Jehova Thu Neihna Pawm Rawh
Jehova Thu Neihna Pawm Rawh
“Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va.”—1 JOH. 5:3.
1, 2. (a) Engvângin nge thu neihna hnuaia intukluh chu mi tam takte tân thil duhawm lo tak a nih? (b) Dân zâwm duh lo nia inchhâlte chu mahni thu thuin an awm tak zet em? Hrilhfiah rawh.
“THU NEIHNA” tih thu mal hi tûn laia mi tam takte ngainat a ni lêm lo va. Anni chuan mi dang duhzâwng anga intukluh chu thil duhawm lo takah an ruat a ni ngei ang. “Ka tih tûr tuma min hrilh ka ngai lo,” tia an sawi ṭhin thu chuan dân zâwm duh lote rilru put hmang chu a târ lang a ni. Mahse, hêng mite hi mahni thu thuin an awm tak zet em? Hnai lo ve! Mi tam takte chuan ‘he khawvêl dân anga awm’ mi dang chhiarsên lohte tehna chu an zui mai zâwk a ni. (Rom 12:2) Mahni thu thua awm ahnêkin, Kristian tirhkoh Petera sawi dân takah ‘chhiatna bâwihah’ an tâng zâwk a. (2 Pet. 2:19) ‘He khawvêl dân angin an awm a, boruaka thuneihna lal,’ Diabol-Setana thu thuin an awm a ni.—Eph. 2:2.
2 Ziaktu pakhat chuan: “Ka nu leh pa emaw, puithiam emaw, sakhaw rawngbâwltu emaw, . . . Bible emaw chuan dik nia ka hriat a khawih danglam ka phal lo,” tiin inchhuang takin a sawi a. Mi ṭhenkhat chuan an thu neihna an hmang sualin, kan thu âwihna an phu lo pawh a ni thei ngei ang. Mahse, kaihhruaina hnâwl ṭhak chu a chinfel dân a ni em? Chanchibua chanchin langsâr zualte chuan chhânna lungchhiatthlâk tak min pe a ni. Mihringte’n kaihhruaina an mamawh hle laia chu mi pawm duh kan tlêm tial tial hi a lungngaihthlâk hle.
Thu Neihna Kan Thlîr Dân
3. Engtin nge kum zabi khatnaa Kristiante chuan mihring thu neitute thu chu an pâwngpaw âwih mai lo tih an târ lan?
3 Kristian kan nih angin, khawvêl mite awm dân lovin kan awm a. Chu chu mite’n ti tûra min hrilh apiang kan pâwngpaw tih mai tihna a ni lo. Chutih ahnêkin, a châng chuan thu neitute pawh tiamin, mi dangte duhzâwng kalhin thil kan ti tûr a ni. Chutiang chuan kum zabi khatnaa Kristiante pawhin an lo ti a. Entîr nân, tirhkohte chu thu hril tawh lo tûra khap an nih khân, puithiam lal leh Sanhedrin zînga mi thu neitu dangte an hlauh avângin thu hrilh an bânsan mai lo. Mihring thu neitute thu âwih nân an thil ṭha tih chu an bânsan lo a ni.—Tirhkohte 5:27-29 chhiar rawh.
4. Hebrai Pathian Lehkha Thu aṭanga entîrna engte hian nge Pathian mite chu an danglam a ni tih târ lang?
4 Kristian hun hmaa Pathian chhiahhlawh tam takte pawhin chutiang chuan thil an lo ti a. Entîr nân, “lal thinurna” thlen hial mah se, Mosia chuan “Pharaoa fanua fapaa vuah a duh lo va . . . Pathian mite nêna tihduhdah tuar [chu] a thlang ta zâwk” a ni. (Heb. 11:24, 25, 27) Josefa chuan a chunga chhiatna thlen theitu tûr Potiphara nupui thlêmna chu a hnâwl bawk. (Gen. 39:7-9) Tin, Daniela duhzâwng chu tilrehte hotu tân pawm harsa tak ni mah se, ani chuan “a rilruin lal chaw . . . te chuan intihbawlhhlawh loh a tum tlat” a ni. (Dan. 1:8-14) Hêng entîrnate hian, a sawhkhâwk tûr chu eng pawh ni se, hmân lai aṭang tawhin Pathian mite chu thil dik atân an ding nghet tlat a ni tih a târ lang. Anni chuan duhsakna dawn nân mite duhzâwng an zui mai lo; keini pawhin chutiang chuan kan ti tûr a ni bîk lo.
