Pathian Ram Hmanga Chhan Chhuahna A Hnai!
Pathian Ram Hmanga Chhan Chhuahna A Hnai!
“I ram lo thleng rawh se. I duhzâwng vâna an tih angin leia mi’n ti rawh se.”—MT. 6:10.
1. Isua zirtîrna bulpui ber chu eng nge ni?
ISUA KRISTA’N Tlâng Chunga Thusawi a pêk khân, a zirtîrna bulpui ber khaikhâwmtu lal ṭawngṭaina a telh a. A zirtîrte chu Pathian hnêna: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûrin a zirtîr a ni. (Mt. 6:9-13) Isua chuan “thu hril leh Pathian ram chanchin ṭha thlen chungin khaw lian leh khaw tê te a fang zêl a.” (Lk. 8:1) Krista chuan a hnungzuitute chu: ‘A ram leh a felna zâwng hmasa zâwk rawh u,’ tiin a fuih a ni. (Mt. 6:33) He thuziak i zir hian, a chhûnga thute rawngbâwlnaa i hman theih dân tûr zawng rawh. Entîr nân, hêng zawhnate i chhân dân tûr ngaihtuah rawh: Lalram thuchah chu eng anga pawimawh nge ni? Mihringte chu eng ata nge chhan chhuah an ngaih? Pathian Ram chuan engtin nge chhan chhuahna a pêk ang?, tih te hi.
2. Lalram thuchah chu eng anga pawimawh nge ni?
2 Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi lâwk a. (Mt. 24:14) Pathian Ram chanchin ṭha hi thil pawimawh ber a ni. Tihah chuan, chu chu khawvêla thuchah pawimawh ber a ni miau si a! Leilunga Jehova Thuhretute kohhran 1,00,000 chuanga awm Pathian chhiahhlawh maktaduai sarih vêlte chu tlukpui nei lo thuhrilh rawngbâwlnaah an tel a, mi dangte hnênah vâna Lalram din a nih tawh thu chu an hriattîr a ni. Chu chu Pathianin leia rorêltu tûr vânah sawrkâr a din tihna a nih avângin, chanchin ṭha a ni a. Lalram rorêlna hnuaiah chuan, vâna Jehova duhzâwng tih a nih angin leiah pawh tih a ni ve tawh ang.
3, 4. Leia Pathian duhzâwng tih a nih hunah chuan, chu chuan eng nge thlen ang?
3 Leia Pathian duhzâwng tih a nih hunah chuan, mihringte chungah eng nge lo thleng ang? Jehova chuan “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.” (Thup. 21:4) Kan rochun sual leh ṭhat famkim lohna avângin mite chu an dam lovin, an thi tawh hek lo vang. Pathian hriatrengnaa awm mitthite chuan chatuana nun theihna hun remchâng an nei ang, Bible chuan: “Mi felte leh fel lote thawhlehna a awm ang,” tih a tiam avângin. (Tirh. 24:15) Indo te, nat te, ṭâm te, a awm tawh lo vang a, lei pum pui chu paradis huan mawi taka chantîr a ni ang. Tûna ramsa hlauhawm takte pawh chu mihringte nên inrem takin an awm ang a, ramsa inkârah pawh inremna a awm bawk ang.—Sâm 46:9; 72:16; Is. 11:6-9; 33:24; Lk. 23:43.
4 Lalram rorêlna aṭanga chutiang malsâwmna ropui takte a lo thlen dâwn avângin, Bible-in chu mi huna nun chungchângah: “Thuhnuairawlhte . . . chuan ram hi an luah ang a: remna chênin an hmuingîl ang,” tia a sawi pawh hi a mak lo. Mahse, buaina siamtute chungah eng nge lo thleng ang? Pathian Thu chuan: “Rei lo tê achinah mi suaksual chu a awm tawh dâwn si lo,” tiin a sawi lâwk a. Amaherawhchu, “LALPA nghâktute erawh chuan ram hi an luah ang.”—Sâm 37:9-11.
