In Tina Rawngbawlnaa Harsatnate Hnehin
In Tina Rawngbawlnaa Harsatnate Hnehin
“Buai êm êm [“harsa taka bei,” New World Translation] chung pawhin Pathian chanchin ṭha in hnêna sawi tûrin kan Pathianah chuan kan lo huai tâk zâwk kha.”—1 THES. 2:2.
1. Jeremia chuan eng harsatna nge a tawh a, engtin nge a hneh theih?
JEREMIA chu keimahni rilru ang pu mihring ve tho a ni a. Jehova’n “hnamte hnêna zâwlneiah” a ruat thu a hrilh khân, “E, Lalpa PATHIAN, ngai teh, thu ka sawi thiam lo, ka naupang si,” tiin a au chhuak a ni. Mahselangin, Jehova rinchhanin chu hna chu a pawm a. (Jer. 1:4-10) Jeremia chuan kum 40 aia tam chu ngaihsak lohna, hnâwlna, nuihsawhna, leh kut thlâkna hial pawh a tuar a ni. (Jer. 20:1, 2) A châng chuan thu hrilh bânsan mai châkna a nei a. Mahse, a thusawi ngaithla duh lote hnênah chanchin lâr lo tak chu a hril ṭâng ṭâng a ni. Jeremia chuan ama chaknaa a tihtheih miah loh tûrte chu Pathian chakna ringin a thawk zo thei a ni.—Jeremia 20:7-9 chiar rawh.
2, 3. Engtin nge tûn laia Pathian chhiahhlawhte chuan Jeremia tawh ang chi harsatnate chu an tawh ve?
2 Tûn laia Pathian chhiahhlawh tam takte chuan Jeremia rilru put hmang ang chu an pu ve a. In tina thu hril tûra an inngaihtuah hian, kan zînga ṭhenkhatte chuan, ‘Chu chu ka tithei ngai hauh lo vang,’ kan lo ti tawh ṭhîn. Mahse, chanchin ṭha hrilh chu Jehova duhzâwng a ni tih kan hriat chuan, kan hlauhthâwnna chu hnehin, thu hrilin kan buai ta hle a ni. Chutichung pawhin, kan zînga tam takte chuan a lo berah pawh rei lo te chhûng tal thu hrilh zêl tiharsatu dinhmunte chu kan tâwk a. In tina thu hrilh ṭan leh a tâwp thlenga hrilh chhunzawm zêl a harsa a ni tih chu hnial rual a ni lo.—Mt. 24:13.
3 A nih leh, hun eng emawti chhûng chu Jehova Thuhretute nêna Bible zira kohhran inkhâwmahte tel tawh ṭhîn, in tina thu hrilh erawh hreh tak ni ta la, engtin nge ni ang? A nih loh leh, tisa lama chak lohna nei ni chuang si lova in tina thu hrilh harsa titu baptisma chang tawh Thuhretu ni ta la, engtin nge ni ang? Mite chuan in tina rawngbâwlnaa harsatna an tawhte chu Jehova ṭanpuinain an hneh thei ṭheuh va, chuvângin nang ngei pawhin i hneh ve thei a ni.
Intihuai Rawh
4. Engin nge Paula chu huaisen taka chanchin ṭha hrilhtîr thei?
4 Khawvêl puma thu hrilhna chu mihring thiltihtheihna emaw, finna emaw avânga thawh zawh a ni lo va; Pathian thlarau hmanga thawh zawh a ni zâwk tih chu i hre ngei ang. (Zak. 4:6) Chu chu Kristian tinte rawngbâwlnaah pawh a dik a ni. (2 Kor. 4:7) Tirhkoh Paula hi han ngaihtuah ta ila. Missionary a thawhpuite nêna tiduhdahtute kut an tuar lai kha hre chhuakin: “Philippi khuaah chuan hrehawm tuar leh zahthlâk taka siama kan awm hnu khân buai êm êm [“harsa taka bei,” NW] chung pawhin Pathian chanchin ṭha in hnêna sawi tûrin kan Pathianah chuan kan lo huai tâk zâwk kha,” tiin a ziak a ni. (1 Thes. 2:2; Tirh. 16:22-24) Ṭhahnemngai taka chanchin ṭha hriltu Paula te ang meuhvin thu hrilh harsa tih châng an neih chu kan ring lo mai thei. Chutichung pawhin, keimahni ang bawkin Paula chuan huaisen taka chanchin ṭha hril tûrin Jehova a rinchhan tlat a ngai a ni. (Ephesi 6:18-20 chhiar rawh.) Engtin nge Paula chu kan entawn theih?