5. Thu neihna kan thlîr dân chu khawvêl mite thlîr dân nên engtin nge a inan loh?
5 Huaisen taka kan din nghehna chu pâwngpaw luhlulna nêna ngaih pawlh tûr a ni lo va; politics thila lungnih lohna lantîr nâna helte ang lah kan ni hek lo. Chutih ahnêkin, mihringte thu neihna aia Jehova thu neihna pawm kan tum tlat mai zâwk a ni. Mihringte dân siam leh Pathian dân a inkalh hunah, kan tih zâwk tûr chu thlan harsa kan ti lo. Kum zabi khatnaa tirhkohte angin, mihring thu aiin Pathian thu kan zâwm zâwk a ni.
6. Jehova thupêkte zawm chu engvângin nge thil ṭha ber a nih ziah?
6 Engin nge Pathian thu neihna chu pawm tûra min ṭanpui? Thufingte 3:5, 6-a thu: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tih hi kan pawm a. Pathian thil min phût eng pawh hi a tâwpa kan tâna ṭha tûr a ni tih kan ring a ni. (Deuteronomy 10:12, 13 chhiar rawh.) Jehova chu Israelte hnênah ‘an ṭhatna tûra anmahni zirtîrtu, an kalna tûr kawnga hruaitu’ niin a insawi a. Heti hian a sawi belh a ni: “Aw nangni hian ka thupêkte chu lo ngaithla ta ula chu aw! In chunga remna chu lui ang maia awmin, in felna chu tuifinriat fâwnte ang maiin a awm tûr,” tiin. (Is. 48:17, 18) Hêng thute hi kan ring thlap a. Pathian thupêkte zawm chu kan tân thil ṭha ber a ni ziah tih kan ring tlat bawk.
7. Pathianin ti tûra min phût thil pakhat hre thiam ta lo ila, eng nge kan tih ang?
7 Pathian Thua thil phût ṭhenkhatte chu a chhan leh vâng hre kîlkêl lo mah ila, Jehova thu neihna pawmin kan zâwm a ni. Hei hi thil âwih samna a ni lo; amah rinchhanna a ni zâwk. Chu chuan kan tâna ṭha ber tûr Jehova’n a hria tih rin tlatna a târ lang a ni. Thu âwihna chu hmangaihna kan lantîrna a ni bawk; tirhkoh Johana chuan: “Pathian kan hmangaihna chu hei hi a ni, a thupêkte kan zawm hi,” tia a ziak avângin. (1 Joh. 5:3) Mahse, kan hmuh hmaih hauh loh tûr thu âwihna pêng dang pakhat pawh a awm a ni.
Kan Hriat Theihnate Sawizawiin
8. Kan ‘hriat theihnate sawizawi’ chu Jehova thu neihna pawm nên engtin nge a inkûngkaih?
8 Bible chuan “chhia leh ṭha fiah tûrin [kan] hriat theihnate chu [kan] sawizawi” tûr a ni tih a sawi a. (Heb. 5:14) Chuvângin, kan tum chu ngaihtuah lêm lova Pathian dânte zawm tawp a ni lo; chutih ahnêkin, Jehova tehnate ṭanchhana “chhia leh ṭha fiah” thei nih chu kan duh zâwk a ni. Fakna hla phuahtu thusawi: “I dân thu chu ka thinlungah a awm reng e,” tih hi kan sawi ve theih nân, Jehova kawngte finthlâkzia hmuh chu kan duh a ni.—Sâm 40:8.