5. Tûn lai khawvêl chungah hian eng nge lo thleng ang?
5 Hêng zawng zawng lo thleng thei tûr chuan, tûn lai khawvêl hi a chhûnga thil awm inkalh tak tak, a sawrkârnate, a sakhuanate, leh a sumdâwnnate nên lama paihbo vek a ngai ang. Chu tak chu a ni, vân sawrkârin a rawn tih tûr chu. Zâwlnei Daniela chu: “Chûng lalte [tûna awm mêkte] nîah chuan vân Pathianin [vânah] ram a . . . din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng [tûn laia] ram zawng zawngte hi a tikeh sawmin a tiral zâwk ang a, kumkhuain a ding reng ang,” tih sawi tûra thlarauva thâwk khumin a awm a ni. (Dan. 2:44) Pathian Ram—vâna sawrkârna thar—chuan leia mipui tharte chungah ro a rêl ang a. “Vân tharte leh lei thar,” a awm ang a, chu mi ‘chhûngah chuan felna a awm ang.’—2 Pet. 3:13.
Tûnah Hian Chhan Chhuahna Kan Mamawh Lehzual
6. Engtin nge Bible chuan he khawvêl suahsualzia chu a sawi?
6 Setana te, Adama te, leh Eve te’n a chhia leh a ṭha mahnia inrêl an duh avânga Pathian laka an hel khân, mihringte chuan kawng hlauhawm tak an zawh ṭan a. Helna a chhuah aṭanga kum 1,600 aia tam a liam hnu, khawvêl pum huapa Tuilêt a thlen hma khân, Pathianin “leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a.” (Gen. 6:5) Tuilêt a thlen hnu kum 1,300 vêlah, khawvêl dinhmun a chhiat êm avângin, Solomona chuan: “Mi nung la damte aiin mitthi thi tawhte chu awhawm ka ti zâwk; tin, anmahni ve ve ai pawhin lo la piang lo, nî hnuaia thiltih ṭha lo la hmu lo nih chu a ṭha zâwk,” tiin a ziak a ni. (Thur. 4:2, 3) Solomona hun aṭanga kum 3,000 vêl a liam hun, kan tûn lai hunah pawh hian suahsualna chu a la hluar reng a ni.
7. Engvângin nge Pathian chhan chhuahna chu tûn hma zawng aia mamawh zual a nih?
7 Suahsualna hi hun rei tak chhûng awm reng tawh mah se, Pathian Ram hmanga chhan chhuahna chu tûn hma zawng aia mamawh zual a ni a. Kum 100 kalta chhûnga khawvêl dinhmun chu a hma zawng aiin a chhia a, chhiat lam a la pan telh telh a ni. Entîr nân, Worldwatch Institute chuan: “Kum zabi 20-na chhûnga indona avânga thi zât chu, AD kum zabi khatna aṭanga kum 1899 chhûnga indona zawng zawng avânga thite let thum lai a ni,” a ti. Kum 1914 aṭangin mi maktaduai 100 chuang laite chuan indona avângin nun an chân tawh a ni. Encyclopedia pakhat chhût dân chuan, Khawvêl Indopui II-naah mi maktaduai 60 lai an thi a ni. Ram ṭhenkhatin nuclear râlthuam an nei tawh a, khawvêl mihring zawng zawng deuhthaw tihchimih theihna an nei a. Science leh damdawi lama thiamna hian hma a sâwn hle chung pawhin, ṭâm chuan naupang maktaduai nga laite nun chu kum tinin a la la cheu a ni.—What Does the Bible Really Teach? lehkhabu bung 9-na en rawh.
8. Kum sâng tam tak chhûng mihring rorêlna chuan eng nge rinhlelh rual lohva a finfiah?
8 Mihringte ṭan lâkna chuan suahsualna pung tûr chu a dang thei lo va. He khawvêl politics lam, sum dâwnna lam, leh sakhaw lam inkaihhruainate chuan mihringte mamawh bulpui ber remna, ei leh bâr kham khawp neihna, leh hrisêlna chu a pe thei hek lo. Hêng hian mihringte tawh mêk harsatna lian takte chu tihvensak a hnêkin, a belhchhah zâwk mah a ni. Dik takin, kum sâng tam tak chhûng mihring rorêlna chuan hêng thu: “Mihring awm dân chu mahni thu mai a ni lo tih ka hre ta: tungchhova kal mihringah hian a pheikhai hruai tûr a awm lo,” tihte dikzia a finfiah a. (Jer. 10:23) Ni e, “mi, mi dang chungah pawi khawpin a intilal ṭhîn.” (Thur. 8:9) Chu bâkah, “thil siam zawng zawngte chu tûn thlengin rûm leh nauvei na tuarin an awm hlawm” a ni.—Rom 8:22.
