Bible-in Nun A Thlâk Danglam

Mexican ṭhalai mi sual rual Setana Fate tia koh pâwl zînga mi pakhat chu inthlâkthleng a, khua leh tui rinawm leh taima tak ni tûrin engin nge chêttîr thei? Engvângin nge Japan nu sumdâwng hlawhtling tak pakhat chuan hausakna chu a nuna thil tum ber a nihtîr tawh loh va, engtin nge a inthlâk dang lamna chu a ngaih? Engin nge râlthuama sumdâwngtu Russia mi chu dân lo anga a sumdâwnna hlâwk tak bânsan tûra chêttîr? Hêng mite’n thu sawi tûr an neih chu i lo en ang u.

MI MAL CHANCHIN TAWI

HMING: ADRIAN PEREZ-A

KUM: 30

RAM: MEXICO

TUN HMAIN: MI SUAL RUAL PAWLA MI

KA TUN HMA NUN: Kum 13 mi vêl ka ni a, kan chhûngin Mexico State-a Ecatepec de Morelos hmunah kan pêm a. Chutih hun lai chuan kum tling lo naupang dân bawhchhiatna te, vântlâng thil tih chhiatna te, leh ruihhlo ngaihna te chu kan awmna vêngah chuan a hluar hle a. Kei pawhin zu ruih ka chîng ṭanin, vântlâng thilte ka tichhia a, nungchang bawlhhlawh takin ka khawsa ta thuai a ni.

A hnuah chuan, ka pianna khua San Vicente hmunah chuan kan pêm let leh a. Amaherawhchu, chu mi hmunah pawh chuan ruihhlo ngawl veina chu harsatna lian tak a ni a. Khaw laia ṭhalai thi let rengte chu hmuh tûr a awm fo a ni. Setana Fate tia koh mi sual pâwl chu ka zawm ve a. Thilte rûin, ruihhlo kan ngai a, chu chu petrol emaw, dendrite emaw ang chite hnim hi a ni deuh ber ṭhîn. In ka thlen dân pawh ka hre mang meuh ṭhîn lo va, a châng phei chuan kawngah nikhaw hre lovin ka lo let dêr ṭhîn bawk. Ka ṭhian ṭhenkhatte chu rûkrûk vâng leh tualthah vângin lung inah an tâng hial a ni.

Chûng thil sualte ka ti reng chung pawhin Pathian chu ka ring ve tlat a. Ka chhia leh ṭha hriatna thawi dam nân, sakhaw thiltih chi hrang hrang, Good Friday hapta chhûnga kros kawng zawhna angahte ka tel ve ṭhîn a. A hnuah  chuan Krista lema changtu ber pawh chu tiamin kan zâin chu mi thilthlenga kan telna lawm nân kan rui nghek ṭhîn.

BIBLE-IN KA NUN A THLAK DAN: Kum sawm hnih ka tlin dâwn hnaih lamah chuan Jehova Thuhretute hnênah Bible ka zir ṭan a. Ka nun chuan awmzia a nei meuh lo tih leh hetiang zêla awm chu ka tân a ṭha dâwn lo tih ka hria a ni. Ka rilru hnehtu deuh mai chu Galatia 6:​8-a chhinchhiah: “Mahni tisa lama thehtu chuan tisaa mi chhiatna a seng ang a; thlarau lama thehtu erawh chuan thlarauva mi chatuana nunna a seng dâwn a ni,” tih thu hi a ni a. He Bible châng hian ka tâna thil a kal tluan zêl ka duh chuan, hma lam hun ngaihtuah rân chunga ka theh a ngai tih min hriattîr a ni.

Bible ka han zir chuan, Jehova chu Pathian nung, mi mal taka min ngaihsaktu leh thil sual ka lo tih tawhte min ngaidam peihtu a ni tih ka hre thiam ṭan a. Ṭawngṭaina a ngaithlain a chhâng tih keimah ngeiin ka tawng bawk a ni.

