Ṭhalaite U, Tûnah Hian In Siamtu Ropui Chu Hre Reng Rawh U
Ṭhalaite U, Tûnah Hian In Siamtu Ropui Chu Hre Reng Rawh U
“I vânglai hian i siamtu hre reng rawh.”—THUR. 12:1.
1. Engtin nge Jehova’n amah chibai bûktu ṭhalaite a rinzia chu a sawi chhuah?
JEHOVA chuan Kristian ṭhalaite chu daifîm anga hlu leh mi tihahdam sawng sawng thei angin a thlîr a. Ani chuan a Fapa “thiltihtheihna” nîah chuan ṭhalaite chuan Krista rawngbâwlnaah “mahni duh thuin an inpe” ang tih a lo sawi lâwk a ni. (Sâm 110:3) Chu hrilh lâwkna chu mi nâwlpuite’n Pathian an ngaihsak loh hun, mahni duhzâwng leh sum ringawta an buai hun, leh thu an âwih loh huna thleng famkim tûr a ni a. Mahse, Jehova chuan amah chibai bûktu ṭhalaite chu an danglam dâwn tih a hria a ni. Nangni, unaupa leh unaunu ṭhalaite u, Jehova chuan a va ring tak che u êm!
2. Jehova hriatnaah eng nge tel?
Thur. 12:1) Dik takin, Jehova hriatnaah chuan amah hriat chhuah mai aia tam a tel a. Chutah chuan thiltih a tel a ni—a lâwmzâwng tih leh kan nî tin nuna a dânte leh thu bulte inkaihhruaitîr chu. Tin, kan tâna ṭha ber tûr a ngaihtuah tih hre reng chunga Jehova rinchhan a tel bawk. (Sâm 37:3; Is. 48:17, 18) Chutiang chuan i Siamtu Ropui chu i ngai em le?
2 Ṭhalaite’n Pathian chu anmahni Siamtu Ropui anga an hriat reng avânga Pathian lâwm dân tûr chu han ngaihtuah teh. (“I Thinlung Zawng Zawngin LALPA Ring La”
3, 4. Engtin nge Isua chuan Jehova a rinchhan tlatzia a târ lan a, engvângin nge tûn laiah Jehova rinchhan chu a pawimawh?
3 Pathiana rinna kawnga entawn tûr ṭha ber chu Isua Krista hi a ni a. Ani chu Thufingte 3:5, 6 thu: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tih milin a nung a ni. Baptisma a chan hnu lawkah, Setana chuan Isua chu khawvêl thuneihna leh ropuina pêk tumin a thlêm a. (Lk. 4:3-13) Mahse, Isua chu bum theih a ni lo. Ani chuan “sum te, chawimawina te, nunna te” chu “inngaihtlâwmna leh LALPA ṭih man” a ni tih a hria a ni.—Thuf. 22:4.
4 Tûn lai khawvêlah hian duhâmna leh mahni hmasialnain ro a rêl a. Chutiang kârah chuan Isua entîrna zui chu a finthlâk a ni. Setana chuan nunnaa kalna kawngka zîm tak ata Jehova chhiahhlawhte pêntîr tûrin theih tâwp chhuahin a thlêm a ni tih kan hre bawk tûr a ni a. Ani chuan mi tinte’n boralna kawngka zau an zawh chu a duh a ni. A bumin awm suh ang che! I Siamtu Ropui hriat reng chu tum tlat zâwk rawh. Amah chu rinchhan tlat la, nakin lawka lo thleng ngei tûr “nunna taktak” chu vuan tlat ang che.—1 Tim. 6:19.
Ṭhalaite U, Fing Takin Awm Rawh U!
