Lungngaihna Tawrh Thiam Dân

“A fapate zawng zawng leh a fanute zawng zawng chu [Jakoba] thlamuan tûrin an tho va; nimahsela ani chuan thlamuan a duh lo va; ‘Lusûn chungin thlânah ka fapa hnênah chuan ka liam dâwn e,’ a ti a. Tichuan a pa chu amah ngaiin a ṭap ṭhîn a.”​—⁠GENESIS 37:⁠35.

THLAHTU Jakoba chuan a fapa thi chu a tuar hle a. A thih thlenga a tawrh a inring hial a ni. Jakoba ang bawkin, hmangaih takte sûn chu a nat êm avângin lusûn bân hun awm thei lo tûrah i ngai hial thei ang. Chutianga nasa taka tawrhna chuan Pathiana rinna tlâkchhamzia a târ lang em? Târ lang lo ve!

Bible chuan Jakoba chu rinna nei mi niin a sawi a. A pu Abrahama leh a pa Isaaka rualin, ani chu rinna nasa tak neite zîngah a chhiar tel a ni. (Hebrai 11:​8, 9, 13) Ṭum khat phei chu Pathian malsâwmna a dawn theih nân zankhuain vântirhkoh a buan hial a! (Genesis 32:​24-30) Jakoba chu thlarau mi tak a ni tih a chiang hle. Chuti a nih chuan Jakoba’n a fapa thi a tawrh dân aṭangin eng nge kan zir theih? Pathiana rinna chak tak neite pawhin an hmangaih takte an thih hian nasa taka tuarin an lungngai thei tho a ni, tih hi. Kan hmangaih tak tuemaw a thih avânga lungngaih chu thil âwm tak a ni.

Lungngaihna Chu Eng Nge Ni?

Lungngaihna chuan kawng chi hrang hrangin min nghawng thei a; mahse, mi tam  tak tân chuan rilru lama tawrhna hi tawrhna azawnga tawrh harsa ber a ni. Leonardo-a thiltawn hi han ngaihtuah teh. Kum 14 mi lek a nih laiin a pa chu lung natna leh thâwk lam panga harsatna avângin a thi ta thut mai a. A nutei’n a pa thih thu a hrilh ni chu a theihnghilh thei ngai hauh lo vang. A tîrah chuan a ring thei hlawl lo va. An vui dâwn chuan a pa ruang chu a hmu ngei a, mahse a tak tak niin a pawm thei si lo. Thla ruk chhûng lai chu ṭah pawh a ṭap chhuak thei lo va. A pa hna thawk bâng lo haw mai beiseiin a lo nghâk leh reng ṭhîn. A pa a thi a ni tih chu kum khat dâwn lai hnuah chauh a pawm thei a. Chutianga a han pawm tâkah chuan, mal ngawih ngawih nia inhriatna a nei a ni. Thil ho tê tê, a in ruaka rawn haw ang mai maite pawhin a pa a awm tawh lo tih a hriat chhuahtîr ṭhîn a. Chutiang hunah chuan, insûm zo lovin, a ṭap chhuak ta ṭhîn a ni. A pa chu a va ngai ṭhîn tak êm!

Leonardo-a thiltawnin chiang taka a târ lan angin, lungngaihna chu a nasa thei hle a. Chanchin lâwmawm tak erawh chu tawrh thiam theih a ni hi a ni. Chu chuan hun erawh a duh thung. Nasa taka inhliamna hnu hma dam leh tûr chuan hun a duh angin, lusûnna tuar thiam thei tûr chuan hun engemaw chen a liam a ngai a. A thla têl, kum hnih khat vêl, a nih loh leh a aia rei zâwk pawh a ngai mai thei. Mahse, a tîra i tawrhna nasa tak chu hun a liam rualin a ziaawm zêl ang a, nun beisei bo leh awmze nei lova i ngaihna pawh chu a reh tial tial ang.

