In Tina Rawngbawlna​—⁠Tuna A Pawimawh Chhan

“Ni tin Pathian biak inah leh anmahni inahte ‘Isua chu Krista a ni,’ tiin zirtîr leh hrilh an bâng chuang lo.”​—⁠TIRH. 5:⁠42.

1, 2. (a) Jehova Thuhretute chu eng ang thu hrilh dân avânga hriat hlawh tak nge an nih? (b) He thuziakah hian eng nge kan ngaihtuahho vang?

FELFAI taka inchei mi pahnih chuan in neitu hnênah Bible-a awm Pathian Ram chanchin chu hrilh an tum a. In neituin a ngaihven chuan, Bible ṭanchhan thu leh hla pe-in, in lama Bible zirpui neih a duh leh duh loh an zâwt ang a. Tichuan, in dangah an kal zawm ang. Hei hi khawvêl ram zawng zawng deuh thawa hmuh ṭhin a ni a. He hnaah hian i tel a nih chuan, miin thu i sawi hma aṭang hauh pawhin Jehova Thuhretute zînga mi i nih an hre fo tih i hmuh ngei a rinawm. Dik takin, in tina kala rawngbâwl chu kan nihna chhinchhiahna a lo ni.

² Thu hril tûr leh zirtîr siam tûra Isua hna min pêk kan thawh chhuah theih nân tih dân chi hrang hrang kan hmang a. (Mt. 28:​19, 20) Dâwr hmunah te, kawngsîrah te, leh vântlâng hmunah te thu kan hril a ni. (Tirh. 17:17) Mi tam takte chu telephone leh lehkha thawn hmangin kan be pawp a. Nî tin thiltiha kan mi tawhte hnênah Bible thutak kan hrilh bawk a. Ṭawng 300 chuanga Bible ṭanchhan thute hmuh theihna tûr, official Web site pawh kan nei hial bawk. * Hêng zawng zawngte hian rah ṭha tak a chhuah a ni. Mahse, hmun tam zâwkah chuan chanchin ṭha kan hriattîr dân ber chu in tina thu hrilh hi a ni a. Hetiang thu hrilh dân hian eng nge a ṭanchhan? Engtin nge chu tih dân chu tûn laia Pathian mite hman nasat ber a lo nih tâk? Engvângin nge tûnah hian a pawimawh êm êm?

Tirhkohte Tih Dân A Ni

3. Isua chuan tirhkohte hnênah thu hrilh chungchânga kaihhruaina eng nge a pêk a, chu chuan an thu hrilh dân tûr eng nge a târ lan?

³ In tina thu hrilhna hian Bible a ṭanchhan a. Isua’n tirhkohte chu thu hril tûra a tirh chhuah khân: “Khaw lianah emaw, khaw têah emaw in luhna apiangah a thleng tlâk mi tûr che u zawng chhuak ula,” tiin kaihhruaina a pe a ni. Engtin nge a thleng tlâk mi tûrte chu an zawn chhuah ang? Isua’n an hnênah: “Inah chuan in luh dâwnin chibai bûk ang che u. Tin, ina mite chu chibai bûk tlâk an nih chuan in thlamuanna thu chu an chungah lo thleng rawh se,” tia sawiin, in tina kal tûrin a hrilh a ni. Sâwm lohvin mite inah an va lêng lût tûr tihna a ni em? Isua thusawi belh chu chhinchhiah rawh: “Tupawh lâwm lo che ua, in thu pawh ngaithla lo apiang, chu mi in ata emaw, chu mi khua ata emaw in chhuah hun chuan in kephaha vaivut chu thing thla ang che u,” tih hi. (Mt. 10:​11-14) He kaihhruaina hian tirhkohte chu ‘an kalin, khua an fang zêl ang a, ram tinah chanchin ṭha hril’ tûrin mite sâwm nghâk lovin an inah an va tlawh tûr a ni tih a tichiang hle.​—⁠Lk. 9:⁠6.

