Zahawmna Lantirin Jehova Chawimawi Rawh
Zahawmna Lantirin Jehova Chawimawi Rawh
“[Jehova] hnathawh chu a zahawmin a ropui a ni.”—SAM 111:3.
1, 2. (a) Engtin nge “zahawmna” chu i hrilhfiah ang? (b) He thuziakah hian eng zawhnate nge kan ngaihtuah ang?
HMEICHHE naupang kum sâwm mi Madison-i chu “zahawm” tih thu mal awmzia an han zawh chuan, ani chuan, “Ṭha taka inthuam” tiin a chhâng vat a ni. Bible chuan Pathian chu zahawmna, a nih loh leh ‘chawimawinaa inthuam’ angin a sawi tih chu hmeichhe naupang chuan a hre lo mai thei. (Sâm 104:1) Mihringte tân zahawmna lantîrnaah chuan ṭha taka inthuamna a tel châng a awm mai thei a. Entîr nân, tirhkoh Paula chuan Kristian hmeichhiate chu “inthlahdah lo leh inbel lutuk lovin, thuam inchawih tâwkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin” awm se a duh a. (1 Tim. 2:9) Mahse, Jehova ‘zahawmna leh ropuina’ chawimawitu nungchang zahawmah chuan chutianga incheina aia tam thil a tel a ni.—Sâm 111:3.
2 Bible-ah chuan, “zahawmna” tih sawina Hebrai thu mal chu “ropuina,” “lalna” leh “chawimawina” ti pawha lehlin theih a ni. Dictionary pakhat chuan, “zahawmna” tih hi “ngaihsân leh zah tlâk,” a nih loh leh chawimawi phu tiin a hrilhfiah a. Tumah hi Jehova aia chawimawi phu zâwk leh ngaihsân tlâk zâwk an awm lo. Chuvângin, a hnêna inpumpêk a chhiahhlawhte kan nih angin, kan thusawi leh thiltihin amah kan chawimawi tûr a ni. A nih chuan, engvângin nge mihringte’n zahawmna an lantîr theih? Engtin nge Jehova zahawmna leh ropuina chu târ lan a nih? Pathian zahawmna chuan eng anga min nghawng tûr nge a nih? Isua Krista chuan he mize lantîrna chungchângah hian eng nge min zirtîr theih? Engtin nge Pathian duhzâwng zahawmna chu kan lantîr theih?
Zahawmna Kan Lantîr Theih Chhan
3, 4. (a) Pathian min pêk zahawmna chu engtin nge kan chhân lêt ang? (b) Sâm 8:5-9-na chuan tu chungchâng nge a hrilh lâwk? (Footnote en rawh.) (c) Hun kal tawhah khân Jehova chuan tute hnênah nge zahawmna a pêk?
3 Pathian anpuia siam an nih avângin, mihring zawng zawng chuan zahawmna an lantîr thei a. Jehova chuan mihring hmasa ber chu leilung enkawltu anga ruatin a chawimawi a ni. (Gen. 1:16, 27) Mi ṭha famkim an nih tawh loh hnuah pawh, Jehova chuan leilung nêna inkûngkaih mihring mawhphurhna chu a sawi nawn leh a. Chutiang chuan, Pathian chuan mihringte chu zahawmna a la “khumtîr” cheu a ni. (Sâm 8:5-9 chhiar rawh.) * Zahawmna pêk kan nihna chuan zahawm taka chhân lêt a phût a ni—Jehova hming ropui zah leh ṭih taka chawimawi chu.
4 Jehova chuan a bîk takin a rawngbâwltute chungah zahawmna engemaw chen a hlân a. Pathian chuan Abela chu a thil hlante pawmin a chawimawi a, a unaupa Kaina thil hlante erawh chu a hnâwl thung. (Gen. 4:4, 5) Mosia chu a aia Israelte hruaitu tûr Josua hnêna “thuneihna hlân,” a nih loh leh a zahawmna ṭhenkhat hlân chhâwng tûra hrilh a ni a. (Num. 27:20) Davida fapa Solomona chungchângah, Bible chuan heti hian a sawi: “LALPAN Solomona chu Israel-ho zawng zawng mithmuhah nasa takin a tiropui a, Israel rama a hmaa lalte zînga tuma la chan ngai loh, lal nihna ropui tak a chantîr a,” tiin. (1 Chro. 29:25) Pathian chuan rinawm taka “a ram mawina ropuizia hriattîr” tawh hriak thih tholehte hnênah zahawmna nasa tak a pe ang. (Sâm 145:11-13) Chutianga Jehova chawimawina kawngah chuan, Isua “berâm dang” pung chak takte pawhin dinhmun zahawm tak leh ṭha tak an chang bawk.—Joh. 10:16.