Chu mi hma loh chuan, lungngaihna chu rilru na thawi dam nân leh dinhmun thar atâna insiam rem dân zir nâna thil pawimawh tak nia sawi a ni ṭhîn. In chhûng chu a lo ruak huai a. Mitthi ta tel lova nun dân kan zir a lo ngai ta a ni. Lungngaihna lantîrna chuan rilru veizâwng a chhâwk thei a. Mi zawng zawngte tawrh dân erawh chu a inang vek kher lo ngei mai. Mahse, hei hi a dik tlângpui niin a lang: Intih pachan duh avânga tawrhna lantîr loh chu rilru lam, ngaihtuahna lam, leh taksa lam atân a hlauhawm thei, tih hi. Chuti a nih chuan, engtin nge i tawrhna chu a ṭhazâwnga i lantîr theih ang? Bible-ah chuan thurâwn ṭangkai tak tak a chuang a ni.

Lungngaihna Tawrh Thiam Dân

Lusûn tam takte chuan rilru veizâwng sawi chhuah chu ṭangkai an ti hle a. Entîr nân, Bible hun laia mi Joba, a fa sâwmte a chân vek hnua chhiatna dangte pawh tuartu thusawi hi chhinchhiah teh. Heti hian a sawi a ni: “Ka thlâin a ning e, ka nun hi, ka nawmmâkin ka phunnawi dâwn e: rilru na êm êm chungin ka ṭawng dâwn hi,” tiin. (Joba 1:​2, 18, 19; 10:⁠1) Joba’n ‘a rilru natna’ thawi dam nân a ‘ṭawng chhuah’ a ngai tih a sawi hi chhinchhiah ang che.

Paulo-a chuan a nu a chân a, ani chuan: “Min ṭanpuitu pakhat chu ka nu chanchin sawi hi a ni,” a ti. Chuvângin, ṭhian ṭha tak hnêna i rilru veizâwng sawi chhuahna chuan engemaw chenin a chhâwk ang che. (Thufingte 17:17) Yone-i chuan a nuin a thihsan hnuah a Kristian unaute chu amah tlawh zîng lehzual  tûrin a ngên a. “Rilrua awm sawi chhuah chu rilru nâ thawi damna a ni,” a ti. Nang pawhin khawngaihna nêna ngaithlâksaktu tûr che hnêna i rilru veizâwngte sawi chhuah chu lusûn avânga lungngaihna chhâwktu a ni tih i hre thei ang.

A ziaka ziak chhuahna pawh chuan a chhâwk thei ang che. An rilru veizâwng sawi chhuah harsa ti mi ṭhenkhatte chuan a ziaka ziak chhuah chu awlsam an ti zâwk mai thei. Saula leh Jonathana an thih hnuah, mi rinawm Davida chuan a lungngaihna chu sûnna hla phuahin a ziak chhuak a. Chu sûnna hla chu a hnuah Samuela Bu Hnihnaah telh a ni.​—⁠2 Samuela 1:​17-27.

A ṭaha ṭah chhuahna pawhin a chhâwk thei ang che. Bible chuan: “Engkim tân hian hun ruat a awm a, . . . ṭah hun [pawh] a awm” a ti. (Thuhriltu 3:​1, 4) Kan hmangaih tak tuemaw a thih hun chu “ṭah hun” a ni ngei mai. Lungngaih avânga mittui tla chu zahpui tûr a ni lo. Bible-ah chuan mi rinawm ahmei apate’n an lungngaihna chu mittui sênga vântlâng hmaa an lantîr thu kan hmu hnem hle a. (Genesis 23:2; 2 Samuela 1:​11, 12) Isua Krista pawh a ṭhian duh tak Lazara thlân bula a awm lai khân “a ṭap” a ni.​—⁠Johana 11:​33, 35.

I rilru chu inthlâk thut thut renga i hriat avângin, lusûnna avânga lungngaihna hmachhawn tûr chuan i dawhtheih a ngai a. I mittui chu zahpui tûr a ni lo tih hre reng ang che. Mi rinawm tam takte chuan mittui tlâk chu rilru nâ thawi dam nâna thil ṭûl leh pângngai tak a ni tih an hria a ni.

