He Tâwpna Huna Inneihna leh Fa Enkawlna
He Tâwpna Huna Inneihna leh Fa Enkawlna
“Hun hi tihtawiin a awm a ni.”—1 KOR. 7:29-31.
1. (a) Tûn hnaia inthlâkthlengna engte nge thil hmachhawn harsate zînga tel? (b) Engvângin nge chhûngkaw hlutna inthlâkthlengte chu kan buaipui?
PATHIAN Thu chuan “tâwpna hun” chu indo te, lîrnghîng te, ṭâm te, leh hrilêngtea târ lan a nih tûr thu a sawi lâwk a ni. (Dan. 8:17, 19; Lk. 21:10, 11) Tin, mihringte chanchina he hun pawimawh tak hi khawtlânga inthlâkthlengna hun a nih tûr thu-in min vaukhân bawk. Chhûngkaw nuna buainate hi he ‘ni hnuhnûng hun khirh taka’ thil hmachhawn ngai harsa takte zînga mi a ni. (2 Tim. 3:1-4) Engvângin nge chutiang inthlâkthlengnate chu kan lo buaipui a ngaih? Chu chu tûnlaia Kristiante’n inneihna leh fa enkawlna an thlîr dân thunun thei tûr khawpa thil tithei tak leh darhzau tak a nih avângin. Eng kawngin nge a thunun?
2. Engtin nge khawvêlin inneihna leh inṭhenna chungchâng a thlîr tlângpui?
2 Tûn laiah hian nupa inṭhen chu a awlin, a hluar hle a; ram tam takah nupa inṭhenna chu a pung chak hle a ni. Amaherawhchu, khawvêlin inneihna leh inṭhenna chungchânga a pawm theihte chu Pathian thlîr dân nên a inkalh tlat a ni tih rilruah kan vawng reng tûr a ni. Chuti a nih chuan Jehova thlîr dân chu eng nge ni?
3. Engtin nge Jehova leh Isua Krista’n inneihna chu an thlîr?
3 Pathian Jehova chuan innei tawhte chu an inneihna thutiama rinawm tûrin a beisei a. Mipa leh hmeichhe hmasa berte a inneihtîr khân, Jehova chuan “mipain . . . a nupui a vuan ang: tichuan tisa pum khat an lo ni tawh ang” a ti. A hnuah Isua chuan chu thu bawk chu sawi zawmin: “Chuvângin, Pathianin a zawm tawh chu mihringin ṭhen suh se,” tiin a sawi belh a ni. Isua chuan: “Tupawh tlangvâl ngaih vâng ni lova, nupui maa mi dang nei apiang chu, a uirê a ni,” tih a sawi belh bawk. (Gen. 2:24; Mt. 19:3-6, 9) Chuvângin Jehova leh Isua chuan nupa inneihna chu kawppui a pakhat zâwk zâwk a thih huna tâwp chauh tûr, damchhûnga phuarna angah an ngai a ni. (1 Kor. 7:39) Inneihna hi Pathian ruahman a nih avângin, nupa inṭhenna chu holam taka ngaih tûr a ni lo. Dik takin, Bible chuan Jehova’n A thu ang ni lova inṭhenna a hua tih a târ lang a ni. *—Malakia 2:13-16; 3:6 chhiar rawh.
Puitling Taka Inneihna
4. Engvângin nge Kristian ṭhalai ṭhenkhatte’n naupangtêa nupui pasal an neih?
4 Pathian ngaihsak lo he kan awmna khawvêl hian mipat hmeichhiatna a âtchilh a. Ni tin mai hian châkna chawk tho thei milem tam takte chu kan hmu thei a. Chûng thilte’n a bîk taka kohhrana kan ṭhalai duh takte leh kan chunga nghawng a neihte chu kan ngaihthah mai thei lo. Engtin nge Kristian ṭhalaite chuan an duhzâwng kalha tisa châkna chawk tho thei chûng thilte chu an do vang? Ṭhenkhatte chuan nupui pasal hma taka neiin do an tum a. Chutiang kawng chuan mipat hmeichhiatna lama nungchang bawlhhlawhna pumpelh theih an inbeisei a ni. Amaherawhchu rei a rial hmain, an inchhîr leh a ni. Engvângin nge? Inneih hlima an inlâwm tawnna a han reh deuh chuan an nî tin nunah inmilna an lo nei meuh lo tih an inhre chhuak a. Chutiang nupate’n harsatna khirh tak an tâwk chu hriatthiamawm tak a ni.
