Thinlung Sakhat Puin Rinawmna Vawng Rawh

“I thutakah ka awm ang; i hming ṭih tûrin thinlung sakhat min puttîr ang che.”​—⁠SAM 86:⁠11.

1, 2. (a) Sâm 86:​2, 11 sawi angin, fiahna leh thlêmna laka Jehova chunga rinawm tûrin engin nge min ṭanpui thei? (b) Eng hunah nge thinlung taka rinawmna chu kan neih ṭan ang?

KUM tam tak chhûng lung in tânna emaw, tihduhdahna emaw rinawm taka tuar chhuak tawh Kristian ṭhenkhatte chu a hnuah engvângin nge hausak âtchilhnaa an tlûk luh? A chhânna chu kan thinlung​—⁠chhûngrîla kan nihna dik takah a innghat a ni. Sâm 86-na chuan rinawmna chu thinlung sakhat neihna nên a thlun zawm a; chu chu thinlung pumhlûm, ṭhen hran loh chu a ni. “Ka nunna hi vawng ṭha ang che; Pathian ngaihsak mi [a nih loh leh mi rinawm] ka ni sî a: Aw, nang ka Pathian, nangmah ringtu, i chhiahhlawh hi chhandam ang che,” tiin fakna hla phuahtu Davida chu a ṭawngṭai a ni. Ani chu: “Aw LALPA, i kawng chu mi entîr ang che; i thutakah ka awm ang: i hming ṭih tûrin thinlung sakhat mi puttîr ang che,” tiin a ṭawngṭai bawk.​—⁠Sâm 86:​2, 11.

² Jehova chu thinlung zawng zawnga kan ring tlat a nih chauh loh chuan, lungkhamna dangte leh kan ngainatzâwngte chuan Pathian dik chunga kan rinawmna chu awlsam têin a tichau vang. Mahni hmasialna chu kan kalna kawnga rah puah bomb inphûm ru ang hi a ni a. Dinhmun harsa tak hnuaiah Jehova chungah lo rinawm tawh pawh ni ila, Setana thangah chuan kan âwk thei a ni. Fiahna emaw, thlêmna emaw kan tawh hma, tûnah hian Jehova chunga thinlung taka kan rinawm chu a va pawimawh tak êm! Bible chuan: “Thil dang bera aiin i thinlung vêng ṭha rawh,” a ti. (Thuf. 4:23) He mi chungchângah hian Jehova’n Israel Lal Jeroboama hmu tûra a tirh zâwlnei thiltawn aṭangin thil hlu tak kan zir thei a ni.

“Lâwmman Ka Pe Dâwn Che Nia”

3. Engtin nge Jeroboama’n Pathian zâwlneiin rorêlna thu a puan chhuah chu a chhân lêt?

³ Thil awm dân chu han mitthla teh. Pathian mi chuan Israel hnam sâwm hmâr lam lalrama bâwng no biakna dintu Lal Jeroboama hnênah thuchah khauh tak a puang chhuak zo chiah a ni. Lal chu a thinrim ta hle mai a. Zâwlnei chu man tûrin a mite hnênah thu a pe ta a ni. Mahse, Jehova chuan a chhiahhlawh chu a awmpui a. Lalin thinrim taka a han banna kut chu mak tak maiin a zeng ta thut a, biakna dik lo atâna hman maichâm pawh chu a khi ta phawk bawk a ni. Jeroboama awm dân chu a inthlâkthleng ta thut a. Pathian  mi hnênah chuan: “Ka kut hi a lo dam leh theihna tûrin LALPA i Pathian khawngaihna ngên la, min ṭawngṭaisak teh khai,” tiin a ngên a. Zâwlnei chu a ṭawngṭai a, lal kut chu a lo dam leh ta a ni.​—⁠1 Lal. 13:​1-6.

4. Engvângin nge, lal thilpêk tiam chu zâwlnei tân rinawmna fiahna a nih tak zet? (b) Engtin nge zâwlnei chuan a chhân lêt?

