I Ṭhatlai Hian Jehova Rawngbâwl Thlang Rawh
I Ṭhatlai Hian Jehova Rawngbâwl Thlang Rawh
“I thil zir leh i thil hriat chianahte chuan awm reng rawh.”—2 TIM. 3:14, 15.
1. Engtin nge Jehova’n a Thuhretu ṭhalaite rawngbâwlna chu a thlîr?
ṬHALAITE rawngbâwlna thianghlim hlan chu Jehova tân a pawimawh êm avângin, ani chuan an chungchângah thlarauva thâwk khum hrilh lâwkna pakhat a chhinchhiahtîr a ni. Fakna hla phuahtu chu: “I mite chu i thiltihtheihna nîah chuan mahni duh thuin an inpe ṭhîn: thianghlim mawinaah, zîng pum chhûng aṭangin, i tleirâwl daifîm chu i nei a,” tiin a zai a. (Sâm 110:3) Ni e, Jehova chuan a rawngbâwl duh ṭhalaite chu a ngai hlu hle a ni.
2. Tûn laia ṭhalaite chuan an hma lam hun tûr chungchângah eng ang nêksâwrna nge an tawh?
2 Nangni Kristian kohhran chhûnga awm ṭhalaite u, Jehova hnênah in inpumpêk tawh em le? Ṭhalai tam takte chuan Pathian dik rawngbâwl thlan chu harsa an ti mai thei a. Sumdâwng hausa takte, zirtîrtute, leh a châng chuan chhûngkaw zînga mite leh ṭhen rualte ngei pawhin ṭhalaite chu hausak âtchilhna lama tlân tûrin an fuih ṭhîn. Thlarau lam thiltum ûmtu ṭhalaite chuan khawvêl mite hmuhsit an hlawh fo ṭhîn a. Mahse, a nihna takah chuan Pathian dik rawngbâwl hi i ûm theih nun dân kawng ṭha ber chu a ni. (Sâm 27:4) He mi chungchângah hian, hêng zawhna pathumte hi han ngaihtuah teh: Engvângin nge Pathian rawng i bâwl ang? Mite thusawi leh thiltih chu engpawh ni se, engtin nge Pathian hnêna i inpêkna kawngah i hlawhtlin theih ang? Pathian rawngbâwlna lama eng hun remchâng ṭha tak nge i tân inhawng thei?
Jehova Rawngbâwl Hi Kan Tih Tûr Dik Awmchhun A Ni
3. Jehova thil siamte chuan eng nge min neihtîr tûr a nih?
3 Engvângin nge Pathian nung leh dik rawng chu i bâwl ang? Thu Puan 4:11 chuan a chhan bul ber chu min hrilh a ni: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin. Jehova chu thil awm zawng zawngte Siamtu ropui tak a ni. Leilung hi a va mawi êm! Thingte, pangpârte, ramsate, tuipuite, tlângte, leh tui khawh thlate hi Jehova siam vek a ni. “Leilung hi [Pathian] hausaknain a khat” tih Sâm 104:24 chuan a sawi. Jehova’n he lei leh a chhûnga awm thil ṭhate chên thei tûra hmangaih taka taksa leh rilru min pêk avângin kan va lâwm tak êm! Thil siam ropui takte avânga kan lâwmna chuan a rawngbâwl duhna min neihtîr tûr a ni lâwm ni?
4, 5. Josua chu Pathian thiltih engte’n nge Jehova hnaihtîr?
4 Jehova rawng kan bâwl nachhan tûr dang leh chu Israelte hruaitu Josua thusawi aṭang hian kan hre thei a ni. A thih dâwn hnaihah Josua chuan Pathian mite hnênah: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a,” tiin a hrilh a ni. Josua’n chûng thute chu engvângin nge a sawi theih?—Jos. 23:14.
