Jehova Chuan A Chhiahhlawh Tarte Duat Takin A Enkawl

“A hming chunga hmangaihna in lantîr, . . . chu theihnghilh tûrin Pathian chu mi fel lo a ni si lo.”​—⁠HEB. 6:⁠10.

1, 2. (a) Lu ṭuak tuemaw i hmuhin, eng nge a hriat chhuahtîr che? (b) Engtin nge Jehova chuan Kristian tar tawh takte chu a thlîr?

KOHHRAN chhûnga tar lu ṭuak tawhte i han hmuh hian, chu chuan Daniela bua chuang chanchin pakhat a hriat chhuahtîr che em? Daniela hmuh inlârnaah, Pathian Jehova chu lu ṭuak tawh angin a insawi a. Daniela chuan: “Lalṭhutthlêngte an han hûn chhuaha, mi pakhat, Hmâkhawsânga a ṭhut thlengin ka en reng a; a silhfênte chu vûr anga vâr a ni a, a sam chu sahmul thinghlim tak ang a ni,” tiin a ziak a ni.​—⁠Dan. 7:⁠9.

² Sahmul pângngai, a nih loh leh sahmul thianghlim chu a vâr a ni ṭhîn a. Chuvângin, lu ṭuak leh “Hmâkhawsânga” tih hming chuan Pathian upat tawhzia leh a finna nasatzia min hriattîr a, chûng chuan kan zah ber a phu a ni. Chuti a nih chuan, Hmâkhawsânga tia koh Jehova chuan tar rinawmte chu engtin nge a thlîr? Pathian Thu chuan: “Lu ṭuak chu ropuina lallukhum a ni, felna kawnga hmuh a nih hian,” tiin a sawi. (Thuf. 16:​31, NW) Ni e, Kristian mi rinawmte lu a lo ṭuah hian, chutianga an lan dân puitling tak chu Pathian mit hmuhah a mawi a ni. Jehova’n i unau tar tawh takte a thlîr dân chu i ṭâwmpui ve em?

Engvângin Nge An Hlut Em Em?

3. Engvângin nge kan Kristianpui tarte chu kan tân an hlut êm êm?

³ Pathian chhiahhlawh tar duhawm takte zîngah chuan, Jehova Thuhretute Governing Body member-te, tûn hma leh tûna bial kan hna thawktute, pioneer ṭhahnemngai takte, leh kan kohhrana rinawm taka rawngbâwl Lalram thuchhuahtu puitling takte an tel a ni. Kum sâwm têl ṭhahnemngai taka chanchin ṭha hril tawhte leh ṭhalaite chu an nun chher chho tûra ṭanpui nâna entîrna ṭha siamtu mi ṭhenkhat chu i hre mai thei a. Kan Kristianpui tar ṭhenkhat chuan mawhphurhna rit tak an chelh a, chanchin ṭha avângin tihduhdahna pawh an tuar chhuak bawk. Jehova leh “bawi rinawm, fing tak” chuan Lalram atâna an lo thawh tawhte leh an thawh mêkte chu an hlut hle a ni.​—⁠Mt. 24:⁠45.

4. Engvângin nge Kristian tar tawhte chu kan zahin, an tân kan ṭawngṭai ang?

 ⁴ Chûng tar rinawmte chuan Pathian Jehova chhiahhlawh dangte lawm leh zah an phu a ni. Mosia kal tlanga Pathian Dân pêk chuan, tarte ngaihtuahna leh zahna chu Jehova ṭihna nên a thlunzawm a. (Lev. 19:32) Hêng mi rinawmte tân hian kan ṭawngṭai ṭhînin, hmangaihna nêna an thawh rimna avângin Pathian hnênah lâwmthu kan sawi ṭhîn tûr a ni. Tirhkoh Paula chu a hnathawhpui duh tak apui apangte tân a ṭawngṭai a ni.​—⁠1 Thessalonika 1:​2, 3 chhiar rawh.