5. He khawvêl hmabâk chungchâng chu engtin nge i ngaih?
5 Anmahni Siamtu Ropui hre rengtu ṭhalaite chu an rualpuite aiin an fing zâwk a. (Sâm 119:99, 100 chhiar rawh.) Pathian thlîr dân anga an thlîr avângin, he khawvêl hmabâk thimzia hi an hre chiang hle a ni. Nangni ṭhalaite hian tûna thil in hriat phâk chinah ringawt pawh hlauhna leh lungkhamna a pun sâwtzia hi in hmu ngei ang. Boruak bawlhhlawhna te, khawvêl lum sâwtna te, ramngaw tihchereuna te, leh chutiang bawk buainate chungchâng chu in hriat ngei a rinawm a. Mite chuan chûngte chu an vei hle a; mahse, Jehova Thuhretute chauhvin Setana khawvêl tâwpna chhinchhiahna zînga mi a ni tih an hria a ni.—Thup. 11:18.
6. Engtin nge ṭhalai ṭhenkhat chu bum an nih?
6 Lungchhiatthlâk takin, Pathian chhiahhlawh ṭhalai ṭhenkhat chu an fîmkhur tâwk lo va, he khawvêl hun hmâwr tawhzia hi an theihnghilh a ni. (2 Pet. 3:3, 4) Mi dangte erawh chu ṭhian sual leh zahmawh lam thuziak leh milemte avângin sual nasa tak lama thlêm an ni. (Thuf. 13:20) He hun hmâwr tawh taka Pathian duhsakna hloh chu a va pawi dâwn êm! B.C.E. 1473-a Ram Tiam ramri, Moab Phaizâwla riahhmun khuar Israelte chunga thil thleng aṭang khân inzir zâwk ang che u. Chutih hun lai chuan eng thil nge thleng?
An Tum Ram Thlen Dâwn Aruaiah An Tlu
7, 8. (a) Moab Phaizâwlah khân Setana’n eng tih dân nge a hman? (b) Tûn laiah hian eng tih dân nge a hman?
7 Chutih hun lai chuan, Israelte’n thutiam ro chu an chan lohna tûrin Setana chuan dan a duh tih a chiang hle. Zâwlnei Balaama hmanga ânchhia lawh a tumna a hlawhchham hnuah, Setana chuan bum dân vervêk zâwk chu a hmang a; Jehova malsâwmna dawng tlâk lova siam chu a tum a ni. Anmahni thlêm nân Moab hmeichhe ngaihno bei takte chu a hmang a, chu mi ṭumah zet chuan Diabola chu a hlawhtling thawkhat hle. Mite chuan Moab fanute chu mutpuiin, Peor hmuna Baala hmaah chuan an kûn ta hial mai! An rochun tûr hlu tak, Ram Tiam chu hnai hle tawh mah se, Israel mi 24,000 vêlte chuan an nun an chân a ni. A va râpthlâk tak êm!—Num. 25:1-3, 9.
8 Tûn laiah, ram tiam ṭha zâwk tak—khawvêl thar chu kan hnaih tial tial a. Setana chuan a tih ṭhin dân pângngaiin, Pathian mite tichhiat nân nungchang bawlhhlawhna chu a hmang leh a ni. Khawvêlah hian nungchang tehna chu a tlâk hniam êm avângin, inngaih chu thil pangngai ang leh mawngkawhurna chu mi mal duh thlanna thil ang lekin an thlîr a. Kristian unaunu
pakhat chuan, “Ka fate’n mawngkawhurna leh innei si lova mipat hmeichhiatna hman chu Pathian mithmuhah sual a ni tih an zirna hmun awmchhun chu inah leh Kingdom Hall-ah chauh a ni,” a ti.9. “Vânglai” hun chhûngin eng nge thleng thei a, engtin nge ṭhalaite’n an hmachhawn theih?
9 An Siamtu Ropui hre rengtu ṭhalaite chuan mipat hmeichhiatna chu nunna leh inthlahchhâwnna nêna inkûngkaih thilpêk thianghlim tak a ni tih an hria a. Chuvâng chuan, mipat hmeichhiatna chu Pathian kawhhmuhna anga inneite inkâr chauhva hman tûr a ni tih an hria a ni. (Heb. 13:4) Amaherawhchu, “vânglai” hun chhûng—tisa châkna a nasat lai leh mi ngaihtuahna a tihkhaw loh theih lai—chuan thianghlim taka awm chu a harsa hle thei. (1 Kor. 7:36) I rilrua ngaihtuahna ṭha lo a lo luh hunah eng nge i tih theih? Thil thianghlimte ngaihtuah tûrin tih tak zetin Jehova ṭanpuina dîl rawh. Jehova chuan tih tak zeta a lam pantute ṭawngṭaina chu englai pawhin a ngaithla a. (Luka 11:9-13 chhiar rawh.) Mi tichak thei tak tîtîna pawhin kan ngaihtuahna thlâk tûrin min ṭanpui thei bawk a ni.