5 Josua chuan Aigupta rama seilian a nih angin, Israelte hnêna Jehova’n ram pêk a tiam thu chu a hre ngei ang. (Gen. 12:7; 50:24, 25; Ex. 3:8) Tichuan, Jehova’n chu a thutiam chu Aigupta rama Hri Sâwm lêntîrna hmanga a rawn thlen famkimtîr ṭan dân leh mi luhlul tak Pharaoa chu Israel mite Aigupta ram a chhuahsantîr luih dân pawh Josua chuan a hmu a. Tuipui Sen ata chhan chhuahte zîngah chuan a tel a, tuipuiin Pharaoa leh a sipaite a lem pil lai chu a lo hmu reng a ni. Josua chuan, Sinai Thlalêr, “thlalêr zau tak leh râpthlâk tak” pal tlanga zinkawng thui tak an zawh chhûng pawh khân Jehova’n Israelte mamawh zawng zawng a pêk dân chu a hmu a. An zînga pakhat tê mah chu tuihâl emaw, rilṭâm emawin an thi lo. (Deut. 8:3-5, 14-16; Jos. 24:5-7) Israel mite’n Kanaan hnam chak takte hneha Ram Tiam an lâk a ngaih hunah pawh, Josua chuan amah leh Israel mi dangte biak Pathianin anmahni a ṭanpui dân chu a hmu bawk a ni.—Jos. 10:14, 42.
6. Engin nge Pathian rawngbâwl châkna nei tûra ṭanpui thei che?
6 Josua chuan Jehova’n A thutiamte a hlen tih a hria a. Hei vâng hian: “Kei leh ka chhûngte erawh hi zawngin LALPA rawng a nia kan bâwl dâwn ni,” tiin a sawi thei a ni. (Jos. 24:15) A nih leh, tu rawng nge i bâwl ve dâwn? Pathian dikin a thutiam a hlen tawhte leh a la hlen chhuah tûrte i ngaihtuah hian, Josua anga a rawngbâwl châkna chu i nei ve em?
7. Engvângin nge tuia baptisma chan chu tih tûr pawimawh tak a nih?
7 Jehova thil siamte leh a thutiam ropui tak leh innghahna tlâk takte ngaihtuah ngunna chuan, A hnêna inpumpêk tûrin a chêttîr mai che ni lovin, chu i inpumpêkna chu tuia inhnimphûma lantîr tûrin a chêttîr tûr che a ni. Baptisma chan hi Pathian rawngbâwl duhte tâna tih tûr pawimawh tak a ni tih kan Entawn Tûr Isua chuan a ti chiang hle. Messia anga rawng a bâwl hmain, Baptistu Johana hnênah baptisma chang tûrin a inhlân a ni. Engvângin nge Isua’n chutianga a tih? “Mahni duhzâwng ti tûrin vân aṭanga lo chhuk ka ni lo va, mi tîrtu duhzâwng ti tûra lo chhuk ka ni zâwk e,” tiin a hnuah a sawi a ni. (Joh. 6:38) A Pa duhzâwng ti tûra a inhlanna târ lan nân, Isua chuan baptisma a chang a ni.—Mt. 3:13-17.
8. Engvângin nge Timothea chuan Pathian biak a thlan a, eng nge i tih ngai mai thei?
8 Kristian ṭhalai Timothea, Jehova’n a hnua hna tam tak leh chanvo hlu tam tak a pêka chungchâng pawh chu ngaihtuah teh. Engvângin nge Timothea chuan Pathian dik biak a thlan? Bible chuan ‘thil a zir a, thil a hriat chian’ thu min hrilh a ni. (2 Tim. 3:14, 15) Pathian Thu i zir tawh a, a zirtîrnate a dik ngei a ni tih i hriat chian tawh chuan, Timothea dinhmun angah i ding tihna a ni. Tûnah chuan thu tlûkna i siam a ngai ta. I nu leh pate chu i thil tih duh chungchâng engvângin nge i hriattîr loh vang? Kohhran upate rualin, anni chuan Baptisma chan nâna Bible-a thil phûtte hre thiam tûrin an ṭanpui thei che a ni.—Tirhkohte 8:12 chhiar rawh.
9. Baptisma i channa chuan mi dangte chu engtin nge a nghawng theih?
9 Baptisma i chan chuan, chu chu Pathian dik biak nâna bul ṭanna ṭha tak a ni ang. Chutianga hma i lâk chuan kawng hla tak intlânsiaknaa tel ṭan ang i ni a, a lâwmman chu tûna Pathian duhzâwng tihna aṭanga lo awm hlimna leh chatuana nunna a ni. (Heb. 12:1-3) Tin, chu chuan intlânsiaknaa tel reng tawh i chhûngte leh Kristian kohhrana i ṭhiante hlimna a thlen bawk ang. A pawimawh berah chuan, Jehova thinlung i tilâwm dâwn a ni. (Thufingte 23:15 chhiar rawh.) Mi dangte chuan Jehova biak i thlan chhan chu an hre thiam lovin, i thu tlûkna siam chu an sawisêl pawh a ni thei ang a. An dodâl hial che pawh a ni thei bawk ang. Mahse, chûng harsatnate chu hlawhtling takin i tuar chhuak thei a ni.
