‘A Ṭhantirtu Chu Pathian’ A Ni

“Chuti chuan a ṭhantîrtu Pathian chauh lo chu, a phuntu chu engmah a ni lo va, tuia châwmtu pawh chu engmah a ni hek lo.”​—⁠1 KOR. 3:⁠7.

1. Eng kawngin nge “Pathian hnathawhpuite” kan nih?

“PATHIAN hnathawhpuite.” Hei hi tirhkoh Paula’n kan vaia kan neih theih chanvo a sawi dân chu a ni. (1 Korinth 3:​5-9 chhiar rawh.) Paula sawi chu zirtîr siam rawngbâwlna hi a ni a. Chu chu chi theha tuia châwm nên a tehkhin a ni. Chu hna pawimawh taka hlawhtling tûr chuan Jehova ṭanpuina kan mamawh a. Paula chuan ‘a ṭhantîrtu chu Pathian’ a ni tih min hriattîr a ni.

2. ‘Pathian chu ṭhantîrtu’ a nihna chuan engtin nge kan rawngbâwlna thlîr dân dik nei tûra min ṭanpui?

² Engmah kan nih lohzia lantîrtu he thil hian kan rawngbâwlna thlîr dân dik nei tûrin min ṭanpui a. Thu hrilhna leh zirtîrna kawngah taima takin kan thawk pawh a ni thei ang; mahse, mi chu zirtîr thar a lo nih hian Jehova chu  chawimawina dawngtu tûr chu a ni. Engvângin nge? A chhan chu, eng ang pawhin thawk rim mah ila, mi chu zirtîr lo ni tûra thunun theih chu sawi loh, a lo nih dân pawh hre thiam vek thei tumah kan awm loh vâng a ni. Lal Solomona chuan: “Pathian engkim titu thiltih chu i hre lo,” tia ziakin, chu dinhmun chu a sawi dik hle a ni.

3. Buh chi tak tak thehna leh zirtîr siamna hian inanna eng nge a neih?

³ Mi chu zirtîr a lo nih dân kan hriat theih lohna chuan kan hna chu beidawnthlâk tak a nihtîr em? Nihtîr lo ve. Chu chuan phûrawm tak leh tuiawm tak a nihtîr zâwk mah a ni. Lal Solomona chuan: “Zîngah i chi tuh la, tlaiah i kut sûm suh; i hre si lo, a ṭhang ṭha tûr khawii nge, hei hi nge, kha kha nge, an ṭha ve ve dâwn,” tiin a sawi a ni. (Thur. 11:⁠6) Buh chi tak tak thehnaah chuan, khawi laia mi nge ṭiak ang tih kan hre lo va, a ṭiak dâwn nge dâwn lo tih pawh kan hre hek lo. Thil tam tak chu kan thunun phâk bâk a ni. Zirtîr siamna hna pawh chu, chutiang deuh bawka sawi theih a ni a. Isua chuan Chanchin Ṭha Marka ziak bung 4-naa chhinchhiah tehkhin thu pahnih sawiin, he thu hi a târ lang. Chûng tehkhin thu pahnihte aṭanga kan thu zir theihte chu i lo en ang u.

Lei Chi Hrang Hrangte

4, 5. Isua buh chi thehtu tehkhin thu chu tâwi têin sawi rawh.

⁴ Marka 4:​1-9-a chhinchhiah angin, Isua chuan buh chi thehtuin lei chi hrang hrang chunga buh chi a theh thu a sawi a ni: “Ngaithla ula, en teh u; buh chi thehtu buh chi thehin a feh a; tin, heti hi a lo ni a, a theh laiin a ṭhen kalkawng dungah a tla a, savaten an rawn tlân zo ta a. Tin, a ṭhen pialtlêp chung lei pan hmunah a tla a; lei a chhah loh avangin a ṭo ta nghâl a; nimahsela ni a lo tlângsân deuhvin em vuaiin a lo awm a, zung a neih loh avângin a râwp ta mai a. Tin, a ṭhen hnimhlîngnei zîngah a tla a, hnim chu a lo ṭo sâng a, a dîpral ta a, rah rêng rêng a rah ta lo va. Tin, a ṭhen lei ṭhaah a tla a, a ṭo va, a ṭhang lian a, a rah ta a; sawmthum te, sawmruk te, za tein a pung ta hlawm a,” tiin.

