Pathian Fate Zînga Mi Ni Ang Che
Pathian Fate Zînga Mi Ni Ang Che
KOREA Rama Indona a thlen hnu kum 30 vêlah chuan indo avânga chhûngkhatte nêna inhlohte an inhmuhkhâwm leh nâna ṭanpui tûrin Korea rama chanchin puangchhuaktu pâwl, Korean Broadcasting System chuan ruahmanna thar a siam chhuak a. Chu mi avâng chuan mi 11,000 aia tamte chu an hmangaihte nên an inhmukhâwm leh a, lâwm avânga mittui tla chungin an inkuah vawng vawng a ni. The Korea Times chuan: “Korea mite chanchinah chuan hetiang rênga a ruala lâwmna mittui sên a la ni ngai lo,” a ti.
Brazil ramah chuan, Cézar-a chu a nausên laiin ba rulh nân a pa’n a hmang a. A hnu kum sâwm vêla a hringtu nu ngei mai a han hmuh chuan a lâwm êm êm a, fa anga lo pawmtu a nu leh pa hausa takte chu kalsanin a nu hnênah chuan a khawsa ta a ni.
Hun rei tak chhûng an inṭhen leh an inhloh tawh hnua chhûngkua an han inhmuh khâwm leh hian a va hlimthlâk ṭhîn tak êm! Bible chuan mihringte hi Pathian chhûngkua ata lungchhiatthlâk taka ṭhen hran an nih dân chu a sawi a. Tin, tûna hlim taka an inpumkhat leh tâk dân pawh a sawi tel bawk. Chu chu engtin nge a lo thlen? Chu hlimna chu engtin nge i neih theih ang?
Pathian Chhûngkua A Inṭhen Darh Dân
Fakna hla phuahtu chuan Pathian Jehova chungchâng heti hian a sawi a ni: “Nunna tuikhur chu i hnênah a awm si a,” tiin. (Sâm 36:9) Jehova chu chhûngkaw hung tak, lei leh vâna finna nei thil siam rinawmte tân Pa ber a ni a. Chu a chhûngkuaah chuan a thlarau lam fa vântirhkohte hmanga din vân lam pêng leh a lei lam fate anga sawi theih mihringa din lei lam pêng chu a tel a ni.
Thuziak hmasaa kan sawi tawh anga Pathian lei lam fa hmasa ber Adama a hel khân, mihringte chu an Pa hmangaihna nei tak leh anmahni Siamtu hnên ata lungchhiatthlâk taka ṭhen hran an lo ni a. (Luka 3:38) Hei hi Adama’n a helna hmanga amah leh a fa la piang lote tâna Pathian fate nih theihna chanvo ropui tak a chân vâng a ni. Pathian chuan a chhiahhlawh Mosia kal tlangin chu thilthleng rah chhuah chu heti hian a sawi a ni: “Ṭha lo takin a chungah an ti a, [Pathian] fate an ni lo, an sawisêl kaina a ni,” tiin. An “sawisêl kaina,” a nih loh leh mi sual an nihna chuan anni chu Pathian thianghlim leh kawng engkima ṭha famkim lak ata chu a inmihrantîr a ni. (Deuteronomy 32:4, 5; Isaia 6:3) Tichuan, mihringte chu bo leh pa nei lo anga sawi theih an lo ni ta a ni.—Ephesi 2:12.
Rom 5:8, 10) Mihringte chuan Pathian laka an inlâk hran tâkah chuan Setana rorêlna râwng tak leh an rochun sual leh ṭhat famkim lohna chu an tuar a. (Rom 5:12; 1 Johana 5:19) Mi sualte chu Pathian chhûngkaw zîngah an tel leh thei ang em? Mihring ṭha famkim lote chu Adama leh Evi-te thil sual tih hma ang khân, Pathian fate an ni leh thei tak zet ang em?
Mihringte inlâkhranna nasatzia sawi uar nân Bible chuan Pathian chhûngkaw zînga tel lote chu “hmêlma” tiin a sawi. (Pathian Laka Inmihran Fate Lâkkhâwmna
Jehova chuan amah hmangaihtu mi ṭha famkim lote hlâwkpui atân ruahmanna duhawm tak a siam a. (1 Korinth 2:9) Tirhkoh Paula chuan: “Pathianin Kristaah chuan khawvêl hi amah nên inremin a siama an bawhchhiatnate chu bawhchhiatnaa ruatsak lovin, inremna thu min kawltîr kha,” tiin a hrilhfiah a ni. (2 Korinth 5:19) Thuziak hmasain a hrilhfiah tawh angin, Pathian Jehova chuan Isua Krista chu kan sualte tlan nân min pe a. (Matthaia 20:28; Johana 3:16) Tirhkoh Johana chuan lâwm takin: “Ngai teh u, Pain mi hmangaihna chu a va nasa êm! ‘Pathian faahte’ min vuah tâk hi,” tiin a ziak. (1 Johana 3:1) Chutiang chuan, thuâwih mihringte tân Jehova chhûngkaw zînga mi nih leh theihna kawng chu a inhawng a ni.
Pathian chhûngkaw zînga lâkluh leh mihring zawng zawngte chuan an Pa vâna mi enkawlna hnuaiah inpumkhatna ropui tak nei dâwn mah se, anni chu pâwl hniha lâkkhâwm an nihzia Bible-in a târ lan dân chu chhinchhiah rawh. Heti hian kan chhiar a ni: “Hun bi kim khawsak hunah [Pathian] lâwmzâwng (engkim—vâna thil awmte, lei chunga thil awmte pawh—Kristaa fâwk khâwm tûr chu),” tiin. (Ephesi 1:9, 10) Engvângin nge Pathianin chutianga thil a tih?