Ka nun dân phung thlâk danglam chu a awlsam lo hle. Mi sual pâwl chhuahsan chu a harsa khawp mai. Chu pâwlah chuan tel tawh lo mah ila, pâwl dangte lalna vêng ṭhenkhatah chuan ka luh phal a la ni chuang lo. A châng chuan, ka ṭhian hluite chuan min zawn chhuah a, ka thil lo tih tawh ṭhinte ti leh tûra min tihluih ka hlauh avângin anni chu ka bihrûksan a ngai hial ṭhîn.

Chu mi nêna inkalh takin, Jehova Thuhretute ruala Kingdom Hall-a ka han inkhâwm ṭan chinah chuan kohhrana mite chu an nêlawmin, an ngainatawm hle tih ka hre ta a. An rinna nghet tak leh an zirtîrna mila an nunna chuan ka rilru a khawih tak zet a ni. Chu chu ka lo chêttlat ṭhinna khawvêl lakah chuan a dang zar mai le.

KA HLAWKPUI DAN: Jehova Thuhretute zînga mi anga baptisma ka channa pawh kum sâwm lai a ni tawh a. Bible zirtîrnate chu nunpui tûrin theihtâwp ka chhuah a ni. Chutianga ka tihna avâng chuan ka chhûngte pawhin min zah ṭan ta a. Tûnah chuan mi taima tak angin min hre tawh a, sum leh pai lamah pawh ka ṭanpui thei hial tawh a ni. Ka nu pawhin Bible a zir ṭan a, Jehova Thuhretute zînga mi a lo ni ve ta. Ka pa pawhin a nun a thlâk danglam a. Ka chhûngte zînga a tam zâwkte chu Jehova Thuhretu ni lo mah se, ka inthlâk danglam dân an han hmuh hnu chuan Bible-in mi nun a thlâkthleng thei a ni tih an pawm ta a ni.

MI MAL CHANCHIN TAWI

HMING: YAYOI NAGATANI

KUM: 50

RAM: JAPAN

TUN HMAIN: SUMDAWNG HLAWHTLING TAK

KA TUN HMA NUN: Mi nêlawm tak hlîr awmna thingtlâng khawtê pakhata sei lian ka ni a. Ka pa chuan dâwr lian tak a nei a, chutah chuan mi sâwm lai hna thawkin a chhawr a ni. Kan in chu kan dâwr bulah chiah a awm a; ka Nu leh Pate chu buai ṭhîn hle mah se, ka khua a har ngai lo.

Kan unau hmeichhe naupang pathumte  zînga a upa ber ka ni a, chhûngkaw sumdâwnna enkawl chho tûra têt tê aṭanga zirtîr ka ni. Pasal ka nei hma hle a. Ka pasal chuan bank-a a hna thawh lai chu bânsanin, kan chhûngkaw sumdâwnnaah chuan min pui chhunzawm ta a. Fa pathum lai kan nei ta thuai a. Ka nu chuan in lam sekrek a khawih pahin naupangte chu a enkawl a, kei erawh chuan zîng aṭanga zân thleng ṭhak ṭhakin dâwr ka nghâk thung. Chuti chung pawh chuan, chhûngkua angin hun tlêm azâwng chu kan la hmang tlâng thei tho a ni.

Chuti chuan, sumdâwnna lama tlâkchhiatnain kan sumdâwnna chu a rawn nghawng ṭan ta a. Chuvângin, in sakna bungraw lam pang zawrhna dâwr chu kawngpui âna hawn zai kan rêl ta a. Dâwr kan sak ṭan hma chiah niah chuan ka pa, kan company-a a hotupa ber chuan thluak lam natna rang chi veiin min natsan ta thut mai a. A ṭawng hleih theih tâk loh avângin kan dâwr thar atâna mawhphurhna zawng zawng chu ka kovah a tla ta a ni. Ka pasal chuan kan dâwr hlui chu a la enkawl chho zêl a. Kan buai hlawm ta hle mai a ni.

