“I Hmangaihna Hmasa Ber Kha” Nei Reng Rawh
“I Hmangaihna Hmasa Ber Kha” Nei Reng Rawh
“I thil neih sa kha vawng tlat rawh.”—THUP. 3:11.
1, 2. Jehova chungchâng i zirte chu thutak a ni tih i pawm lai khân engtin nge i awm?
JEHOVA’N thu âwih mihringte hnêna a pêk beiseina ropui tak i zir ṭan lai kha i la hre reng em? Sakhaw dang vuan ṭhîn i nih chuan, Bible hmanga Pathian thiltumte an hrilhfiah che emaw, tûn hmaa i hriatthiam loh zirtîrnate an hrilhfiah che emaw hunah engtin nge i awm? Bumin i awm tih i inhre chhuak pawh a ni thei. Mahse, tûnah chuan hrilhhriat i nih tâk avângin i va lâwm tak êm! Kristian nu leh pate enkawl seilen i nih chuan, Jehova chungchâng i zirte hi thutak a ni tih i pawm a, chu mi mila nun i tum tâk laia i awm dân kha i la hre thei em?—Rom 12:2.
2 Thlarau lama i unau tam takte chu an hlim hlein, anni chuan Jehova an hnaih a, a hîpa an awm avânga an lâwmzia chu an hrilh thei ang che. (Joh. 6:44) An lâwmna chuan Kristian rawngbâwlnaa tel tûrin a chêttîr a. An hlimna a nasat êm avângin, an thiltawn chu mi zawng zawng hnêna hriattîr an duh a ni. Chutiang thiltawn chu i nei ve em?
3. Isua’n lehkha a thawn lai khân, Ephesi khuaa kohhranah eng dinhmun nge awm?
3 Kum zabi khatnaa Ephesi khuaa Kristian kohhrante a biak khân, Isua chuan an “hmangaihna hmasa ber” chungchâng a sawi a. Anni chuan mize ṭha tam tak an nei a, mahse, tûn hmaa Jehova an hmangaihna an lantîr ṭhin chu zawi zawiin a dai ṭan a ni. Chuvângin Isua chuan an hnênah: “I thiltih te, i thawh rimzia leh i chhelzia te, mi sualte i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a; chhelna i nei bawk a, ka hming avângin i tuar tawh a, i chau si lo va. Nimahsela demna che ka nei a ni, i hmangaihna hmasa ber kha i bân tâk avângin,” tiin a hrilh a ni.—Thup. 2:2-4.
4. Engvângin nge Ephesi kohhranho hnêna Isua thuchah chu tûn lai hun atân a pawimawh?
4 Thu Puan bua Ephesi kohhran leh kohhran dangte hnêna Isua zilhna thute chu kum 1914 hnu lama hun engemawti chhûnga hriak thih Kristiante dinhmun han thlîr chuan a âwm hle a. (Thup. 1:10) Mahse, tûnah pawh hian Kristian ṭhenkhat chuan Jehova leh Kristian thutak an “hmangaihna hmasa ber kha” an hloh mai thei. Chu chu rilrua vawng rengin, nangma thiltawn ngei hriat chhuahna leh ngun taka ngaihtuahna hmanga Pathian leh thutak atâna hmangaihna leh ṭhahnemngaihna i lo neih tawhte i vawn reng a, i tihthar a, i tihpun bawk theih dân i lo en ang u.
Engin Nge Thutak I Nei Tih Rin Nghehtîr Che?
5, 6. (a) Kristian tinte chuan eng nge an rin tlat ang? (b) Jehova Thuhretute chuan thutak an zirtîr a ni tih engin nge rin nghehtîr che? (c) Engin nge mi chu a hmangaihna hmasa ber kha tithar tûrin ṭanpui thei?