I Thiltum Chu Thlang Thiam Rawh!
10. Eng ngaihtuahna lawi lo nge pumpelh kan duh a, eng zawhnate nge kan inzawh ang?
10 Khawvêla ṭhalai tam takin an duh duha an tâl chhan leh tisa lam nawn chenna nun kawng an zawh chhan pakhat chu Pathian kaihhruaina emaw, nakin hun beiseina chiang tak emaw an neih loh vâng a ni. Anni chu Isaia hun laia “hlimna leh lâwmna . . . sa eina leh uain inna” atân chauhva nung, Pathian ngaihsak lo Israelte ang mai an ni a. (Is. 22:13) Chutiang mite îtsîk ai chuan, engvângin nge Jehova’n a mi rinawmte hmaa a dah beiseina hlu tak chu i ngaihtuah zâwk loh vang? Pathian chhiahhlawh ṭhalai i nih chuan khawvêl thar chu i nghâkhlel em? Jehova’n i hmaa a dah ‘beiseina lâwmawm chu nghâka insûma awm tûrin’ theih tâwp i chhuah em? (Tit. 2:12, 13) I chhânna chuan mahni tâna i insiam thiltum leh i thil ngaih pawimawhte indawt dân chu a thunun ang.
11. School kal lai Kristian ṭhalaite chuan engvângin nge taima taka lehkha an zir ang?
11 Khawvêl chuan ṭhalaite’n eizawnna lama an thiltum ûm nâna an tha leh zung an sên chu a duh a. A tlângpui thuin, nangni school kal laite hian zirna ṭha dawng thei tûrin taima taka in zir a ngai a ni. I thiltum chu hna ṭha hmuh nân ringawt ni lovin, kohhrana mi ṭangkai nih leh Lalram thuchhuahtu hlawhtling tak nih a ni tel bawk tih hre reng ang che. Chu thiltum hlen chhuak tûr chuan, mite biangbiak thiam, thil chhût thiam, leh mi dangte chu zaidam tak leh zahthiam taka be thei mi i nih a ngai a ni. Chutichung chuan, Bible zir a, a thu bulte nunpui tumtu ṭhalaite chuan zirtîrna ṭha ber chu an dawngin, nakina hlawhtlinna leh chatuan nunna atân lungphûm an phûm a ni.—Sâm 1:1-3 chhiar rawh. *
12. Kristian chhûngkuate chuan eng entîrna nge an entawn ang?
Deut. 6:6, 7) Chuvâng chuan, Israel ṭhalai, an nu leh pate leh Pathian ṭih upa zâwkte thu ngaithlatute chuan hriatna chauh ni lovin, finna te, hmang hriatna te, hriat thiamna te, ngaihruat thiamna te an nei a—chûngte chu Pathian zirtîrnain a pêk theih miziate a ni. (Thuf. 1:2-4; 2:1-5, 11-15) Tûn laia Kristian chhûngkuate pawhin zirtîrna chu chutiang bawkin an ngaihsak tûr a ni.
12 Israel rama nu leh pate tân fate zirtîrna pêk chu thil pawimawh tak a ni a. Chu zirtîrna chuan nun kawng engkim deuhthaw, a bîk takin thlarau lam thilte a huap tel vek a ni. (Nangmah Hmangaihtute Thu Chu Ngaithla Rawh
13. Ṭhalai ṭhenkhatte’n eng ang thurâwn nge an dawn a, engvângin nge an fîmkhur ang?
