Engkimah Pathian Kaihhruaina Zawng Rawh
Engkimah Pathian Kaihhruaina Zawng Rawh
“He Pathian hi kumkhaw tlaitluana kan Pathian a ni dâwn si a. Thih thleng pawha min hruaitu a ni ang.”—SAM 48:14.
1, 2. Engvângin nge mahni finna rinchhan aiin Jehova kaihhruaina chu kan zui zâwk ang a, eng ang zawhnate nge lo chhuak?
THIL tlâktlai lo emaw, hlauhawm emawte chungchâng kan ngaihtuah hian, mahni inbum a awl khawp mai a. (Thuf. 12:11) Kristiante tiha mawi lo thil engemaw tih kan châk tlat hian, kan thinlung hian chhuanlam tûr ṭha tak a ngaihtuah chhuak fo ṭhîn. (Jer. 17:5, 9) Chuvângin, fakna hla phuahtu chuan: “I êng leh i thutak chu tîr chhuak la, anni chuan mi hruai sela,” tia a ṭawngṭai hian finna a lantîr a ni. (Sâm 43:3) Ani chuan ama finna tling lo tak ni lovin, Jehova a ring zâwk a, ani bâk chu a tân kaihhruaina ṭha ber petu tûr an awm lo. Fakna hla phuahtu ang bawkin, Pathian kaihhruaina kan zawng tûr a ni.
2 Mahse, engvângin nge Jehova kaihhruaina chu kan rin ber ang? Eng hunah nge chu kaihhruaina chu kan zawn ang? Chu mi hlâwkpui tûr chuan eng ang rilru put hmang nge kan neih ang a, engtin nge Jehova’n tûn laiah min kaihhruai? Hêng zawhna pawimawh takte hi he thuziakah hian sawiho a ni ang.
Engvângin Nge Jehova Kaihhruaina Kan Rin Ang?
3-5. Engvângin nge Jehova kaihhruaina chu kan rin pumhlûm ṭhak ang?
3 Jehova chu kan Pa vâna mi a ni. (1 Kor. 8:6) Ani chuan a mi malin min hre chiang ṭheuh va, kan thinlung ngaihtuahna a hmu thei vek a. (1 Sam. 16:7; Thuf. 21:2) Lal Davida chuan Pathian hnênah: “Nangin ka ṭhut leh ka din hi i hre ṭhîn a, ka ngaihtuahna hi hla tak aṭang pawhin i hre thiam ṭhîn. Ngai teh, aw LALPA, nangin i hriat fai vek loh chu, ka leiah hian thu rêng rêng a awm lo,” a ti. (Sâm 139:2, 4) Jehova chuan min hriat chian êm avângin, kan tâna ṭha ber tûr a hria tih engtin nge kan rinhlelh theih tehlul ang? Chu bâkah, Jehova chu kawng engkimah a fing ber a. Thil engkim a hmu a, mihringte aiin thil a chîk zâwk a; tin, thil lo thleng tûrte chu atîr tê aṭangin a hre ṭhîn. (Is. 46:9-11; Rom 11:33) Ani chu “Pathian finga chauh” a ni.—Rom 16:27.
4 Chu bâkah, Jehova chuan min hmangaih a, kan tâna ṭha ber tûr min duhsak a ni. (Joh. 3:16; 1 Joh. 4:8) Pathian hmangaihna nei tak a nih angin, kan chungah a thilphal hle a. Zirtîr Jakoba chuan: “Thilpêk ṭha leh thilpêk famkim zawng zawng chu chung lam aṭangin êngte Pa hnên ata, a lo chhuk ṭhîn a ni,” tiin a ziak a. (Jak. 1:17) Pathian kaihhruaia awmte chuan a thilphalna chu nasa takin an hlâwkpui a ni.
5 A tâwpah chuan, Jehova chu engkimtithei a ni. He mi chungchângah hian, fakna hla phuahtu chuan: “Chungnungbera bihrûkna hmuna awma chu Engkimtitheia hlimah chuan a awm reng ang. LALPA chung thu-ah chuan, ‘Ani chu ka inhumhimna leh ka kulhpui; ka Pathian, ka rina chu a ni,’ ka ti ang,” a ti. (Sâm 91:1, 2) Jehova kaihhruaina kan zawm hian, hlawhchham thei lo Pathianah kan inhumhim tihna a ni. Dodâlna kan tâwk a nih pawhin, Jehova chuan min ṭanpui a, min tibeidawng lo vang. (Sâm 71:4, 5; Thufingte 3:19-26 chhiar rawh.) A ni, Jehova chuan kan tâna ṭha ber tûr a hriain, a duh a; tin, chu mi min pe tûr chuan thiltihtheihna a nei bawk a ni. Kan tân a kaihhruaina ngaihthah chu a va âtthlâk dâwn êm! Mahse, eng hunah nge chu a kaihhruaina chu kan mamawh?