9. Engtin nge kan chhia leh ṭha hriatna chu Jehova tehnate mila kan siam rem theih a, chutianga tih chu engvângin nge a pawimawh?
9 Fakna hla phuahtu anga Pathian dânte hlut tûr chuan, Bible-a kan thu chhiarte chu ngun taka kan ngaihtuah a ngai a. Entîr nân, Jehova thil phût engemaw tak kan hriat hunah, heti hian kan inzâwt thei: ‘Engvângin nge he thupêk emaw, thu bul emaw hi a finthlâk? Engvângin nge chu mi zawm chu ka tâna ṭha ber tûr a nih? He mi kawnga Pathian thupêk ngaihthahtute chungah eng thil ṭha lo nge thleng ṭhîn?’ tiin. Chutianga kan chhia leh ṭha hriatna chu Jehova kawngte mila kan siam rem chuan, a duhzâwng nêna inmilin thu tlûknate kan siam a rinawm lehzual a. ‘Lalpa duhzâwng chu kan hre zêl’ theiin, thu âwih takin kan zâwm thei ang. (Eph. 5:17) Chu chu thil awlsam erawh a ni lo fo.
Setana’n Pathian Thu Neihna Phiarrûk Dân A Zawng
10. Setana’n Pathian thu neihna phiarrûk a tumna kawng khat chu eng nge ni?
10 Setana chuan Pathian thu neihna chu hmân aṭang tawhin phiarrûk dân a zawng a. A inlâk hranna rilru put hmang chu kawng tam takin a lang a ni. Entîrna atân inneihna chungchânga Pathian ruahmanna siam zah lohna hi ngaihtuah ta ila. Ṭhenkhat chuan innei lova khawsak dun an thlan laiin, a dangte chuan inṭhen dân tûr an dap thung a. Chûng mite chuan Hollywood film changtunu hmingthang tak thusawi chu an pawm ve ve a rinawm. Ani chuan: “Kawppui pakhat chauh neih chu a tu zâwk atân pawh a theih loh. A kawppui laka rinawm emaw, rinawm duh emaw an awm ka hre lo,” a ti. An nupa nun hlawhtlin lohna chungchâng sawiin, film changtupa hmingthang tak pakhat chuan: “Kan dam chhûnga kawppui pakhat chauh neih hi mihringte zia a nih leh nih loh ka chiang chiah lo,” a ti bawk. Heti hian kan inzâwt tûr a ni, ‘Inneihna chungchângah Jehova thu neihna ka pawm nge, khawvêl thlîr dân pawlawh tak hian ka ngaihtuahna a nghawng zâwk?’ tiin.
11, 12. (a) Engvângin nge ṭhalaite tân Jehova thu neihna pawm chu a harsat mai theih? (b) Jehova dân leh thu bulte hnâwl a âtthlâkzia târ langtu thiltawn pakhat sawi rawh.
11 Jehova inawpna pâwla ṭhalai pakhat i ni em? I nih chuan, Jehova thu neihna phiarrûk nâna Setana tum ber i ni mai thei. I ṭhiante leh “tleirâwl châknate” ṭang kawp chuan Pathian thupêkte hi thil khirh tak anga thlîr duhna a neihtîr mai thei che. (2 Tim. 2:22) Mahse, chutiang a thlen chu phal rêng rêng suh. Pathian tehnate finthlâkzia chu hmuh tum rawh. Entîr nân, Bible chuan “inngaih tlânsan” tûrin a hrilh che a. (1 Kor. 6:18) Hetah pawh hian, hêng zawhnate hi inzâwt rawh: “Chu thupêk chu engvângin nge a finthlâk? He mi kawnga thu âwihna hi engtin nge ka hlâwkpui ang?’ tiin. Pathian thupêk an zawm loh avânga a sawhkhâwk ṭha lo tak tuartu tuemaw hriat i nei mai thei a. Anni chu an hlim tak zet em? Jehova inawpna pâwl an belh lai aia nun ṭha zâwk an nei em? Pathian chhiahhlawh zawng zawngte hriat thiam loh hlimna thurûk an chhar chhuak tak zet em?—Isaia 65:14 chhiar rawh.