5. Engin nge nupate chu an inneihna thutiama rinawm tûra ṭanpui ang? (Footnote en bawk rawh.)
5 Kristianpui pawh ni se, tuemaw i han neih a, a hnua i beisei ang a ni lo lutuk tih han hriatchhuah chu thil tawrh harsa tak a ni ngei ang. (1 Kor. 7:28) Chuti chung pawhin, Kristian dikte chuan nupa inkâra harsatna chu eng anga nasa pawh ni se, chu mi sut kian nâna Pathian thu ang ni lova inṭhen chu harsatna chinfelna atâna pawm theih a ni lo tih an hria. Chuvângin an inneihna thutiama rinawm an duh avânga taima taka ṭan latute chuan an Kristian kohhrana awmte zah leh hmangaih taka ṭanpui chu an phu a ni. *
6. Engtin nge Kristian ṭhalaite chuan nakina nupui pasal an neih hun tûr chu an thlîr ang?
6 Ṭhalai nupui pasal la nei lo i ni em? I nih chuan, nakina nupui pasal neia i awm hun tûr chu engtin nge i thlîr? Kristian unau nêna in inngaihzâwn ṭan hmaa tisa lam, rilru lam, leh thlarau lama puitlin thleng i nghah chuan lungngaihna tam tak i pumpelh thei a ni. Bible chuan nupui pasal nei thei chin tûr a bithliah lo ngei mai a. * Amaherawhchu, Bible chuan tleirâwl chhuaha, mipat hmeichhiatna hman châkna a sosân hun a pelh thleng i nghah rih a ngai tih a sawi a ni. (1 Kor. 7:36, NW) Engvângin nge? Tisa châkna nasa tak chuan rilru fîm a puttîr theih loh che avânga a hnua lungngaihna thlen thei thutlûkna a siamtîr theih vâng che a ni. Inneih chungchânga Bible-a Jehova zilhna thute hi i ṭhatna tûr leh i hlimna tûr a ni tih hre reng ang che.—Isaia 48:17, 18 chhiar rawh.
Puitling Taka Fa Enkawlna
7. Nupa la naupang ṭhenkhatte chuan eng thilte nge an tawh a, engvângin nge hei hian an inneihnaah harsatna a siam theih?
7 Naupang taka innei nupa ṭhenkhat chuan an la puitlin tak tak hmain fa an nei mai dâwn a. Engtik lai pawha ngaihsak ngai fa an neih hmain, anmahni pawh an inhre chiang hman meuh lo a ni. Nausên piang hlim chuan nu ber ngaihsakna zawng zawng a chan tâkah chuan pasal la puitling lo tak chuan a thîk thei a. Chu bâkah, naute enkawl avânga zân mut theih loh chângin chu chuan nupa inkârah harsatna a awmtîr thei a ni. Tûn hmaa an lo neih ṭhin zalênna tam tak chu an chân tih an hre chhuak ta thut a. Tûn hma angin zalên takin an chhuak vâkin thil an ti thei tawh lo. An dinhmun inthlâkthleng chu engtin nge an thlîr ang?
8. Fa enkawlna chu eng anga thlîr tûr nge ni a, engvângin nge?
8 Puitling taka inneih a ngai ang bawkin, fa enkawlna pawh chu Pathian pêk chanvo leh mawhphurhna angah kan ngai tûr a ni. Kristian nupate chuan fa an neih avânga insiamremna an neih ngai apiang chu puitling taka an tih theih nân theih tâwp an chhuah tûr a ni. Jehova chuan mihringte hnêna fa neih theihna a pêk avângin, nu leh pate chuan an nausên piang hlim chu ‘LALPA laka rochan’ angin an thlîr tûr a ni. (Sâm 127:3) Kristian nu ber leh pa berte chuan ‘Lalpaa nu leh pate’ an nih angin an mawhphurhna chu hlen an tum tûr a ni.—Eph. 6:1.
9. (a) Naupang enkawlnaah chuan eng nge tel? (b) Pasalin a nupui thlarau lama a chak reng theih nân engtin nge a ṭanpui theih?
9 Naupang pakhat enkawl tûr chuan a kum têla mahni inpêkna neih a ngai a. Hun leh tha leh zung tam tak sên a ngai a ni. Kristian pasal chuan fa an neih hnu kum engemaw zât chu a nupuiin inkhâwmnaah rilru a pe ṭha thei lovin, mahnia Bible zir leh ngun taka chhûtna pawh a nei thei vak lo vang tih pawh a hriat a ngai a ni. Chu chuan thlarau lamah a ti chak lo thei a. Puitling taka fa enkawl tûr chuan pasalin naupang enkawl tûra a theih ang tâwka a ṭanpui a ngai a ni. Inkhâwmnaa a nupuiin a ngaihthlâk theih lohte chu in lamah a sawipui thei a. A nupuiin Lalram thuhrilhnaa awmze nei taka a tel ve theih nân nausên pawh a enkawl pui thei bawk a ni.—Philippi 2:3, 4 chhiar rawh.
10, 11. (a) Engtin nge naupangte chu Jehova “thununnaah” enkawl chhoh an nih? (b) Engvângin nge Kristian nu leh pa tam takte chuan fak an phu?