4. Bible khawi lai takah nge in tina thu hrilh chungchâng chiang taka sawi a nih?

⁴ Bible chuan tirhkohte’n in tinah thu an hril tih chiang takin a sawi a. Entîr nân, Tirhkohte 5:42 chuan: “Ni tin Pathian biak inah leh anmahni inahte ‘Isua chu Krista a ni,’ tiin zirtîr leh hrilh an bâng chuang lo,” tiin an chungchâng a sawi a ni. A hnu kum 20-ah, tirhkoh Paula chuan Ephesi khua kohhrana upate chu: “A sâwt tûr thu in hnênah engmah hrilh ka tîm lo va, vântlâng zîngah te, in tinah te ka zirtir ṭhîn che u a,” tiin a hriattîr a ni. Paula chuan chûng upate chu ringtu an lo nih hmain a tlawh em? Thil dangte a zirtîr bâkah ‘Pathian lama rilru lamlêt thu leh, kan Lalpa Isua Krista lam rin tûr thu a hriattîr ṭhin’ avângin, anni chu a tlawh ngei a rinawm. (Tirh. 20:​20, 21) Tirhkohte 20:20 chungchâng sawiin, Robertson’s Word Pictures in the New Testament chuan: “Thuhriltu ropui berte’n in tina thu an hril hi a chhinchhiah tlâk hle,” a ti.

 Tûn Laia Khau Sipai Rualte

5. Engtin nge Joela hrilh lâwknaah thu hrilhna chu târ lan a nih?

⁵ Kum zabi khatnaa thu hrilhna chu kan hun laia thu hrilhna nasa zâwk neih tûr tem lâwkna mai a ni a. Zâwlnei Joela chuan hriak thih Kristiante thu hrilh rawngbâwlna chu khau pawh tiama ran nung nasa taka punna hri nên a tehkhin a ni. (Joel. 1:⁠4) Sipai rual ang maia kalin, khaute chuan harsatnate an hneh a, inahte lûtin, an kawnga awm rêng rêng chu an ei chhe vek zêl a ni. (Joela 2:​2, 7-9 chhiar rawh.) Pathian mite’n tûn lai huna chhel tak leh kimchang taka thu an hrilhna târ langtu fiah tak a va ni êm! He hrilh lâwkna thlen famkim nâna hriak thih Kristiante leh an ṭhian ‘berâm dangte’ tih dân hman nasat ber chu in tina rawngbâwl hi a ni. (Joh. 10:16) Keini Jehova Thuhretute hian he tirhkohte tih dân hi engtin nge kan lo hman ve ṭan?

6. Kum 1922 khân, in tina thu hril tûrin eng fuihna nge pêk a nih a, chu chu ṭhenkhatin engtin nge an chhân lêt?

⁶ Kum 1919 aṭang khân, thu hril tûra Kristian tinte mawhphurhna neih chu sawi uar a ni a. Entîr nân, August 15, 1922 Watch Tower-a chhuak “Rawngbâwl A Ngai Tak Meuh” tih thuziak chuan hriak thih Kristiante chu “mite hnêna thu leh hlate pêk chhuah leh an kawngka bula bia a, vân ram hnaih tawhzia hrilh” a pawimawhzia a hriat nawntîr a ni. Thusawi dân tûr kimchang tak chu Bulletin (tûna Kan Lalram Rawngbâwlna ni taah) hian târ lan a ni a. Chutichung pawhin, in tina ṭhahnemngai taka rawngbâwltu chu an la tlêm tham hle. Ṭhenkhat chuan chutianga rawng bâwl chu an duh lo va. Anni chuan hnialna chi hrang hrang phuh chhuak mah se, an harsatna bul ber chu in tina thu hrilh hi an thawh atâna hniam lutuk nia an ngaih vâng a ni a. Thlawhhma rawngbâwlna ngaih pawimawh a nih telh telh tâkah chuan, chutiang mi tam takte chu Jehova inawpna pâwl ata zawi zawiin an inhnûkdâwk ta a ni.