5. Engtin nge Jehova betu tar tawhte nêna inkawm chu kan hlâwkpui theih?

⁵ Chu bâkah, kohhran chhûnga mi zawng zawng chuan Kristian tar tawhte nêna inkawm chu an hlâwkpui ṭheuh thei a. Bible zirna te, an thil hmuhte, leh an thiltawnte aṭangin Jehova betu rinawm tarte chuan hriatna hlu tak an nei a ni. Anni chuan dawhtheihna leh khawngaihna lantîr dân an zir tawh a, chûngte chu ṭhang tharte hnêna an zirtîr lehchhawn hian hlimna leh lungawina nasa tak an hmu a ni. (Sâm 71:18) Ṭhalaite u, fing takin awm ula, tuichhunchhuah thûk tak ata tui khai chhuah ang maiin, he hriatna hnâr ata hi hriatna phawrh chhuak ang che u.​—⁠Thuf. 20:⁠5.

6. Engtin nge tarte chu i hlut tak zetzia i lantîr theih?

⁶ Tarte chu Jehova’n anmahni a hlut angin i hlut ve tih i hrilh em? I tih theih dân kawng khat chu an rinawmna avânga anmahni i hmangaihzia leh an ngaih dân i hlutzia hrilh a ni a. Chu bâkah, an thurâwn anga thil i tih hian, anmahni i zah tak zetzia i lantîr tihna a ni. Kristian tar tam tak chuan, an aia u zâwkte hnên aṭanga an dawn thurâwn fing tak an dawn leh chu mi mila hma an lâkna tûn thlenga an hlâwkpuizia chu an la hre reng a ni. *

I Duatzia Chu Kawng Ṭangkai Takin Lantîr Rawh

7. Jehova chuan tute hnênah nge a bîk takin tarte enkawl tûra mawhphurna a pêk?

⁷ Pathian chuan tar awmna chhûngkuate hnênah anmahni enkawl tûrin mawhphurhna a pe a. (1 Timothea 5:​4, 8 chhiar rawh.) Chhûngkuate’n an chhûngkhat tarte enkawl tûra an mawhphurhna hlen a, Jehova anga tarte an ngaihsakzia an lantîr hian ani chu a lâwm a ni. Pathian chuan chûng chhûngkuate chu a ṭanpuiin, an thawh rimna leh an inpêkna zawng zawng chu mal a sâwm a ni. *

8. Engvângin nge kohhran chuan Kristian tarte ngaihsakna a lantîr ang?

⁸ Chutiang bawkin, ringtu chhûngkhat emaw, anmahni ṭanpui duhtu chhûngkhat emaw nei lo tar rinawm ṭanpui ngaite tualchhûng kohhranin a ṭanpui hian Jehova chu a lâwm a. (1 Tim. 5:​3, 5, 9, 10) Chutianga ṭanpuiin kohhran chuan tarte chungah ‘lainatna te, unau anga hmangaihna te, khawngaihna te’ a lantîr a ni. (1 Pet. 3:⁠8) Kohhran chhûnga tarte an ngaihsakna chu mihring taksa pêng khatin a tawrh huna ‘pêng dang zawng zawngin an tawrhpui ṭhin’ thu Paula sawi hian a târ lang chiang hle. (1 Kor. 12:26) Tarte tâna khawngaihna nei chunga thil ṭangkai tak tihsakna chuan: “In ritphurhte chu inchhâwk tawn rawh u, chutichuan Krista dân thu chu in zâwm a ni ang,” tia Paula fuihna phêna thu bul awm chu a târ lang a ni.​—⁠Gal. 6:⁠2.