Pathian Hnaih Rawh

Bible chuan: “Pathian hnaih rawh u, tichuan anin a hnaih ang che u,” tih min hrilh a. (Jakoba 4:⁠8) Pathian hnaih dân pawimawh berte zînga pakhat chu ṭawngṭai hi a ni.  Ṭawngṭai a hlutna chu ngainêp ngai rêng rêng suh! Bible chuan he thutiam thlamuanthlâk tak hi min pe a ni: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” tih hi. (Sâm 34:18) Tin: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” tih hi min tiam bawk. (Sâm 55:22) Hei hi ngaihtuah teh. A hma lama kan lo hmuh tawh angin, lusûn tam takte chuan an ṭhian ṭhate hnêna an rilru veizâwng sawi chhuah chu ṭangkai an ti a. Chuti a nih chuan, kan thinlung thlamuan min tiamtu Pathian hnêna rilru veizâwng phawrh chhuah chu a ṭangkai lehzual dâwn lâwm ni?​—⁠2 Thessalonika 2:​16, 17.

A chanchin kan sawi tâk Paulo-a chuan: “Ka hrehawm tawrh tuar thei tawh ngang lova ka inhriat hian, ṭhingṭhiin Pathian hnênah ka ṭawngṭai a. Min ṭanpui ka ngên ngawih ngawih a ni,” a ti. Paulo-a chuan ṭawngṭainain a ṭanpui tih a ring tlat a ni. Nang ngei pawhin, bâng lova i ṭawngṭaina chu chhângin, “thlamuanna zawng zawng Pathian” chuan lungngaihna hmachhawn thei tûra i mamawh huaisenna leh chakna a pe ang che tih i hre thei ang.​—⁠2 Korinth 1:​3, 4; Rom 12:⁠12.

 Thawhleh Beiseina

Isua chuan: “Kei hi thawhlehna leh nunna chu ka ni; tupawh mi ring chu thi mah sela a nung [leh] ang,” a ti. (Johana 11:25) Bible chuan mitthite chu an nung leh dâwn tih a zirtîr a ni. * Isua’n leia a awm lai khân, mitthite a kaihthawh theihzia a lo lantîr tawh a. Ṭumkhat chu kum 12 mi hmeichhe naupang pakhat a kai tho va. A nu leh pate chuan engtin nge an chhân lêt? Anni chuan “mak tih namênin mak an ti lo va,” an hlim hle a ni. (Marka 5:42) Lal Isua Krista chuan a Lalram rorêlna hnuaiah mi chhiar sên lohte chu a kai tho vang​—⁠felna leh thlamuanna awmna he leiah hian. (Tirhkohte 24:15; 2 Petera 3:13) Mitthite an thawhleh a, an chhûngte nêna an inhmuh leh huna an hlim dân tûr chu han ngaihtuah teh!

Thlawhna chesuala a fapa Renato-a chântu Claudete-i chuan a fapa thlalâk chu fridge kawngkhârah a târ a. A thlalâk târ chu enin, ‘Thawhlehnaah kan inhmu leh dâwn nia,’ a ti fo ṭhîn. Leonardo-a pawh chuan Pathian thutiam khawvêl thara a pa lo tho leh lai chu a mitthla reng ṭhîn bawk. Ni e, thawhleh beiseina chu hmangaih takte thihnaa chântu anmahni leh mi dang chhiar sên lohte tân thlamuantu a ni a. Chu chu nangmah thlamuantu che pawh a ni ve thei asin! (w08 7/1)

[Footnote]

[Phêk 7-naa bâwm/milem]

“Thlamuanna Zawng Zawng Pathian”

“Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se.”​—⁠2 Korinth 1:⁠3.

He Bible châng hian Pathianin a chhiahhlawh mi rinawmte chu an hma chhawn buaina emaw, harsatna emawte tuar thei tûrin a ṭanpui thei tih a târ lang. Jehova’n thlamuanna min pêk dân kawng khat chu kan rinpui ṭhian ṭha emaw, kan hmangaih tak emaw kal tlangin a ni ṭhîn.

