Chhan Chhuah Kan Ngai!

AMERICA ram, Pennsylvania, Pittsburgh khaw kianga awm lungalhthei laih chhuahna khur chu tuiin a rawn chîm thut mai a. A laitu mi pakuate chu tuiin a chîm theih lohna lai lei aṭanga feet 240 laia thûk hmun ruak pakhatah chuan an tâng khâwm a. Mahse, ni thum hnuah chuan, him pialin an rawn chhuak ta hlauh mai! Engtin nge chhan chhuah an nih?

Lungalhthei khur awm dân târ lanna map-te leh satellite hmanga thil awmna hmun zawn chhuah theihna Global Positioning System ṭanpuinain chhan chhuaktute chuan inches 30 bialin lei an verh kua a, bâwm tung sâwl chu chûng mite tân khâwmna laiah chuan an thlâk thla a. An thlâna chang mai tûr chu hmun ata chu bâwm chuan a mal mala khai chhuah an ni ta a ni. An vai chuan an thaw huai a, chhan chhuah an nih avâng chuan an lâwm hle a ni.

Hêng lungalhthei laitu pakuate anga lei hnuaia tâng emaw, râpthlâk taka thihna hmachhawn emaw kan awm mang meuh lo vang. Mahse, natna te, tarna te, leh a tâwpa thihna te kan pumpelh theih loh avângin kan zain chhan chhuah kan ngai a ni. Thlahtu rinawm Joba chuan: “Hmeichhe hrin tawh mihring phawt chu rei lo tê dam, buainaa khat a ni. Pangpâr angin a lo chhuak a, a vuai leh a, hlimthla angin a thlâwk bo va, a awm hlen lo,” a ti. (Joba 14:​1, 2) Kan zînga tumah hian nuna thil râpawm ber​—⁠thihna​—⁠chu kan pumpelh theih loh avângin, kum 3,500 vêl lai a liam hnuah pawh hêng thute hi a la dik reng a ni. Khawi hmunah pawh awmin, eng anga ṭha pawhin inenkawl mah ila, hrehawm tawrhna te, tarna te, leh thihna te lak ata chhan chhuah chu kan ngai tho tho a ni.

Scientist-te leh mi dangte chuan mihring dam chhûng pângngai bâka mite nunna pawhsei tumin ṭan an la nasa hle a. Pâwl pakhat chuan a thiltum ber chu “pumpelh theih loh thihna hneh” leh “a mi leh sate’n thih theih lohna neih an tumna kawnga hlawhtling tûra ṭanpui” a nih thu a sawi. Amaherawhchu, science lama hmasâwnna leh hlawhtlin duhna nasa tak inkawp chuan tûn thleng hian kum 3,500 kal taa Mosia’n mihring dam chhûng nia a lo sawi kum 70 emaw, kum 80 emaw aia tamin mihring nun chu a pawtsei thei vak chuang lo.​—⁠Sâm 90:⁠10.

Joba’n nunna leh thihna chungchâng a thlîr dân chu i ṭâwmpui emaw, ṭâwmpui lo emaw pawh ni se, kumte a han ral zêl chuan nang ngei pawh i ṭhian te, i in leh i chhûngkua te, leh i thiltih zawng zawng te kalsanin, thihna lam pan chuan ‘hlimthla angin i thlâwk bo’ vang. Hmân lai Israel rama Lal fing Solomona chuan: “Mi nungdamte chuan an la thi dâwn tih an hre si a, mitthi erawh chuan engmah an hre lo va, lâwmman an nei tawh ngai lo,” tiin a ziak a ni.​—⁠Thuhriltu 9:⁠5.

Bible sawi anga thihnain mihringte chunga lal nunrâwng tak anga “ro a rêl” hi a lungchhiatthlâk hle. Thihna chu mihringte chhan chhuah an ngaihna hmêlma hnuhnûng ber a ni a. (Rom 5:14; 1 Korinth 15:26) Khawvêla chhan chhuaktu pâwl ṭha ber leh changtlung ber pawhin chu hmêlma lak ata chu a chhan chhuak hlen thei lo vang che. Mahse, chu mi aṭang ngeia chhan chhuahna chu Pathian Jehova chuan a ruahman a ni. (w08 3/1)

[Phêk 3-naa Thlalâk Hawhtîrtu]

Photo by Gene J. Puskar-Pool/Getty Images