9. Kristiante chuan hêng “ni hnuhnûngahte” hian eng ang dinhmun nge hmuh an inbeisei?
9 Kan hun chungchângah Bible chuan: “Ni hnuhnûngahte chuan hun khirh takte a lo awm ang,” tiin a sawi lâwk a. Mihring rorêlna hnuaia ni hnuhnûng dinhmunte a sawi hnuah, hrilh lâwkna chuan: “Mi sual leh tihdertute erawh chu mi bum leh buma awmin an sual zual deuh deuh vang,” tiin a sawi. (2 Timothea 3:1-5, 13 chhiar rawh.) Chu chu Kristiante beisei chu a ni, ‘khawvêl pum hlûm hi mi sual [Setana] thu thua a awm’ avângin. (1 Joh. 5:19) Amaherawhchu, chanchin ṭha tak mai chu Pathianin amah hmangaihtute a chhan chhuak thuai tûr hi a ni. He khawvêl chhe chak tak lak ata hi chhan chhuah an ni ang.
Chhan Chhuahna Rin Tlâk Awmchhun Chu
10. Engvângin nge Jehova chu chhan chhuahna rin tlâk tak Lo Chhuahna awmchhun a nih?
10 Chanchin ṭha i han hrilh hian, Jehova chu chhan chhuahna rin tlâk tak Lo Chhuahna awmchhun a ni tih hrilhfiah rawh. Amah chauh chuan eng ang khawpa dinhmun ṭha lo hnuaiah pawh a chhiahhlawhte chhan chhuak tûrin thiltihtheihna leh duhna a nei a ni. (Tirh. 4:24, 31; Thup. 4:11) Jehova chuan a mite chu engtik lai pawhin a chhan chhuak ang a, a thutiam a hlen ziah ang tih kan chiang thei a ni: “Ka ruat ang tak hian a awm . . . ang,” tia chhia a chham avângin. A thu chu “engmah tih nei lovin [a] hnênah a kîr leh lo vang.”—Isaia 14:24, 25; 55:10, 11 chhiar rawh.
11, 12. Pathianin a chhiahhlawhte hnênah eng thutiam nge a pêk?
11 Jehova chuan mi suaksualte chunga ro a rêl hunah chuan a chhiahhlawhte a chhan chhuak dâwn tih a tiam tlat a. Pathianin zâwlnei Jeremia chu sual lian tak titute hnêna huaisen taka thu sawi tûra a tirh khân, a hnênah: “Hlau suh,” a ti. Engvângin nge? “Chhan chhuak tûr chein i hnênah ka awm,” tiin a chhan a sawi a ni. (Jer. 1:8) Chutiang bawkin, Jehova’n Sodom leh Gomorra a tihchhiat dâwn khân, Lota leh a chhûngte hmun hima hruai chhuak tûrin vântirhkoh pahnih a tîr a. “Tin, LALPA chuan Sodom leh Gomorra khaw chhûngah chuan . . . kât leh mei a sûrtîr” a ni.—Gen. 19:15, 24, 25.
12 Jehova chuan a duhzâwng titute chu khawvêl pum huap pawhin a chhan chhuak thei a. Hmân lai khawvêl suaksual chu Tuilêta a tihboral khân, ani chuan “Nova, felna thu hriltu chu, mi dang pasarih nên a chhan dam” a ni. (2 Pet. 2:5) Jehova chuan tûn lai khawvêl suaksual a tihboral hunah mi felte chu a chhan chhuak leh ang. Chuvângin a Thu chuan: “Nangni leia mi thuhnuairawlh zawng zawng . . . te u, LALPA chu zawng rawh u; felna zawng ula, thuhnuairawlh tum rawh u: LALPA thinrimna nîah chuan thuhrûkin in awm thei mahna,” tiin a sawi a ni. (Zep. 2:3) Chu khawvêl pum huapa tihchhiatna zârah, ‘mi tluangte chu leilungah hian an chêng ang a, mi suaksualte erawh chu leilung ata tihboral an ni ang.’—Thuf. 2:21, 22.
