Jehova Chu Kan Tân “Chhanhimtu” A Ni

“LALPAN anni chu a ṭanpuiin a chhanhim ṭhîn.”​—⁠SAM 37:⁠40.

1, 2. Jehova chungchânga eng thu dik nge min tichaktu leh min thlamuantu ber chu?

NIIN hlimthla a siam chu a awmna ngaiah a awm reng lo. Leilung a inher ang zêlin hlimthla pawh chu a inherin, a inthlâk danglam ve zêl a ni. Mahse, lei leh ni Siamtu chu a inthlâk danglam ve ngai lo. (Mal. 3:⁠6) Bible chuan: “Amahah chuan danglamna leh herna rêng rêng a awm thei lo,” a ti. (Jak. 1:17) Jehova chungchânga he thu dik tak hi min thlamuantu a ni tak zet a, a bîk takin fiahna leh harsatna khirh takte kan tawh hunah hian a ni lehzual a ni. Engvângin nge?

² Thuziak hmasaa kan lo hmuh tawh angin, Jehova chu Bible hun laia mite tân “Chhanhimtu” a lo ni tawh ṭhîn a. (Sâm 70:⁠5) A inthlâk thleng lo va, a thutiam chu a hlen ziah a ni; chuvângin tûn laia amah betute hian ‘anmahni ṭanpui tûr leh chhanhim’ tûrin an ring tlat thei a ni. (Sâm 37:40) Jehova chu engtin nge tûn laia a chhiahhlawhte tâna chhanhimtu a nih? Engtin nge a mi mal taka min chhanhim theih?

Dodâltute Lak Ata Chhan Chhuahna

3. Engvângin nge dodâltute chuan Jehova mite chu chanchin ṭha hril lo tûra an khap beh theih loh vang?

³ Setana dodâlna chu eng anga nasa pawh ni se, chu chuan Jehova Thuhretute chu Jehova hnênah a phu ang ngeia chibai bûkna pumhlûm a pêk lohtîr phah chuang lo. Pathian Thu chuan: “Nangmah beina tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang,” tiin min tiam a ni. (Is. 54:17) Dodâltute chuan Pathian mite chu an thu hrilhna tihtâwpsak an tum a, mahse an hlawhchham a ni. Entîrna pahnih lo ngaihtuah ta ila.

4, 5. Jehova mite chuan kum 1918 khân eng ang dodâlna nge an tawh a, chu chuan eng nge a rah chhuah?

⁴ Kum 1918 khân Jehova mite chuan an thu hrilhna tihtâwp tum sakhaw hruaitute tih chhuah tihduhdahna nasa tak chu an tâwk a. May ni 7-ah chutih laia United States ram sawrkâr chuan khawvêl puma thu hrilh rawngbâwlna enkawltu ber, J. F. Rutherford-a leh headquarter-a mi ṭhenkhatte chu man theihna thupêk a chhuah a. Thla hnih chhûngin Unau Ratherford-a leh a ṭhiante chu phiarrutu anga dik lo taka puhin, rei tak chhûng tâng tûra an chungthu rêl a ni. Dodâltute’n rorêlna in hmanga thu hrilh rawngbâwlna tihtâwp hlen an tumna chu a hlawhtling em? Hlawhtling teh suh e!

⁵ Jehova thutiam: “Nangmah beina tûra hriam chher rêng rêng a sâwt lo vang,” tih chu hre reng ang che. Rin loh taka thil awm dân inthlâkthleng thutin, March 26, 1919-ah Unau Rutherford-a leh a ṭhiante chu lung in an tânna a thla kuanaah bail chhuah an ni a. A kum leh May 5, 1920-ah anmahni puhna zawng zawng chu hnuhdawh vek a ni. Unaute chuan zalênna an neih chu Lalram hna tih hmasâwn nân an hmang chho va. Chu chuan eng nge a rah chhuah? Chuta ṭang chuan nasa takin kan pung chho ta a nih kha! Chu punna avânga chawimawina zawng zawng chu min “Chhanhimtu” Pathian chuan nei lul rawh se.​—⁠1 Kor. 3:⁠7.