Kan dâwr hawn thar chu a hlawhtling hle mai a. Ka hlawhtlinnate chu ka chhuang hle a, mu hman lo lêkin hna ka thawk ta mai a. Ka fate chu hmangaih mah i la, ka rilruah chuan hna ringawt ka ngaihtuah thung. Ka pasal nêna inbiakna hun tak ngial pawh kan nei mang lo va, kan neih chhunah lah kan inhnial ziah lehnghâl. Ka rilru hahna thawi dam nân zan tin deuhthaw chu ka ṭhiante leh ka sumdâwnpuite nên zuin tûrin kan chhuak ṭhîn a. Ka thiltih awm chhun chu hna thawh, zu in, leh mut a ni ringawt. Sumdâwnna lamah hlawhtling hle mah i la, hlim lo tawlh tawlha ka inhriat si avângin a chhan ka hre thiam lo hle.

BIBLE-IN KA NUN A THLAK DAN: Jehova Thuhretute hnêna Bible ka han zir ṭan tâkah chuan Bible châng pathum chuan ka chungah nasa takin nghawng a nei a. Matthaia 5:3 thu: “Rilrua retheite [“mahni thlarau lam mamawh ngaihven mite,” NW] chu an eng a thâwl e; vân ram an ta a ni si a,” tih chu ka han hriat thiam chuan ka ṭap ta ringawt a. He mi châng hian sum leh pai lamah hausa hlein, ka sumdâwn puite ngaihsân hlawh mah i la, ruak riau nia inhriatna ka neih chhan a hrilhfiah a ni. Ka thlarau lam mamawh hriatna leh phuhrûkna chauhvin hlimna dik tak min neihtîr dâwn a ni tih ka hre chhuak ta a ni.

Chutih hun lai chuan Japan rama sumdâwnna chu nasa takin a tla hniam a, ka sumdâwn puite zîngah chuan 1 Timothea 6:​9-in: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn,” tia a sawi a dik zia chu ka hmu a ni. Matthaia 6:​24-a Isua thusawi: “Pathian leh sum rawng in bâwl kawp thei lo ve,” tih chu ka tân liau liau niin ka hria a, chuvângin ka nunah inthlâk thlengna siam ka tum ta a ni.

Ka nu leh pa, ka pasal leh ka fate ka ngaihsak lohzia ka inhre chhuak a. Tin, mize duhawm lo ṭhenkhat ka nei a ni tih a lo lang chiang a. Ka lo chapo ta viau vin, mite chungah dawhtheihna ka tlachham a, ka thinur hma hle bawk a ni. A tîrah chuan, ka nun thlâk dang lama Kristian ka nih theih chu ka ring lo. Amaherawhchu, ka fate ka hmangaih tak zet a, chhûngte nêna kan indâwrnaah Bible-a zilhna thute ka nunpui tâkah chuan ka fate pawhin thu an âwih ta hle mai a. An bulah hun tam zâwk hmangin, Kristian inkhâwmahte ka hruai ṭhîn a ni.

KA HLAWKPUI DAN: Nuna thiltumte hriatna leh Pathian rawngbâwl theihna, amah tilâwm thei nun kawng zuina chuan hlimna leh lungâwina dik tak min pe a. Chhûngkua aiin ka hna thawh ka ngai pawimawh zâwk tawh lo va, chuvângin ka hloh tâk ka zahawmna pawh chu ka nei lêt leh ta a ni.

Bible thu bulte ka nunpuinain ka mizia a thlâk danglam dân a hmuhna chuan ka nu chu Bible zir tûrin a chêttîr a, Kristian a lo ni ve ta a. Ka pa emaw, ka pasal emawin ka nu nêna kan thutlûkna siam an kalh loh avângin ka lâwm hle. Ka fate nên chuan kan inpawh zual sauh va, tûnah chuan chhûngkaw nun hlim tak kan nei tawh a ni.

MI MAL CHANCHIN TAWI

HMING: MIKHAIL ZUYEV-A

KUM: 51

RAM: RUSSIA

TUN HMAIN: DAN LO ANGA RALTHUAMA SUMDAWNGTU

 KA TUN HMA NUN: Kan khua Krasnogorsk chu hmun hring dup maiin a hual vêl a. Moscow Lui chu chhim lamah a luang a. Tlâk lam leh hmâr lamah chuan khua chu ram ngawin a khuh bo lek lek a ni.