13. Engtin nge Jehova chhiahhlawh thi tawhte chu chhan chhuah an nih ang?
13 Amaherawhchu, Pathian chhiahhlawh tam takte chu natna te, tihduhdahna te, leh thil dang avâng tein an boral tawh a. (Mt. 24:9) A nih chuan, engtin nge hêng mite hi chhan chhuah an nih tâk ang? A tîra kan lo hmuh tawh angin, “mi felte . . . thawhlehna a awm ang.” (Tirh. 24:15) Jehova’n a chhiahhlawhte a chhan chhuahna tûr engmahin a dang thei lo tih hriat chu a va thlamuanthlâk êm!
Sawrkârna Fel Chu
14. Engvângin nge Pathian Ram chu sawrkârna fel a ni tih kan rin tlat theih?
14 I rawngbâwlnaah, Jehova vân lam Lalram chu sawrkârna fel a nihzia i hrilhfiah thei a. Chutiang a nih chhan chu Pathian mize ropui tak, dikna te, felna te, leh hmangaihna ang chite a târ lan vâng a ni. (Deut. 32:4; 1 Joh. 4:8) Pathianin Lalram chu lei chunga rorêl tûra tling ber, Isua Krista kutah a dah a. Jehova chuan hriak thih Kristian 1,44,000 te chu Krista ro luahpuitute anga lei chunga a rorêlpui ni tûra vâna lâk chhoh chu a tum bawk a ni.—Thup. 14:1-5.
15. Pathian Ram rorêlna leh mihring rorêlna khaikhin rawh.
15 Mihring ṭha famkim lote rorêlna leh Isua leh 1,44,000 te rorêlna chu a va inthlau dâwn tak êm! He kawvêl chunga rorêltute chu an nunrâwng châwk ṭhîn a, an khua leh tuite chu indonaahte teltîrin mi maktaduai tam takin an thih phah ṭhîn a ni. Bible-in “ṭanpuina,” a nih loh leh chhandamna min pe thei lo mihringte ring lo tûra min fuih pawh hi a mak lo ve! (Sâm 146:3) Mahse, Krista chuan rilru put hmang dikin ro a va rêl dâwn tak êm! Isua chuan: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in . . . tân chawlhna inhmu ang. Ka nghâwngkawl chu a nuam a, ka phur pawh a zâng a ni,” tiin a sawi.—Mt. 11:28-30.
Ni Hnuhnûngte A Tâwp Thuai Dâwn!
16. Engtin nge hêng ni hnuhnûngte hi a tâwp ang?
16 He khawvêl hi kum 1914 aṭangin a ni hnuhnûng, a nih loh leh a “tâwpna” hunah a awm reng tawh a. (Mt. 24:3) Rei lo têah chuan, Isua’n “hrehawm nasa tak” tia a koh chu a lo thleng ang. (Matthaia 24:21 chhiar rawh.) Chu hrehawmna tehkhin rual loh chuan Setana khawvêl zawng zawng hi a rawn titâwp ang. Mahse, chu hrehawm nasa tak chu eng angin nge a inṭan ang a, engtin nge a tâwp ang?
17. Bible chuan hrehawm nasa tak a inṭan hunah eng nge lo thleng ang a tih?
17 Hrehawm nasa tak chu a lo thleng phut ang. Ni e, “Lalpa Nî” chu “‘Muanna leh himna,’ tia an sawi lai takin” rin loh takin a lo thleng ang. (1 Thessalonika 5:2, 3 chhiar rawh.) Sawi lâwk hrehawmna chu ram tam takin an buaina lian tak takte tiveng thei tûra an inhriat hunah a lo thleng ang a. “Babulon Khaw Ropui,” khawvêl sakhuana dik lo lalram vawilehkhata tihchhiatna chu khawvêl mite’n mak an ti hle ang a. Babulon Khaw Ropui chunga rorêl a nih hunah chuan Lalte leh mi dangte pawhin mak an ti hle bawk ang.—Thup. 17:1-6, 18; 18:9, 10, 15, 16, 19.