Jehova Zahawmna leh Ropuina Chu Târ Lan A Ni
5. Jehova zahawmna chu eng anga ropui nge ni?
5 Pathian ropuizia leh mihringte engmah tham an nih lohzia khaikhinna fakna hlaah, a phuahtu Davida chu: “Aw LALPA, kan Lalpa, lei chung zawng zawngah hian, i hming chu a va ṭha êm! I ropuina chu vân chungahte khian i dah a,” tiin a zai a ni. (Sâm 8:1) “Lei leh vân” siam a nih hma aṭanga Pathianin lei hi paradis-a siam a, mihringte ṭhat famkimnaa hlân kai a tumna ropui taka a thlen famkim hnu thlengin—chatuan ata chatuan thlengin—Pathian Jehova chu lei leh vâna lalber leh zahawm ber a ni reng ang.—Gen. 1:1; 1 Kor. 15:24-28; Thup. 21:1-5.
6. Engvângin nge fakna hla phuahtu chuan Jehova chu zahawmnaa inthuam anga a sawi?
6 Zân thiang reh taka arsi pe un mai, “lunghlua” cheimawi ang maia lang chuan Pathian ṭih mi fakna hla phuahtu rilru chu a va khawih dâwn em! Pathianin ‘vânte khi puan in chung anga a kaih pharh’ dân chu mak a tih êm avângin, fakna hla phuahtu chuan Jehova chu chawimawina, a nih loh leh zahawmnaa inthuam angin a sawi a ni. (Sâm 104:1, 2 chhiar rawh.) Hmuh theih loh Siamtu engkimtitheia zahawmna leh ropuina chu a kut chhuak hmuh theihahte hian a lang a ni.
7, 8. Vânahte khian Jehova zahawmna leh ropuina finfiahtu eng nge kan hmuh?
7 Entîr nân, Thlasik Kawng galaxy hi han ngaihtuah teh. Arsi te, planet te, leh nî leh a hêltu arsi te awmna he hmun zau takah hian kan Leilung hi tuipui kam zau taka ṭiau vaivut mal khat ang lek a ni. He galaxy pakhat ringawtah pawh hian arsi tlûklehdingâwn 100 aia tam a awm si a! Châwl hauh lova second khat chhûnga arsi pakhat zêl i chhiar theih chuan, tlûklehdingâwn 100 i chhiar thlen nân kum 3,000 aia tam i hman a ngai dâwn a ni.
8 Thlasik Kawng galaxy-ah ringawt pawh arsi tlûklehdingâwn 100 aia tam a awm chuan, vânlâwtah khian eng zât tak awm ang maw? Vân sâng chanchin zir mite chuan Thlasik Kawng chu galaxy tlûklehdingâwn 50 aṭanga 125 thleng awm tûra rinte zînga pakhat mai a nih an ring. Vânlâwt pumpuiah khian arsi eng zât nge awm? A chhânna chu kan hriatthiam phâk bâk a ni. Mahse, Jehova chuan “arsi tam chin a chhiar a; an hming a vuah ṭheuh” a ni. (Sâm 147:4) Jehova chu chutiang zahawmna leh ropuinain a inthuam tih i hriatna chuan a hming ropui fak tûrin a chêttîr che a ni lâwm ni?
9, 10. Engtin nge chhang chuan min Siamtu finna a târ lan?