Mi Dangin An Sawisêl Emaw, An Dodâl Emaw Hunah Che
10, 11. (a) Pathian rawngbâwl i thlanna chungchângah mite’n eng ang zawhnate nge an zawh mai theih che? (b) Isua’n biakna dik chungchânga zawhnate a chhân dân aṭangin eng nge i zir theih?
10 Jehova rawngbâwl i thlanna chuan i school kalpuite leh i chhûngkhatte chu a ngaihna hre lovin a siam mai thei a. He kawng i zawh chhan leh i rinna chungchâng chu an zâwt mai thei che a ni. Engtin nge i chhân ang? Thu tlûkna i siam chhan hrilhfiah thei tûr chuan i ngaihtuahna leh i rilru chu i chhût chian a ngai ngei ang. Tin, i rinna chungchânga zawhnate chhânna kawngah Isua aia entawn tûr ṭha zâwk tunge awm thei ang?
11 Juda sakhaw hruaitute’n thawhlehna chungchâng Isua an zawhfiah khân, ani chuan Bible thu ṭhenkhat an ngaihtuah hmaihte chu a kawhhmuh a ni. (Ex. 3:6; Mt. 22:23, 31-33) Lehkha ziaktu pakhatin thupêk ropui ber a zawh khân, Isua chuan Bible châng inâwm tak chu a sawi chhuak a. Chu pa chu Isua chhânna avângin a lâwm hle a ni. (Lev. 19:18; Deut. 6:5; Mk. 12:28-34) Isua Bible hman dân leh a thusawi dân avâng chuan “mipuite chu an inṭhen a, an inkhing ta a,” chutiang chuan amah dotute chuan a chungah chhiatna an thlen thei lo. (Joh. 7:32-46) I rinna chungchâng zawhnate i chhân hunah Bible hmang la, “thuhnuairawlh tak leh ṭihdêk chungin” chhâng ang che. (1 Pet. 3:15) An zawhna che chhân dân tûr i hriat loh chuan, i hriat loh thu leh i zir chian tûr thu hrilh rawh. Chu mi hnuah, December thla apianga chhuak Vênnainsâng Zawnawlna hmangin emaw, i ṭawng hriat engemaw bera neih theih a nih chuan Watch Tower Publications Index emaw, Watchtower Library CD-ROM emaw hmangin chu mi chungchâng chu zir chiang ang che. Inbuatsaih lâwkna ṭha tak i neih chuan, ‘mi tin engtia chhân ṭheuh tûr nge ni tih i hria ang.’—Kol. 4:6.
12. Engvângin nge tihduhdahna i intihlunghnualtîr loh vang?
12 Pathian hmêlma, Diabol-Setana chuan khawvêl a thunun tlat avângin, Pathian rawngbâwl tûra i thu tlûkna siam leh i rinna chungchâng bâkah, zawhna dangte pawh i hmachhawn thei a ni. (1 Johana 5:19 chhiar rawh.) Mi zawng zawngte fak leh pawm nih inbeisei chu thil inâwm lo tak a ni a, dodâlnate pawh i tâwk thei bawk a ni. Mi ṭhenkhat chuan an ‘sawichhe thei che a,’ chutiang chuan an tichhunzawm zêl pawh a ni thei. (1 Pet. 4:4) Mahse, nangmah chauh i ni lo tih inhre reng ang che. Isua Krista pawhin tihduhdahna a tuar bawk a ni. Tirhkoh Petera pawhin a tuar bawk a, heti hian a ziak a ni: “Duh takte u, in zînga fiahna nasa tak lo awm, nangmahni fiahna tûra in chunga lo thleng hi, thilmak in chunga lo thleng angin mak ti suh u. Krista tuarnaahte tuarpuitute in nihzia ang zêlin lâwm zâwk rawh u,” tiin.—1 Pet. 4:12, 13.