⁴ Tichuan, Jeroboama chuan Pathian mi hnênah chuan: “Ka in lamah ka hnênah lo kal la, va châwl hahdam rih rawh khai, tin, lâwmman ka pe dâwn che nia,” a ti a. (1 Lal. 13:⁠7) Zâwlnei chuan eng nge a tih tâk ang le? Ani chuan lal hnêna thiam loh chantîrna thu a puan chhuah tawh avângin, a sâwmna chu a hnâwl tûr a ni em? (Sâm 119:113) Nge, lal chu inchhîr taka a lan avângin a sâwmna chu a pawm zâwk ang? Jeroboama chu a hausa hle a, a ṭhiante hnênah thil man to tak leh ṭha takte a pe thei âwm si a. Pathian zâwlnei chuan a rûk têin hausak âtchilhna nei ta se, lal thilpêk tiam chu thlêmna lian tham tak a tling ngei ang. Amaherawhchu, Jehova chuan zâwlnei hnênah: “Chhang va eiin tui rêng rêng pawh va in suh la, i va kalna kawngah pawh haw leh tawh suh,” tiin thu a pe a ni. Chuvângin, zâwlnei chuan: “I in lo zâtve pawh mi pe dâwn mah la, i hnênah zawng ka lo kal chuang lo vang, he mi hmunah hian chhang ka eiin, tui rêng rêng pawh ka in hek lo vang,” tiin chiang takin a chhâng a ni. Tichuan, zâwlnei chuan kawng danga kalin Bethel chu a chhuahsan ta a. (1 Lal. 13:​8-10) Zâwlnei thu tlûkna siam chuan tih tak zeta rinawmna chungchângah eng nge min zirtîr?​—⁠Rom 15:⁠4.

‘Lungawi Rawh’

5. Engtin nge hausak âtchilhna chuan kan rinawmna a fiah?

⁵ Hausak âtchilhna chu rinawmna fiahna ni angin lang lo mah se, rinawmna fiahna a ni. Kan thil mamawh tak takte min pe tûrin Jehova thutiam chu kan ring em? (Mt. 6:33; Heb. 13:⁠5) Tûna kan neih mai theih loh tûr nun ti nuam deuh thei thil “ṭha zâwkte” eng kim huama ûm ai chuan, a tel lovin kan awm thei ang em? (Philippi 4:​11-13 chhiar rawh.) Tûna kan thil duhte neih theih nân theocratic chanvote thlahthlam mai duhna kan nei em? Rinawm taka Jehova rawngbâwlna chuan kan nunah hmun pawimawh ber a chang em? Kan chhânna pêk chu Pathian rawng tih tak zeta kan bâwl leh bâwl lohvah a innghat thui hle a ni. Tirhkoh Paula chuan: “Pathian ngaihsakna hi lungawina tel zawngin hlâwkna nasa tak a ni rêng a ni. Khawvêlah hian engmah kan luhpui si lo va, engmah kan chhuahpui thei bawk hek lo. Nimahsela ei tûr leh silh tûr neiin chûngahte chuan kan lungawi ang,” tiin a ziak a ni.​—⁠1 Tim. 6:​6-8.

6. Eng thilte nge pêk kan nih mai theih a, engin nge kan pawm dawn leh dawn loh thu tlûkna siam tûrin min ṭanpui ang?

⁶ Entîr nân, kan hnathawhna pu ber chuan hlawh tam zâwk leh hlâwkna dangte kan hmuh theihna tûrin min kaisântîr a tum mai thei a. A nih loh leh, ram dang emaw, khawvêl hmun dang emawa hna thawk tûra kal chhuah chu sum neih belh theihna niin kan hria pawh a ni thei bawk. A tîrah chuan, chutiang hun remchângte chu Jehova malsâwmna ni te pawhin a lang hial mai thei. Mahse, thu tlûkna kan siam hmain, kan rilru put hmang chu kan bih chiang tûr a ni lâwm ni? Kan ngaih pawimawh ber tûr chu, “Ka thu tlûkna siam hian Jehova nêna kan inlaichînna engtin nge a nghawng ang?” tih hi a ni.