10 Puitling taka fa enkawlnaah chuan, naupang mamawh chaw te, thawmhnaw te, awmna tûr in te, leh a hrisêlna enkawlte bâkah thil tam tak pawh a tel a ni. A bîk takin he tâwpna hun chhe tawh takah hian naupangte chuan an nunpui tûr nungchang tehna ṭhate chu an naupan têt aṭanga an zir a ngai a ni. Naupangte chu “Lalpa thununnaah leh zilhnaah chuan” an enkawl tûr a ni a. (Eph. 6:4) He “thununaah” hian an naupan têt aṭanga enkawl an harsat hun an tleirâwl chhuah chhoh thlenga an rilrua Jehova ngaihtuahna tuhsak a tel a ni.—2 Tim. 3:14, 15.
11 Isua’n a zirtîrte hnêna “hnam tina mi zirtîrahte siam” tûra a hrilh khân nu leh pate’n an fate chu zirtîr lo ni tûrin an ṭanpui tûr a ni a tihna pawh a ni chiang hle. (Mt. 28:19, 20) He khawvêlin ṭhalaite nasa taka a nêksâwr avângin chu chu thil harsa tak a ni. Chuvângin, an fate Kristian inpumpêk ni tûra enkawl thei nu leh pate chuan kohhran chhûnga mi zawng zawngte fak chu an phu a ni. Nu leh pa puitling tak anga an rinna leh an rinawmna hmangin khawvêl thununna chu an “ngam” tawh a ni.—1 Joh. 5:4.
Chhan Ropui Tak Avânga Nupui Pasal Neih Loh, A Nih Loh Leh Fa Nei Loh
12. Engvângin nge Kristian ṭhenkhatte’n nupui pasal nei rih lo va awm an thlan?
12 ‘Hun hi tihtawia a awm’ avâng leh “khawvêl awm dân hi a boral mêk” avângin Pathian thu chuan nupui pasal nei lo va awm a sâwtnate ngaihtuah tûrin min fuih a. (1 Kor. 7:29-31) Chuvângin Kristian ṭhenkhat chuan an dam chhûnga nupui pasal nei lova awm emaw, nupui pasal neih hmaa hun engemaw chen nghah hrih emaw chu an thlang a ni. Nupui pasal neih loh avânga an neih zalênna chu mahni hmasial thiltumte ûm nâna an hman loh avângin an fakawm hle. Mi tam takte chuan “buai lova” Jehova rawng an bâwl theih nân nupui pasal nei lovin an awm a ni. (1 Korinth 7:32-35 chhiar rawh.) Kristian nula tlangvâl ṭhenkhatte chuan pioneer an thawk emaw, Bethel-ah rawngbâwlin emaw an awm a ni. Mi tam takte chuan Ministerial Training School-a kal thei tûra tlin tumin Jehova inawpna pâwl atâna ṭangkai lehzual theih dân an zawng a ni. Dik takin, hun bi kima hun engemawti chhûng rawngbâwl tawhte’n a hnua nupui pasal an neih pawhin, a hma kumtea an thil zir hlu takte chu an la hlâwkpui tho tho a ni.
13. Engvângin nge Kristian nupa ṭhenkhatte chuan fa neih loh an thlan?
13 Khawvêl hmun ṭhenkhatah chuan chhûngkaw nun inthlâkthlengna dang a awm leh a—nupa tuak tam takte chuan fa neih loh an thlang a. Ṭhenkhatte tân chuan ei leh bâr harsat vâng a ni a; mi dangte tân erawh chuan hlawh ṭha tak hmuhna hna thawh theih nân a ni thung. Kristiante zîngah pawh fa nei lo an awm a. Anni erawh chuan Jehova rawng an bâwl ṭhat lehzual theih nâna ti an ni. Fa nei lo mah se, nupa nun pângngai an nei lo tihna a ni lo. An nei ngei a ni. Amaherawhchu, inneihna aṭanga lo awm malsâwmna ṭhenkhatte chu Lalram hmakhua dah hmasak an duh avângin chân an inhuam a ni. (1 Kor. 7:3-5) Chutiang nupa tuak ṭhenkhatte chuan Jehova leh an unaute rawngbâwlsakin, bial leh district te an kan a, Bethel-ah te an awm bawk. Mi dangte erawh chuan pioneer emaw, missionary hna emaw an thawk bawk. Jehova chuan an hna thawh leh a hming chunga hmangaihna an lantîr chu a theihnghilh lo vang.—Heb. 6:10.
‘Tisaa Hrehawm Tawrhna’
14, 15. Kristian nu leh pate’n ‘tisaa hrehawm’ eng nge an tawrh theih?