13. Engvângin nge Kristiante chu tihduhdahna an tawh huna an hlim theih?
13 Kristian i nih avânga tihduhdahna leh dodâlna i tâwk chu hlim nachhan tûr pakhat a ni. Engvângin nge? Khawvêl pawm theih nihna chuan Pathian tehnate ni lovin, Setana tehnate milin i nung tih a târ lan dâwn avângin. Isua chuan: “Mi zawng zawngin an fak hunah che u in chung a la pik ang, chutiang bawkin an thlahtuten zâwlnei derte chunga an tih kha,” tiin a vaukhân a ni. (Lk. 6:26) Tihduhdahna chuan Jehova rawng i bâwl avângin Setana leh a khawvêl chu i lakah an thinrim a ni tih a târ lang. (Matthaia 5:11, 12 chhiar rawh.) Tin, “Krista hming avânga hau . . . nih” chu hlim chhan tûr a tling a ni.—1 Pet. 4:14.
14. Miin tihduhdahna tuar reng chunga Jehova laka a rinawm tlat hian, chu chuan eng ang thil ṭhate nge a rah chhuah theih?
14 Tihduhdahna tâwk reng chunga Jehova laka i rinawmna hian a lo berah pawh thil ṭha pali tal a rah chhuak a ni. Pathian leh a Fapa chungchâng i hril tihna a ni a. Rinawm taka i tawrhchhuahna chuan i Kristian unaute a tichak bawk a. Jehova la hre ngai lo thlîrtu ṭhenkhat chu amah zawng tûrin a chêttîr a. (Philippi 1:12-14 chhiar rawh.) Tin, fiahnate tuar chhuak thei tûra Jehova’n chakna a pêk dân che i han hriat chuan, amah i hmangaihna chu a zual a ni.
“Kawngka Zau Tak” I Tân A Inhawng
15. Eng “kawngka zau tak” nge tirhkoh Paula tân inhawng?
15 Tirhkoh Paula chuan Ephesi khuaa a rawngbâwlna chungchângah: “Kawngka zau tak leh sâwt tak ka tân a inhawng si a,” tiin a ziak a ni. (1 Kor. 16:8, 9) Chu chu, chu khawpuia chanchin ṭha hrilh leh zirtîr siama rawngbâwlna ropui tak chu a ni a. Chu kawngkâah chuan lûtin, Paula chuan mi tam takte chu Jehova chanchin zira Amah be tûrin a ṭanpui a ni.
16. Engtin nge hriak thih a la bângte chu ‘kawngka inhawngah’ an luh?
16 Kum 1919 khân, chawimawi tawh Isua Krista chuan hriak thih a la bângte hmaah ‘kawngka a hawng’ a. (Thup. 3:8) Chu kawngkâah chuan lûtin ṭhahnem ngai lehzuala chanchin ṭha hrilin, Bible thutak an zirtîr ṭan ta a ni. An rawngbâwlna rah chhuah chu eng nge ni? Chanchin ṭha chuan kâwlkil a thleng tawh a, mi maktaduai sarih vêlte chuan Pathian khawvêl thara chatuana nun beiseina an nei tawh a ni.
17. Engtin nge ‘kawngka zau tak leh sâwt takah’ chuan i luh theih ang?
17 “Kawngka zau tak leh sâwt tak” chu Jehova chhiahhlawhte tân a la inhawng reng a. Chuta lûtte chuan chanchin ṭha hrilhnaa an han thawh tam lehzual hian hlimna leh lungawina an nei a ni. Nangni Jehova chhiahhlawh ṭhalaite u, mi dangte ‘chanchin ṭha ring’ tûra ṭanpui theihna chanvo sâng tak in chan chu eng anga nasain nge in hlut? (Mk. 1:14, 15) Regular pioneer emaw, auxiliary pioneer emaw thawh chu i ngaihtuah tawh ngai em? Chu bâkah, Kingdom Hall saknaa tel te, Bethel-a rawngbâwl te, missionary anga rawngbâwl te, leh special pioneer thawhte chu in zînga mi tam takte neih theih chanvo hlu dangte chu a ni. Setana khawvêl suaksual hi a tâwp ṭêp tawh avângin, hêng Lalram rawngbâwlnaa tel hi a hmanhmawhthlâk tawlh tawlh a ni. Hun a la awm lai hian ‘kawngka zau takah’ i lût ang em?