⁵ Bible hun lai chuan, buh chi chu a theha theh a ni ṭhîn a. A thehtu chuan buh chi chu a kawr bah fualah emaw, bâwmah emaw paiin, a darh thei tûr ang berin a theh ṭhîn. Chuvângin, he tehkhin thua buh chi thehtu hian buh chi chu lei chi hrang hrang chungah a theh lui lo. A buh chi theh chu lei chi hrang hrang chungah a tla darh mai zâwk a ni.

6. Engtin nge Isua chuan buh chi thehtu tehkhin thu chu a hrilhfiah?

⁶ He tehkhin thu awmzia hi kan lo inrinsiak a ngai lo. Isua chuan Marka 4:​14-20-a chhinchhiah angin a hrilhfiah belh a ni: “Buh chi thehtu chuan thu chu a theh a ni. Tin, kawng dunga thu thehnate chu hêng hi an ni: thu an hriat veleh Setana chuan an rilrua thu theh chu a lâksak nghâl ṭhîn. Tin, chutiang bawkin pialtlêp chunga theh chu hêng hi an ni: thu an hriat veleh lâwm taka pawm nghâlte hi; nimahsela anmahniah chuan zung rêng an nei lo va, rei lo tê chauh an awm a; chu mi hnuah chuan thu avânga hrehawmna emaw, tihduhdahna emaw a lo awm veleh an tlu nghâl mai ṭhîn. Tin, mi dangte chu hnimhlîngnei zînga theh chu an ni a: chûngte chuan thu chu an hre tawh a, nimahsela, khawvêl lungkhamnate, hausakna bumna te, thil dang châknate chu a lo luhin, thu chu a dîp a, rah lovin a lo awm ṭhîn. Tin, lei ṭhaa theh chu hêng hi an ni: thu chu hriaa, pawma, a leh sawmthum te, a leh sawmruk te, a leh za tea rahte hi an ni,” tiin.

7. Buh chi leh lei chi hrang hrangte’n eng nge a entîr?

⁷ Isua chuan buh chi inang lo theh a nih thu a sawi lo tih chhinchhiah ang che. Buh chi thuhmun chu rah chhuah dân inang lo lei chi hrang hrang chunga a tlâk thu a sawi zâwk a ni. Lei zînga a chi khatna chu châr tak a ni a; a chi hnihna chu a pan a; a chi thumna chu hlînghmun a ni a; a chi lina erawh chu rah ṭha tak chhuah thei lei ṭha a ni. (Lk. 8:⁠8) Buh chi chuan eng nge a entîr? Chu chuan Pathian Thua kan hmuh Lalram chanchin a entîr a ni. (Mt. 13:19) A nih leh, lei chi hrang hrangte chuan eng nge a entîr? Rilru dinhmun inang lo mi chi hrang hrangte a entîr a ni.​—⁠Luka 8:​12, 15 chhiar rawh.

8. (a) Buh chi thehtu chuan tu ai nge a awh? (b) Engvângin nge Lalram thu hrilhna chhân lêt dân a inan loh?

⁸ Buh chi thehtuin tunge a entîr? Ani chuan  Lalram chanchin ṭha puangtu Pathian hnathawhpuite ai chu a awh a ni. Paula leh Apollova angin, anni chuan an phunin tuiin an châwm a. Rim takin thawk ve ve mah se, an rah chhuah chu a inang lo. Engvângin nge? Thuchah ngaithlatute thinlung dinhmun a inan loh avângin. Tehkhin thuah chuan, buh chi thehtu chuan buhin rah a chhuah dân tûr chungchângah thu a nei lo. Hei hi rah ṭha chhuah a nih mang lohna hmuna kum tam tak chhûng, a ṭhenah phei chuan kum sâwm bi têl rawngbâwl kan unaute tân a va thlamuanthlâk tak êm! * Engvângin nge?