12 Tûn hma lama Kristian pakhat a hming Sharon-i thusawi: “Jehova dân ka zawm loh avângin natna hlauhawm tak, AIDS ka kai a. Jehova rawngbâwlnaa kum tam tak chhûng hlimna ka neihte chu ka hre chhuak ṭhîn,” tih hi han ngaihtuah teh. Ani chuan Jehova dânte zawm loh âtthlâkzia leh chûngte hlutna hre âwm tak a nihzia chu a hria a ni. Jehova dânte chu kan invênhim nân a ni a. Sharon-i chu a chunga thute a ziak hnu chawlhkâr sarih lekah a boral a. A thiltawn lungchhiatthlâk takin a târ lan angin, Setana chuan he khawvêl suaksual zînga mite hnênah thil ṭha pêk tûr engmah a nei lo. “Dâwt pa” a nih angin, thu tam tak a tiam a, chûng chu Evi hnêna a thutiam ang bawkin pakhat mah a hlen lo. (Joh. 8:44) Jehova thu neihna pawm chu a ṭha ber fo tih a chiang hle.
Inlâk Hran Duhna Lakah Invêng Rawh
13. Inlâk hran duhna rilru put hmang laka kan invên a ngaihna thil pakhat chu eng nge ni?
13 Jehova thu neihna pawmna kawngah hian, inlâk hran duhna rilru put hmang lakah kan invêng tûr a ni. Chapona rilru put hmang chuan tu hnên aṭang mahin kaihhruaina kan mamawh lo tih ngaih dân min neihtîr thei a. Entîr nân, Pathian mite zînga hmahruaitute thurâwn pêk chu kan hnâwl mai thei a. Pathian chuan bâwih rinawm leh fing takin a hun apianga thlarau lam chaw a pêk dân tûr ruahmanna a siam a ni. (Mt. 24:45-47) Hei hi Jehova’n tûn laia a mite a enkawl dân a ni tih inngaitlâwm takin kan pawm tûr a ni. Tirhkoh rinawmte ang ni ang che. Zirtîr ṭhenkhatte an lungnih lohva Isua an zui tawh loh khân, Ani chuan a tirhkohte hnênah: “Nangni pawhin kal bo in duh ve em?” tiin a zâwt a. Petera chuan: “Lalpa, tu hnênah nge kan kal ang? Nangin chatuana nunna thu i nei alâwm,” tiin a chhâng a ni.—Joh. 6:66-68.
14, 15. Engvângin nge Bible zilhna thute lakah inngaitlâwm taka kan intukluh ang?
14 Jehova thu neihna pawmnaah chuan a Thu ṭanchhana pêk fuihna thute pawm pawh a tel a. Entîr nân, bâwih rinawm leh fing tak chuan ‘menga ngaihven reng’ tûrin min fuih reng ṭhîn a ni. (1 Thes. 5:6) Chutiang fuihna pêk chu mite “mahni inhmangaihtu te, tangka ngainatu te” an nihna hêng ni hnuhnûng chhûng atân hian a âwm hliah hliah a ni. (2 Tim. 3:1, 2) Chutiang rilru put hmang tlânglâwn takte chuan min nghawng thei ang em? Thei e. Thlarau lam thil ni lo thiltumte hian thlarau lamah min âwimu thei a, a nih loh leh hausak âtchilhna rilru put hmang min neihtîr thei a ni. (Lk. 12:16-21) Chuvângin, Setana khawvêla hluar tak mahni hmasialna nun kawng hnâwl tûra Bible zilhna thu zawm hi a va finthlâk tak êm!—1 Joh. 2:16.