5 Jehova hnêna inpumpêk tawh phawt chuan “Pathian duhzâwng, a ṭha leh lawm tlâk leh, ṭhat famkim chu” mahniin an ‘hre fiah,’ a nih loh leh an fiah hmasa tûr a ni. (Rom 12:1, 2) Chutiang tihna kawnga tel pakhat chu Bible thutak zir hi a ni a. Jehova Thuhretute’n thutak an zirtîr a ni tih mite rin nghehtîrtu chu a inang lo thei ang a. Ṭhenkhat chuan an rilru thlâkthlengtu chu Bible-a Pathian hming an chhiar emaw, mitthite dinhmun dik tak an hriatthiamna emaw chu a ni tih an hre chhuak a. (Sâm 83:18; Thur. 9:5, 10) Mi dangte rilru khawihtu chu Jehova mite zînga hmangaihna awm hi a ni. (Joh. 13:34, 35) Mi dang lehte erawh chu khawvêla mi nih loh dân an hriatnain an rilru a thlâk thung. Anni chuan Kristian dikte chu politics lama buainate emaw, indona engpawh emawah an tel thei lo tih an ring tlat a ni.—Is. 2:4; Joh. 6:15; 17:14-16.
6 Mi tam takte tân, hêngte leh thil dangte hi Pathian an hmangaihna hmasa ber kai thotu a ni a. Thutak a ni tih nangmah rin nghehtîrtu thilte ngaihtuah nân hun hmang rawh. Mi tin hian dinhmun hrang leh mize hrang an nei ṭheuh va, chuvângin Jehova i hmangaih chhan leh a thutiamte i rin nachhan bul berte chu mi dangte’n amah an hmangaih chhan leh an rin nachhan nên a inang lo thei ang. Chûng a chhante chu i zir ṭantirh lai ang bawkin tûnah pawh Pathian i hmangaih chhan leh a thutiamte i rin nachhan a la nih reng a rinawm hle. Thutak a inthlâk danglam lo. Chuvângin, chûng thilte ngaihtuahna chuan thutak i hmangaihna hmasa ber kha a tithar reng thei a ni.—Sâm 119:151, 152; 143:5 chhiar rawh.
I “Hmangaihna Hmasa Ber Kha” Tizual Zêl Rawh
7. Engvângin nge thutak kan hmangaihna hmasa ber kha kan tihzual zêl a ngaih a, chu chu engtin nge kan tih theih?
7 Jehova hnêna i inpumpêk aṭangin i nunah thil tam tak a inthlâkthleng tawh mai thei a ni. Thutak i hmangaihna hmasa kha a pawimawh a; mahse, hun a ral zêl chuan i rinna fiahtu dinhmun dangte i hmachhawn theih nân hmangaihna thûk zâwk i mamawh a. Amaherawhchu, Jehova chuan chutiang hunah chuan a ṭanpui che a ni. (1 Kor. 10:13) Chuvângin, hun a liam ruala i thiltawn neihte pawh i tân a hlu hle. Chûng chuan i hmangaihna hmasa ber kha tizual zêl tûrin a ṭanpui che a, chûng chu Pathian duhzâwng a ṭha leh lawm tlâk i fiah theihna kawng dang a ni bawk.—Jos. 23:14; Sâm 34:8.
8. Engtin nge Jehova chu Mosia hnênah a insawi a, engtin nge Israelte chuan Pathian chu an hriat chian lehzual?
8 Entîr nân, Jehova’n Aigupta sal tânna ata chhan chhuah a tum thu a puan chhuah laia Israelte dinhmun hmachhawn chu ngaihtuah ta ila. Pathian chuan Mosia hnênah a nihna sawiin: “Ka duh ang chu ka ni ang,” a ti. (Ex. 3:7, 8, 13, 14, NW) A nihna takah chuan, Jehova chuan a mite chhan chhuah nâna a ṭûl ang ang a ni dâwn tih a sawina a ni. Chu mi hnua thilthlengahte leh dinhmun avânga a ṭûl dân azirin, Israelte chuan Jehova’n a mize pêng chi hrang hrang—Engkimtitheia ang te, Rorêltu ang te, Hruaitu ang te, Chhan Chhuaktu ang te, Sipai ang te, leh Chhawmdâwltu ang tea—a târ lan chu an hmu a ni.—Ex. 12:12; 13:21; 14:24-31; 16:4; Neh. 9:9-15.
9, 10. Eng ang dinhmunin nge mi chu Pathian hre tûra ṭanpui thei a, engvângin nge chutiang thiltawnte hriat chhuah chu a ṭhat?