5. Thu hril tûra huaisenna kan neih theih dân kawng khat chu eng nge ni?
5 Thu hril tûra huaisenna kan neih theih dân kawng khat chu ṭawngṭaina hi a ni. Pioneer pakhat chuan: “Inring tâwk taka thu ka sawi theih nân te, mite rilru khawih tûra thu ka sawi theih nân te, leh rawngbâwlnaa hlimna ka neih theih nân te ka ṭawngṭai a ni. Hei hi keimahni hna ni lova Jehova hna a nih avângin, a ṭanpuina tel lo chuan engmah kan ti thei si lo va,” a ti. (1 Thes. 5:17) Kan zain huaisen taka thu kan hrilh theih nân Pathian thlarau thianghlim ṭanpuina chu bâng lova kan dîl ṭheuh a ngai a ni.—Lk. 11:9-13.
6, 7. (a) Eng inlârna nge Ezekiela’n a dawn a, eng nge a awmzia? (b) Ezekiela inlârna hmuh chuan tûn laia Pathian chhiahhlawhte tân zir tûr eng nge a pêk?
6 Ezekiela lehkhabu chuan huaisen taka thu kan sawi theihna tûra min ṭanpuitu thil dang a târ lang a. Jehova chuan inlârnaah Ezekiela chu “ṭahnate, lusûnna te” a chhûng lam leh a pâwn lama inziak lehkhabu zial chu a pe a, a hnênah chuan: “Mihring fapa, i pumah pai la, he lehkhabu ziak ka pêk che hian i kawchhûng tikhat rawh,” tiin ei tûrin thu a pe a ni. Chu inlârna awmzia chu eng nge ni? Ezekiela chuan a thuchah sawi tûr chu a hre chiang êm êm tûr tihna a ni a. Ama taksa pêng ang mai niin, a rilru veizâwng a khawih pha tûr tihna a ni bawk. Zâwlnei chuan: “Ka ei ta a, a thlumzia chu ka kâah chuan khawizû ang mai a ni,” tiin a sawi belh a ni. Pathian thuchah mipui zînga tlângaupui chu Ezekiela tân thil duhawm tak—khawizû thlum ang mai a ni a. Ani chuan ngaithla duh lote hnêna vaukhânna thu chu a hrilh ngai mah se, Jehova aiawh leh a hnathawh tûr pêk thawh zawh chu chanvo ropui takah a ngai a ni.—Ezekiela 2:8–3:4, 7-9 chhiar rawh.
7 He inlârna hian tûn laia Pathian chhiahhlawhte tân zir tûr ṭha tak a pai a ni. Keini pawhin kan thawhrimna hlut ṭhîn lotute hnênah vaukhânna thuchah hrilh tûr kan nei a. Kan tân Kristian rawngbâwlna chu Pathian min pêk chanvo hlu tak anga thlîr zêl tûr chuan, thlarau lama kan inchâwm ṭhat a ngai a ni. A pâwnlâng mai emaw, a châng châng chauh emawa zirna neih chu Pathian Thu hriat chian nân a tâwk ṭhîn lo. I mi mal Bible chhiarna leh zirna chu i tiṭha lehzual theiin, hun bi nei zâwkin i nei thei ang em? I thu chhiar chu ngun lehzualin i ngaihtuah zing zâwk thei ang em?—Sâm 1:2, 3.
Bible Sawihona Nei Ṭanin
8. Eng tih dânin nge Lalram thuchhuahtu ṭhenkhat chu in tina rawngbâwlnaah Bible sawihona neih ṭantîr thei?
8 Thuchhuahtu tam takte’n in tina rawngbâwlnaa harsa an tih ber chu in neitu biak ṭan hi a ni a. Thu hrilhna bial ṭhenkhatah mite biak ṭan chu thil harsa zawng a ni ngei mai. Thuchhuahtu ṭhenkhat chuan in tina thu hrilhnaah, phêk leh lam bâwm chhûnga târ lan anga uluk taka an inbuatsaih thusawi dân hmanga in neitu biak lawk hnua tract pakhat pêk chu nuam an ti zâwk a. Tract thupui emaw, a milem târ lan emaw chuan in neitu rilru a la mai thei a, chu chuan kan va lên chhan min hrilhtîr theiin, zawhna pakhat min zawhtîr thei bawk a ni. Hetiang chi tih dân dang leh chu, in neitu hnêna tract chi thum emaw, chi li emaw vêl entîr a, a duh ber pakhat thlantîr hi a ni. Mahse, kan tum chu tract pêk chhuah mai emaw, in tina he tih dân hman fo emaw a ni lo va, Bible zirna awmtîrtu sawihona neih ṭan hi a ni.