9. Kum upatnain mi chungah eng phurrit nge a thlen theih?

⁹ Tarte chuan eng phurrit nge an phurh? Tam takte chu an chau hma êm êm a. Anni chuan thiltih pângngai tak​—⁠doctor pan te, electric bill ilo pêk te, in chhûng tihfai te, leh ei rawngbâwl te​—⁠pawh chu ti thei lovah an inngai thei a ni. Tar lamah chuan chaw eite a lo tui loh va, tuiinte a hâl mang tawh loh avângin, an taksa mamawh âwm tâwk chu ei-in ngai tawh lohvin an inhre thei bawk. Thlarau lam thilah pawh chutiang bawk chu a ni thei. Mitte a ṭhat tawh loh va, bengte a chêt ṭan tawhna chuan thlarau lam thil chhiar leh ngaihthlâk chu a tiharsain, Kristian inkhâwma kal tûra inbuatsaih ringawt pawh chu an tân chuan a hahthlâk hle thei a ni. A nih leh chutiang tarte tân chuan mi dangte’n eng nge an tih theih?

 I Ṭanpui Theih Dân

10. Upate chuan tarte chu ṭanpuina ṭangkai tak pe tûrin eng nge an tih theih?

¹⁰ Kohhran tam takah chuan tarte chu entawn tlâk taka enkawl an ni a. Mi khawngaih thei tak unaute chuan tarte tân an bazârsak a, ei rawngte bâwlsakin, thilte an tihfaisak a ni. Tin, tarte chu Bible zir tûr te, inkhâwm tûra insiam tûrte, leh rawngbâwlnaa tel ve ziah tûr tein an ṭanpui bawk. Thuhretu naupang zâwkte chuan an kalpuiin, an kalna tûr ruahmanna an siamsak a ni. Tar chak lo zualte’n in an chhuahsan thei lo a nih chuan, inkhâwma thusawite telephone hmanga ngaihthlâktîr, a nih loh leh an tâna lo record-sak theih a ni. A theih hun apiangah, upate chuan kohhrana tarte mamawh phuhrûksak tûrin ruahmanna ṭangkai tak an nei tûr a ni. *

11. Engtin nge chhûngkaw pakhat chuan unaupa tar tawh tak chu an ṭanpui?

¹¹ Kristiante chuan a mi mal ang pawhin khualchhâwn thiamna lantîrin, an thil phalzia an lantîr thei bawk. Unaupa tar tawh tak pakhatin a nupui a sûn a. A nupui pension hmuh ṭhin chu a dawn chhunzawm theih tawh loh avângin in chu a luah zawm thei tawh lo va. A nupui nên chuan in lian taka awm nula tleirâwl pahnih nei nupa tuak khat chu Bible an lo zirpui tawh a. Chu mite chhûngkua chuan a awm nân pindan pahnih an pe a ni. An chhûngkaw zînga mi lo niin, kum 15 chhûng chu hun hlimawm takte an hmang tlâng a. Naupang zâwkte chuan a rinna leh a thiltawn tam takte chu an hlâwkpui hle a, ani pawh chuan an inkawmhona hlimawm tak chu a hlâwkpui ve bawk. He unaupa tar tawh tak hi kum 89 mi nia a thih thlengin an kiangah a khawsa a. Chu mite chhûngkua chuan amah an kawmna aṭanga an dawn malsâwmna tam tak avângin, tûn thlengin Pathian hnênah lâwmthu an la sawi reng a ni. Anni chuan an ṭhian Isua Krista zirtîr pakhat an ṭanpui avângin, ‘an lâwmman tûr an chân lo.’​—⁠Mt. 10:42. *

12. Unau tar tawh takte chu engtin nge i ṭanpui theih?

¹² Chu mite chhûngkua ang chuan unau tar tawh tuemaw ber chu i ṭanpui thei lo pawh a ni thei; mahse, tarte chu inkhâwmnaah leh thlawhhma rawngbâwlnaah i hruai chhuah theih a rinawm. I inah i sâwm emaw, i chhuah vahnaah i hruai chhuak emaw thei bawk. I va tlawh ṭhînin, a bîk takin an dam loh châng leh kal chhuak thei lo va an awm chângin i tlawh thei a ni. Chu bâkah, anni chu engtik lai pawhin puitling pângngai angin i cheibâwl theiin, i cheibâwl tûr a ni bawk. Ngaihtuahna fîm an la neih chhûng chuan, anmahni khawih thei thil thutlûkna siam tûr rêng rêngah râwn tûr an ni. Ngaihtuahna fîm nei tawh mang lote pawhin zah taka cheibâwl an nih leh nih loh chu an hre thei a ni.

