,” tia zirtîr kan ni.—1 Pet. 2:17.
13. Engtin nge kan ngaih dân siamrem a ngaih theih?
13 Kan unau zawng zawngte kan hmangaih theih nân kan ngaihtuahna siam danglam a ngai thei a. (2 Korinth 6:12, 13 chhiar rawh.) “Tumah ka thliar hrang ve lo, mah se, . . . ” tiin, hnam ṭhenkhat zînga kan hmuh ṭhin mize ṭha lo ṭhenkhat kan sawi lai kan hre chhuak ngai em? Chûng chuan kan rilru chhûngrila inthliar hranna kan neih chu paih bo a ngaihzia a târ lang thei a ni. ‘Ka chi-pui ni lo hnam dangte hriat chian ka tum ṭhîn em?’ tiin kan inzâwt thei a. Chutianga mahni inenfiahna chuan khawvêl pum puia kan inunauna pawm tûr leh ngaina chho tûrin min ṭanpui thei a ni.
14, 15. (a) Mi dangte an thlîr dân siamremtute entîrna ṭhenkhat pe rawh. (b) Anni chu engtin nge kan entawn theih ang?
14 Bible chuan an ngaih dân siamremtu entîrna ṭha tak takte min pe a, chûng zînga pakhat chu tirhkoh Petera hi a ni. Juda a nih angin, ani chu Jentailte inah chuan a lût lo ngei ang a. Jentail mi serh tan loh Kornelia in tlawh tûra tirh a nih laia a rilru awm dân tûr chu han ngaihtuah teh! Petera chuan a ngaih dân a siam rem a, Kristian kohhranah hnam zawng zawnga mite an tel chu Pathian duhzâwng a ni tih a hre ta a ni. (Tirh. 10:9-35) A hnua tirhkoh Paula lo ni ta Saula pawh chuan a ngaih dân a siamrem a, chi inthliarna a neih chu a bânsan a ngai a ni. Kristiante chu a huat êm avânga “nasa taka tiduhdahin [a] tihbuai ṭhin” thu a sawi. Chutichung chuan, Lalpa Isua’n Paula a han thunun tâkah, ani chu nasa takin a insiam ṭha a, tûn hmaa a lo tihduhdahte kaihhruaina pawh a zâwm ta hial a ni.—Gal. 1:13-20.
15 Jehova thlarau ṭanpuinain kan rilru put hmang kan siam ṭha thei tih chu rinhlelh rual a ni lo. Mi dangte a rûka thliar hranna kan nei tih kan inhriat chuan, chu chu tireh ṭhak tûr leh “thlarau inpumkhatna . . . vawng tûra bei” tûrin ṭan i la ang u. (Eph. 4:1-6) Bible chuan “hmangaihna inbel rawh u, chu chu phuar famkimna a ni,” tiin min fuih a ni.—Kol. 3:14.
Kan Rawngbâwlnaah Jehova Entawnin
16. Mite chungchânga Pathian duhzâwng chu eng nge ni?
16 Tirhkoh Paula chuan: “Pathianin mi duhsak bîk a nei si lo,” tiin a ziak a. (Rom 2:11) Hnam tina mite amah biaknaa teltîr chu Jehova thiltum a ni. (1 Timothea 2:3, 4 chhiar rawh.) Chu mi tihhlawhtlin nân chuan, ani chuan “hnam tinrêngte, chi tinrêng te, ṭawng tinrêng te, mi tinrêng te hnêna . . . chatuana chanchin ṭha” hrilh dân kawng a ruahman a ni. (Thup. 14:6) Isua chuan: “Lo chu khawvêl hi a ni,” a ti. (Mt. 13:38) Chu chuan i tân leh i chhûngkhatte tân eng awmzia nge a neih?
17. Engtin nge mi tinrêngte chu kan ṭanpui theih?
17 Lalram chanchin mite hnêna pe chhuak tûrin mi zawng zawng chu khawvêl hmun hla tak takah an kal chhuak thei lo va. Mahselangin, chu chanchin ṭha chu khawvêl hmun hrang hrang aṭanga lo kal kan thu hrilhna bial chhûnga awmte hnênah kan pe chhuak thei a ni. Kum tam tak chhûng thu kan lo hrilh tawhnate mai ni lovin, mi tinrêngte hnêna thu hrilh theihna hun remchâng chu kan zawng em? Kimchang taka thu hrilhna la dawng lote hnêna thu hrilh chu engah nge kan tum tlat loh vang?—Rom 15:20, 21.