Ka naupan lai chuan, kut lâwnga insual leh hriamhrei hmanga infiam vêl ka hrât hle a. Taksa sawizawi nân hun tam tak ka hmang a. Tin, dân lo angin silai ka siam chawp a, silai mu leh chemtê te ka siam bawk. A hnuah chuan, chu chu ka sumdâwnna nghet a lo ni ta a. Remruatna fel tak ka neiin, ka thil siam chhuahte chu mi sualte hnêna hralh a tla hle a ni.

BIBLE-IN KA NUN A THLAK DAN: Kum 1990 chho vêlah khân Jehova Thuhretute chu ka hre ṭan a; mahse, atîrah chuan anni chu ka ring lo. Zawhna min zâwt tam mah mahin ka hria a ni.

Ni khat chu an zînga pakhat chuan Rom 14:12 thu: “Kan zain Pathian hnênah mahni chanchin kan sawi ṭheuh tûr a ni,” tih chu min chhiarsak a. Pathian hnênah eng nge ka sawi ve ang tih ka ngaihtuah ta a. Chu Bible châng chuan Pathianin ti tûra min beisei chu zir tûrin min chêttîr a ni.

Kolossa 3:​5-10-a chhinchhiah Bible zilhna: “Chutichuan in taksa pêng leia awmte hi tihlum rawh u, inngaih te, bawlhhlawhna te, hurna te, châkna sual te, duhâmna te hi (duhâmna chu milem biakna a ni si a); chûng thil avâng chuan a ni, Pathian thinurna chu . . . a thlen ṭhin ni; . . . tauhna te, thinurna te, huatna te, sawichhiatna te, in kaa chhuak ṭawng zahmawhte hi ti bo rawh u. Dâwt inhrilh tawn suh u; mihring hlui chu a thiltihte chawpin in hlîp tawh a, mihring thar chuan in inthuam tawh si a,” tih chu nunpui tûrin ka thawk rim hle a ni.

Chutianga inthlâkthleng chu harsa ka ti hle a. Tûn hma lama ka “sumdâwn puite” chuan râlthuamte siam leh tûrin pawisa min pêk an tum reng ṭhîn a; tin, kei lahin mite’n min han deusawh chângte hian inthunun harsa ka ti hle ṭhîn bawk. Chuti chung pawh chuan râlthuam hlu tam tak ka neihte chu ka tichhe ta vek a ni. Pathian leh Krista min hmangaihna ka han hriat chuan, anmahni hmangaih lêt tûra chêttîrin ka awm ta a. Bible zir chhunzawm zêlin, tualchhûng kohhrana inkhâwmnaahte ka tel a, Pathian ṭanpuina dîlin ka ṭawngṭai bawk a ni.

KA HLAWKPUI DAN: Nasa taka ka beihna leh ka Kristian unaute ṭanpuina zârah zawi zawiin mize ṭha zâwk ka nei chho ta a. Jehova’n mitthi tawhte pawh tiamin, kan vaiin min ngaihsak ṭheuh tih ka hriatthiamna chuan min tihlim hle. (Tirhkohte 24:15) Jehova Thuhretute zînga ka hmuh tih tak zetna leh rinawmna chu ka hlut khawp mai. Tin, min ngaihsak tak zetna avâng chuan ka lâwm hle a, Pathian laka an rinawmna chu ka hlut hle bawk.

A tîrah chuan ka chhûngte leh ka ṭhiante zînga ṭhenkhatte chuan ka rinna chhar thar chu an dodâl a. Mahse, dân bawhchhe pâwl nêna inkûngkaih aia sakhaw lama ka inhman chu a ṭha zâwk tia ngaihtuahin an inhnêm a ni. Ka nun chu indona râlthuam hralh nâna hmang lova, mi dangte’n remna Pathian an hriatna tûra ṭanpui nâna ka hman avângin ka lâwm hle. (w08 8/1)

[Phêk 21-naa milem]

Ka chhia leh ṭha hriatna thawi dam nân Katholic thiltihah ka tel

[Phêk 22-naa milem]

Sum leh pai lamah hausa mah i la, ka hlim lo hle