Thil Siama Lang Pathian Finna

“Hnuailêngte aia min zirtîr hnem zâwktu, chunglêngte aia finga min siamtu.”​—⁠JOBA 35:⁠11.

SAVATE chuan thiamna mak tak an nei a. Boruaka thiam taka an thlâwk kual vêl chu thlawhtheihna siamtute’n an awt hle a ni. Sava ṭhenkhat chu hmêlhmang pawh nei lo mêl sâng tam taka zau tuipui chungah thlâwkin, an tum ram an thleng chat thei a ni.

Anmahni siamtu finna târ lan belhchhahtu chunglêng savate neih thiamna mak danglam tak dang leh chu an hrâm ri hmanga an inbe pawp thei hi a ni a. Entîrna ṭhenkhat lo ngaihtuah ta i la.

Hrâm Ri Hmanga Savate Inbiak Pawhna

Sava ṭhenkhatte chu an keu hma aṭang pawhin an inbe pawp ṭan dêr tawh ṭhîn. Entîr nân, vahmîm nu chuan ni tina pakhat zêl tuiin, pariat thleng a tui thei a. A tui zawng zawngte chu a pângngaiin ṭhang chho vek se chuan, ni riat chhûng lai an keu a ngai dâwn a ni. A pui tân chuan a tui la keu lo a awp lum mêk laia, kâr khata upa a naute harh takte enkawl chu thil harsa tak a ni ngei ang. Mahse, chutianga keu lovin, chu vahmîm nautê pariatte chu dârkâr ruk chhûngin an keu vek zâwk a ni. Chu chu engtin nge a nih theih? Thil zir chîk mite chuan vahmîm notê la keu lote chu inbe pawpin, engtin emaw taka keu rual deuh dân an ruahman ho a nih an ring ber.

Savate an han puitlin chuan, apâ chu a hrâm tlângpui ṭhîn a. Kawppui tûr hîp nân leh a awmna ram chin tih lan nân kawppui tûr zawn hunah a hrâm deuh ber ṭhîn. Sava chi hrang sâng tam takte chuan mahni ṭawng ṭheuh an nei a tih theih a, chu chuan a nute chu anmahni chipui zînga an kawppui tûr âwm apâte hre hrang thei tûrin a ṭanpui a ni.

Savate chu kâwl ên hun leh ni tlâk hun vêlah an hrâm tlângpui ṭhîn a, chu chuan chhan ṭha tak a nei. Chûng hun lai chu thli a tleh vak loh lai leh bengchheng dang a tam loh lai a ni a. Thil chîk mite chuan chhûn lai taka hrâm aiin kâwl ên hun leh ni tlâk huna hrâm chu a lêt 20 laiin a ri ṭha zâwk tih an hmu chhuak a ni.

Savapâ chu an hrâm ngun deuh ber ṭhîn nâin, anu leh apa chu awmze chi hrang hrang neiin an hrâm bawk ṭhîn a. Entîr nân, Europe rama sava te tak tê, chaffinch an tihte chuan awmze hrang nei hrâm dân chi kua lai a nei a. Hrâm dân chi khat chu vânsâng lam aṭanga hlauhawm​—⁠ei tûr zawnga thlâwk sava dangte​—⁠lak aṭanga invêng tûra hriattîr nân a ni a, hrâm dân chi dang chu lei lam aṭanga hlauhawm laka invêng tûra hriattîr nân a ni thung.

Thilpêk Chungnung Zâwk

Pathianin savate hnêna pianpui finna a pêk chu a mak ngei mai. Mahse, inbiak  pawhna lama thiamna chungchângah chuan mihringte’n thiamna chungnung zâwk tak an nei a ni. Joba 35:11 chuan Pathianin mihringte chu “chunglêngte aia finga” min siam thu a sawi a ni. Mihringte dang lam bîkna chu ngaih dân hriatthiam harsa takte pawh aw bâwm hmang emaw, zaizir emawa kan inhriattîr thei hi a ni.

Thil siam dangte ang lo takin nausênte chuan ṭawng khirh takte pawh zir thiam theihna an pianpui niin a lang. Internet aṭanga chhiar theih American Scientist chanchinbu chuan: “Nau tête chuan an nu leh an pate’n an biak loh pawhin ṭawng an zir thiam thei a; naupang bengchhêt ṭhenkhatte phei chuan an inah zaizir dân zirtîrna dawng lo mah se, zaizira inbiak dân (sign language) an insiam chawp hial a ni,” tiin a sawi.

Ṭawngkam emaw, zaizir emawa kan ngaihtuahna leh rilru veizâwngte kan inhrilh tawn theihna chu Pathian min pêk thilthlâwnpêk ropui a ni tak zet a ni. Mahse, mihringte hnêna thilthlâwnpêk ropui lehzual chu ṭawngṭaia Pathian nêna inbiak pawh theihna hi a ni a. A nihna takah chuan, Pathian Jehova chuan amah be pawp tûrin min sâwm a ni. Pathian Thu, Bible chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” a ti.​—⁠Philippi 4:⁠6.

Thu tlûkna siam tûr khirh tak kan hmachhawn hunah Jehova chuan Bible-a chhêkkhâwm a finna chi hrang hrangte chu hmang ṭangkai tûrin min duh a. Ani chuan chuta thurâwn kan hmuhte nunpui dân tûr chu hre thiam tûrin min ṭanpui bawk ang. Bible ziaktu Jakoba chuan: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin a sawi a ni.​—⁠Jakoba 1:⁠5.

Engtin Nge A Nghawng Che?

Sava hrâm ri mawi tak emaw, naupangin a ṭawngkam hmasa ber tûr a zir lai emaw i han hriatin chu chuan engtin nge a nghawng che? Pathian thil siama a finna lang chu i hmu em?

Fakna hla phuahtu Davida chuan amah siam a nih dân ngun taka a ngaihtuah hnuah heti hian a sawi chhuak a ni: “I hnênah lâwm thu ka hrilh ang che; hlauhawm tak leh mak taka siam ka ni si a. I thiltihte hi mak tak a ni a; chu chu ka nunna hian a hre chiang hle a ni,” tiin. (Sâm 139:14) Thil siama Pathian finna langte ngaihlu tak chunga i han bih chian hian, kaihhruaina ṭha pe tûr chea amah i rin tlatna chu a nghet zual sauh ngei ang. (w08 5/1)

[Phêk 5-naa thu lâk chhuah]

Inbiak pawh theihna hi Pathian thilthlâwnpêk a ni

[Phêk 4-naa Thlalâk Hawhtîrtu]

© Dayton Wild/Visuals Unlimited