9. Eng thu dik thlamuanthlâk tak nge tirhkoh Paula leh Isua’n an sawi uar?

⁹ Buh chi thehtu rinawmna chu a hnathawh rah chhuah dân azira teh a ni lo. Paula chuan: “Anmahni thawh rim ang zêlin mahni lâwmman an hmu ve ve ang,” tih a sawi khân chu chu a sawi hmuh a ni. (1 Kor. 3:⁠8) Lâwmman chu thawh rimna rah chhuah ang zêl ni lovin, thawh rimna ang zêlin a ni ang. Isua chuan a zirtîrte thu hrilhna ata an lo haw leh khân, he thu hi a sawi uar bawk a ni. Zirtîrte chu Isua hminga ramhuaite an hnawh chhuah theih avângin an lâwm hle a. Chu chu thil phurawm tak zawng a ni ngei mai; mahse, Isua chuan: “Nimahsela ramhuaite in thu thuin an awm avâng hian lâwm suh u; vâna in hming ziak a nih avângin lâwm zâwk rawh u,” tiin anni chu a hrilh a ni. (Lk. 10:​17-20) Buh chi thehtu pakhat chuan a hnathawh avânga nasa taka punna awm a hmu lo a nih pawhin, mi dangte aiin a thatchhe zâwk emaw, a rinawm lo zâwk emaw tihna a ni lo. Rah chhuah chu a ngaithlatute thinlung dinhmunah a innghat thui hle a ni. Mahse, a tâwpah chuan a ṭhantîrtu chu Pathian a ni tho tho!

Thu Ngaithlatute Mawhphurhna

10. Thu ngaithlatu chu lei ṭha ang a nih leh nih loh engin nge hril?

¹⁰ Thu ngaithlatute chungchâng ve hi eng nge ni? An chhân lêt dân tûr chu ruat lâwk a ni em? Ni lo ve. Lei ṭha ang an nih leh nih loh chu an duh thlannaah a innghat a ni. Dik tak chuan, mi thinlung chu a chhe lam emaw, a ṭha lam emaw zawngin a inthlâkthleng thei si a. (Rom 6:17) Tehkhin thu a sawinaah, Isua chuan ṭhenkhatin “thu an hriat veleh” Setana’n a paih bosak thu a sawi. Mahse, chu chu thilthleng ngei ngei tûr a ni kher lo. Jakoba 4:7 chuan Kristiante chu “Diabola dodâl” tûrin a fuih a, tichuan ani’n anni chu a tlânsan ang. Isua chuan mi dangte chu thu an hriat veleh lâwm taka pawm nghâl niin a sawi a; mahse, ‘anmahniah chuan zung rêng an neih loh’ avângin an tlu leh mai ṭhîn. Pathian chhiahhlawhte chu rilrua “a zauzia te, a seizia te, a sânzia te, a thûkzia te hriat chian theihna leh, Krista hmangaihna hriat phâk loh hriat theihna” an neih theih nâna “zung kai leh nghahchhan neia awm” tûra fuih an ni.​—⁠Eph. 3:​14-19; Kol. 2:​6, 7.

11. Lungkhamna leh hausaknain thu a dîpral loh nân miin eng nge a tih theih?

 ¹¹ Thu ngaithlatu dangte chu “khawvêl lungkhamnate, hausakna bumna te” intihbuaitîr a, thu chu dîpraltîr anga sawi an ni. (1 Tim. 6:​9, 10) Chutiang chu engtin nge an pumpelh theih? Tirhkoh Paula chuan: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, ‘Engtikah mah ka thlahthlam tawp lo vang chia, kal pawh ka kalsan tawp lo vang che,’ a ti si a,” tiin a chhâng a ni.​—⁠Heb. 13:⁠5.