9 I dinhmun chu hmân lai Israelte dinhmun nên a inang lo va. Chutiang mah ni se, Pathianin a mi malin a ngaihsak che tih rin nghehtîrtu thilte i tawn ngei a rinawm a, chûng chuan i rinna a tinghet a ni. Jehova chuan kawng engemawti takin Chhawmdâwltu, Thlamuantu, leh Zirtîrtu a nihzia a lantîr pawh a ni thei ang. (Isaia 30:20b, 21 chhiar rawh.) A nih loh leh, i ṭawngṭaina a chhâng che a ni tih inhriatna chiang tak i nei pawh a ni thei a. Dinhmun khirh tak i tâwk pawh a ni thei a, Kristian unaute’n an ṭanpui che a ni thei. A nih loh leh, mahnia zirna i neih aṭangin i dinhmun atâna hman theih tûr Bible chângte i hmu pawh a ni thei bawk.
10 Chutiang i thiltawnte chu mite hnêna hrilh tûr ni ta la chuan, ṭhenkhat chuan i phûr angin an phûrpui vak lo che pawh a ni thei. Tihah chuan, chûng chu thilmak thleng a ni si lo. Mahse, thil pawimawh tak angin i thlîr a. A ni, Jehova chu i tân a ṭûl ang ang chu a ni. Thutaka i awm tawh chhûng hunte kha ngaihtuah rawh. I nunah hian Jehova mi mal ngaihsakna vawi khat aia tam i tawn chu i hre chhuak thei em? I hre chhuak thei a nih chuan, chûng thilte leh chûng avânga i awm dânte hriat rengna chuan, chutih hun laia Jehova i hmangaihna chu i thinlungah a kai tho leh thei a ni. Chutiang i thiltawnte avâng chuan lâwm hle rawh. Chûng chu ngun takin ngaihtuah rawh. Jehova’n a mi malin a ngaihsak che a ni tih finfiahna a ni a, chu mi i rin tlatna chu tuman an chhuhsak thei lo vang che.
Inbih Chiang Rawh
11, 12. Kristianin thutak a hmangaihna a daih ṭan chuan, eng nge a chhan ni thei ang a, eng zilhna thu nge Isua’n a pêk?
11 Tûn hmaa i neih ang Pathian leh thutak hmangaihna chu nei tawh lova i inhriat chuan, chu chu Pathian lama inthlâkthlengna a awm vâng a ni lo. Jehova chu a danglam ngai si lo. (Mal. 3:6; Jak. 1:17) Tûn hma lama a ngaihsak che ang bawk khân, tûnah pawh hian a la ngaihsak reng che a ni. Chuti a nih si chuan, Jehova nêna in inlaichînna thlâkthengtu chu eng nge ni thei ang? Tûn hma aiin nêksâwrna i tâwk nasa zâwkin, nuna lungkhamnate chuan a chîmbuai zâwk che a ni thei ang em? Tûn hma chuan i ṭawngṭawi nasa zâwkin, i zir taima zâwkin, leh ngun taka ngaihtuahna i nei zîng zâwk pawh a ni thei. Rawngbâwlnaah tûn aiin ṭhahnem i ngai zâwkin, kohhran inkhâwmnaah i tel ṭha zâwk em?—2 Kor. 13:5.
12 I inbih chian hnuah pawh chutiang inthlâkthlengna i neih i hre lo mai thei a, mahse, i lo nei a nih chuan engin nge chutianga thlâkthlengna thlen? Mahni chhûngkaw tâna ei in tûr indaih tâwk pêk emaw, i hrisêlna enkawl emaw, a nih loh leh chutiang lam hawi thilte ang chi chhan ṭha tak nei lungngaihnate chuan hun hmâwr tawhzia i hriatna chu a hloh ṭhentîr che a ni thei ang em? Isua chuan a tirhkohte hnênah: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chu mi nî chuan thang âwk angin thâwklehkhatan in chungah a lo thleng phut ang. Chutiang tak chuan lei chung zawng zawnga awmte chungah chuan a thleng ṭheuh dâwn a ni. Chutichuan chûng thil lo thleng tûr zawng zawng chu pumpelh . . . tlâka ruat in nih theihna tûrin, eng lai pawhin ṭawngtai chungin ngaihven rawh u,” tiin a hrilh a ni.—Lk. 21:34-36.
