Korinth Khuaa Mite Hnêna Lehkha Thawnte Aṭanga Thu Pawimawh Hrilhfiahna
Jehova Thu Chu A Nung
Korinth Khuaa Mite Hnêna Lehkha Thawnte Aṭanga Thu Pawimawh Hrilhfiahna
TIRHKOH Paula chuan Korinth khuaa kohhran chu a vei hle a. Chuta unaute inkârah chuan inhnialnate a chhuak tih a lo hria a ni. Nungchang bawlhhlawhna chu an ngaithei a. Tin, chu mi kohhran pawh chuan thil eng engemaw chungchângah Paula râwnin lehkha a thawn ve bawk a ni. Chuvângin, Paula chuan missionary-a a zin a ṭum thumna, C.E. 55-a Ephesi khuaa a châm laiin, Korinth khuaa mite hnêna a lehkha thawn pahnihte zînga a hmasa zâwk chu a ziak a ni.
Thla engemaw zât hnu lawka a ziak ni âwm taka lang a lehkha thawn pahnihna chu, a hmasa zâwk chhunzawmna a ni a. Kum zabi khatnaa Korinth khua kohhran chhûng lam leh pâwn lam dinhmun chu kan tûn lai hun dinhmun nêna kawng tam taka a inan avângin, Korinth mite hnêna Paula lehkha thawnte chu kan tân pawh a hlu hle a ni.—Heb. 4:12.
‘INVENG ULA, DING NGHET ULA, CHAK TAKIN AWM RAWH U’
‘In zain thu thuhmun sawi rawh u,’ tiin Paula chuan a fuih a. (1 Kor. 1:10) Kristian miziate rem chhohna tûr ‘Isua Krista lo chu lungphûm dang rem theih’ a ni lo. (1 Kor. 3:11-13) Kohhran chhûnga inngaih hmang mi pakhat chungchângah, Paula chuan: “Mi sual chu in zîng ata hnawt chhuak rawh u,” a ti. (1 Kor. 5:13) “Taksa hi inngaih nân a ni lo va, Lalpa tân a ni zâwk e,” tiin a sawi bawk.—1 Kor. 6:13.
An “thil ziak thute” chhângin, Paula chuan inneihna leh nupui pasal nei lova awm chungchângah fuihna ṭha tak a pe a. (1 Kor. 7:1) Tin, Kristian lû nihna te, Kristian inkhâwmnaa engkim fel taka tih chungchâng te, thawhlehna a awm ngeizia te a sawi hnuah: “Invêng ula, rinnaah chuan ding nghet ula, intihuai ula, chak takin awm rawh u,” tiin a fuih a ni.—1 Kor. 16:13.
Bible Chungchânga Zawhnate Chhânna:
1:21—Jehova chuan “thu hril âtthlâk” hmangin ringtute a chhandam tak zet em? Chhandam lo. Amaherawhchu, “khawvêlin finna hmanga Pathian an hriat theih loh” avângin, mite chhandam nâna Pathian thil hman chu khawvêl tân thil âtthlâk a ni.—Joh. 17:25.
7:33, 34—Paula’n nupui pasal neite lungkham “khawvêl lam thil” a tih hian eng a sawina nge ni? Paula chuan nupui pasal nei Kristiante ngaihsak ngai nî tin nun nêna inkûngkaih thilte a sawina a ni. Chûng zîngah chuan ei in tûr te, silhfên tûr te, in hmun lo ram te a tel a; mahse, Kristiante hawisan tûr khawvêla thil ṭha lote a tel lo.—1 Joh. 2:15-17.
11:26—Isua thih hriat rengna chu eng anga zinga hman tûr nge ni a, eng hun a lo thlen ‘hma loh zawnga’ hman tûr nge ni? Paula chuan Isua thih hriat rengna chu hman tlut tlut tûr a tihna a ni lo. A sawi zâwka chu, hriak thih Kristiante’n kum khata vawi khat, Nisan ni 14-a Hriatrengna entîrnate an ei a, an in apiangin “Lalpa thihna chu [an] entîr,” a nih loh leh an puang chhuak a tihna zâwk a ni. Chutiang chuan “a lo kal leh hma loh zawng” an ti zêl a, chu chu thawhlehna hmanga vâna anmahni a lâk chhoh hma loh zawngin an ti zêl tihna a ni.—1 Thes. 4:14-17.