Eng Hunah Nge Kaihhruaina Kan Mamawh?
6, 7. Eng hunah nge Jehova kaihhruaina kan mamawh?
6 Pathian kaihhruaina chu kan naupan hun ata kan tar thlengin, kan dam chhûngin kan mamawh tak zet a. Fakna hla phuahtu chuan: “He Pathian hi kumkhaw tlaitluana kan Pathian a ni dâwn si a: Thih thleng pawha min hruaitu a ni ang,” tiin a sawi. (Sâm 48:14) Fakna hla phuahtu angin, Kristian fingte chuan Pathian kaihhruaina an zawng reng ṭhîn a ni.
7 Ṭanpui vat ngai nia inhriat châng kan nei ngei mai a. A châng chuan tihduhdahna emaw, natna khirh tak emaw, a nih loh leh vawilehkhata hnathawh lai kan chân emaw avângin, kan “mangang” hle thei a ni. (Sâm 69:16, 17) Chutiang hunah chuan, chhel tûrin min tichak ang tih leh thutlûkna ṭha siam tûrin min kaihruai ang tih ring tlat chunga Jehova lam hawi chu a thlamuanthlâk hle. (Sâm 102:17 chhiar rawh.) Amaherawhchu, hun dangah pawh a ṭanpuina kan mamawh bawk. Entîr nân, kan ṭhenawmte hnêna Lalram chanchin ṭha kan hrilh hian, kan hlawhtlin nân Jehova kaihhruaina kan mamawh a ni. Tin, intihhlimna te, silhfên leh inchei dân te, ṭhian kawm te, hnathawhna te, zirna te, a nih loh leh thil dangah te pawh ni se, thutlûkna kan siam dâwn rêng rêngin, Jehova kaihhruaina kan zawm chauhvin fing takin thil kan ti thei ṭhîn. Kan nun kawng engkimah hian kaihhruaina kan mamawh a ni.
Pathian Kaihhruaina Zawn Loh A Hlauhawmna
8. Evi’n thei rah ei phal loh eiin eng nge a lan chhuahtîr?
8 Mahse, Jehova kaihhruaina zawm kan inhuam tûr a ni tih hre reng ang che. Pathian chuan kan duh loh chu min tihluihtîr dâwn lo. Jehova kaihhruaina zawm loh thlang hmasa bertu chu Evi a ni a, a thiltawn chuan thutlûkna dik lo rahchhuah a pawi theihzia a târ lang a ni. A thiltih aṭanga a lan chhuahtîr chu ngaihtuah bawk rawh. Evi chuan thei rah ei phal loh chu ‘a chhia leh a ṭha hria a, Pathian ang nih’ a duh avângin a ei a ni. (Gen. 3:5) Chutianga tiin, Pathian dinhmunah a indah a, Jehova kaihhruaina zawm aiin mahni thuin a chhia leh a ṭha chungchângah thutlûkna a siam a ni. Chuvângin, Jehova lalchungnunna chu a hnuchhawn a. Mahni hotua insiam chu a duh a ni. A pasal, Adama chuan chu helna kawng tho chu a zawh ve a ni.—Rom 5:12.
9. Jehova kaihhruaina kan hnâwl chuan, a nihna takah chuan eng nge kan tih a, engvângin nge chu chu thil âtthlâk ber a nih?
9 Tûn laiah hian, Jehova kaihhruaina kan zâwm lo a nih chuan, keini pawhin a lalchungnunna chu kan pawm lo tihna a ni ang. Entîr nân, saruak lem en chîng mi pakhat han ngaihtuah ta ila. Kristian kohhran chhûnga mi a nih chuan, he mi chungchânga Jehova kaihhruaina chu a hria a. Chutiang thil bawlhhlawhte chu tih ve châk chunga en chu sawi loh, a sawi pawha sawi chhuah hauh loh tûr a ni tih a hre bawk a ni. (Eph. 5:3) Chutiang en chîng chuan Jehova kaihhruaina chu hnâwlin, A lalchungnunna leh lû A nihna chu a hnâwl tel a ni. (1 Kor. 11:3) Chutianga hnâwl chu thil âtthlâk ber mai a ni ang; Jeremia’n, “tungchhova kal mihringah hian, a pheikhai hruai tûr a awm lo” a tih avângin.—Jer. 10:23.