13. Jakoba chuan Pathian Thu chu eng nên nge a khaikhin?
13 Thlarauva thâwk khum Bible ziaktu Jakoba chuan a rinpuite chu Pathian Thu êng ṭanchhana mahni ngun taka inbih chiang tûrin a fuih a. Heti hian a ziak a ni: “Thu ngaithlatute mai ni lovin zâwmtute lo ni zâwk rawh u, chutilochu mahni inbum in lo ni dah ang e. Tupawh thu ngaithlatu nia zâwmtu ni si lo chu mi, dârthlalanga a pianpui hmai ngun taka inen ang chu a ni, a kal bo va, mi eng ang nge a nih a intheihnghilh nghâl si ṭhîn. Amaherawhchu, tupawh dân famkim, zalênna dân hi bih a, chutianga awm reng a, ngaithla a, theihnghilh leh mai ṭhîntu ni lo va, zâwma hna thawk fo ṭhîntu ni zâwk chu, chu mi chu a thil tihah malsâwmin a awm ang,” tiin.—Jak. 1:22-25.
14, 15. (a) Engtin nge Bible chuan i thlarau lam dinhmun tiṭha lehzual tûra a ṭanpui theih che? (b) Eng zawhnate nge ngun takin i ngaihtuah ang?
14 Mi chuan hmuh tlâkin a awm tih a inhriat theih nân dârthlalang a hmang thei a. Entîr nân, mipain a nghâwngawrh chu a awrh sâwi a ni tih a hmuh chuan, a tingîl thei a. Hmeichhiain a sam chu buarchuar deuhva a hmuh chuan, a khuih mâm thei a ni. Chutiang bawkin, Pathian Thute chuan kan nihna inbih chiang tûrin min ṭanpui a. Kan nihna leh Bible-in a sawi kan nih dân tûr kan khaikhin hian, Bible chu dârthlalang angin kan hmang tihna a ni. Mahse, kan lan dik lohna lai kan insiam ṭhat si loh chuan dârthlalanga inen chuan sâwtna a nei dâwn em ni? Pathian ‘dân famkima’ kan thil hmuh ṭanchhana thil kan tih a, chu mi “zâwmtu” kan nih chuan kan fing tihna a ni. Chuvângin, Jehova leh thutak an hmangaihna hmasa dai ṭan nia inhria apiangte chuan hêng zawhnate hi ngun takin an ngaihtuah tûr a ni: “Nunah hian eng ang nêksâwrna nge ka tawh a, chu chu engtin nge ka hmachhawn? Hun kal tawhah engtin nge ka lo hmachhawn tawh ṭhin? Ka hmachhawn dân a inthlâk thleng em ni?’ tiin. Chutianga mahni inbih chianna kan neihnain tlâk chhamna kan nei tih a târ lan chuan, chûng chu ngaihthah suh ang che. Insiam ṭhat a ngaih chuan, tâwi khawmuang lovin insiam ṭha nghâl ang che.—Heb. 12:12, 13.
15 Chutianga ngun taka ngaihtuahna neihna chuan thlarau lama hma sâwn tûra thiltum inâwm takte siam tûrin a ṭanpui bawk ang che. Tirhkoh Paula chuan a rawngbâwlpui Timothea hnênah a rawngbâwlna tihmasâwn tûrin thâwk khum fuihna thu a pe a ni. Ani chuan Timothea chu: “Mi zawng zawng hnêna i sâwtna a lan theih nân chûng thilahte chuan taima la, chûngah chuan inhmang zo rawh,” tiin a fuih. Keini pawhin Pathian Thu êng ṭanchhanin kan tâna sâwtna, a nih loh leh hmasâwnna kan neih theihna tûrte chu ngun takin kan ngaihtuah tûr a ni.—1 Tim. 4:15.