14 Tirhkoh Paula chuan Kristian nupui pasal neite’n “tisaah chuan hrehawm an tuar ang” tih a sawi a. (1 Kor. 7:28) Chutah chuan kawppui te, an fa te, a nih loh leh an nu leh pa tar tawh takte hrisêl lohna a tel thei a. Tin, naupang enkawlnaa harsatna leh rilru hahnate pawh a tel thei bawk. He thuziak ṭantirh lama sawi tawh ang khân Bible chuan “ni hnuhnûngahte” hmachhawn harsa “hun khirh takte” a awm tûr thu a sawi lâwk a ni. Chûng thil hmachhawn harsa takte zîngah chuan “nu leh pa thu âwih lo” naupangte an tel a ni.—2 Tim. 3:1-3.
15 Kristian nu leh pate tân naupang enkawl chu thil harsa tak a ni a. Tûn lai “hun khirh takte” avânga lo awm nghawng ṭha lote lak ata hum kan ni bîk si lo. Chuvângin, Kristian nu Eph. 2:2, 3) Chu indonaah chuan hnehtu a nih ziah theih loh lehnghâl! Kristian chhûngkuaa sei lian fa tuemawin Jehova rawngbâwl a bânsan chuan, chu chu Pathian thutaka fate enkawl puitlin tum rântu nu leh pate tân chuan ‘hrehawmna’ a tling tak zet a ni.—Thuf. 17:25.
leh pate chuan ‘he khawvêlin’ an fate chunga a neih theih thununna hlauhawm tak chu an do reng a ngai a ni. (“Hrehawm Nasa Tak A Awm Dâwn Si A”
16. Eng ‘hrehawmna’ chungchâng nge Isua’n a hrilh lâwk?
16 Amaherawhchu, inneihna leh fa enkawlna chungchânga ‘hrehawm’ engpawh chu a aia nasa zâwk hrehawmna dang lo thleng tûr nên chuan khaikhin rual a ni lo. Isua chuan a lo kal lehna leh khawvêl tâwpna chungchâng a hrilh lâwknaah heti hian a sawi: “Hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” tiin. (Mt. 24:3, 21) Isua chuan a hnuah mipui tam tak chuan he “hrehawm nasa tak” pal tlangin an dam khawchhuak dâwn tih a târ lang a ni. Amaherawhchu, Setana khawvêl chuan remna duh tak Jehova Thuhretute theih tâwp chhuaha a beihna hnuhnung ber chu a chhunzawm zêl ang. Chu chu puitling kan ni emaw, naupang kan ni emaw kan zâ atân hun khirh tak a ni ngei ang.
17. (a) Engvângin nge hma lam hun chu inring tâwk taka kan hmachhawn theih? (b) Inneih leh fa enkawl chungchâng kan thlîr dân chu engin nge thunun ang?
17 Mahselangin, hma lam hun chu kan lo pâwngpaw hlauh lutuk tûr a ni lo. Jehova laka rinawm nu leh pate chuan an fa naupangte chu an rualin Pathianin a humhim an inbeisei thei a ni. (Isaia 26:20, 21 chhiar rawh; Zep. 2:1-3; 1 Kor. 7:14) Mahse, tûnah erawh chuan, kan tûn lai hun khirhzia kan hriatna chuan he tâwpna huna inneih leh fa enkawl chungchâng kan ngaih dân chu thunun rawh se. (2 Pet. 3:10-13) Chutiang kawng chuan nupui pasal nei kan ni emaw, ni lo emaw fa kan nei emaw, nei lo emaw pawh ni se, kan nun chuan Jehova leh Kristian kohhran chu a chawimawiin, a fak ang. (w08 4/15)
[Footnote-te]
^ par. 3 Live With Jehovah’s Day in Mind tih lehkhabu phêk 125-naa ‘Inmâk Hi A Haw Si A,’ tih hnuaia mi chu en rawh.
^ par. 5 Nupa kâra harsatna neite chuan inneihna chungchânga thuziak Vênnainsâng September 15, 2003, leh Awake! January 8, 2001 (English) ang chite ennawn chu an hlâwkpui ang.
^ par. 6 Questions Young People Ask—Answers That Work bu bung 30-naa, “Nupui Pasal Nei Tûrin Ka Inpeih Tawh Em?,” tih chu en rawh.
Ennawn Nân
• Engvângin nge Kristian ṭhalai chuan hmanhmawh taka nupui pasal a neih loh vang?
• Naupang enkawl chhohnaah eng thil nge tel?
• Engvângin nge Kristian tam takte chu nupui pasal nei lo va an awm a, an nei a nih pawhin fa nei lo va an awm?
• Kristian nu leh pate’n eng ang ‘hrehawm’ nge an tawrh theih?
[Zirlai Atâna Zawhnate]
[Phêk 23-naa milem]
Engvângin nge Kristian ṭhalaite tân nupui pasal neih hmaa nghah deuh hrih chu a finthlâk?