9 Tûnah chuan vân ropui tak ngaihtuah tawh lovin, kan thil hriat tlânglâwn tak chaw hi lo ngaihtuah tawh ila. Jehova chu “lei te, vân te . . . siamtu” mai ni lovin, ‘rilṭâmte hnêna chaw pe ṭhîntu’ pawh a ni. (Sâm 146:6, 7) Pathian ‘zahawmna leh ropuina’ chu chaw kan hmuhna thlai min pêkte pawh tiamin, a hnathawh ropui takahte hian a lang a. (Sâm 111:1-5 chhiar rawh.) Isua chuan a hnungzuitute chu: “Vawiinah hian kan ei khawpin chaw min pe ang che,” tia ṭawngṭai tûrin a zirtîr a ni. (Mt. 6:11) Israel mite pawh tiamin, Bible hun laia mi tam takte chuan chaw atân chhang an ring ṭhîn a. Chhang chu chaw pângngai tak anga ngaih ni mah se, chhang siam nâna thil chawhpawlhte ti dang lamtu bâwlhlo hnathawh dân chu a namai lo hle.
10 Bible ziak a nih lai chuan, Israelte chuan chhang siam nân chhang phut emaw, barli phut emaw chu tui nên an hmet pawlh ṭhîn a. Dâwidim, a nih loh leh chawl chu chhang siam nâna hman châng a awm. Hêng thil pangngai takte hian inkûngkaihna nei bâwlhlo inchawhpawlh engemaw zât siam chhuak tûrin hna an thawk tlâng a. Chûng bâwlhlo inchawhpawlhte inkûngkaih dân chiah chu hriatthiam vek theih a ni lo. Chu bâkah, pum chhûnga chhang pai ṭawih dân pawh hi thil mak tak a ni. “Aw LALPA, i thiltihte chu a va tam êm! Finnain i siam vek a ni: leilung hi i hausaknain a khat a nih hi,” tia fakna hla phuahtu a zai pawh hi a mak lo ve! (Sâm 104:24) Chutianga Jehova fak tûr chuan chêttîrin i awm em?
Pathian Zahawmna leh Ropuina Chuan Engtin Nge A Nghawng Che?
11, 12. Pathian kut hnathawh ngaihtuahna chuan kan chungah eng rah nge a chhuah theih?
11 Zâna vân sânga thil awmte mak ti taka thlîr tûrin vân sâng chanchin zir mi kan nih a ngai lo va, chhang ei tûr pawhin bâwlhlo hnathawh dân hre mi kan nih kher a ngai hek lo. Mahse, min Siamtu ropuizia hre thiam tûr erawh chuan a kut hnathawhte ngaihtuah nâna hun kan hman a ngai a ni. Chutianga ngaihtuahna chuan kan tân eng nge a tih theih? Chutiang ngaihtuahnain min nghawng dân chu Jehova kut hnathawh dang ngaihtuahnain min nghawng dân nên a inang a ni.
12 Jehova’n A mite tâna thil ropui tak a tih chungchângah: “Nangmah chawimawina ropui tak leh, i thilmak tihte chu ka ngaihtuah ang,” tiin Davida chu a zai a ni. (Sâm 145:5) Bible zir a, chu mia kan thu chhiarte ngun taka chhûtin hêng a thiltihte hi kan ngaihtuahzia kan lantîr a. Chutianga ngaihtuahna chuan eng nge a rah chhuah? Pathian zahawmna leh ropuina kan hriatthiam phah a. Davida anga Jehova chawimawi ve tûr leh: “Kei pawhin i ropuizia ka hriattîr bawk ang,” tia sawi ve tûra chêttîr kan ni bawk a ni. (Sâm 145:6) Pathian thilmak tihte ngun taka ngaihtuahna chuan Jehova nêna kan inlaichînna a tinghetin, mi dangte hnêna a chanchin phûr tak leh tum ruhna nêna sawi tûrin min chêttîr tûr a ni a. Chanchin ṭha chu ṭhahnemngai taka puang chhuakin, Pathian Jehova zahawmna, ropuina, leh lalna hre thiam tûrin mite chu i ṭanpui em?
Isua Chuan Pathian Zahawmna Sawisêlbovin A Lantîr
13. (a) Daniela 7:13, 14-na sawi angin, Jehova chuan a Fapa hnênah eng nge a pêk? (b) Lal a nih angin Isua’n a khua leh tuite chu engtin nge a cheibâwl?