7. Kum 1950 chho bâwr vêl khân, thiltih ngai eng nge lo lang chiang?

⁷ Chu mi hnu lam kum sâwm bi-ahte chuan, thu hrilhnaa tel an pung tial tial a ni. Amaherawhchu, in tina rawngbâwl thei tûra mi mal zirtîrna pêk belh a ngai tih a lo lang chiang ta a. United States ram hi entîrna atân lo hmang ta ila. Kum 1950 chho bâwr vêl ṭantîr lamah chuan, ram chhûnga thuchhuahtu zaa 28-te chu lehkha sem chi pêk chhuah mai emaw, magazine kenga kawngpuia din mai emaw ang chi rawngbâwlnaah  chauh an tel a. Zaa 40 chuangte chuan thu hril miah lovin a thla têl an liamtîr a, thu hrilhnaah an tel ṭha lo hle a ni. Inpumpêk tawh Kristian zawng zawngte chu in tina thu hril tûra ṭanpui tûrin eng nge tih theih awm?

8, 9. Kum 1953 khân, eng zirtîrna program nge ṭan a nih a, chu chuan eng nge a rah chhuah?

⁸ Kum 1953-a New York Khawpuia neih khawvêl pum huap inkhâwmpuiah chuan, in tina rawngbâwlna chu ngaihsak zual sauh a ni a. Unau Nathan H. Knorr-a chuan Kristian upa zawng zawngte hna pui ber chu in tina rawngbâwltu ni tûra Thuhretu tinte ṭanpui a ni tûr a ni tih a puang a. Ani chuan: “Mi tinin chanchin ṭha chu in tinah an hril thei tûr a ni,” a ti. Chu thiltum tihlawhtling tûr chuan khawvêl puma zirtîrna program chu neih ṭan a ni a. In tina thu la hril lote chu mite ina va biak dân te, Bible aṭanga chhûtpui dân te, leh an zawhna siamte chhân dân te chu zirtîr an ni.

⁹ Chu zirtîrna chu a hlawhtling hle. Kum sâwm chhûngin khawvêl puma thuchhuahtu chu zaa 100-in a pung a, tlawhkîr neih zât chu zaa 126-in, Bible zirpui neih zât chu zaa 150-in a pung a ni. Tûnah hian Lalram thuchhuahtu maktaduai sarih dâwn laiin khawvêl pumah chanchin ṭha an hril a. He punna chhinchhiah tlâk tak hi Jehova’n a mite in tina thu hrilhna mal a sâwmzia târ langtu pakhat a ni.​—⁠Is. 60:⁠22.

Chhandam Ni Tûra Mite Chhinchhiah

10, 11. (a) Ezekiela bung 9-a chhinchhiah a nih angin, a hnênah eng inlârna nge pêk a nih? (b) Chu inlârna chu kan hun lai hian engtin nge a thlen famkim?

¹⁰ In tina rawngbâwl a pawimawhna chu zâwlnei Ezekiela hnêna inlârna pêkah hian a hmuh theih a ni. Chu inlârnaah chuan, Ezekiela chuan mi paruk hriamhrei keng leh a pasarihna lehkhatui bûr paia puan zai sîn sin chu a hmu a. Chu a pasarihna chu “khawpui . . . fang” chhuak a, “a chhûnga thil tenawm tih tawhte avânga thawpika ṭap ṭhînte chu an chalah chhinchhiah” tûra hrilh a ni. Chu chhinchhiahna hna thawh zawh a nih chuan, hriamhrei keng mi parukte chu chhinchhiahna nei lote that fai vek tûra hriattîr an ni.​—⁠Ezekiela 9:​1-6 chhiar rawh.

¹¹ Chu hrilh lâwkna thlen famkimnaah chuan, “puan zai sîn sin” mi pakhat chuan thlarauva hriak thih Kristian a la bângte a entîr a ni tih kan hria a. Thu hrilhna leh zirtîr siamna hmangin, hriak thih pâwl chuan Krista “berâm dang” lo ni tate chalah entîr nei chhinchhiahna an siamsak a ni. (Joh. 10:16) Chu chhinchhiahna chu eng nge ni? Chu chu chutiang berâmte’n inpumpêka baptisma chang tawh Isua Krista zirtîrte leh Krista neih ang mihring thara inthuam tawhte an nihzia târ langtu chiang tak, engmahin a hliahkhuh loh chala târ lan ang maia chiang hi a ni. (Eph. 4:​20-24) Hêng berâm ang mite hi hriak thih Kristiante nên pâwl khat an lo ni a, anni chuan chhinchhiahna hna pawimawh takah hriak thihte chu an ṭanpui leh chhâwng a ni.​—⁠Thup. 22:⁠17.