13 Ṭhalaite chuan khawvêla hlawhtlin dân chauh ngaihtuahtu school naupangte hnêna thurâwn petute pawh tiamin, mi chi tinrêngte hnên aṭangin thurâwn an dawng a. Chûng thurâwn zawng zawngte chu Pathian Thu leh bâwih rinawm leh fing tak pêk thlarau lam chaw hmangin fîmkhur takin bûk tawn rawh. I Bible zirna aṭangin, ṭhalaite leh thiltawn la nei tlêmte chu Setana’n a tum bîk ṭhîn tih i hria a. Entîr nân, Eden huanah khân, thiltawn nei lo Evi chuan a chunga hmangaihna pawh lantîr ngai hlei lo, mi hrang daih Setana thu chu a ngaithla a ni. Kawng tam taka a chunga hmangaihna lantîrtu, Jehova thu chu ngaithla sela chuan thil awm dân chu a danglam viau mai tûr!—Gen. 3:1-6.
14. Engvângin nge Jehova leh ringtu kan nu leh pate thu chu kan ngaihthlâk ang?
14 Min Siamtu Ropui chuan rilru thianghlim takin nang pawh a hmangaih che a. Ani chuan tûn atân mai ni lovin, chatuan thlenga i hlim chu a duh asin! Chuvâng chuan, fate ngaihsak tak nu leh pa angin i hnênah leh mi dang amah chibai bûktu zawng zawngte hnênah: “Hei hi kawng a nih hi, tah hian kal rawh u,” tiin duat takin a sawi a ni. (Is. 30:21) Jehova hmangaih tak zet ringtu nu leh pa i neih chuan, malsâwmna i dawn belhchhah tihna a ni a. Thil dah pawimawh dân tûr leh thiltumte i insiam hunah an thurâwn chu zah takin ngaithla ang che. (Thuf. 1:8, 9) Anni chuan he khawvêl hausakna emaw, nihna sâng emawte aia hlu zâwk daih nunna i neih chu an duhsak si che a.—Mt. 16:26.
15, 16. (a) Jehova chungah eng rinna nge kan nghah tlat theih? (b) Baruka thiltawn aṭangin eng thil pawimawh tak nge kan zir theih?
15 Min Siamtu Ropui hre rengtute chuan Jehova’n anni chu “engtikah mah” a thlahthlam tawp lo vang a, kal pawh a kalsan “tawp lo vang” tih ring tlat chungin, anni chu samkhai takin an nung a ni. (Hebrai 13:5 chhiar rawh.) He rilru put hmang ṭha hi khawvêl ngaihtuah dân nên a inkalh tlat avângin, khawvêl thlarau inthununtîr lo tûrin kan fîmkhur tûr a ni. (Eph. 2:2) He mi chungchângah hian, B.C.E. 607-a Jerusalem khawpui tihchhiatna a thlen hmaa awm Jeremia lehkha ziaktu, Baruka thiltawn hi han ngaihtuah teh.
16 Baruka chuan nuamsa zâwka nun chu neih a duh pawh a ni thei a. Jehova’n chu chu hriain, Baruka chu mahni tâna “thil ropui” te zawng lo tûrin ngilnei takin a vaukhân a ni. Baruka’n Jehova thu ngaithlaa Jerusalem tihchhiatnaa a dam khawchhuahna chuan, ani chu a inngaitlâwmin, a fing a ni tih a târ lang. (Jer. 45:2-5) Kawng leh lamah chuan Baruka dam rualpui, mahni tâna “thil ropui” zawng a, Jehova biakna dah pawimawh ber lotute chuan an thil neih zawng zawng chu a hnu lawkah Kaldai mite (Babulon mite) lakah an chân vek a. Mi tam tak chuan an nun pawh an chân a ni. (2 Chro. 36:15-18) Baruka thiltawn chuan Pathian nêna inlaichînna ṭha chu he khawvêla hausakna leh hmingthanna aiin a pawimawh zâwk fê tih hre thiam tûrin min ṭanpui a ni.