16. Bible ṭanchhana i inbih chian hunah, eng hlauhawm nge i hriat ngai?
16 Ngun taka inbih chianna chuan chak lohna ṭhenkhat a lai lang ngei ang. Chu chuan mi chu a tilungngai mai thei, mahse chutiang chu i chunga a thlen phal suh ang che. Mahni inbih chiannain a tum ber chu hmasâwn kan ngaihna lai hriat chhuah nân a ni miau si a. Setana chuan Krsitianin a ṭhat famkim lohna avânga tlâktlai lo nia inhriatna a neih chu a duh hle a. Dik takin, Pathianin amah chibai bûkna tûra ṭan lâkna zawng zawng chu engah mah a ngai lo tia sawi a ni tawh si. (Job. 15:15, 16; 22:3) Chu chu dâwt a ni a, Isua’n nasa takin a hnial a ni; Pathian chuan min hlut ṭheuh si a. (Matthaia 10:29-31 chhiar rawh.) I ṭhat famkim lohzia i inhriatna chuan inngaitlâwm takin Jehova ṭanpuina zâra hma sâwn a tumtîr tlat zâwk tûr che a ni. (2 Kor. 12:7-10) Natna emaw, kum upatna emaw chuan i duh anga thil a tihtîr thei lo che a nih chuan, thiltum inâwm tâwk insiam la, tlâwm mai lovin i hmangaihna a daih chu phal suh ang che.
Lâwm Chhan Tûr Tam Tak A Awm
17, 18. I hmangaihna hmasa ber tihzualna aṭangin eng hlâwkna nge lo awm?
17 I hmangaihna hmasa ber tizual tûra ṭan i lâk zêlna chu nasa takin i la hlâwkpui ang. Pathian i hriatna chu i tipung theiin, a kaihhruaina duhawm tak avânga i lâwmna chu i tizual zêl thei a ni. (Thufingte 2:1-9; 3:5, 6 chhiar rawh.) Fakna hla phuahtu chuan Jehova rorêlnate “zawm chu lawmman nasa tak neihna a ni ṭhîn” a ti a. Tin, “LALPA thuhriattîr chu a rinawm a, mi mâwl a tifing ṭhîn,” a ti bawk. Chu bâkah, “kawnga mi ṭha famkimte chu an eng a thâwl e, LALPA dân zawhtute chu,” tih a sawi bawk a ni.—Sâm 19:7, 11; 119:1.
18 Lâwm chhan tûr thil tam tak i nei tih chu i pawm ngei ang. Tûn lai khawvêla thilte a thlen chhan i hria a. Pathianin tûn laia a mite tâna a pêk thlarau lama châwmna zawng zawngte chu i hlâwkpui bawk a. Tin, Jehova chuan khawvêl puma a kohhrana a hîp che avâng leh a Thuhretu nih theihna chanvo hlu a pêk che avâng pawhin i lâwm hle bawk a ni. Malsâwmna i dawnte chu chhiar rawh! Chûng chu ziak chhuak dâwn ta la chuan, a tam hle ngei ang. Chutianga tih fona chuan: “I thil neih sa kha vawng tlat rawh,” tih fuihna thu nunpui tûrin a ṭanpui ang che.—Thup. 3:11.
19. Pathian nêna in inlaichînna ngun taka ngaihtuah bâkah, thlarau lama hrisêlna neih reng nân eng nge pawimawh?
19 Hun a liam zêl ruala rinna i neih chhoh dân ngaihtuah chu i thil neih sa vawng tlat tûra ṭanpui theitu che pakhat mai a ni a. He magazine hian thlarau lama hrisêlna neih reng nâna thil pawimawh dangte a târ lang fo ṭhîn. Chûng zîngah chuan ṭawngṭai te, Kristian inkhâwma tel leh chan neih ve te, leh thu hrilh rawngbâwlnaa ṭhahnemngai taka tel te a tel a. Hêngte hian i hmangaihna hmasa ber kha tuaithar reng tûr leh tizual zêl tûrin a ṭanpui thei che a ni.—Eph. 5:10; 1 Pet. 3:15; Jud. 20, 21. (w08 6/15)
Engtin Nge Kan Chhân Ang?
• Engtin nge Jehova i hmangaih ṭan nachhan chu tûnah nangmah tichaktu che a nih theih?
• Tûn thlenga i thil lo tawn tawhte ngaihtuahna chuan eng nge a rin nghehtîr che?
• Engvângin nge Pathian i hmangaihna chu i bih chian ang?
[Zirlai Atâna Zawhnate]
[Phêk 25-naa milem]
Thutak lama hîptu che leh thutak pawmtîrtu che chu eng nge ni?
[Phêk 27-naa milem]
Nangmahah siam ṭhat ngai thil i hmu em?