7. Engvângin nge hausak duhna kan neih chu kan paihbo a pawimawh?

⁷ Setana khawvêl chuan hausak âtchilhna chu a awmtîr reng a. (1 Johana 2:​15, 16 chhiar rawh.) Diabola thiltum chu kan thinlung tihchhiat a ni a. Chuvângin, kan thinlunga hausak duhna kan neih chu hre zung zungin, kan paihbo nghâl vat ṭhîn tûr a ni. (Thup. 3:​15-17) Setana’n khawvêl ram zawng zawng pêk a tum khân Isua chuan hnâwl harsa a ti lo. (Mt. 4:​8-10) Ani chuan: “Fîmkhur ula, awhna rêng rêng lakah chuan invêng rawh u; sum ngah hi mihring dam chhan a ni lo ve,” tiin a vaukhân a ni. (Lk. 12:15) Rinawmna chuan mahni inrinchhan lo va, Jehova rinchhan zâwk tûrin min ṭanpui ang.

Zâwlnei Putar Chuan “A Hnênah Dâwt A Sawi”

8. Engtin nge Pathian zâwlnei rinawmna chu fiah a nih?

⁸ Pathian zâwlnei chu in lam panin haw nal nal  se la chuan engkim a fel mai tûr. Mahse, a hnu lawkah fiahna dang a tâwk leh a. Bible chuan: “Bethel khuaah chuan zâwlnei putar pakhat hi a awm a; a fapa pakhat chuan chu mi nia Bethel-a Pathian mi thiltih zawng zawng chu a hrilh vek a,” a ti. Putar chuan chanchin a hriat hnu chuan Pathian zâwlnei a ûm zui nâna sabengtung buatsaihsak tûrin a fate chu a tîr a. A hnu rei vak lovah chuan, thing lian tak hnuaia zâwlnei a lo châwl hahdam lai chu a va hmu a, a hnênah chuan: “Ka in lamah ka hnênah lo kal la, chhang va ei rawh khai,” a ti a. Pathian miin a sâwmna a hnâwl chuan, putar chuan a hnênah: “Kei pawh nangmah ang bawka zâwlnei ka ni alâwm: vântirhkohvin LALPA thuin, ‘Chhang te eia tuite in tûrin i inlamah hruai kîr leh rawh khai,’ tiin mi bia asin,” a ti a. Mahse, Bible chuan: “A hnênah dâwt a sawi a ni,” a ti.​—⁠1 Lal. 13:​11-18.

9. Bum hmangte chungchângah Bible-in eng nge a sawi a, tute nge an tihnat?

⁹ Zâwlnei putarin a tum tak chu kan hre lo va, mahse dâwt a sawi a ni. Putar chu tûn hmain Jehova zâwlnei rinawm tak a lo ni tawh pawh a ni mahna. Mahse, he mi ṭumah hi chuan mi bumzâwngin thil a ti a ni. Bible chuan chutiang nungchang chu nasa takin a dem a. (Thufingte 3:32 chhiar rawh.) Mi bum hmangte chuan thlarau lamah mahni an in tichhe mai ni lovin, mi dangte pawh an tichhe fo a ni.

Putar “Hnênah chuan A Kîr Leh”

10. Engtin nge Pathian zâwlnei chuan putar sâwmna chu a chhân lêt a, eng nge a rah chhuah?

¹⁰ Judai rama zâwlnei chuan fing vervêk taka zâwlnei putar bumna chu a hre thiam tûr a ni na a. ‘Engvângin nge Jehova chuan kaihhruaina thar mi pe tûrin vântirhkoh chu mi dang hnêna a tirh?’ tiin a inzâwt thei reng a ni. Zâwlnei chuan chu kaihhruaina chungchângah chuan Jehova a zâwt fiah thei reng a, mahse chutianga a tih thu Bible chuan a sawi lo. Chu ai mah chuan, putar “hnênah chuan a kîr leh ve a, a inah chuan chhang te a eiin tui te a in ta a.” Jehova chu zâwlnei thiltihah chuan a lâwm lo. Buma awm zâwlnei chu Judai ram lam pana a hawn kawngah sakeibaknei nên an intâwk a, a lo sehhlum ta a ni. A zâwlnei rawngbâwlna tâwp dân chu a va râpthlâk tak êm!​—⁠1 Lal. 13:​19-25. *