Entawn Tlâk Entîrna Ṭha Takte
17. Engvângin nge Isua te, Paula te, leh Timothea te chu tûn laia Jehova chhiahhlawhte tâna entawn tûr ṭha tak an nih?
17 Nunna kawng kan zawhnaa min ṭanpui tûrin, Pathian Thu chuan entawn tûr ṭha tam tak min pe a ni. Entîr nân, Isua chu nungdam tawh azawnga thil thiam ngah ber mah ni se, chatuana mite ṭanpuitu tûr “ram chanchin ṭha” hrilh nân a tha leh zungte chu a hmang zâwk a ni. (Lk. 4:43) Tirhkoh Paula chuan Jehova hnêna a thil neih ṭha ber pe tûrin a hna ṭha leh duhawm tak chu a kalsan a, chanchin ṭha hrilh nân a hun leh ṭha leh zung chu a hmang a ni. ‘Rinnaa fa tak tak’ Timothea chuan Paula entîrna ṭha chu a entawn a. (1 Tim. 1:2) Isua te, Paula te, leh Timothea te chu an nun kawng zawh avâng chuan an inchhîr em? Inchhîr lo ve! Paula chuan khawvêlin a pêk theih thilte chu Pathian rawngbâwlna chanvo nêna a khaikhin chuan “hnâwmhneah lek” a ngai tih a sawi a ni.—Phil. 3:8-11.
18. Unaupa ṭhalai pakhat chuan eng inthlâkthlengna lian tak nge a siam a, engvângin nge a inchhîr loh?
18 Tûn laia Kristian ṭhalai tam takte chuan Isua te, Paula te, leh Timothea te rinna chu an entawn a. Entîr nân, unaupa hlawh ṭha tak nei ṭhalai pakhat chuan heti hian a ziak a ni: “Bible thu bulte mila kan nun avângin, hna aṭanga kaisântîr ka ni thuai a. Sum tam tak thawk chhuak mah ila, chu chu thil lothlâwn mai niin kan hria. Company-a hotu ber hnênah hun bi kima rawngbâwl ka duh thu kan han hrilh chuan, ka awm zawm zêl beiseiin hlawh tam zâwk pêk min tiam nghâl vat a. Mahse, ka rilru chu ka siam fel tawh. Mi tam tak chuan hna ṭha tak bânsana hun bi kima rawng ka bâwl chhan chu an hre thiam thei hlawl lo. Pathian hnêna ka inpumpêkna thutiam hlen ka duh vâng a nih thu anni chu ka hrilh a. Ka nuna Pathian rawngbâwl chauh ka ngaihtuah avângin, sum leh challannain min pêk theih hauh loh hlimna leh lungawina ka nei a ni,” tiin.
19. Ṭhalaite chu eng duhthlanna fing nge siam tûra fuih an nih?
19 Khawvêl pum puiah hian ṭhalai sâng tam takte chuan chutiang bawk duhthlanna fing tak chu an siam a. Chuvângin, ṭhalaite u, in nakin hun tûr in ngaihtuah hunah, Jehova nî a hnaih tawhzia chu rilruah vawng reng rawh u. (2 Pet. 3:11, 12) He khawvêla mi hausate chu awt suh ula. Nangmahni hmangaih tak zettute thu chu ngaithla zâwk rawh u. ‘Vâna rote’ khâwl khâwm chu i neih theih chatuana hlâwkna thlentu awmchhun inkhâwlna him ber a ni. (Mt. 6:19, 20; 1 Johana 2:15-17 chhiar rawh.) Ni e, in Siamtu Ropui chu hre reng rawh u. Chutianga in hriat reng chuan Jehova’n mal a sâwm ang che u. (w08 4/15)
[Footnote]
^ par. 11 Zirna sâng leh hnathawh chungchângah Vênnainsâng, October 1, 2005, phêk 26-31-na (Mizo) en rawh.
I Hre Chhuak Thei Em?
• Pathian kan rinzia engtin nge kan lantîr?
• Zirtîrna ṭha ber chu eng nge ni?
• Baruka thiltawn aṭangin eng nge kan zir theih?
• Tute nge entawn tûr ṭha ber ni a, engvângin nge?
[Zirlai Atâna Zawhnate]
[Phêk 19-naa milemte]
Jehova chuan zirtîrna ṭha ber a pe