13 Pathian Fapa, Isua Krista chuan ṭhahnemngai takin chanchin ṭha a puang chhuak a, a Pa vâna mi zahawm tak chu a chawimawi a ni. Jehova chuan a Fapa mal neih chhun chu ‘rorêlna leh ram’ pein chawimawina ṭha bîk tak a pe a. (Daniela 7:13, 14 chhiar rawh.) Mahse, Isua chu a chapo lo va, a inla hrang hek lo. Chu mi kalh chiah chu a ni zâwk—a khua leh tuite tlin tâwk hriaa zahawm taka cheibâwltu, Rorêltu mi khawngaih thei tak a ni. Lala Ruat Isua’n a mi tawhte, a bîk takin mi dangte’n an hnuaichhiah leh an hmangaih lohte a cheibâwl dân entîrna pakhat i lo ngaihtuah ang u.
14. Hmân lai Israel ramah khân phar hri veite chu eng anga thlîr nge an nih?
14 Hmân laia phar hri veite chu hrehawm an tawrh hrep hnuah an thi chauh ṭhîn. Zawi zawiin a veitu taksa pêngte chu a mawih ral tial tial a. Phar tih dam chu mitthi kaih thawh ang tluka thil harsaa ngaih a ni. (Num. 12:12; 2 Lal. 5:7, 14) Pharte chu thianghlim lova puan an ni a, mi ten leh vântlâng zîng ata hnawhchhuah an ni ṭhîn. Mite an tawhin: “Ka bawlhhlawh e, ka bawlhhlawh e,” tiin an au tûr a ni. (Lev. 13:43-46) Phar hri vei chu mitthi ang mai a ni a. Juda sakhaw hruaitute thu chhinchhiahin a sawi angin, phar hri vei chu tupawh feet ruk vêl bâka a hnaih phalsak a ni lo. Juda sakhaw hruaitu ṭhenkhat chuan phar an hmuh hunah hla taka an awm pawhin hnawh kian nân lungin an vawm ṭhîn tih a târ lang bawk.
15. Engtin nge Isua chuan phar hri vei pakhat chu a ṭanpui?
15 Amaherawhchu, Isua’n a hnêna a phar tihdamsak ngêntu a lo dawnsawn dân hi a chhinchhiah tlâk hle. (Marka 1:40-42 chhiar rawh.) Phar hri vei chu hnawt kiang mai lovin, chutianga mite’n an endawng tak chu Isua chuan khawngaih tak leh zahawm takin a cheibâwl a. Isua chuan chu pa chu ṭanpui ngai mi khawngaihthlâk tak angin a hmu a ni. A thinlung a khawih êm avângin, Isua chuan a khawngaihna chu thiltihah a chantîr ta vat a. Ani chuan a kuta banin phâr hri vei chu a dek a, a tidam ta a ni.
16. Isua’n mi dangte a dâwr dân aṭangin eng nge i zir?
16 Isua hnungzuitute kan nih angin, engtin nge a Pa zahawmna a târ lan dân chu kan entawn theih ang? Kan entawn theih dân kawng khat chu mihring zawng zawngte—an nihna, an hrisêlna, a nih loh leh an kum upat lam chu engpawh ni se —chawimawi leh zah an phu tih hriat hi a ni. (1 Pet. 2:17) A bîk takin mi dangte enkawltu—pasalte, nu leh pate, leh Kristian upa ang chite hian an enkawlna hnuaia awmte an chawimawi leh mahni inzah derna an neihte an neih chhunzawmtîr zêl a ngai a ni. Chutianga tih chu Kristian zawng zawngte tih tûr a nihzia sawi uarin, Bible chuan: “Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula,” tiin a sawi.—Rom 12:10.
Pathian Biaknaah Zahawmna Lantîrin
17. Jehova kan biak huna zahawmna lantîr dân tûr chungchâng Bible sawite aṭangin eng nge kan zir theih?
17 Jehova kan biak hunah zahawmna kan lantîr lehzual tûr a ni. “Pathian ina i kal laiin i kê vêng ṭha rawh,” tiin Thuhriltu 5:1 chuan a sawi a. Mosia leh Josua chu hmun thianghlima an awmin an pheikhawk phelh tûra hrilh an ni. (Ex. 3:5; Jos. 5:15) Chu chu zahna lantîr nâna ti an ni a. Israel puithiamte chuan “an taksa saruak khuh nan” puan zai sîn kekawr an ha ngei tûr a ni. (Ex. 28:42, 43) Hei hi maichâma rawng an bâwl laia mawi lo taka an saruakna a lan loh nân a ni. Puithiam chhûngkaw zînga mi tinte chuan Pathian duhzâwng zahawmna chu an vawng tlat tûr a ni.