11. Ahija’n eng entawn tûr ṭha nge min hnutchhiah?

¹¹ Kawng leh lamah chuan, Jeroboama lala hriak thih tûra tirh zâwlnei Ahija chu a tar kûn thlengin a rinawm reng a ni. Ahija a tara, khua pawh a hmuh theih tawh loh hunah Jeroboama’n a nupui chu an fapa dam lo chungchânga râwn tûrin a tîr a. Ani chuan Jeroboama fapa chu a thih dâwn thu huaisen takin a lo hrilh a ni. (1 Lal. 14:​1-18) Ahija malsâwmna dawn tam takte zînga pakhat chu Pathian thâwk khum Thu, Bible-a chhinchhiah tûr chanchin thawh ve theihna chanvo a neih hi a ni. Engtin nge? A thu ziakte chu puithiam Ezra’n a hnua Bible a ziak khân thu lâk chhuah nân a hmang a ni.​—⁠2 Chro. 9:⁠29.

12-14. (a) Zâwlnei naupang zâwk chunga thilthleng aṭangin eng nge kan zir theih? (b) Upate pêk Bible ṭanchhan zilhna thute ngun tak leh tih tak zeta ngaihtuah a ngaihzia entîrna pe rawh.

¹² Zâwlnei naupang zâwkin a upa zâwk ruala a kîr leh hma leh thil a eia a in hmaa Jehova a râwn loh chhan Bible chuan engmah a sawi lang lo. Zâwlnei upa zâwk chuan a ngaihthlâk duhzâwng tak a sawi vâng a ni thei ang em? Kan tân zir tûr eng nge awm? Jehova thil min phûtte dikzia chu kan rin tlat a ngai a. Eng pawh lo thleng se, a thil phûtte zawm chu kan tum tlat tûr a ni bawk.

¹³ Zilhna pêk chungchângah ṭhenkhat chuan an hriat duh lai chauh an hria a. Entîr nân, thuchhuahtu pakhat chu a chhûngkaw tân leh rawngbâwlna atâna a hman theih tûr hunte la botu hnathawh tûr pêk a ni thei a. Ani chuan upa pakhat hnênah thurâwn a la mai thei a ni. Upa chuan a thusawi tûr chu unaupa’n a chhûngkua a châwm dân tûr chungchânga sawi theih a neih loh thuin a ṭan thei a. Tichuan, a hnathawh tûr pawmnain a thlen theih thlarau lama hlauhawm awm theite chu upa chuan a sawipui a ni. Unaupa chuan upain a ṭan tirh lama a sawite chauh chu a hre reng dâwn nge, a hnu lama zilhna thu a sawite ngun takin a ngaihtuah zâwk dâwn? Unaupa chuan thlarau lama a tâna ṭha ber tûr a thlan a ngai tih a chiang hle.

 ¹⁴ Thil ni thei dang han ngaihtuah leh ta ila. Unaunu pakhat chuan upa pakhat hnênah ring lo mi a pasal a ṭhen dâwn leh dâwn loh a zâwt a. Upa chuan a ṭhen dâwn leh dâwn loh chu ama thu tlûkna siam tûr a nih thu a hrilhfiah ngei ang. Tichuan, chu mi chungchânga Bible zilhna thute chu a enpui ngei ang. (1 Kor. 7:​10-16) Unaunu chuan upa thusawi chu ṭha takin a ngaihtuah ang em? Nge a pasal kalsan tûrin a rilru a siam fel sa tawh zâwk? Thu tlûkna a siamnaah, Bible ṭanchhan zilhna thute ngun taka ngaihtuah chu a tân a finthlâk ang.

Inngaitlâwm Rawh

15. Pathian zâwlnei thil tihsual aṭangin eng nge kan zir?

¹⁵ Judai rama mi zâwlnei thil tihsual aṭangin thil dang eng nge kan zir theih? Thufingte 3:5 chuan: “I thinlung zawng zawngin LALPA ring la, nangma hriatnaah innghat suh,” a ti. He mi ṭumah hian, Judai rama mi zâwlnei chuan tûn hmaa a lo tih thin dân ang lo taka Jehova chunga innghat lovin, ama thu tlûknaah a innghat zâwk a. A thil tihsual chuan thihna leh Pathian laka a hming ṭha neih chânna a thlen a ni. He thiltawn hian inngaitlâwm tak leh rinawm taka Jehova rawngbâwl a pawimawhzia a va târ lang chiang tak êm!