10. Engvângin nge zalên taka duhthlan theihna chu puitling taka kan hman a ngaih?
10 Ṭhenkhat chuan Jehova’n zalên taka duhthlan theihna min pêk si chuan, chu mi kan hman avângin min sawisêl tûr a ni lo tih ngaih dân neiin Jeremia thute chu an pawm lo va. Amaherawhchu, zalên taka duhthlan theihna hi thilthlâwnpêk a nih rual rualin, chu chuan mawhphurhna pawh a keng tel bawk a ni tih erawh theihnghilh suh. Kan thusawi leh kan thiltih ang zêlin Pathian hnênah chanchin kan sawi a ngai a ni. (Rom 14:10) Isua chuan: “Thinlunga khat liam chu kain a sawi ṭhîn,” a ti a. “Thinlungah hian ngaihtuahna sualte, tualthahnate, uirênate, inngaihnate, rûkrûknate, hêknate, sawichhiatnate a lo chhuak si ṭhîn,” tiin a sawi bawk. (Mt. 12:34; 15:19) Chuvângin, ka thusawi leh kan thiltih hian kan thinlung awm dân a târ lang a. Chûng chuan kan nihna dik tak a târ lang bawk. Hei vâng hian a ni, Kristian fingte chuan engkimah Jehova kaihhruaina an zawm ni. Chutiang chuan, Jehova chuan ‘thinlung dik tak’ nei chu zawng chhuakin, a chungah chuan ‘ṭha takin a ti ang.’—Sâm 125:4.
11. Israelte chanchin aṭangin eng nge kan zir?
11 Israelte chanchin kha hre chhuak rawh. Duhthlanna dik siama Jehova thupêk an zawm chuan, Jehova chuan anni chu a vênghim a ni. (Jos. 24:15, 21, 31) Mahse, zalên taka duhthlan theihna an neih chu an hmang sual fo va. Jeremia hun lai khân Jehova chuan an hnênah: “An ngaithla lo va, beng an dawh hek lo: an thinlung sual chhuchhêtin anmahni thu thuin an awm ta zâwk a, hma lam pan aiin an hnungtawlh ta zâwk a ni,” a ti. (Jer. 7:24-26) A va lungchhiatthlâk êm! ‘Hma lam pan aia hnungtawlh ta zâwk’ kan nih loh nân, kan luhlul vâng emaw, mahni duhzâwng ûmnaa kan inhman lutuk vâng emawin Jehova kaihhruaina chu i hnâwl ngai lo vang u. Tin, mahni thu thuin i kal ngai hek lo vang u.
Pathian Zilhna Zâwm Tûrin Eng Nge Ngai?
12, 13. (a) Eng miziain nge Jehova kaihhruainate zawm duhna min neihtîr? (b) Engvângin nge rinna neih a pawimawh êm êm?
12 Jehova kan hmangaihna chuan a kaihhruainate zawm duhna min neihtîr a. (1 Joh. 5:3) Mahselangin, Paula chuan: “Hmu theia kal lovin, rinnain kan kal zâwk si a,” tia sawiin thil dang min kawhhmuh a ni. (2 Kor. 5:6, 7) Engvângin nge rinna neih chu a pawimawh? Aw le, Jehova chuan “felna kawngahte” min hruai ṭhîn a; mahse, chu kawngte chuan he khawvêla neihnunna emaw, nihna emaw lamah min hruai lo. (Sâm 23:3) Chu mi avâng chuan, kan rinna mit chuan Jehova rawngbâwlna aṭanga lo awm thlarau lam lâwmman tehkhin rual lohte chu engtik lai pawhin a en tlat tûr a ni. (2 Korinth 4:17, 18 chhiar rawh.) Tin, rinna chuan kan thil mamawh châkkhaite neia lungawi tûrin min ṭanpui bawk.—1 Tim. 6:8.