12. Engtin nge Ezekiela inlârna hmuha chala chhinchhiahna chuan berâm ang mite zawn chhunzawm zêl a pawimawhna a târ lan?

¹² Ezekiela hmuh inlârna chuan “thawpika ṭap ṭhînte” zawn chhuah zêl a hmanhmawhthlâk chhan pakhat chu a târ lang a. Chu chu mite nunna nêna a inkûngkaih vâng a ni. Hriamhrei keng mi parukin a entîr Jehova rorêlna kengkawhtu tûr vân sipaite chuan chu entîr nei chhinchhiahna nei lote chu an tiboral thuai ang. Chu rorêlna lo thleng tûr chungchângah tirhkoh Paula chuan “a vântirhkoh chak takte” nêna lo kal Lalpa Isua’n “Pathian hre lo mi leh kan Lalpa Isua chanchin ṭha âwih lo mite chunga phuba” a lâk tûr thu a ziak a ni. (2 Thes. 1:​6-8) Mite chu chanchin ṭha an chhân lêt dân azira an chungthu rêl a ni dâwn tih chhinchhiah ang che. Chuvângin, Pathian thuchah puan chhuahna chu tâwpna a lo thlen hma loh chuan khaihlak hauh lova neih chhunzawm zêl tûr a ni a. (Thup. 14:​6, 7) Chu chuan Jehova hnêna inpumpêk tawh zawng zawngte chungah mawhphurhna rit tak a nghat a ni.​—⁠Ezekiela 3:​17-19 chhiar rawh.

13. (a) Tirhkoh Paula chuan eng mawhphurhna nge nei nia a inhriat a, engvângin nge? (b) I thu hrilhna bial chhûnga mite lakah eng mawhphurhna nge nei nia i inhriat?

 ¹³ Tirhkoh Paula chu chanchin ṭha hril tûrin mi mala mawhphurhna nei niin a inhria a. Heti hian a ziak a ni: “Grik mite leh Awze mite hnênah bat ka nei; mi fing leh mi finglote hnênah pawh. Chutichuan nangni Rom khuaa awmte hnênah pawh chanchin ṭha ka theihtâwpa hril tûrin ka inpeih reng a ni,” tiin. (Rom 1:​14, 15) Zahngaihna a dawn avânga a lâwm êm avângin, Paula chuan amah ang bawka Pathian khawngaihna hlâwkpui tûra mi dangte ṭanpui chu a mawhphurhna niin a hria a ni. (1 Tim. 1:​12-16) A mi tawh apiangte chunga thu hrilhna hmang chauhva a rulh theih tûr bâ nei ang mai a ni. I thu hrilhna bial chhûnga mite lakah chutiang bâ chu nei niin i inhre ve em?​—⁠Tirhkohte 20:​26, 27 chhiar rawh.

14. Vântlâng hma leh in tina thu kan hrilh chhan ber chu eng nge ni?

¹⁴ Mihringte nun chhanhim chu pawimawh hle mah se, in tina thu hrilh nachhan tûr ṭha zâwk fê a awm a. Malakia 1:​11-a chhinchhiah hrilh lâwknaah, Jehova chuan: ‘Ni chhuahna aṭanga a tlâkna thleng pawhin Jentailte zîngah ka hming chu a ropui dâwn si a, . . . ka hming atân rimtui hlan a ni ang, thilhlan thianghlim nên: Jentailte zîngah ka hming a ropui dâwn si a,’ a ti. He hrilh lâwkna hi tithleng famkimin, Jehova hnêna inpumpêk a chhiahhlawhte chuan khawvêl hmun tina inngaitlâwm taka an rawngbâwlnaah Pathian hming chu tlâng hriatah an chawimawi a ni. (Sâm 109:30; Mt. 24:14) Jehova hnêna “faka inthawina” hlan chu vântlâng hma leh in tina thu kan hrilh chhan ber a ni.​—⁠Heb. 13:⁠15.