6, 7. (a) Nazi-ho lalna German ramah Jehova Thuhretute chu eng anga cheibâwl nge an nih a, chu chuan rah eng nge a chhuah? (b) Tûn hnaia Jehova Thuhretute chanchin chuan eng nge a finfiah?

⁶ Entîrna pahnihna chu lo en ta ila. Kum 1934 khân Hitler-a chuan German ram ata Jehova Thuhretute chu tihchimih vekah a vau va. Chu chu a ṭawngkam mai a ni lo. Mi tam takte chu  man an ni a, tân ina khung an ni bawk. Thuhretu a sâng têlte chu tihduhdah an ni a, a za têlte chu concentration camp-ah tihhlum an ni bawk. Thuhretute tihchimih a tumna kawngah Hitler-a chu a hlawhtling em? German rama chanchin ṭha hrilhna zawng zawng chu a titâwp em? Hnai lo ve! Kan unaute chuan tihduhdahna an tawrh lai ngei pawh chuan a rûk têin thu chu an hril chhunzawm zêl tho va. Nazi rorêlna a tlûk chhiat hnuah zalênna an neih chu thu hrilh nân an hmang zawm zêl a ni. Tûnah hian German ramah Lalram thuchhuahtu 1,65,000 chuang an awm tawh a. “Chhanhimtu” Pathian chuan a thutiam: “Nangmah beina tûra hriam chher rêng rêng a sâwt lo vang,” tih chu a hlen leh ta a ni.

⁷ Kan sawi zawh tâk, tûn hnaia Jehova Thuhretute chanchin chuan Jehova’n a mite chu a huhova tihchimih a phal ngai dâwn lo tih a finfiah a ni. (Sâm 116:15) A nih leh Jehova chuan a mi malin min vênghim ve ang em? Engtin nge Jehova chuan a mi malin min chhanhim?

Tisa Lama Vênhimna Lam Ve Thung Hi?

8, 9. (a) Mi mal anga tisa lama vênhimna tiam kan ni lo tih engtin nge kan hriat? (b) Eng nge kan pawm ngei tûr chu?

⁸ Mi mal anga tisa lama vênhimna tiam kan ni lo tih kan hria. Lal Nebukadnezzara siam rangkachak milim chibai bûk duh lo Hebrai mi rinawm pathumte’n an ṭanhmun tûr an sawi chhuah chu keini pawhin kan ṭâwmpui ve a ni. Chûng Pathian ṭih mi tlangvâlte chuan Jehova’n thil mak tih theihna hmanga a vênhim an inring lo. (Daniela 3:​17, 18 chhiar rawh.) Mahse, Jehova chuan anni chu rawhtuina mei ata a chhan chhuak a ni. (Dan. 3:​21-27) Amaherawhchu, mak taka chhanchhuahna chu thilthleng zen zen a ni lo. Jehova chhiahhlawh rinawm tam takte chu dodâltute kutah an thi a ni.​—⁠Heb. 11:​35-37.

⁹ Tûn laia tisa lama vênhimna chungchâng hi eng nge ni? Jehova chuan “Chhanhimtu” a nih angin, mite chu dinhmun hlauhawm tak ata a chhan chhuak thei ngei mai a. Tûn laia thilthlengahte hian Jehova a inrawlh leh inrawlh loh chu kan sawi fak thei em? Thei lo. Amaherawhchu, Dinhmun hlauhawm tak pumpelhtu mi pakhat chuan a chungchângah Jehova a inrawlh ngei niin a hre thei a. Mi dangte thiltawn va âwihsak loh chu a chapothlâk ang. Chutih rual chuan, Nazi hun laia mi angin Kristian mi rinawm tam takte chu tihduhdahna avângin an thi a ni tih kan pawm ngei tûr a ni. Mi dangte erawh chu thil râpthlâk takte avângin an thi hlawm bawk. (Thur. 9:11) Hetiang hian kan inzâwt thei ang, ‘A hun lo taka thi ta mi rinawmte tân Jehova chu “Chhanhimtu” a ni ve lo vem ni?’ tiin. Chu chu thil dik a ni thei lo.