9. Engvângin nge inbuatsaihna ṭha neih chu a pawimawh?
9 Tih dân eng pawh chu hmang dâwn ta la, inbuatsaihna ṭha chuan in tina rawngbâwlnaah inring tâwk tak leh phûr taka thu hril thei tûrin a ṭanpui ang che. Pioneer pakhat chuan: “Thusawi dân tûr ka inbuatsaih ṭhat hian ka hlim zâwk ṭhîn. Chu chuan chu mi hmanga mite hnêna thu hrilh duhna min neihtîr a ni,” tiin a sawi. Pioneer dang pakhat chuan: “Ka pêk chhuah tûr thu leh hla chhuahte ka hriat bel hian, chûngte chu thu hrilhnaa hman ka phûr sauh ṭhîn,” tiin a sawi bawk. Thusawi tûr rilrua ennawnna chuan ṭangkaina ṭhenkhat a neih rual rualin, mi tam takte chuan a ria tihchhinna neih chu ṭangkai an ti lehzual a ni. Chutianga tihna chuan Jehova hnêna a ṭha ber pe tûrin anni chu a ṭanpui a ni.—Kol. 3:23; 2 Tim. 2:15.
10. Thlawhhma rawngbâwlna atâna inhmuhkhâwmna chu ṭangkai tak leh hlâwk tak nihtîr tûr chuan tih theih eng nge awm?
10 Thlawhhma rawngbâwlna atâna inhmuhkhâwmna ṭangkai tak chuan in tina rawngbâwlnaah hlawhtlinna leh hlimna a awmtîr a. Ni châng chu thu hrilh rawngbâwlna lam hawi a nih chuan, chu chu chhiara sawiho lawk theih a ni. Amaherawhchu, inhmuhkhâwmna kaihruaitu chuan thu hrilhna bial atâna inchawih tak thusawi dân chu sawipui emaw, lemchana entîr emaw nân; chutiang a nih loh pawhin, chu mi nî rawngbâwlna atâna hman theih tûr thu ṭangkai dang emaw sawipui nân hun inâwm tâwk a pe tûr a ni. Chu chuan lo kal khâwmte chu thu hrilhna ṭha tak nei thei tûrin a thuam belh ang. Inbuatsaihna ṭha tak a awm chuan, hetiang inkhâwmna kaihruaitu upate leh mi dangte chuan hêng zawng zawng hi hun ruat chhûngin an ti zo vek thei ang.—Rom 12:8.
Ngaihthlâknain Thil A Tihtheihzia
11, 12. Engtin nge khawngaihna nêna ngaihthlâksakna chuan chanchin ṭha mite hnêna thlen tûrin a ṭanpui theih? Entîrna pe rawh.
11 Inbuatsaihna ṭha mai ni lovin, mi dangte chunga mi mal ngaihsakna nasa tak lantîrna pawh hian rawngbâwlnaah Bible thu sawihona ṭan tûr leh mite rilru thlen thei tûrin min ṭanpui a. Chutianga ngaihsakna kan lantîr theih dân kawng khat chu, mite thusawi kan ngaihthlâksak dân hi a ni. Bial kantu pakhat chuan: “Dawhthei taka i ngaihthlâk peihzia i lantîr hian, chu chuan mite chu mak tak maiin a hîp thei a, chu chu inngaihsakna duhawm tak lantîrna a ni,” a ti. A hnuaia thiltawnin a târ lan angin, khawngaihna nêna ngaihthlâksakna chu in neitu thinlung hawngtu chabi a ni thei a ni.
12 France ram, Saint-Étienne khawpuia Le Progrès chanchinbua lehkha thawnah nu pakhat chuan a fanu thla thum mi a thih hnu lawka mi pahnihin a kawngkâ an va kik thu a sawi a. “Jehova Thuhretute an ni tih ka hre nghâl vat a. Anni chu hawihhâwm taka lo hnar haw nghâl mai ka tum a; mahse, an pêk chhuah lehkhabu pakhat chu ka hmu ta hlauh va. Chu chu Pathianin hrehawm tawrhna awm a phal chhan chungchâng ziakna a ni. Chuvângin, an thusawi hnial kalh tum rân chungin in chhûngah ka sâwm lût a. . . . Thuhretute chu dârkâr khat chuang an lêng a. Khawngaihna nei tih hriat ngawih ngawihin ka thusawi chu min ngaihthlâksak a; an kal chhuah dâwn meuh chuan thawveng huai nia ka inhriat avângin, an lo lên leh chu ka remti ta a ni,” tiin a ziak a ni. (Rom 12:15) A hnuah chuan, chu nu chuan Bible zir chu a remti ta bawk. Chu nu’n Thuhretute tlawh hmasak ber ṭuma a hriat ber chu an thusawi ni lovin, an ngaihthlâk dân hi a ni tih a chiang hle a, chu mi aṭang chuan thil tam tak kan zir thei a ni.