13 Isua chuan biakna dikah hian mahni inphatna a tel thu a sawi a, chu mi atân chuan rinna neih a ngai tel bawk. (Lk. 9:23, 24) Betu rinawm ṭhenkhatte chu nasa taka an inpêk a ngai a, retheihna te, awpbehna te, inpâwnghuatna te, leh tihduhdahna nasa takte hial pawh an lo tuar chhuak a ni. (2 Kor. 11:23-27; Thup. 3:8-10) Rinna nghet tak chauh chuan lâwm tak chungin a tawrh chhuahtîr thei a. (Jak. 1:2, 3) Rinna nghet tak chuan Jehova kaihhruaina zawm chu thil ṭha ber a ni ziah tih rin tlatna min pe a. Chu chu kumkhuaa kan ṭhat rengna tûr a ni. Rinawm taka tuar chhuaktute lâwmman dawn tûr chu tûna rei lo te chhûng hrehawm an tawrhte aiin a ropui zâwk hle a ni tih rinhlelhna rêng kan nei lo.—Heb. 11:6.
14. Engvângin nge Hagari tân inngaihtlâwm a ngaih?
14 Jehova kaihhruaina zawmna kawnga inngaihtlâwmnain hmun a chan pawh chu ngaihtuah bawk teh. Sari bâwihnu Hagari entîrna chuan hei hi a târ lang a ni. Sari’n fa a la neih loh fo avângin, Abrahama hnênah Hagari chu a pe a; tin, Hagari chuan Abrahama fa chu a pai ta a. Tichuan, Hagari chu a pi nau nei thei lo lakah chuan a lo chapo ta a. Chuvângin, Sari chuan “a tirethei ta hle a,” Hagari chu a tlân bo ta a ni. Jehova vântirhkoh pakhat chuan Hagari chu tâwkin: “I pi hnênah kîr leh la, a thu thuin awm rawh,” tiin a hrilh a. (Gen. 16:2, 6, 8, 9) Hagari chuan kaihhruaina dang a duhzâwk ngei ang. Vântirhkoh kaihhruaina anga thil ti tûr chuan, a chapona rilru put hmang a neih tawh loh a ngai dâwn a ni. Mahselangin, Hagari chu vântirhkoh sawi ang chuan a inngaitlâwm a, a fapa Ismaela chu a pa Abrahama puan in lumah a lo piang ta a ni.
15. Tûn laia Jehova kaihhruaina zawmna kawngah inngaihtlâwmna neih a ṭûlna dinhmun ṭhenkhat sawi rawh.
15 Kan tân pawh Jehova kaihhruaina zâwm tûr chuan inngaihtlâwm a ngai thei a. Ṭhenkhatte chuan intihhlimna an neih ṭhin chuan Pathian Jehova a tilâwm lo a ni tih an pawm a ngai mai thei. Kristian pakhat chuan tuemaw chu a tihthinur avângin ngaihdam a dîl a ngai mai thei a. A nih loh leh thil a tisual a ni tih a pawm a ngai mai thei bawk a ni. Tuemaw hian sual khûnkhân tak ti ta se engtin nge ni ang? Inngaitlâwmin upate hnêna a inpuan a ngai a ni. Mi chu hnawhchhuah pawh a ni hial thei a. Kohhran chhûnga lâk luh a nih leh theih nân, inngaitlâwm taka simin, a inlamlêt a ngai a ni. Hêng leh hetiang dinhmunah hian, Thufingte 29:23 thu hi a thlamuanthlâk hle: “Mi a chaponain a titlâwm ang a, mi rilru inngaitlâwm chuan chawimawi a hlawh ang,” tih hi.
Engtin Nge Jehova’n Min Kaihhruai?
16, 17. Engtin nge Pathian Thu chu kaihhruaina kan hmuh theihna bul ber anga kan hlâwkpui tak zet theih?
16 Pathian kaihhruaina kan hmuh theihna bul ber chu, Pathian thâwk khum Thu, Bible hi a ni. (2 Timothea 3:16, 17 chhiar rawh.) Pathian Thu hlâwkpui tak zet tûr chuan, Bible aṭanga thu ṭangkaite râwn nâna harsatna a lo thlen hun nghah kher loh chu a finthlâk a ni. Chu ai mahin, Bible chhiar chu kan ni tin thiltih ṭhin kan nihtîr ang. (Sâm 1:1-3) Chutiang kawng chuan, Pathian thâwk khum thute chu kan hre bel ang. Pathian ngaihtuahna ang chu kan kan lo nei ang a, harsatna lo thleng thutte pawh hmachhawn thei tûrin kan inpeih bawk ang.