12. Engvângin nge lei ṭhain a entîrte rah chhuah zât chu a inan loh?

¹² A tâwp berah, Isua’n lei ṭha chunga tlate chuan ‘a leh sawmthum te, a leh sawmruk te, a leh za tea rah’ a chhuah thu a sawi a ni. Thu ngaithlatu ṭhenkhat chuan thinlung dinhmun ṭha tak an nei chung pawhin, an dinhmun azirin chanchin ṭha hrilhna kawnga an tih theih zât chu a inang lo hlawm a ni. Entîr nân, kum upatna emaw, hrisêl ṭhat lohna emaw chuan mi chu duh angin thu hrilhnaah a tel ṭhattîr thei lo pawh a ni thei a. (Marka 12:​43, 44 nên khaikhin rawh.) He mi chungchângah pawh hian, buh chi thehtu chuan tihtheih a nei mang meuh lo vang; mahse, Jehova’n a ṭhantîr tih a hmuh chuan a hlim hle a ni.​—⁠Sâm 126:​5, 6 chhiar rawh.

Buh Chi Thehtu Muhîl Chu

13, 14. (a) Isua sawi buh chi thehtu tehkhin thu chu tawifel takin sawi rawh. (b) Buh chi thehtuin tunge a entîr a, buh chiin eng nge a entîr?

¹³ Marka 4:​26-29-ah chuan buh chi thehtu tehkhin thu dang kan hmu leh a ni: “Pathian ram chu hetiang hi a ni: miin leiah hian chi theh sela, zânah muhîlin chhûnah tho ṭhîn sela, chi chu, a zia a hriat lohvin, lo ṭiakin lo ṭhang sela; chutiang chu a ni. Lei hian amahin rah a rawn chhuah ṭhîn; a tîr berah a kûng, chu mi hnuah chuan a vui; tin, chu mi hnu lehah a vuiah chuan buh fang pum chu. Nimahsela, rah chu a lo hmin hunin, buh lâk a lo hun tâk avângin, favah chu a phawrh nghâl ṭhîn,” tiin.

¹⁴ Heta buh chi thehtu hi tunge ni? Kristianna rama mi ṭhenkhat chuan Isua a nih an ring a. Mahse, engtin nge Isua chu muhîl ang leh buh chi ṭhan dân hre lo anga kan sawi theih ang? Isua chuan a ṭhan dân chu a hre ngei ang le! He buh chi thehtu hian a hmaa kan sawi tâk buh chi thehtu ang bawkin, ṭhahnemngai taka thu hrilhna hmanga Lalram buh chi thehtu, Lalram puang chhuaktu apiangte ai chu a awh a ni. Leia buh chi an theh chu an thu hrilh hi a ni. *

15, 16. Isua chuan buh chi thehtu tehkhin thu a sawinaah, buh chi tak tak ṭhan dân leh thlarau lama ṭhan dân thudik eng nge a târ lan?

¹⁵ Isua chuan buh chi thehtu chu “zânah muhîlin chhûnah [a] tho ṭhîn” tih a sawi a. Chu chu buh chi thehtuin ngaihthahna a lantîr tihna a ni lo. Mi zawng zawngte nî tin nun pângngai a lantîr mai zâwk a ni. He Bible chânga thu mal hman hian chhûna hna thawka zâna muhilin, chutianga hun eng emawti chhûng hman ral a nihzia a târ lang. Isua chuan chu mi hun chhûnga thilthleng chu a hrilhfiah a ni: “Chi chu, a zia a hriat lohvin, lo ṭiakin [a] lo ṭhang,” tiin. A sawi pawimawh ber chu, buh chi chu ‘amaha’ a lo ṭhang chho hi a ni. *

 ¹⁶ Isua’n heta a sawi tum ber hi eng nge ni? A sawi pawimawh ber chu a ṭhan chhohna leh zawi zawia a ṭhan chhoh dân hi a ni. “Lei hian amahin rah a chhuah ṭhîn; a tîr berah a kûng, chu mi hnuah chuan a vui; tin, chu mi hnu lehah a vuiah chuan buh fang pum chu.” (Mk. 4:28) He ṭhan chhohna hi a intahtawl tê têin zawi zawiin a thleng a ni. Chu chu tihluih theih emaw, ṭhan chaktîr theih emaw a ni lo. Thlarau lama ṭhan chhohna pawh chutiang bawk chu a ni. Chutiang ṭhan chhohna chu Jehova remtih dân ang zêlin a thleng a, thutak chu rilru dik tak putute thinlungah a intahtawl tê têin a thleng a ni.​—⁠Tirh. 13:​48, NW; Heb. 6:⁠1.