16, 17. Engin nge Jehova chunga rinawm reng tûrin min ṭanpui ang?

¹⁶ Thinlunga mahni hmasialna awm chuan mi a hruai sual duh khawp a. “Thinlung hi thil zawng zawng aiin bumhmang ber, chhe lailet der a ni.” (Jer. 17:⁠9) Jehova chunga rinawm reng tûr chuan, chapona leh mahni inrinchhanna te chawpa mihring hlui chu hlîp thla tûrin ṭan kan la reng tûr a ni a. Tin, mihring thar, “thutak felna leh thianghlimnaa [a nih loh leh, rinawmnaa] Pathian anga siam khân” kan inthuam tûr a ni bawk.​—⁠Ephesi 4:​22-24 chhiar rawh.

¹⁷ Thufingte 11:2 chuan: “Inngaitlâwmte hnênah chuan finna a awm,” tiin a sawi a. Inngaitlâwm taka Jehova rinchhanna chuan thil sual lian takte pumpelh tûrin min ṭanpui a ni. Entîr nân, lunghnualna chuan thu tlûkna siam tûr chu awlsam takin a tibuai thei a ni. (Thuf. 24:10) Rawngbâwlna thianghlim a engemaw bera tel chu kan ning mai thei a, kum tam tak chhûng kan lo thawk tawh bawka mi dangte thawh ve hun angah kan ruat ṭan mai thei a ni. A nih loh leh mite’n nun “pângngai” an tih ang chi neih chu kan duh mai thei bawk. Amaherawhchu, ‘tum hrâm hrâmna’ leh ‘Lalpa hna ṭhahnemngai taka thawhna’ chuan kan thinlung a vênghim ang.​—⁠Lk. 13:24; 1 Kor. 15:⁠58.

18. Thu tlûkna siam tûr kan hriat loh chuan eng nge kan tih theih?

¹⁸ A châng chuan, thu tlûkna khirh takte pawh kan siam a ngai mai thei a, a dik ber tûr pawh hriat nghâl theih a ni lo mai thei. Chutiang hunah chuan a ṭha ber tûra kan ngaih anga tih mai chu kan duh em? Chutiang dinhmun kan tawh apiangin, Jehova ṭanpuina kan dîl chu a finthlâk ang. Jakoba 1:5 chuan: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin a sawi. Kan Pa vâna mi chuan thu tlûkna fing siam thei tûra kan mamawh thlarau thianghlim min pe ang.​—⁠Luka 11:​9, 13 chhiar rawh.

Rinawm Reng Chu Tum Tlat Ang Che

19, 20. Eng nge tih kan tum tlat ang?

¹⁹ Solomona’n biakna dik a pênsan hnu hun hrehawm takahte chuan Pathian chhiahhlawhte rinawmna chu nasa taka fiah a ni a. Mi tam takte chuan kawng engemaw takin an phatsan deuh vek a. Mahse, ṭhenkhatte erawh chu Jehova chungah an rinawm thung.

²⁰ Nî tinin, kan rinawmna fiahtu duhthlan tûr leh thu tlûkna siam tûr kan hmachhawn a. Keini pawh kan rinawm ve thei a ni. Jehova’n a mi rinawmte mal a sâwm dâwn tih ring tlat chunga thinlung sakhat puin a chungah i rinawm reng ang u.​—⁠2 Sam. 22:26. (w08 8/15)

[Footnote]

Engtin Nge Kan Chhân Ang?

• Engvângin nge thinlunga hausak âtchilhna chu kan paih bo vang?

• Engin nge Jehova chunga rinawm tlat tûrin min ṭanpui ang?

• Engtin nge inngaihtlâwmna chuan Pathian chunga rinawm reng tûra min ṭanpui?

[Zirlai Atâna Zawhnate]