18. Engtin nge Jehova kan biaknaah zahawmna lantîr a nih?
18 Chuti a nih chuan, biaknaa zahawmnaah chawimawina leh zahna a tel a. Chawimawi tlâk leh zah tlâk ni tûr chuan, zahawm taka thil kan tih a ngai a ni. Zahawmna kan lantîr chu a der mai emaw, nihna kâwr ang mai emaw a ni tûr a ni lo. Chu chu mihringte hmuh theih piah lam, Pathianin a hmuh kan thinlung aṭanga chhuak a ni tûr a ni. (1 Sam. 16:7; Thuf. 21:2) Zahawmna chu kei mahnia bet tel ve rêng lo niin, chu chuan kan nungchang te, kan rilru put hmang te, mi dangte nêna kan inlaichînna te, leh mahni kan inthlîr dân leh kan inngaih dân te pawh a nghawng hial tûr a ni a. Zahawmna chu englai pawhin, kan ṭawngkam chhuak leh thiltih apiangah a lang tûr a ni. Kan nungchang, kan khawsa zia, leh kan silhfên leh inchei dân chungchângah tirhkoh Paula thu hi kan ngaihsak a ni: “Kan rawngbâwl hna hi an dem lohna tûrin eng kawngah mah tlûk phahna tûr rêng rêng kan siam lo va; Pathian rawngbâwltute angin engkimah mi mit tlungin kan awm zâwk ṭhîn,” tih hi. (2 Kor. 6:3, 4) ‘Pathian min Chhandamtu zirtîrna thu engkimah kan cheimawi’ a ni.—Tit. 2:9, 10.
Pathian Lâwmzâwng Zahawmna Lantîr Zêl Rawh
19, 20. (a) Mi dangte zahna lantîr dân kawng ṭha tak chu eng nge ni? (b) Zahawmna chungchângah eng nge tih kan tum tlat?
19 “Krista aia palai,” hriak thih Kristiante chuan zahawmna an lantîr a. (2 Kor. 5:20) Anmahni rinawm taka thlâwptu “berâm dang” chu Messia Lalram tâna thuchah kengtu zahawm takte an ni. Palai leh thuchah kengtu chuan a ram aiawhin huaisen tak leh zahawm takin thu a sawi ṭhîn. Chuvângin, Pathian sawrkâr, a Lalram thlâwpin, zahawm tak leh huaisen takin thu kan sawi tûr a ni. (Eph. 6:19, 20) Mi dangte hnêna “thil ṭha chanchin ṭha” kan thlen hian, anmahni chawimawina leh zahna kan lantîr a ni lâwm ni?—Is. 52:7.
20 Pathian zahawmna mila nungin, amah chawimawi chu kan tum tlat tûr a ni. (1 Pet. 2:12) Engtik lai pawhin Pathian zahna, a biakna zahna, leh kan rinpuite zahna thûk tak chu i lantîr ang u. Tin, zahawmna leh ropuinaa inthuam Jehova chu zahawm taka amah kan biakna chuan tilâwm lul rawh se. (w08 8/15)
[Footnote]
^ par. 3 Sâm 8-naa Davida thusawi chu mi ṭha famkim Isua Krista chungchâng hrilh lâwkna a ni bawk—Heb. 2:5-9.
Engtin Nge Kan Chhân Ang?
• Jehova zahawmna ropuizia hriatthiamna chuan kan chungah eng nge a rah chhuah ang?
• Isua’n phar hri vei pakhat a lo dawnsawn dân aṭangin mi dangte zahawm taka cheibâwl chungchâng eng nge kan zir theih?
• Engtin nge zahawm taka Jehova kan chawimawi theih ang?
[Zirlai Atâna Zawhnate]
[Phêk 18-naa milem]
Engtin nge Jehova’n Abela chu a chawimawi?
[Phêk 21-naa milem]
Isua’n phar pakhat a tihdam dân aṭangin zahawmna chungchâng eng nge i zir?