“LALPA Ṭhatzia Chu Temchhin Tehrêng U”
18, 19. (a) Engin nge Davida chu Jehova rawngbâwl châkna nasa tak nei tûra ṭanpui? (b) Davida chuan Pathian rawng a bâwl avângin a inchhîr ngai lo tih engin nge târ lang?
18 Pathian thâwk khum fakna hla phuahtu Davida chuan mi dangte chu “LALPA ṭhatzia chu temchhin tehrêng u,” tiin a sâwm a. (Sâm 34:8) Hmân lai Israel Lal Davida chu berâm vêngtu naupang a nih laiin, Jehova chuan ram sakawlhte lak ata a chhanhim a. Pathian chuan Goliatha a beihnaah a ṭanpuiin, chhiatna dang tam takte lakah pawh a chhanhim bawk a ni. (1 Sam. 17:32-51; Sâm 18, a chunga thuziak) Pathian ngilneihna nasa tak avângin, Davida chu: “Aw LALPA ka Pathian, nangin thilmak i tihte leh keimahni lam i ngaihtuahnate hi a tam êm êm mai a, chûng chu i hmaa tihlan sên rual a ni lo,” tia ziak tûra chêttîrin a awm a ni.—Sâm 40:5.
19 Davida’n Jehova chu a hmangaih nasa hle a, a thinlung leh rilru zawng zawnga Amah fak chu a duh a ni. (Sâm 40:8-10 chhiar rawh.) Kumte a ral zêl hnuah pawh, Pathian dik biakna tûra a nun a hman avângin Davida chu a inchhîr ngai rêng rêng lo. Pathian ngaihsaka nun chu atân chuan ro hlu ber, tlukpui nei lo hlimna hnâr a ni. A tar hnuah, Davida chuan: “Aw Lalpa PATHIAN, nang chu ka beiseia chu i ni si a: ka naupan têt ata ka rina chu i ni. A ni, Aw Pathian, ka tara ka lu ṭuah hnu pawhin mi kalsan lul suh ang che,” a ti. (Sâm 71:5, 18) Davida taksa chu chak lo tawlh tawlh mah se, Jehova a rinchhanna leh Amah nêna an inṭhianna chu a nghet tawlh tawlh a ni.
20. Engvângin nge Pathian rawngbâwl chu i nun hman theih dân kawng ṭha ber a nih?
20 Josua te, Davida te, leh Timothea te nun chuan Jehova rawngbâwl chu i nun hman dân ṭha ber a ni tih finfiahna a pêk belh a ni. He khawvêla rei lo te chhûng daih hausakna chuan ‘thinlung zawng zawng leh thlarau zawng zawnga Jehova rawngbâwlna’ aṭanga i dawn tûr hlâwkna tluantlingte chu a tluk thei lo. (Jos. 22:5) Ṭawngṭaia Jehova hnêna inpumpêkna i la neih loh chuan, ‘Engin nge Jehova Thuhretu ni lo tûra min dang?’ tiin inzâwt ang che. Baptisma chang tawh Jehova betu i nih tawh chuan, i nunah hlimna neih belh i duh em? I duh a nih chuan, Pathian rawng bâwl tam lehzual la, thlarau lamah hmasâwn chho zêl ang che. A dawta thuziak chuan tirhkoh Paula entîrna zuina hmanga thlarau lama hma i sâwn theih dân a kawhhmuh ang che. (w08 5/15)
Engtin Nge Kan Chhân Ang?
• Pathian rawng kan bâwl nachhan tûr pahnih sawi rawh.
• Engin nge Timothea chu Pathian rawngbâwl thlang tûra ṭanpui?
• Engvângin nge tihduhdahna hmachhawn hunah i din ngheh tlat ang?
• Eng ang rawngbâwlna hun remchângte nge i tân inhawng thei?
[Zirlai Atâna Zawhnate]
[Phêk 22-naa milem]
Jehova rawngbâwl chu nun kawng ṭha ber a ni
[Phêk 23-naa milem]
I rinna chungchânga zawhnate i chhâng thei em?