13:13—Eng kawngin nge hmangaihna chu rinna leh beiseina aia a ropui zâwk? “Thil beiseite” a lo thlen hun chuan, rinna leh beiseina chu a tâwp ta ṭhîn a. (Heb. 11:1) Hmangaihna chu chatuana a awm zêl avângin rinna leh beiseina aiin a ropui zâwk a ni.
15:29—‘Mitthite puala baptisma chang’ tih chu eng tihna nge ni? Paula chuan a la nung damte’n baptisma chang lova thite tân baptisma an chang tûr a tihna a ni lo. Hriak thih Kristiante’n an thiha thlarau nuna an thawhleh thlenga rinawmna an vawnna tûr nun kawng ûm tûra baptisma an chan chungchâng a sawina a ni zâwk.
Kan Zir Tûrte:
1:26-31; 3:3-9; 4:7. Mahni inchhuang lova, inngaitlâwm taka Jehova chhuanna chuan kohhranah remna a awmtîr.
2:3-5. Grik mi fingte leh zirna sâng awmna Korinth khuaa thu a hrilh laiin, Paula chuan a thu ngaithlatute a hmin dâwn leh dâwn loh a ngaihtuah buai ve ngei ang. Amaherawhchu, a neih mai theih chak lohna emaw, hlauhthâwnna emaw a enga mahin Pathian pêk rawngbâwlna chu a hlen lohtîr chuang lo. Chutiang bawkin, dinhmun khirh leh kan la tawh ngai lohte chuan Pathian Ram chanchin ṭha hril lovin min awmtîr tûr a ni lo. Paula ang bawkin, Jehova ṭanpuina chu kan ring tlat thei a ni.
2:16. “Krista rilru” nei tih chu a thil ngaihtuah dân leh a ngaihtuah chhan hriat a, a thil ngaihtuah anga ngaihtuah bawk a, a mizia chiang taka hriat a; tin, a entîrna siam zui hi a ni. (1 Pet. 2:21; 4:1) Isua nun leh a rawngbâwlna chanchin uluk taka kan zir chu a va pawimawh tak êm!
3:10-15; 4:17. Mite zirtîrna leh zirtîra kan siamna kawnga kan thiam dân chu ṭha taka bih chiangin, hma kan sâwn zêl tûr a ni. (Mt. 28:19, 20) Zirtîr dân kan thiam vak loh chuan, kan zirpui chuan rinna fiahna a pal tlang zo lo vang a, chhandam ni mah ila chu chu chânna nasa tak a nih avângin ‘meia kal tlang ang mai’ a ni ang.
6:18. “Inngaih hi tlânsan” tûr chuan, Grik ṭawnga por·neiʹa an tihin a huam tel thiltihte pumpelh mai ni lovin, inngaihna thlen thei thil eng pawh—saruak lem leh zahmawh lam thuziak te, nungchang lama bawlhhlawhna te, mipat hmeichhiatna lam hlîr ngaihtuahna te, leh inchhaiderna te chu kan pumpelh tûr a ni.—Mt. 5:28; Jak. 3:17.
7:29-31. Nupate chu Lalram hna dah hmasa thei lo khawpa inngaihsak tawn lutuk lo tûrin an fîmkhur tûr a ni.
10:8-11. Mosia leh Arona laka Israelte an phunnawi khân, Jehova chu a thinur hle a. Phunnawi chîng ni lo tûra invên chu a finthlâk a ni.
16:2. Ruahman lâwkna a awm a, dân ang thlapa tih a nih chuan khawvêl puma rawngbâwlna atâna thawhlâwm chu kan thawh zat zat thei ang.
“TIHṬHAT FAMKIMIN AWM ULA”
Paula chuan Korinth kohhrana mite hnênah thil sual ti zilhhauh tawh inlamlêta chu an “ngaidamin [an] thlamuan zâwk tûr a ni,” tih a hrilh a. A lehkha thawn hmasa chuan anni chu tilungngai mah se, ‘simna tûra lungngai’ an nih avânga a lâwm thu Paula chuan a hrilh a ni.—2 Kor. 2:6, 7; 7:8, 9.
Paula chuan Korinth khuaa mite chu ‘engkim an ngah anga’ khawngaih thilpêk pawh “ngah” tûrin a fuih a. Amah dodâltute a chhân hnuah, mi zawng zawngte hnênah, fuihna hnuhnûng ber chu heti hian a pe a ni: “Lâwm takin awm rawh u. Tihṭhat famkimin awm ula; thlamuang takin awm ula; rilru hmunkhat pu ula, lungrual takin awm rawh u,” tiin.—2 Kor. 8:7; 13:11.
