A Awm Tâwk Inbeiseiin, Hlim Zêl Ang Che

“KA HLAWHCHHAM leh ta!” I thiltih tum i tihpuitlin theih loh avângin vawi eng zât nge hetiang deuh hian i sawi chhuah tawh? Kristian nu valai tak pakhat chuan engtik lai mai pawha a fa sên a ngaihsaknain a tihchauh êm avâng leh thlarau lam thil a ngaihsak ṭhat theih loh phah avângin chutiang thu chu a sawi chhuak mai thei a ni. Kristian dang pakhat chuan enkawl seilen a nih dân avângin tling tâwk lo nia inhriatna a nei thei a, kohhrana a thiltih rêng rêng chu ṭha tâwk lovah a ngai thei a ni. Thuhretu tar tawh tak pakhat chu tûn hma a chak ṭhat lai leh a kalsawn vêl theih lai anga Kristian rawngbâwlnaa a tel theih tawh loh avângin a lunghnûr mai thei. Chhûngkaw dinhmunin Jehova rawngbâwlnaa a duh anga a teltîr theih loh Christiane-i chuan: “Pioneer thawk tûra fuihna thu ngaihthlâk ringawt pawh chu a châng chuan ka mittui titlatu a tling a ni,” a ti.

Chutiang rilru ang kan put hunah eng nge kan tih theih? Engtin nge Kristian ṭhenkhat chuan an dinhmun thlîr dân tâwk an thiam? Inbeisei sân lutuk loh a hlâwknate chu eng nge ni?

Thiltum Inâwm Tâwk Insiam Rawh

Tirhkoh Paula chuan hlimna kan neih reng theih dân min hrilh a ni: “Lalpaah chuan lâwm fo rawh u: ka ti leh pek ṭhîn ang, lâwm rawh u. In dawhtheihzia [a nih loh leh, a âwm tâwk in hriatzia] mi zawng zawng hriat ni rawh se,” tiin. (Phil. 4:​4, 5) Pathian rawng kan bâwlnaa hlimna leh lungawina nei tûr chuan, kan thiamna leh kan dinhmunte mila beiseina inâwm tâwk kan neih a ngai a ni. Engpawh huama kan theih phâk bâka sâng thiltum kan insiam chuan, ṭûl lo taka lungngaihna kan insiam a ni ang. Kawng lehlamah chuan, kan tlin tâwk nia kan hriat chu a ṭûl aia nasaa Kristian rawngbâwlnaa min hnûk hniamtu nihtîr tûr khawpa ti hniam lutuk lo tûrin kan fîmkhur tûr a ni thung.

Kan dinhmun chu engpawh ni se, Jehova chuan kan theih tâwk​—⁠kan nunna leh thinlung zawng zawnga rawngbâwlna​—⁠a hnêna kan hlan chu min phût a ni. (Kol. 3:​23, 24) Kan theih tâwk aia tlêm Jehova hnêna kan pêk chuan, a hnêna kan inpumpêkna thutiam kan hlen lo tihna a ni ang a. (Rom 12:⁠1) Chu bâkah, thinlung zawng zawnga rawngbâwlna aṭanga neih theih lungawina dik tak, hlimna dik tak, leh malsâwmna nasa tak dangte dawng lo tûrin kan insiam a ni bawk ang.​—⁠Thuf. 10:⁠22.

“Nunnêmna,” a nih loh leh a âwm tâwk hriatna tia lehlin thu mal chuan mi dangte ngaihtuahna a keng tel a. A awmzia dik tak chu “intulût” tihna a ni. (Jak. 3:17) Tin, khirh lutuk lo sawina pawh a ni thei bawk. Chuvângin, a âwm tâwk kan hriat chuan, kan dinhmun chu inbûk tâwk takin kan thlîr thei ang. Chu chu thil harsa a ni em? Ṭhenkhat chuan mi dangte dinhmun inbûk tâwk takin thlîr thei mah se, mahni dinhmun chutianga thlîr chu harsa an ti. Entîr nân, kan ṭhian hnai pakhat chu a thawhrim lutuk avânga a chau a ni tih a lan chuan, insiam remna ṭhenkhat neih a finthlâkzia hre tûrin kan ṭanpui dâwn lâwm ni? Chutiang bawkin, kan tihtheih bâk tih kan tum a ni tih lantîr thei thilte chu kan hriat a ngai a ni.​—⁠Thuf. 11:⁠17.