18. Setana’n Jehova mite a beihna chu engtin nge Jehova chuan a chhân lêt ang?
18 “Niah te, thlaah te, arsiah te chhinchhiahna” a awm ang a, “mihring Fapa chhinchhiahna chu vânah a lang ang.” Chutih hunah chuan, ‘tlan kan nihna tûr hun a hnaih tâk avângin kan dâk chhuak’ thei ang. (Lk. 21:25-28; Mt. 24:29, 30) Setana, a nih loh leh Goga chuan a sipaite chu Pathian mite a dotîr ang a. Mahse a chhiahhlawh rinawmte beitu chungchângah, Jehova chuan: “Nangni khawihtu chuan a mit nautê a khawih a ni mai,” a ti. (Zak. 2:8) Chuvângin, anmahni tiboral tûra Setana ṭan lâkna chu a hlawhtling lo vang. Engvângin nge? Lal Chungnungber Jehova chuan a chhiahhlawhte chhan chhuak tûra hma a lâk vat dâwn avângin.—Ezek. 38:9, 18.
19. Engvângin nge Pathian vân lam sipaite chuan Setana khawvêl an tichhe dâwn tih kan rin tlat theih?
19 Pathianin hnamte chunga ro a rêl hunah chuan, ani chu ‘Jehova a ni tih an hria ang.’ (Ezek. 36:23) Ani chuan leia Setana khawvêl a la bângte tiboral tûrin, a vân sipaite—Isua Krista kaihhruai thlarau thil siam chhiarsên lohte—chu a rawn tîr ang. (Thup. 19:11-19) Ṭum khat chu vântirhkoh pakhat chauhvin zan khat thil thu-ah Pathian hmêlma “mi nuai khat leh sîngriat leh sângnga a tihlum” tih kan hriat chhuah hian, vân lam sipaite chuan Armageddon-a a vâwrtâwp thleng tûr hrehawm nasa takah leia Setana sûlhnu la awm rêng rêng chu awlsam takin an tiboral dâwn tih kan ring tlat thei a ni. (2 Lal. 19:35; Thup. 16:14, 16) Setana leh a ramhuaite chu kum sâng khat chhûng leilâwta khung an ni ang a. A tâwpah chuan, anni chu tihboral vek an ni ang.—Thup. 20:1-3.
20. Lalram hmangin Jehova chuan eng nge a tihhlawhtlin dâwn?
20 Lei ata suahsualna paih bo a ni tawh ang a, mi felte chu he leiah hian chatuanin an nung reng tawh ang a. Jehova chu Chhan Chhuaktu Ropui a ni ang. (Sâm 145:20) Lalram hmangin, a lal chungnunna chu thiam a chantîr ang a, a hming a tithianghlim bawk ang; tin, lei atâna a thiltum ropui tak chu a tihlawhtling bawk ang. Rawngbâwlnaa he chanchin ṭha i hrilhna kawngah leh “chatuana nun duhna rilru dik tak nei apiang” te chu Pathian Ram hmanga chhan chhuahna a hnai tawh tih hre thiam tûra i ṭanpuina kawngah hlimna nasa tak hmu ang che!—Tirh. 13:48, NW. (w08 5/15)
Kan Hre Chhuak Em?
• Engtin nge Isua chuan Lalram pawimawhna chu a sawi uar?
• Engvângin nge tûn hma zawng aia chhan chhuahna mamawh lehzual a nih?
• Hrehawm nasa tak chhûngin eng thilte nge kan beisei theih?
• Engtin nge Jehova chuan Chhan Chhuaktu Ropui a nihzia a târ lan?
[Zirlai Atâna Zawhnate]
[Phêk 16, 17-naa milemte]
Pathian Thu chuan kan hun atân hian tlukpui nei lo khawvêl pum huapa thuhrilhna chungchâng a sawi lâwk
[Phêk 19-naa milem]
Jehova chuan Nova leh a chhûngkua a chhan chhuah angin, keini pawh min chhan chhuak thei
[Phêk 20-naa milem]
Jehova chuan “mittui zawng zawng a hrufai ang a; thihna a awm leh thei tawh lo vang.” —Thup. 21:4