17 Chu bâkah, Bible-a kan thu chhiarte ngun taka ngaihtuah leh chu mi chungchânga ṭawngṭai chu a pawimawh a ni. Bible chângte kan ngaihtuah hian, dinhmun engemaw bîk atâna nunpui theih a nih dân kan ngaihtuah a. (Sâm 72:12) Buaina khirh tak kan tawh hian, kan mamawh kaihhruaina zawng hmu tûra min ṭanpui tûrin Jehova hnênah kan ṭawngṭai a ni. Jehova thlarau chuan Bible aṭang ngei emaw, Bible ṭanchhan thu leh hla chhuahte emaw aṭanga kan lo chhiar tawh Pathian Lehkha Thua thu bulte chu hre chhuak tûrin min ṭanpui ang.—Sâm 25:4, 5 chhiar rawh.
18. Eng kawngin nge Jehova chuan Kristian inunauna chu min kaihruaitu atâna a hman?
18 Kan Kristian inunauna hi Jehova kaihhruaina kan hmuh theihna bul ber hlu tak dang leh chu a ni. Chu inunauna pêng pawimawh tak chu “bawi rinawm, fing tak” leh a aiawhtu Governing Body a ni a, chu chuan thlarau lam chaw chu chhum lo chat lovin, lehkhabu chhuah leh inkhâwm leh inkhâwmpui program-te hmangin a pe chhuak a ni. (Mt. 24:45-47; Tirhkohte 15:6, 22-31 nên khaikhin rawh.) Chu bâkah, Kristian inunauna chhûngah chuan mi puitling tak takte an awm a, a bîk takin mi mal ṭanpuina leh Bible thu aṭanga zilhna min pe thei tûra mi tling upate an awm a ni. (Is. 32:1) Kristian chhûngkuaa naupangte chuan kaihhruaina petu hlu tak dang an neih belh a. Ringtu an nu leh pate chu fuihna leh kaihhruaina an hmuh theihna tûra Pathian ruat thuneitute an ni.—Eph. 6:1-3.
19. Jehova kaihhruaina kan zawn chhunzawm zêl avângin eng malsâwmnate nge kan dawn?
19 Ni e, Jehova chuan kawng tam takin kaihhruaina min pe a, a ṭangkai thei ang berin kan hmang tûr a ni. Israelte rinawm lai hun kha sawiin, Lal Davida chuan: “Min thlahtute chuan an lo ring chia: an ring a, tichuan nangin i lo chhanhim ṭhîn. An au chia, tichuan chhanhimin an lo awm ṭhîn a: an ring chia, tichuan mualphovin an awm ngai lo,” tiin a lo sawi a ni. (Sâm 22:3-5) Jehova kaihhruaina chu ring tlat chunga kan zawm chuan, keini pawh ‘mualphovin kan awm ngai lo’ vang. Kan beiseinaah kan beidawng lo bawk ang. Kan finna rinchhan aia, kan awm dân tûr chu ‘Jehova chunga kan nghah’ chuan, tûnah ngei pawh hian malsâwmna nasa tak kan dawng ang. (Sâm 37:5) Chu mi kawnga rinawm taka kan chhel tlat chuan, chûng malsâwmnate chu chatuanin kan ta a ni ang. Lal Davida chuan: “LALPA chuan rorêlna fel a ngaina si a, a mi thianghlimte [“a mi rinawmte,” NW] chu a kalsan ngai lo; kumkhua atân vawn ṭhatin an awm a . . . mi fel chuan ram hi an luah ang a, a chhûngah hian kumkhuain an awm ang,” tiin a ziak a ni.—Sâm 37:28, 29. (w08 4/15)
I Hrilhfiah Thei Em?
• Engvângin nge Jehova kaihhruaina kan rin?
• Jehova kaihhruaina kan hnâwl chuan eng nge kan lan chhuahtîr ang?
• Kristian tâna inngaihtlâwmna neih a ngaihna dinhmun ṭhenkhat chu engte nge ni?
• Tûn laiah engtin nge Jehova’n min kaihhruai?
[Zirlai Atâna Zawhnate]
[Phêk 15-naa milem]
Evi chuan Jehova lalchungnunna a hnuchhawn