17. Thutak chiin rah a chhuah hian tute nge hlim tel ve?

¹⁷ Engtin nge buh chi thehtu chuan “rah chu a lo hmin hunin . . . favah chu a phawrh nghâl”? Jehova’n zirtîr tharte thinlunga Lalram thutak a ṭhan chhohtîr hian, Pathian an hmangaihnain a hnêna inpumpêk tûra a tur hun a lo thleng a. Chu an inpumpêkna chu tuia baptisma changin an lantîr a ni. Puitlin lam pana ṭhang chho zêl unaupate chuan zawi zawiin kohhranah mawhphurhnate an chelh belh thei a. Lalram rah chu a tîra a thehtu leh a tîra thehnaa tel lo Lalram thu puangtute chuan an seng ṭhîn. (Johana 4:​36-38 chhiar rawh.) Ni e, ‘a tuhtu leh a âttu an lâwm dûn ṭhîn a ni.’

Tûn Laia Kan Zir Tûr

18, 19. (a) Engtin nge Isua sawi tehkhin thute ennawnna chuan a tihchak che? (b) A dawta thuziakah eng nge kan ngaihtuah ang?

¹⁸ Marka bung 4-a chhinchhiah tehkhin thu pahnihte ennawnna aṭangin eng nge kan zir? Hnathawh tûr​—⁠buh chi theh tûr​—⁠kan nei tih kan hmu chiang hle. Chhuanlamte leh buaina leh harsatna kan tawh mai theihte chuan buh chi kan theh lai min tâwptîr ngai tûr a ni lo. (Thur. 11:⁠4) Mahse, chutih rual chuan Pathian hnathawhpuite kan nih theihna chanvo ropui tak kan neih chu kan hre reng a ni. Jehova chu mite zirtîr nihtîrtu a ni a, keimahni leh thuchah dawngtute thawhrimna malsâwmtu a ni bawk. Mi tumah zirtîr ni tûrin kan tilui thei lo tih kan hria. Chutiang bawkin zirtîr kan siam chak lo emaw, kan siam thei lo emaw a nih pawhin kan lunghnualin, kan beidawng tûr a ni lo tih kan hre bawk. Kan hlawhtlinna chu Jehova laka kan rinawmna leh ‘ram chanchin ṭha hi hnam zawng zawng hriattîr’ tûra chanvo min pêk chunga kan rinawmna hmanga teh a ni chu a va thlamuanthlâk tak êm!​—⁠Mt. 24:⁠14.

¹⁹ Isua chuan zirtîr thar leh Lalram hna hmasâwnna chungchângah thil dang eng nge min zirtîr? He zawhna chhânna hi Chanchin Ṭha ziaka tehkhin thu dangah kan hmu thei a ni. Chûng zînga tehkhin thu ṭhenkhat chu phêk 25-a thuziakah kan bih chiang ang. (w08 7/15)

[Footnote-te]

Kan La Hre Reng Em?

• Buh chi tak tak thehna leh Lalram thuchah puanchhuahna inanna ṭhenkhat chu engte nge ni?

• Engtin nge Jehova’n Lalram thu hriltute rinawmna chu a teh?

• Isua chuan buh chi tak tak ṭhan dân leh thlarau lama ṭhan dân inanna eng nge a sawi uar?

• Engtin nge ‘a tuhtu leh a âttu an lâwm dûn ṭhin’?

[Zirlai Atâna Zawhnate]

[Phêk 19-naa milemte]

Engvângin nge Isua chuan Pathian Lalram chanchin hriltu chu buh chi thehtu nên a khaikhin?

[Phêk 21-naa milemte]

Lei ṭhain a entîrte chu an dinhmun azirin Lalram thu hrilhnaah tih tak zetin an tel