13. Kan mi tawhte azirin engtin nge chanchin ṭha kan hrilh dân chu kan thlâk danglam theih?
13 Khawngaihna nêna kan ngaihthlâk hian, a nihna takah chuan mite chu Lalram an mamawhzia min hrilh theihna hun kan pe tihna a ni. Hei hian an hnêna chanchin ṭha hrilh thei tûrin dinhmun ṭha zâwkah min awmtîr a. Chanchin ṭha hriltu hlawhtling takte hi ngaithlatu ṭha an ni tih i lo hriat tawh ngei a rinawm. (Thuf. 20:5) Anni chuan rawngbâwlnaa an mi tawhte chungah ngaihsakna dik tak an lantîr a ni. An hming leh an address mai ni lovin, an thil ngaihvente leh an mamawhte thlengin an chhinchhiah a. Tuemawin a rilru kamtu thil engemaw tak a sawi lan hian, zir bingna neiin, an thil zirte hrilh tûrin an tlawh leh nghâl ṭhîn. Tirhkoh Paula angin, an mi tawhte azirin Lalram chanchin an hrilh dân chu an thlâk danglam a ni. (1 Korinth 9:19-23 chhiar rawh.) Chutianga ngaihsak tak zetna chuan mite chu chanchin ṭha lamah a hîpin, “kan Pathian thinlunga khawngaihna” chu ropui takin a lantîr a ni.—Lk. 1:77.
Rilru Put Hmang Dik Nei Rengin
14. Kan rawngbâwlnaah, Jehova mizia chu engtin nge kan lantîr theih ang?
14 Jehova chuan zalên taka duh thlan theihna min pein, min chawimawi a. Ani chu Pathian Engkimtitheia mah ni se, amah chibai bûk tûrin tumah a tilui lo va, hmangaihna ṭanchhanin a thlêm zâwk a, a thilpêk ropui tak chhâng lêttute chu mal a sâwm bawk ṭhîn. (Rom 2:4) A rawngbâwltu kan nih angin, thu kan hrilh apiangin chanchin ṭha chu kan Pathian khawngaihna phua sawi tûrin kan inring reng tûr a ni a. (2 Kor. 5:20, 21; 6:3-6) Chutianga ti thei tûr chuan, kan thu hrilhna bial chhûnga awm mite chungah rilru put hmang dik kan nei reng tûr a ni. Chu mi nei thei tûrin engin nge min ṭanpui thei ang?
15. (a) Isua’n a tirhkohte chu mite’n an thuchah ken an hnâwl huna tih dân tûr eng nge a hrilh? (b) Engin nge a thleng tlâk âwm mite zawn chhuahna ngai pawimawh ber tûrin min ṭanpui thei?
15 Isua chuan a hnungzuitute chu miin an thuchah ken an hnâwl huna lungngai lutuk lo tûr leh a thleng tlâk âwm mite zawn hmuh tum tlat zâwk tûrin a hrilh a ni. (Matthaia 10:11-15 chhiar rawh.) Thiltum tênau zâwk, thlen theih nghâl tûrte insiamna chuan chutiang ti thei tûr chuan min ṭanpui thei a. Unaupa pakhat chu thil hlu laih chhuah tûr zawnga vâktu nên a inkhaikhin a. “Vawiin eng hun emaw takah hian rangkachak awmna chu ka hmu chhuak ngei ang,” tih chu a châng vawn a ni. Unaupa dang pakhat chuan “chawlhkâr tina tuina nei mi pakhat tal hmu chhuak a, a tuina chhawm chhohtîr tûra rei rial lova va tlawh leh” chu thiltumah a nei a. Thuchhuahtu ṭhenkhat chuan a theih phawt chuan in neitu hnêna Bible châng pakhat tal hmuhtîr chu an tum bawk. I tân thiltum tihhlawhtlin theih ngei tûr eng nge i insiam theih?