Nu leh pa thil phût ngah tak enkawl seilen kan nih chuan, mahni tlin tâwk hriat chu a harsa lehzual thei a. Ṭhenkhatte chuan an naupan laiin nu leh pate hmangaihna dawng tûr chuan engtik lai pawha thil tam lehzual emaw, ṭha lehzual emawa an tih a ngai niin an hria a. Chu chu kan nihna a nih chuan, Jehova min thlîr dân chungchângah ngaih dân dik lo kan nei thei a ni. Jehova chuan thinlung zawng zawnga a rawng kan bâwlna avângin min hmangaih a. A Thu chuan ‘kan taksa siam dân hi a hria a, vaivut mai kan nih a hre reng’  tiin min thlamuan a ni. (Sâm 103:14) Ani chuan kan tlin tâwk a hria a, chutichung pawha ṭhahnemngai taka a rawng kan bâwl hian min hmangaih a ni. Kan Pathian chu pu ber khirh tak a ni lo tih hriatna chuan kan tlin tâwk hriain, thuhnuairawlh tak, a nih loh leh a âwm tâwk chauh inbeisei tûrin min ṭanpui ang.​—⁠Mik. 6:⁠8.

Chutichung pawhin, ṭhenkhat chuan rilru put hmang inbûk tâwk neih chu harsa an ti a. Chu chu i awm dân a nih chuan, engah nge nangmah hre chiangtu che Kristian puitling pakhat ṭanpuina i lâk loh vang? (Thuf. 27:⁠9) Entîr nân, regular pioneer thawh i duh em? Chu chu thiltum ṭha a va ni êm! Chu thiltum thlen chu harsa i ti em? I nun tisamkhai tûra ṭanpui i ngai a ni mai thei. A nih loh leh, i Kristian ṭhian ṭha pakhat chuan i chhûngkaw mawhphurhna tam takte avângin, regular pioneer chu tûn atâna thawh chi a nih leh nih loh a sawipui mai thei che a. Ani chuan pioneer thawh nêna inkûngkaih hna dangte i thawh tak tak theih dâwn leh dâwn loh emaw, thawk thei tûra insiam remna i neih ngai emaw chu hre thiam tûrin a ṭanpui thei ang che. Pasal chu a nupuiin a theih tâwk hre thiam tûra ṭanpui thei tûr dinhmunah a ding bawk a ni. Entîr nân, rawngbâwlnaa inhman tam lehzualna tûr thla thar a inṭan hmain, a nupui chu châwl hahdam tûrin a râwn thei a. Chu chuan thahrui a neihtîr theiin, rawngbâwlnaa a hlimna chu nei reng tûrin a ṭanpui thei a ni.

I Tih Theih Thilte Chu Zawng Rawh

Kum upatna emaw, hrisêl ṭhat lohna emaw chuan Jehova rawngbâwl ṭha thei lovin min siam thei a. Fa nei i nih chuan, i fate’n i hun leh tha leh zung tam tak an lâk avângin, mi mala Bible zirna emaw, Kristian inkhâwmte emaw chu hlâwkpui tehchiam lovah i inngai mai thei. Amaherawhchu, i duh anga i tih theih lohna ringawt ngaihtuahna chuan i tih theihte hmuh hmaihtîr châng che a nei a ni thei ang em?

Kum sâng têl liam ta khân, Levia mi tuemaw chuan a tâna tihpuitlin theih loh tûr a duhzâwng a sawi chhuak a ni. Ani chuan biak inah kum khata chawlhkâr hnih chhûng rawngbâwl theihna hun hlu tak a nei a. Mahse, maichâm hmaa kum khuaa khawsak duhna ngaihsân awm tak a neih chu a sawi chhuak a ni. (Sâm 84:​1-3) He mi rinawm hi lungawi tûrin engin nge ṭanpui? Biak in hungchhûnga ni khat chauh awm pawh chu chanvo ṭha bîk tak a ni tih a hriatthiamnain a ṭanpui a ni. (Sâm 84:​4, 5, 10) Chutiang bawkin, kan tih theih loh thilte ngaihtuah reng ai chuan, kan tih theihte ngaihtuahin, chûngte avâng chuan kan lâwm tûr a ni.

Canada rama Kristian unaunu Nerlande-i hi entîr nân han hmang ta ila. Wheelchair hmang chauhva kal sawn thei a nih avângin rawngbâwlnaa a tih theih chu a tlêm tham hle niin a hria a ni. Amaherawhchu, a ngaih dân thlâkin a in bul lawka awm bazârna hmunpui chu a mi mal thu hrilhna bial angah a thlîr a. Heti hian a sawi a ni: “Bazâr in lianpui chhûnga awm ṭhutthlêngsei kiangah chuan wheelchair-in ka va ṭhu a. Ṭhutthlêngseia rawn ṭhu hah châwl lawkte hnêna thu hrilhna aṭangin hlimna ka hmu a ni,” a ti. Hetiang rawngbâwlna pawimawh taka a telna chuan Nerlande-i chu lungawina nasa tak a pe a ni.

A Ṭûl A Nih Chuan Insiam Rem Rawh

Thli tlehin lawng puanzâr a chhêm avângin lawng chu chak takin a tlân zar zar a. Amaherawhchu, thlipui na tak a tleh hunah lawngpu chuan lawng puanzâr chu a siam rem lo thei lo va. Thlipui chu thunun thei lo mah se, lawng puanzâr siam remin lawng chu a thunun reng thei a ni. Chutiang bawkin, nuna kan tawh thlipui na tak ang mai dinhmun ṭha lote chu kan thunun thei lo fo va. Mahse, kan tha leh zung, rilru leh ngaihtuahnate kan hman dân siam remin, kan nun chu a theih ang tâwkin kan thunun thei a ni. Kan dinhmun tharte kan ngaihtuah tel chuan, Pathian rawngbâwlnaa kan lungawina leh hlimna vawng reng tûra ṭanpui kan ni ang.​—⁠Thuf. 11:⁠2.