A pa sûntu Leonardo-a chuan chakna leh thlamuanna petu a thiltawn pakhat chu a hre reng a ni. Ina a haw a, tumah an awm lo tih a han hriat chuan, insûm hlei thei lovin a ṭap ta hawm hawm mai a. A in kianga awm vântlâng lênvahna atâna siam huana ṭhutthlêngseiah chuan ṭhuin, a va ṭap zawm a ni. Mittui tla chungin Pathian ṭanpuina a dîl a. Chutih lai tak chuan, a bulah motor pakhat a rawn ding thut mai a, a khalhtu chu a mi hriat chian, a Kristian unaupa a lo ni reng a. Chu unaupa chu a thil zawrh leitute an ina va pe tûra kal chhuak a ni a, kawng dik lo a zawh palh mai a ni. Unaupa nêna an inhmuhna ringawt pawh chuan Leonardo-a chu a hnêm hle.

Ṭum khat chu, a nupui sûn tawh pa pakhat chu a khua a harin, a lungngai êm êm a. Beisei bo ngawih ngawiha a inhriat avângin, a ṭap bâng thei lo va. Chhuata bawkkhupin, Pathian ṭanpuina a dîl a ni. Chutianga a ṭawngṭai mêk lai chuan, a tunu hnên aṭangin phone a dawng ta hlauh mai a. “Rei lo te chhûng kan inbiakna ringawt pawh chuan min tihuaisen sawt a. Ka phone dawn chu ṭanpui dîla ka ṭawngṭaina chhânna a ni, ka ti lo thei lo,” a ti a ni.

 [Phêk 9-naa bâwm]

Mi Dangte Thlamuan Ve Rawh

“Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna tûrin ani chuan kan hrehawmna zawng zawngah min thlamuan ṭhîn.”​—⁠2 Korinth 1:⁠4.

Kristian dik tam takte chuan hêng a chunga thute dikzia hi mahni ngeiin an tawng a. Hmangaih tak sûnna tuar thei tûra thlamuanna an dawn tawh avângin, chutiang dinhmuna ding mi dangte chu an thlamuan ve leh chhâwng thei a ni.

A Bible ṭanchhan thurin hrilh tûra mi dangte tlawh ṭhîntu Claudete-i entîrna hi ngaihtuah teh. A fapa a chân hma chuan, leukemia natna avânga a fapa sûn tawh nu pakhat chu a va tlawh ṭhîn a. Chu nu chuan Claudete-i nêna inkawm chu nuam ti hle ṭhîn mah se, a hrehawm tawrh dân chu a hriatthiampui tak tak a ring thei lo. Amaherawhchu, Claudete-i fapa a thih hnu lawkah chuan a va tlawh a, a fapa a han chân ve tâkah chuan Claudete-i’n rinna a la vawn reng leh reng loh hriat nâna va lêng lût a nih thu a hrilh a ni. Claudete-i rinna chak tak a hmuh chuan a rilru a khawih êm avângin, a hnênah chuan Bible a zir ta char char a, Pathian Thu aṭangin thlamuanna tam tak a dawng a ni.

Leonardo-a pawhin a pa a chân hnuah bengngawngte hnêna Bible thu thlamuanthlâk tak a hrilh theih nân zaizira ṭawng dân, sign language zir chu a tum a. Bengngawngte ṭanpui tûra a thawhrimna chu nasa takin a hlâwkpui a ni tih a hria a ni. Ani chuan: “Lusûn avânga ka lungngaihna min tawrh thiamtîrtu pakhat chu Pathian chanchin zir tûra bengngawngte ṭanpui ka duhna hi a ni. Anmahni ṭanpui tûrin hun leh tha leh zung tam tak ka sêng a. Ka Bible zirpui hmasa berin baptisma a chang lai ka han hmuh chuan ka lungngaihna zawng zawng chu lâwmnaah a chang ta! Dik tak chuan, ka pa min boralsan aṭanga chhûngrila hlimna nasa tak ka neih a vawikhatna a ni,” tiin a sawi.​—⁠Tirhkohte 20:⁠35.

[Phêk 5-naa milem]

I rilru veizâwng sawi chhuahna chuan engemaw chenin a chhâwk thei ang che

[Phêk 6-naa milem]

Lungngaihna ziak chhuah chu a ṭangkai thei

[Phêk 6-naa milem]

Thawhleh beiseina chungchâng chhiarna chuan a thlamuan tak zet thei che

[Phêk 8-naa milem]

Isua chuan amah ringtute tân thawhlehna a tiam