16. Thu hrilh zêl chhan tûr eng nge kan neih?
16 In tina rawngbâwlna hlawhtlinna chu thu hrilhna bial chhûnga mite chhân lêt dân ringawtah a innghat lo. Thu hrilhna hi rilru ṭha pute chhandamna atân a pawimawh ngei mai; mahse, thil pawimawh zâwk dang atân pawh a ni bawk. Kristian rawngbâwlna chuan Jehova kan hmangaihna lantîr theihna hun remchâng min pe a. (1 Joh. 5:3) Chu chuan thisena thiam loh channa tûr min pumpelhtîr thei bawk. (Tirh. 20:26, 27) Thu hrilhna chuan Pathian ngaihsak lote hnênah ‘Pathian rorêl hun a lo thlen’ thu vaukhânna a pe a. (Thup. 14:6, 7) A pawimawh berah chuan, chanchin ṭha hrilhna hmangin Jehova hming chu leilung zawng zawngah fakin a awm a ni. (Sâm 113:3) Chuvângin, mite’n an ngaithla emaw, ngaithla lo emaw pawh ni se, Lalram chanchin chu kan hril zêl tûr a ni. Chanchin ṭha hril tûra kan thawhrimna chu Jehova mithmuhah a va mawi tak êm!—Rom 10:13-15.
17. Mite chu eng nge pawm luihtîr an nih thuai dâwn?
17 Tûn laia mi tam takte’n kan thu hrilh rawngbâwlna chu engah mah ngai lo mah se, an ngaih dân chu a inthlâk thuai dâwn. (Mt. 24:37-39) Jehova chuan Ezekiela rorêlna puan chhuah chu a lo thlen tak tak hunah, helhmang Israelte chuan “an zîngah zâwlnei a awm tih an hre” dâwn tih a hnênah a tiam a ni. (Ezek. 2:5) Chutiang bawkin, Pathianin he khawvêl chunga ro a rêl hunah chuan mite chuan Jehova Thuhretute’n vântlâng hmun leh in tina an hrilh chanchin chu, Pathian dik, Jehova hnêna mi a ni tih leh Thuhretute chu Pathian tân palai an ni tak zet tih chu loh theih lohva an pawm a ngai ang. He hun pawimawh takah hian a hming put theihna leh a thuchah puan chhuah theihna kan nei chu chanvo hlu a va ni tak êm! A chakna rinchhanin, in tina rawngbâwlnaa kan tawh harsatnate chu i hneh chho zêl ang u. (w08 7/15)
Engtin Nge Kan Chhân Ang?
• Engtin nge thu hril tûrin huaisenna kan neih theih ang?
• In tina rawngbâwlnaah engin nge Bible sawihona ṭan thei tûrin min ṭanpui ang?
• Engtin nge mi dangte ngaihsak tak zetna kan lantîr theih ang?
• Engin nge kan thu hrilhna biala mite chunga rilru put hmang ṭha nei reng tûrin min ṭanpui thei?
[Zirlai Atâna Zawhnate]
[Phêk 15-naa bâwm/milem]
Bible Sawihona Ṭan Theih Dân Kawng Khat
Ṭan nân:
▪ In neitu i chibai hnuah, tract pakhat pein heti hian i sawi thei ang, “Ka rawn lên luh chhan chu he thu pawimawh tak chungchânga thil phûrawm tak hrilh tûr chein a nia.”
▪ A nih loh leh, tract pakhat pein heti hian i sawi thei ang, “He mi chungchânga i ngaih dân hriat ka duh avângin ka rawn tlawh lawk che a.”
Tract chu a lâk chuan:
▪ Rei tak ngawi reng lovin, tract thupui ṭanchhan a ngaih dân phawrh chhuak thei zawhna tluangtlam tak pakhat zâwt rawh.
▪ Ngun takin ngaihthlâksak la, in neitu ngaih dân chu hriat tum tlat rawh. A ngaih dân a sawi avângin lâwm thu hrilh la, in tîtî dun chhûngin chu chu rilruah vawng reng ang che.
Sawihona chhunzawm tûrin:
▪ Bible châng pakhat emaw, a aia tam emaw chhiarin sawipui la, i thusawi dân chu in neitu tuizâwng leh mamawh dân azirin siam rem rawh.
▪ Tuina lantîr a nih chuan, thuchhuah chu pe la, a remchân chuan Bible zirna neih dân entîr rawh. Tlawh leh tûrin ruahmanna siam ang che.