Tûn Laia ‘Israel Hmeichhe Naupang Tê’

KRISTA thih Hriatrengna a thlen hma chawlhkâr hnihah chuan, Brazil ram Praia Grande khawpuia awm Sales chhûngkua chuan an sâwm duhte hming chu an ziak chhuak ṭheuh va. Kum ruk mi Abigayl-i chu sâwmna pakhat an pe a, a sâwm tûr chu an zâwt a ni.

Ani chuan: “Min nuih ṭhîntu kha ka sâwm ang,” tiin a chhâng a.

A nu leh pate chuan: “Tunge nuih ṭhîn che a?” tiin an zâwt a.

“Wheelchair-a ṭhu reng ṭhîn khân,” tiin a chhâng a ni.

A hnu ni li-ah chuan, Abigayl-i chuan a mi sâwm duh chu a nu leh pate a kawhhmuh a. A sâwm duh Walter-a chu Kingdom Hall aṭanga hla vak lova awm a ni. Ani chu kum 15 kal taa kum 28 mi a nih lai khân, lîrthei chêtsualna avângin a kâwng achin hnuai lam chu a zeng a. Mi hausa a nih avângin vêngtu pahnih a nei a ni. Abigayl-i’n Walter-a biak phalna a hmuh hnu chuan, a nu leh pate chuan an fanuin sâwmna pêk a duh thu an hrilh ta a ni.

Thu a sawi zawhah, Abigayl-i chuan: “Kingdom Hall-a mi dang zawng zawngte chuan sâwmna tam tak an nei ṭheuh va; mahse, kei chuan pakhat chauh ka nei. Chuvângin, nangmah chauh hi ka sâwm thei che a ni. I lo kal loh chuan, ka tân tumah an awm lo a ni mai. I lo kal erawh chuan ka hlim viau vang, Jehova phei chu a hlim lehzual ang,” a ti a.

Hriatrengna nî a lo thlen chuan, chu mi tlaia neih tûr Hriatrengna inkhâwm atâna inbuatsaih nân Abigayl-i pawh tiamin Thuhretute chuan Kingdom Hall chu an tifai a. Chawhnu lamah Walter-a’n Kingdom Hall a kal pelha Abigayl-i a han hmuh chuan, motor khalhtu chu tiding tûrin a hrilh a. Motor kawngka dârthlalang chu a tawlh thla a, Abigayl-i chu eng nge a tih a zâwt a. Ani chuan a tâna hmun nuam tak a nih theihna tûra Hall an tihfai thu a hrilh a ni.

Chu mi tlai chuan Abigayl-i chu a awm hle hle thei lo va. Inkhâwm a inṭan ta, Walter-a a lo thlen leh thlen loh hriat tumin a hawi kual sek mai a. Walter-a chu amah vêngtute nêna an lo thlen tâk thutah chuan a nui ta var var mai a ni. Thusawi zawhah chuan, Walter-a chuan khaw danga zin tûra an kal chhuah ṭan zet tawh thu leh a hnuah chuan a rilru thlâkin hmeichhe naupang tân liau liauva Hriatrengna inkhâwma a lo kal thu a sawi chhuak a ni. Chu mi hnu chuan: “Ka thu ngaihthlâk chu ka mamawh tak a ni,” tiin a sawi belh a. Bible a dîl a; tichuan, Bible zir ṭanin a inkhâwm ṭan ta a ni.

A hnuah, Walter-a farnu chuan a nuṭapain a sawi fo Abigayl-i hmuh a duh thu a sawi chhuak a. A han hmuh chuan, hmeichhe naupang fel tak a nih avângin a lâwm hle. “Ka nuṭapa a hlim viau chhan chu ka hre ve ta,” tiin a sawi a ni.

Walter-a chu Bible zirin a inkhâwm chhunzawm zêl a. Inkhâwmnaah zawhnate pawh chhângin, a thil zirte chu mi dangte a hrilh chhâwng hial a ni. He Abigayl-i tê hian, Pathian dik Jehova hre tûra Naamana ṭanpuitu Israel hmeichhe naupang tê kha min hriat chhuahtîr chiang hle.​—⁠2 Lalte 5:​2-14. (w08 6/1)