18. Isua chuan eng anga mite ngaihsakna nge a lantîr?
18 Isua chuan mi zawng zawngin ṭanpui an ngai tih a hre chiang hle a. Chuvâng chuan, ram bial khatah mai thu a hril lo. Bible thuziak pakhat chuan “khaw lian leh khaw tête zawng zawng a fang zêl” tih min hrilh a ni. Tichuan, “mipuite chu a hmuhin . . . a khawngaih ta êm êm” a ni.—Mt. 9:35-37.
19, 20. Jehova leh Isua’n mi zawng zawngte an ngaihsakna chu eng kawngtein nge kan lantîr ve theih?
19 Chutiang bawk rilru put hmang i lantîr theihna kawng ṭhenkhat chu eng nge ni? Ṭhenkhat chuan, an thu hrilhna bial chhûnga tel an tlawh chhuah zin vak lohna hmunah thu hril tûrin ṭan an la a. Chûngah chuan sum dâwnna hmun te, mipui vântlâng veivahna park te, motor zin chhuak tûr din khâwmna hmun te a tel thei ang. Mi dangte chuan an thu hrilhna biala lo lût thar hnam dangte hnêna thu an hrilh theih nân ṭawng dang an zir emaw, tûn hmaa thu an hrilh ngai vak lohte hnêna thu hril tûrin ṭan an la emaw a ni. Anmahni ṭawng ngeia chibai bûk dân zirna chuan mite chu i ngaihven tak zetzia a lantîr thei ang. Ṭawng dang kan zir thei lo a nih chuan, a zirtute chu kan fuih thei ang em? Ram dang aṭanga lo kalte hnêna thu an hrilh theih nâna chutianga ṭan latute tihlunghnual emaw, an ṭan lâkna lo rinhlelhsak emaw chu kan duh hauh lo vang. Pathian mit hmuhah chuan nunna zawng zawng hi a hlu a, chutianga hlut ve chu kan duh a ni.—Kol. 3:10, 11.
20 Pathian thlîr dân anga mite thlîrnaah chuan, an dinhmun chu eng ang pawh ni se, mi zawng zawngte hnêna thu hrilh pawh a tel a ni. Ṭhenkhat chu in nei lo te, invawngfai lo tak te, a nih loh leh nungchang khaw lo tak an ni tih hriat ngawih ngawihte pawh an ni thei. Mi ṭhenkhatin min cheibâwl ṭhat loh chuan, chu chuan a hnam pum emaw, a chi pum emawa an ṭha lo vek angin min ngaihtîr tûr a ni lo. Paula chu mi ṭhenkhat chuan cheibâwl ṭha lo hle mah se, ani chuan a hnam pum hnêna thu hrilh loh nân a hman phah chuang lo. (Tirh. 14:5-7, 19-22) An zînga ṭhenkhat chuan lâwm taka an dawnsawn duh a beisei tlat zâwk a ni.
21. Engtin nge Jehova’n mi dangte a thlîr dân ang neihna chuan a ṭanpui ang che?
21 Tûnah chuan tualchhûnga kan unaute, khawvêl puma kan unaute, leh kan thuhrilhna hmuna mite nêna kan indâwr tawnnaah thlîr dân dik—Jehova thlîr dân—kan neih a ngai tih a chiang ta hle mai. Jehova thlîr dân kan neih zawh poh leh remna leh inpumkhatna awmtîrtu kan ni lehzual ang a. Tin, mi dangte chu “duhsak bîk [nei] lo” leh ‘an zaa a kutchhuak an nih’ avânga anmahni ngaihsaktu Pathian Jehova hmangaih tûra ṭanpui tûrin kan tling lehzual ang.—Job. 34:19. (w08 3/15)
I Chhâng Thei Em?
• Kan unaute chu engtin nge kan thlîr loh vang?
• Unaute kan thlîr dânah engtin nge Jehova kan entawn theih?
• Khawvêl pum puia kan inunauna kan thlîr dân aṭangin eng nge i zir?
• Rawngbâwla kan chhuah hian engtin nge Jehova’n mite a thlîr dân chu kan entawn theih?
[Zirlai Atâna Zawhnate]
[Phêk 28-naa milem]
Engtin nge hnam dangte i hriat chian theih?