Jehova Chuan I Hnathawh A Theihnghilh Lo Vang

13. Engvângin nge Kristian tarte thil veizâwng ngaihsak chu thil pawimawh tak a ni?

¹³ Tarte thil veizâwng ngaihsak chu a pawimawh hle a. Tarte chu an vânglai leh an hrisêl zâwk lai anga thil an tihtheih tawh loh avângin an beidawng hle ṭhîn. Entîr nân, kum 50 vêl lai regular pioneer anga thatho taka Jehova rawng lo bâwl tawh unaunu pakhat chuan natna khirh tak a vei avângin inkhâwm takngial pawh harsa a ti hle a. Tûn hmaa rawng a lo bâwl tawh ṭhin dân leh tûna a dinhmun a han khaikhin châng hian a mittui a tla hial ṭhîn. Ṭap chunga hnuai lam enin, “Engmah ka ti hlei thei tawh lo,” a ti.

14. Fakna hlate aṭangin Jehova chhiahhlawh tarte chuan eng ang chakna nge an neih theih?

¹⁴ Tar i nih chuan, chutianga rilru hrehawmna chu i nei em? A nih loh leh Jehova’n a kalsan che nia inhriat châng i nei em? Fakna hla phuahtu chuan a tar lamin chutiang thil veizâwng chu a neih ngei a rinawm: “Ka tar hunin mi paihthla suh la; ka tha a ṭhum hunin mi kalsan suh ang che. . . . Aw Pathian, ka tara ka lu ṭuah hnu pawhin mi kalsan lul suh ang che,” a tih avângin. (Sâm 71:​9, 18) Jehova chuan chu fakna hla phuahtu chu a kalsan rêng rêng lo va, nang pawh A kalsan tawp lo vang che. Davida chuan fakna hla  dangah Pathian ṭanpuina a rinnghehzia a sawi chhuak a ni. (Sâm 68:19 chhiar rawh.) Kristian tar rinawm tak i nih chuan, Jehova’n a awmpui chein, nî tin a chhawmdâwl zêl ang che tih i ring tlat thei a ni.

15. Engin nge tarte chu thil a ṭha lama ngaihtuah reng tûra ṭanpui thei?

¹⁵ Jehova Thuhretu tar zawng zawngte u, Pathian chawimawi nâna thil in lo tih tawhte leh in tih mêkte chu ani chuan a hre reng a ni. Bible chuan: “A hming chunga hmangaihna in lantîr . . . chu theihnghilh tûrin Pathian chu mi fel lo a ni si lo,” a ti. (Heb. 6:10) Chuvângin, i tar avâng maia Jehova tâna ṭangkai tawh lo anga inhriatna thlîr dân dik lo chu do tlat ang che. A chhe lam thil ngaihtuaha lunghnualna chu a ṭha lama thil ngaihtuahnain thlâk tum tlat rawh. Malsâwmna i dawnte leh nakin hun beiseina i neihte avângin hlim hle zâwk ang che. Min Siamtu thutiam ‘nakin hun beiseina’ ṭha ber chu i nei si a. I beiseina chu ngaihtuah la, rilru leh thinlunga naupan reng tumin, kohhrana i tel a hlutna chu ngainêp ngai suh! *

16. Engvângin nge unaupa tar tawh tak pakhat chuan upa anga rawngbâwl tawh loh a rilrûk a, mahse engtin nge upahote chuan an fuih?