10, 11. Engvângin nge mihring hian thi lo tûrin tih theih rêng a neih loh va, mahse, Jehova chuan eng nge a tih theih?

¹⁰ Hei hi han ngaihtuah teh: Mihringte thlân pângngai sawina Hades, a nih loh leh “Sheol kut aṭanga a nunna chhanhim tûr” mihring tumah an awm loh avângin, thi lo tûra tih theih nei rêng an awm lo, tih hi. (Sâm 89:48) Mahse, Jehova chungchâng hi eng nge ni? Nazi nghaisakna aṭanga dam khawchhuak unaunu pakhat chuan Thuhretu a nu thusawi: “Thihnain mihringte hi chatuanin kawl reng dâwn ta sela chuan, Pathian aiin a chak zâwk tihna a ni dâwn lâwm ni?” tih chu a hre chhuak a. Chu chu concentration camp-a hmangaih takte chânna chungchânga amah a hnemna a ni. Thihna chuan thil engkimtithei, nunna tuikhur Awmna Jehova chu a ngam lo tih a chiang hle mai! (Sâm 36:⁠9) Sheol, a nih loh leh Hades-a awm zawng zawngte chu Jehova hriatrengnaah an awm a, ani chuan an zâin a chhanhim ngei ang.​—⁠Lk. 20:​37, 38; Thup. 20:​11-14.

¹¹ Chu mi hun a thlen hma loh chuan, Jehova chuan tûn laia amah betu rinawmte chu a ngaihsak tlat a ni. Tûnah chuan kan tâna “Chhanhimtu” Pathian a nih dân kawng thum chu i lo ngaihtuah ang u.

Thlarau Lama Vênhimna

12, 13. Engvângin nge thlarau lama vênhimna chu thil pawimawh ber a nih a, chu chu Jehova’n engtin nge min pêk?

¹² Jehova chuan a pawimawh ber thlarau lama vênhimna min pe a. Kristian dik kan nih  angin, tûna kan nun aia thil hlu zâwk a awm tih kan hre thiam a ni. Kan thil neih hlu ber chu Jehova nêna a mi mala kan inlaichînna hi a ni. (Sâm 25:14; 63:⁠3) Chu inlaichînna tel lo chuan, tûna kan nun hian awmzia a nei meuh lo vang a, nakin nun beiseina pawh kan hloh vang.

¹³ Jehova’n amah nêna inlaichînna ṭha tak neih nâna ṭanpuina kan mamawh zawng zawng min pêk avângin kan lâwm hle. Min ṭanpui tûrin a Thu, a thlarau thianghlim, leh khawvêl puma a kohhran chu kan nei a ni. Hêng thilte hi engtin nge kan hman ṭangkai vek theih ang? Taima tak leh hunbi nei thlapa Bible zirna chuan kan rinna leh beiseina a tinghet ang. (Rom 15:⁠4) A thlarau thianghlim dîla tih tak zeta kan ṭawngṭai chuan Jehova chuan amah nêna kan inlaichînna tichhe thei nungchangte do tûrin min ṭanpui ang. (Lk. 11:13) Bible ṭanchhan thu leh hla chhuahte leh inkhâwm te, inkhâwmpui te kal tlanga pêk bâwih pâwl kaihhruainate kan zawm chuan “a hun apianga” thlarau lam chawa châwm kan ni ang. (Mt. 24:45) Chutiang châwmna chuan thlarau lamah min vênghimin, Pathian hnaiha awm reng tûrin min ṭanpui a ni.​—⁠Jak. 4:⁠8.