Jehova’n a fate pâwl hniha a ṭhen hranna chuan a chhûngkaw inremna tûrin a ṭanpui a. Chutianga a ṭhen hran nachhan chu hriatthiam harsa a ni lo. Pathian chhûngkua chu a len êm avângin ram pakhat anga tehkhin theih a ni a. Khawi ramah pawh hian, khua leh tuite thlamuang taka an awm theih nâna sawrkârna chelh tûrin mi tlêm tê thlan chhuah an ni ṭhîn. Mihring sawrkâr a engamah hian thlamuanna dik tak chu a pe lo ngei mai; mahse, Pathian chuan a chhûngkaw tân sawrkâr ṭha famkim a siam a ni. Pâwl hmasa zâwk “vâna thil awmte” chu vâna sawrkâr, a nih loh leh Lalram din tûra Jehova thlan a fate hmanga din a ni a. Chuta ṭangin, “leiah chuan ro an rêl” dâwn a ni.—Thu Puan 5:9, 10.
Leia Pathian Fate
Jehova chuan “lei chunga thil awmte” pawh chu a la khâwm bawk a, thu danga sawi chuan, a tâwpa lei lama a fate ni tûrin lei pum puia mi maktaduai têlte chu a la khâwm mêk a ni. Khawngaihna ngah tak Pa ber a nih angin, lei lama a fate chu ram hran hrana mi mah ni se, inrem taka an inpumkhat theih nân hmangaihna a neih ang chu a zirtîr a ni. Tharum thawh hmang te, mahni hmasial te, nungchang bawlhhlawh te, leh Pathian thu âwih lote pawh ‘Pathian nêna inrem’ tûra sâwm an ni.—2 Korinth 5:20.
Pathianin a fate anga amah nêna inrem tûra a sâwmna hnâwltute chungchâng hi engtin nge ni ang? Jehova chuan a chhûngkuaa thlamuanna leh inremna a awm theih nân chûng mite chungah chuan dân a kengkawh dâwn a ni. “Pathian ngaihsak lo mite rorêl leh boral nî” a awm ang. (2 Petera 3:7) Pathian chuan lei ata helhmangho chu a thianfai ang a. Chu chu a thuâwihte tân a va hahdamthlâk dâwn êm!—Sâm 37:10, 11.
Remna Lal Isua kum sâng rorêlna hunin a rawn zui ang a, chu mi hun chhûng chuan Pathian hmangaihna chhâng lêttute chu Adama hloh tâk nun ṭha famkim nei tûra zawi zawia siam ṭhat chhoh an ni ang. Mitthite hial pawh kaihthawh an ni bawk ang a. (Johana 5:28, 29; Thu Puan 20:6; 21:3, 4) Chutiang chuan Pathianin a thutiam: “Thil siam [mihring] zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tih chu a hlen dâwn a ni.—Rom 8:21.
In Pa Vâna Mi Nên Inremin Awm Rawh U
He thuziak ṭantirha kan sawi lan tâk Cézar-a leh Korea mi tam takte chuan an chhûngte nêna inzawm khâwma hun hlimawm tak nei tûrin ṭan an lâk ṭheuh a ngai a. Korea rama awmte chuan inhmu khâwm leh tûra an ruahmanna siam chu an zawm a ngai a; tin, Cézar-a chuan fa anga lo
pawmtu a nu leh pate chu a kalsan a ngai bawk a ni. Chutiang bawkin, vâna in Pa, Pathian Jehova nêna inrem leh tûr leh a chhûngkaw zînga mi ni tûrin tumruhna nei chunga hma i lâk a ngai thei a ni. Eng nge i tih tâk ang le?Pathian chu i Pa anga hnaih tûr chuan amah leh a thutiama rinna nghet tak i neih theih nân a Thu, Bible chu i zir ngei tûr a ni. Pathianin ti tûra a hrilh che chu i tâna ṭha tûr a ni tih i lo hria ang. Bible chuan Kristiante hnêna: “Fate chunga tih angin Pathianin in chungah a ti a nih hi; pa thunun loh fa tu nge awm ngai le?” tia a sawi avângin Pathian thununna leh zilhhauna chu i pawm a ngai bawk ang.—Hebrai 12:7.
Chutianga hmalâkna chuan i nun pumpui a thlâk danglam ang. Bible chuan: “In rilru thlarauvah chuan atharin lo awm ula, mihring thar, thutak felna leh thianghlimnaa Pathian anga siam khân inthuam bawk ula,” a ti. (Ephesi 4:23, 24) Tichuan tirhkoh Petera fuihna thu: “Fa thuâwihte angin, in hriat loh laia in hmân lai châknate anga awm lovin,” tih hi zâwm ang che u.—1 Petera 1:14.
I Chhûngkaw Dik Tak Chu Zawng Chhuakin
Cézar-a chuan a hringtu nu a han hmuh chhuah chuan, u pahnih, mipa leh hmeichhia a lo nei reng tih a hriat avângin a lâwm hle a. Chutiang bawkin, i Pa vâna mi i han hnaih chuan Kristian Kohhran chhûngah unaunu leh unaupa tam tak i nei a ni tih i hmu chhuak ang. Anni chu i han kawm chian chuan tisa lama i chhûngte ai maha hnaih zâwk niin i inhria ang.—Tirhkohte 28:14, 15; Hebrai 10:24, 25.
I Pa dik tak leh i unau dik takte nêna inhmuhkhâwm leh theihna hun remchâng chu i tân hawn a ni a. Hlimna i tawn tûr chu Cézar-a leh Korea rama mi tam takte’n an chhûngte nêna an inhmuh leh huna an hlimna anga nasa a ni thei ang. (w08 3/1)
[Phêk 7-naa milem]
Kum 19 mi Cézar-a leh a hringtu nu