Entîrna ṭhenkhat ngaihtuah ta ila. Kan chak ṭha vak lo a nih chuan, tlai lama Kristian inkhâwma tel thei tûra chakna kan neih theih nân zîng lamah hna hahthlâk thawh loh chu a ṭha mai thei. Chutianga kan tih chuan kan Kristian unaute nêna inkawmhona chu kan hlâwkpui thei ang. A nih loh leh, nu ber chu a fa a dam loh avângin in tinah rawngbâwlin chhuak thei lo ta se, Kristian unaunu pakhat chu sâwmin naupang muthilh hlâna telephone hmanga thu hrilh chu sâwt a ti mai thei a ni.

A nih leh, i dinhmun avângin kohhran inkhâwma zir tûrte chu inbuatsaih lâwk vek thei lo ta la engtin nge ni ang? I inbuatsaih theih chin tûr chu insiamin, a ṭha thei ang berin inbuatsaih ang che. Rei lo têa tih hlawhtlin tûr thiltum tênau zâwkte siam remin, thatho tak leh hlim takin kan awm thei a ni.

 Kan thiltumte siam rem tûr chuan tum ruh leh ṭan lâk a ngai ang a. France rama nupa tuak khat, Serge-a leh Agnès-i te chuan an thiltumah inthlâkthlengna nasa tak an neih a ngai a ni. Ani chuan: “Agnès-i’n nau a pai tih kan han hriat chuan, kan beisei angin missionary kan ni thei dâwn ta lo tih kan inhria,” a ti. Tûnah chuan fanu duhawm tak leh harhvâng tak pahnih an nei tawh a, Serge-a chuan an nupaa thiltum thar an insiam thu heti hian a sawi a ni: “Ram pâwna rawng kan bâwl theih tâk lohvah chuan, mahni ram chhûnga ‘missionary’ nih kan tum ta tlat a. Ṭawng dang hmang group pakhatah kan va awm ta a,” tiin. Chu thiltum thar an insiam chu an hlâwkpui em? Serge-a chuan: “Kohhranah ṭangkai hle nia inhriatna kan nei a ni,” a ti.

Kum 70 pêl tawh France rama Kristian unaunu pakhat, Odile-i chuan a khûpah ruhseh natna chi khat, osteoarthritis an tih chu a vei avângin a ding rei thei lo va. A dam lohna avânga in tina rawng a bâwl theih loh avângin a lunghnual hle a ni. Mahse, a tlâwm mai lo. Telephone hmanga thu hrilin, a rawngbâwl dân chu a thlâk danglam a. Ani chuan: “Ka rin ai mahin a lo awlsamin, a lo nuam zâwk phian!” a ti. Chutianga thu hrilh dân chuan rawngbâwl a duhna chu a neih lêttîr a ni.

Beiseina Inâwm Tâwk Chuan Malsâwmna A Thlen

Kan tih theih chin tûr âwm tâwk insiamna chuan beidawnna tam tak min pumpelhtîr ang. Kan tlin tâwk chu tlêm tham hle mah se, thiltum inâwm tâwk takte insiamna aṭangin hlawhtling nia inhriatna kan nei a. Chuvâng chuan, kan tihtheih tâwk chu tlêm tham hle pawh ni se, chu miah chuan kan lâwm a ni.​—⁠Gal. 6:⁠4.

Mahni laka a âwm tâwk inbeiseina kan neih chhoh hian, Kristianpuite ngaihtuah lehzualtu kan lo ni ang. Anmahni tlin tâwk kan hriat avângin, kan tâna an thiltihah kan lâwm reng ang. Ṭanpuina kan dawn chunga lâwmna lantîrin, thawhhona leh inhriatthiam tawnna kan awmtîr a ni. (1 Pet. 3:⁠8) Hmangaihna neitu kan Pa Jehova chuan kan pêk theih aia tam min phût ngai lo tih hre reng ang che. A âwm tâwk inbeiseina kan neih a, thlen theih tûr thiltumte kan insiam hian, thlarau lama kan thiltihte chuan lungawina leh hlimna nasa zâwk min neihtîr ngei ang le! (w08 7/15)

[Phêk 30-naa thu lâk chhuah]

Pathian rawng kan bâwlnaa hlimna leh lungawina nei tûr chuan, kan thiamna leh kan dinhmunte mila beiseina inâwm tâwk kan neih a ngai

[Phêk 32-naa milem]

‘Lawng puanzâr siam rem’ dân zir rawh

[Milem Hawhtîrtu]

© Wave Royalty Free/age fotostock