15 Bâwih rinawm leh fing tak pêk chhuah thlarau lam chaw chu upate kal tlangin tualchhûng kohhranho hnênah sem chhuah a ni a. Bible chuan: “In hotute thu âwih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin min fuih a ni. (Heb. 13:17) Hei hi kohhran upate’n thil an tisual thei lo tihna a ni em? Ni lo ve! Pathian chuan mihring tute ai pawhin an ṭhat famkim lohnate chu a hmu fiah zâwk a. Chutichung pawhin, Pathianin an laka kan intukluh chu min beisei a ni. Ṭha famkim an ni lo chung pawha upate kan thlâwpna chuan Jehova thu neihna kan pawmzia a lantîr a ni.
Inngaihtlâwmna A Pawimawhna
16. Engtin nge Isua chu Kristian kohhran Lû a nihna anga kan zahzia kan lantîr theih?
16 Isua chu kohhran Lû dik tak a ni tih engtik lai pawhin kan hre reng tûr a ni. (Kol. 1:18) Chu chu a ni, upaa ruatte kaihhruaina hnuaia kan intukluh a, anmahni kan ‘ngaihhlut êm êm’ chhan pakhat chu ni. (1 Thes. 5:12, 13) Dik takin, kohhran upate pawhin kohhranho hnênah anmahni ngaih dân ni lovin, Pathian thuchah pe chhuak tûra fîmkhurin, intukluhna an lantîr thei a. Mahni mi mal ngaih dân vawrh lâr nân ‘thuziakte khûmin thil an ti lo.’—1 Kor. 4:6.
17. Engvângin nge chungnun duhna rilru neih chu a hlauhawm?
17 Kohhran zînga mi zawng zawngte tân mahni ropuina zawng lo tûra fîmkhur a ngai a. (Thuf. 25:27) Tirhkoh Johana tawh zirtîr pakhat tân chu chu harsatna niin a lang. Heti hian a ziak a: “Diotrepha, an zînga chungnun duh ṭhîn khân min lâwm si lo. Chuvângin ka lo kal chuanin a thiltihte ka hriat chhuahtîr leh ang, kan chungah thu sual sawiin a kamtamzia hi,” tiin. (3 Joh. 9, 10) Tûnah pawh hian, heta ṭangin zir tûr kan nei a ni. Keimahnia awm chungnun duhna kan hmuh apiang chu nuai bo chhan tûr ṭha tak kan nei. Bible chuan: “Chapona chu boralna hmâah a kal a, rilru intivei chu tlûkna hmaah,” a ti. Jehova thu neihna pawmtute chuan chapona thang chu an pumpelh tûr a ni, chutilochuan, an mualpho vang.—Thuf. 11:2; 16:18.
18. Engin nge Jehova thu neihna pawm tûrin min ṭanpui ang?
18 Ni e, inlâk hran duhna khawvêl thlarau do leh Jehova thu neihna pawm chu i thiltum nihtîr rawh. Jehova rawngbâwl theihna chanvo ropui tak i neih chu ngaihlu tak chungin ngun takin ngaihtuah ṭhîn rawh. Pathian mite zînga i awm thei hi a thlarau thianghlim hmangin a hîp che tih târ langtu a ni. (Joh. 6:44) Pathian nêna in inlaichînna chu ngainêp ngai rêng rêng suh. I nun kawng engkimah inlâk hran duhna rilru put hmang i hnâwlin, Jehova thu neihna i pawm a ni tih lantîr chu tum tlat ang che. (w08 6/15)
Kan Hre Chhuak Em?
• Jehova thu neihna pawmnaah chuan eng nge tel?
• Engtin nge kan hriat theihna sawizawi leh Jehova thu neihna pawm chu a inkûngkaih?
• Eng kawngtein nge Setana’n Pathian thu neihna phiarrûk a tum?
• Engvângin nge Jehova thu neihna pawmna kawngah inngaihtlâwmna a pawimawh?
[Zirlai Atâna Zawhnate]
[Phêk 20-naa milem]
“Mihring thu aiin Pathian thu kan zâwm zâwk tûr a ni”
[Phêk 22-naa milem]
Pathian tehnate zawm chu engtik lai pawhin a finthlâk