Chhiartute Zawhna Siam

Nova Dam Laia Tuilet Khan Lei A Tuam Chhuak Tak Zet Em?

Nova Tuilêt a thlenna chu kum 4,000 aia tam a liam tawh a. Chuvângin a chanchin min hrilh thei tûrin mita hmutu nung dam an awm tawh lo. Amaherawhchu, chu chhiatna chungchâng ziaka chhinchhiah a awm a, chu chuan a hun laia tlâng sâng ber pawh a chîm pil thu a sawi a ni.

Chu mi chungchâng ziaka chhinchhiah chuan heti hian a sawi: “Tui chu leiah hian ni sawmli chhûng zawng a lêt a . . . Lei chungah hian tui chu nasa takin a lo pung a; vân hnuaia tlâng sâng zawng zawngte a pil zo ta vek a. Tawng sâwm leh tawng nga [feet 22 vêl] zeta sângin a lo awm ta pûng a; tlângte chu a pil ta daih a,” tiin.​—⁠Genesis 7:​17-20.

Mi ṭhenkhatte chuan leilung zawng zawng tuiin a tuam chhuak vek tih chu thawnthu mai emaw, sawi uarna mai emawah an ngai mai thei. Mahse, chutiang a ni hauh lo! Dik tak chuan, lei hmun a tam zâwk, hmun zaa ṭhena hmun 71 vêl chu tûn thleng pawhin tuiin a la tuam reng a. Chuvângin, a nihna takah chuan tuilêt tuite chu tûn thlengin a la awm reng a tih theih a ni. Chhim tâwp leh hmâr tâwpa vûr hlâwmte chu tui ral ta sela chuan, New York leh Tokyo ang khawpuite chu a chîm pil vek ang.

United States ram hmâr thlang lam leilung pian hmang zir mite chuan chu mi hmun chu chhiatna râpthlâk tak thlentu hun rei tak chhûng awh tuilêtin vawi 100 vêl lai a tuam chhuah an ring a ni. Chu mi hmuna thleng tuilêt pakhat chu feet 2,000 vêla sâng, dârkâr khata mêl 56-a chakin a lo thleng thut nia sawi a ni a. Chutiang chi thil dang hmuh chhuahte chuan scientist dangte chu lei pum huap tuilêt hi thil awm thei a ni tih a rintîr a ni.

Bible hi Pathian Thu a nih ringtute tân erawh, lei pum huapa tuilêt chu thil awm thei mai a ni lo. Thilthleng dik tak a ni. Isua chuan Pathian hnênah: “I thu chu thutak a ni,” a ti. (Johana 17:17) Tirhkoh Paula chuan Pathianin “mi zawng zawng chhandama awmah leh thutak hriaah” a duh tih a ziak a. (1 Timothea 2:​3, 4) Pathian Thu-ah hian thawnthu phuahchawpte tel ta se, engtin nge Paula chuan Isua hnungzuitute hnênah Pathian leh a thiltum chungchâng thutak a zirtîr theih ang?

Isua chuan Tuilêt a thleng tih a ring mai ni lovin, lei pum huapin a thleng a ni tih a ring bawk. A lo kal lehna leh khawvêl tâwpna chungchâng a hrilh lâwkna ropui takah, Isua chuan chu mi huna thilthleng tûrte chu Nova hun lai nên a khaikhin a. (Matthaia 24:​37-39) Tirhkoh Petera pawhin Nova dam laia tuilêt chungchâng chu a ziak a ni: “Chu mi laia khawvêl awm chu tuiin a chîm a, a boral ta,” tiin.​—⁠2 Petera 3:⁠6.

Nova chu mi awm tak tak a nih loh va, lei pum huapa tuilêt chu thilthleng tak tak a nih loh chuan, Petera leh Isua’n ni hnuhnûnga awmte tâna vaukhânna an pêk chu thil awmze nei lo a ni ang a. Vaukhânna nih ahnêkin, chûng ngaih dânte chuan miin Bible vaukhânna a hriatthiamna chu a tibuai zâwk ang a, Nova Tuilêt aia nasa zâwk hrehawm nasa tak lo thleng tûrah a dam khawchhuah loh mai a hlauhawm ang.​—⁠2 Petera 3:​1-7.

Pathianin a mite chunga a zahngaihna chungchâng sawiin: “‘Nova tuite chuan lei a chîm pil leh tawh lo vang,’ tia, chhia ka chham ang khân, ‘I chungah ka thinur tawh lo vang a, ka zilhhau tawh hek lo vang che,’ tiin, chhia ka chham ta a ni,” a ti. Nova Tuilêtin lei a chîm pil tak tak ang bawkin, Pathian khawngaihna chuan amah rinchhantute chu a awmpui tak zet ang.​—⁠Isaia 54:⁠9. (w08 6/1)