¹⁶ Kum 80 mi Johan-a, a nupui rinawm tak tûna engmah tithei tawh lo Sannie-i eng lai pawha enkawltu chungchâng hi ngaihtuah teh. * Johan-a a inkhâwma, rawngbâwlnaa a tel theih nân unaunute chuan Sannie-i chu an inenkawl chhâwk ṭhîn a. Amaherawhchu, tûn hnai mai khân Johan-a chuan a lungchhiat êm avângin a tuar thei tawh ngang lo va, kohhrana upa anga rawngbâwl chu chawlhsan a rilrûk ṭan ta a ni. “Upa ka nih hi eng nge a ṭûlna? Kohhranah lah ka ṭangkai tawh si lo,” tiin mittui tling ṭeuh chungin a sawi a. Upa dangte chuan a thiltawnte leh a ngaih dân siamte chu a ṭangkaizia an hrilh a ni. A tih theih chu tlêm tawh hle mah se, upa ni chhunzawm zêl tûrin an fuih a. Chu chuan nasa taka a tihchak avângin, Johan-a chuan kohhran upa angin rawng a bâwl chhunzawm a, chu chu kohhranin a hlâwkpui hle a ni.

Jehova’n A Ngaihsak Tak Zet

17. Kristian tarte chu Bible-in eng nge a tiam?

¹⁷ Tarte chuan rinawm takin Jehova rawng an bâwl chhunzawm zêl thei a ni tih Bible chângte’n a târ lang a. Fakna hla phuahtu chuan: “LALPA ina phunte chu . . . tar hunah pawh an la rah fo vang a; tui pai ṭeuhvin an hring hluah hluah ang,” tiin a puang a. (Sâm 92:​13, 14) Tisa lama hrehawmna tuar tirhkoh Paula chu ‘a dawl lo, a pawn lam mihring chu lo awngrawp telh telh mah sela.’​—⁠2 Korinth 4:​16-18 chhiar rawh.

18. Engvângin nge kan rinpui tar tawh takte leh anmahni enkawltute chuan mi dangte ṭanpuina an mamawh?

¹⁸ Tûn laia entîrna tam tak chuan tarte chu “an la rah fo” thei tih a finfiah a. Mahse, natna leh tarna avânga harsatna chu a tuartu leh a enkawltu a chhûngte tân pawh a zâmawm hle thei a ni. A enkawltute pawh an lo chau thei a. Tarte leh anmahni enkawltute chunga thiltiha hmangaihna lantîr tûrin kohhran chuan chanvo leh mawhphurhna a nei a ni. (Gal. 6:10) Chutianga ṭanpuina chuan an mamawh châkkhai pe si lo va “lum tak leh puar takin awm rawh u,” ti mai kan ni lo tih a târ lang.​—⁠Jak. 2:​15-17.

19. Engvângin nge Kristian tar rinawmte chuan nakin hun chu inring tâwk taka an thlîr theih?

¹⁹ Tarna chuan engtin emaw takin Kristiante thiltih chu a thlâk danglam mai thei a; mahse, Jehova’n a chhiahhlawh rinawm tar tawhte a hmangaihna erawh chu hunin a tidai ve lo. Chutih ahnêkin, hêng Kristian rinawm zawng zawngte hi a mithmuhah chuan an hlu hle a, ani chuan a kalsan ngai lo vang. (Sâm 37:28; Is. 46:⁠4) Jehova chuan an thih thlenga chhawmdâwlin, a kaihhruai bawk ang.​—⁠Sâm 48:14. (w08 8/15)

[Footnote-te]

Engtin Nge Kan Chhân Ang?

• Engvângin nge Kristian tar rinawmte chu i ngaih hlut?

• Engtin nge kan chibai bûkpui tarte duatna chu kan lantîr theih?

• Jehova chhiahhlawh tarte chu thil a ṭhazâwnga thlîr tûrin engin nge ṭanpui thei?

[Zirlai Atâna Zawhnate]