Thil Pawimawh Tak Lo Thleng Tûrte

15. (a) Engtin nge Israelte chuan a ni sarih nîa Jeriko an hual khân ṭan an lâk lehzual sauh? (b) Hei hian thu hrilhna chungchânga thil awm thei tûr eng nge a târ lan?

¹⁵ Thu hrilhna chungchângah eng thil nge lo la thleng dâwn? Josua lehkhabua chhinchhiah Jeriko lâkna chuan entîrna a pe a ni. Pathianin Jeriko a tihchhiat hma lawk khân, Israelte chu ni khata vawi khat zêl ni ruk chhûng khawpui kal hual tûra hrilh an ni tih hre chhuak ang che. A ni sarih nîah erawh chuan, an thiltihah ṭan an la lehzual sauh tûr a ni. Jehova chuan Josua hnênah: “Khawpui chu vawi sarih in vêl chhuak ang a, tin, puithiamten tawtawrâwtte chu an hâm ang. Tin, heti hi a ni ang a, berâmpa ki an ham rik ruai ruai hun . . . chuan, mipui zawng zawng chu ring takin au dur dur rawh se; tichuan khawpui kulh chu a chim rup ang,” tiin a hrilh a ni. (Jos. 6:​2-5) Kan thu hrilhnaah pawh hian chutiang bawka ṭan lehzual sauhna a awm thei ang. Rinhlelh rual lohvin, he khawvêl tihchhiat a nih hunah chuan, khawvêl chanchina Pathian hming leh a Lalram chanchin hrilhna nasa ber chu neih a ni tih kan hmu tawh ang.

16, 17. (a) “Hrehawm nasa tak” a lo thlen hmain eng nge thawh zawh a nih ang? (b) A dawta thuziakah eng nge kan sawiho vang?

¹⁶ Kan thu hrilh chu ‘ring taka au dur dur’ ang a nih hun a lo la thleng ngei dâwn a. Thu Puan buah chuan, rorêlna chanchin thiltithei takte chu “rial lian tak talent tluk laia rit ṭheuh” hmanga entîr a ni. * Tin, Thu Puan 16:21 chuan: “Chu hremna chu a nasa êm êm si a,” tiin a sawi bawk. In tina rawngbâwlna hian chûng rorêlna hnuhnûng ber chanchin puan chhuahna kawngah eng chanvo nge a neih dâwn tih chu kan la hre rih lo va. Mahse, “hrehawm nasa tak” a tâwp hmain, Jehova hming chu tûn hma zawng aia nasain hriattîr a ni tawh ang tih erawh  chu kan chiang thei a ni.​—⁠Thup. 7:14; Ezek. 38:⁠23.

¹⁷ Kan hmaa thil pawimawh tak lo thleng tûrte kan nghah pahin, Lalram chanchin ṭha chu ṭhahnemngai takin i puang chhuak chhunzawm zêl ang u. Chu hna thawk tûra in tina rawng kan bâwlnaah chuan eng ang harsatnate nge kan tawh a, engtin nge kan hmachhawn ang? Hêng zawhnate hi a dawta thuziakah sawiho a ni ang. (w08 7/15)

Engtin Nge Kan Chhân Ang?

• In tina thu hrilhnain eng Bible châng nge a ṭanchhan?

• Engtin nge in tina rawngbâwlna chu tûn laiah ngaih pawimawh a nih?

• Engvângin nge Jehova hnêna inpumpêk a chhiahhlawhte chuan thu hril tûra mawhphurhna an neih?

• Eng thil pawimawh takte nge lo thleng ang?

[Footnote-te]

[Zirlai Atâna Zawhnate]

[Phêk 10-naa milemte]

Tirhkoh Paula angin mi dangte hnêna thu hril tûra mawhphurhna nei niin i inhre ve em?

[Phêk 11-naa milem]

Kum 1953-a Unau Knorr-a thlalâk