Bible Chungchânga Zawhnate Chhânna:
2:15, 16—Engtin nge “Krista rimtui” kan nih? Chutiang kan nih chhan chu Bible thu âwih tlat a, a thuchahte kan hrilh vâng a ni. Chutiang “rim” chu mi fel lote tân tenawm tak a nih laiin, Jehova leh mi rilru ṭhate tân erawh rimtui tak a ni thung.
5:16—Engtin nge hriak thih Kristiante chuan ‘tisa lamah chuan tumah an hriat tawh loh’? Anni chuan mite chu tisa lamah an thlîr tawh lo, a awmzia chu mite hausakna te, an hnam te, a nih loh leh an chi emaw, an pianna ram emaw te ṭanchhanin thlei bîk an nei lo tihna a ni. An tâna pawimawh chu an rinpuite nêna an inlaichînna hi a ni.
11:1, 16; 12:11—Paula chu Korinth khuaa mite lakah chuan a â, a nih loh leh âwm lo takin a awm em? Awm lo ve. Amaherawhchu, tirhkoh a nihna humhim a tumna lamah ṭhenkhat tân inchhuang tak leh âwm lo tak angin a lang pawh a ni thei ang.
12:1-4—Tunge “paradis-a lâk chhohva . . . awm” kha? Bible-in chutiang inlârna hmutu dang an awm thu a sawi loh avâng leh Paula’n tirhkoh a nihna humhimna thu a sawi hnu lawk a nih avângin, ama thiltawn ngei a sawi a ni ang. Tirhkohvin a lo hmuh lâwk chu, ‘tâwpna huna’ Kristian kohhran awmna thlarau lam paradis a nih a rinawm hle.—Dan. 12:4.
Kan Zir Tûrte:
3:5. A bul berah chuan, he Bible châng hian Jehova’n a Thu, a thlarau thianghlim, leh a inawpna pâwl lei lam pêng hmangin Kristiante chu rawngbâwl tûra tling tak a nihtîr thu min hrilh a ni. (Joh. 16:7; 2 Tim. 3:16, 17) Bible leh Bible ṭanchhan thu leh hla chhuahte taima takin kan zir tûr a ni a, thlarau thianghlim dîlin kan ṭawngṭai fan fan tûr a ni bawk a; tin, Kristian inkhâwma tel ziahin, chante kan nei ve tûr a ni.—Sâm 1:1-3; Lk. 11:10-13; Heb. 10:24, 25.
4:16. Jehova’n ‘kan chhûng lam mihring chu nî tin a siam thar zêl’ avângin, thlarau lama a châwmnate kan hmang ṭangkai reng tûr a ni a, thlarau lam thil ngaihtuah lovin ni khat tê pawh kan liamtîr tûr a ni lo.
4:17, 18. ‘Kan hrehawmna hi nêp tak, tûn mit khap kâr chhûng chauhva awm tûr’ a ni tih hriatna chuan harsatna kan tawh chhûng zawnga Jehova chunga rinawm reng tûrin min ṭanpui thei.
5:1-5. Vân nun beiseina nei hriak thih Kristiante rilru veizâwng Paula sawi chhuah dân chu a va mawi tak êm!
10:13. A tlângpui thuin, mamawh zualna hmun ṭanpui tûra ruahmanna chiang tak a awm a nih loh chuan, kan kohhran tâna ruat thu hrilhna bialah chauh thu kan hril tûr a ni.
13:5. ‘Rinnaa kan awm leh awm loh inchhin’ tûr chuan, kan nungchang chuan Bible aṭanga kan thu zir a mil a ni tih kan chian tûr a ni a. ‘Mahni ngei infiah ṭhîn’ tûr chuan, ‘hriat theihna’ kan neih ṭhat dân leh rinna thiltih kan lantîr nasat dân pawh tiamin, thlarau lama kan puitlin dân chu kan chhût tûr a ni. (Heb. 5:14; Jak. 1:22-25) Paula fuihna thu ṭha tak chu nunpuiin, thutak kawng chu kan zawh reng thei ang. (w08 7/15)
[Phêk 22, 23-naa milem]
“Chu chhang chu in ei a, no chu in in apiangin,” tih thute awmzia chu eng nge ni?—1 Kor. 11:26