14. Thlarau lama vênhimna târ langtu thiltawn pakhat sawi rawh.

¹⁴ Chutiang thlarau lama vênhimna entîrna atân chuan thuziak hmasaa nupa tuak khat chanchin kan sawi kha lo hre chhuak leh ta ila. An fanu Theresa-i a bo thu an hriat hnu ni rei lo têah chuan thah a nih thu thin tiṭhâwng tak chu an dawng a ni. * An pa ber chuan heti hian a sawi: “Kan zinsan hmain Jehova vênhimna ka dîlsak a. A ruang chhar a han nih tâkah chuan, ka ṭawngṭaina chhân a nih loh chhan ngaihtuahin a tîrah chuan ka buai rilru hle tih ka pha lo. Jehova chuan a mite chu a mi mal takin mak tak maia vênhimna a tiam lo tih zawng ka hre ngei mai. Hriatthiamna dîlin ka ṭawngṭai chhunzawm zêl a. Jehova chuan a mite chu amah nêna kan inlaichînna vênhim nâna kan thil mamawh tak chu min pein, thlarau lamah min vênghim a ni tih hriatna chuan min thlamuan a. Chutiang vênhimna chuan kan chatuan nun a khawih theih avângin, chu chu vênhimna azawnga pawimawh ber a ni. Chutiang zâwng chuan, Jehova chuan Theresa-i chu a vênghim ngei a ni; a thih thlengin a rawng rinawm takin a bâwl si a. A nakin nun beiseina chu hmangaihna Pathian kutah a awm tih ka hriat avângin thlamuanna ka nei,” tiin.

Dam Loh Laia Pathian Chhawmdâwlna

15. Nasa taka kan dam loh laiin eng kawngin nge Jehova chuan min ṭanpui mai theih?

¹⁵ Jehova chuan Davida a chhawmdâwl angin kan “chauhna mut hmunah” chuan min chhawmdâwl ve thei a ni. (Sâm 41:⁠3) Ani chuan kan tûn lai hunah hian mak taka tihdamna hmangin min chhan chhuak lo mah se, min ṭanpui tih a chiang hle. Engtin nge? Bible-a thu bul kan hmuhte chuan inenkawlna leh thil dangte chungchângah thu tlûkna fing siam tûrin min ṭanpui thei a ni. (Thuf. 2:⁠6) Dam lohna engemaw ber chungchâng sawihona Vênnainsâng leh Awake! thuziakte aṭangin rawtna leh thu ṭangkai tak takte kan hmu thei a. Jehova chuan kan chungah eng pawh lo thleng se, kan dinhmun hmachhawn thei tûr leh rinawmna vawng thei tûra kan mamawh ‘thiltihtheihna nasa tak’ chu a thlarau hmangin min pe thei bawk. (2 Kor. 4:⁠7) Chutiang ṭanpuina nên chuan, Pathian nêna kan inlaichînna aia kan natna ngaih pawimawh zâwkna chu kan pumpelh thei a ni.

16. Engtin nge unaupa pakhat chuan dam lohna a hmachhawn?

¹⁶ Thuziak hmasa ṭan tîr lama kan sawi tâk unaupa pakhat chungchâng kha lo ngaihtuah leh ta ila. Kum 1998 khân, natna chi khat tihrâwl rona, ALS an tih chu a vei tih hmuh chhuah a ni a, chu chuan a tâwpah a taksa pumin a ti zeng ta a ni. * Engtin nge a natna chu a hmachhawn theih? Ani chuan: “Thihna chu ka  tâna tlân chhuahna kawng awmchhun nia ka han hriat chhuah châng chuan, ka rilru a nain, ka bei a dawng hle a. Tuar thei tawh lova ka inhriat apiangin, Jehova hnênah thil pathum; rilrua thlamuanna te, dawhtheihna te, leh chhelna te ka dîl ṭhîn. Jehova chuan ka ṭawngṭainate a chhâng niin ka hria. Rilrua thlamuanna chuan khawvêl thar a lo thlen huna ka kal theih hun tûr te, chaw tuihnai tak ka ei theih hun tûr te, leh ka chhûngte ka biak theih hun tûr te min ngaihtuahtîr a. Dawhtheihna chuan ka zeng avânga remchân lohna leh harsatnate tuar thei tûrin min ṭanpui a ni. Chhelna chuan rinawm tûr leh thlarau lama inbûk tâwkna hloh lo tûrin min ṭanpui a. Jehova chuan ka chauhna mut hmuna min tichaka ka hriat avângin fakna hla phuahtu Davida rilru chu ka ṭâwmpui thei tak zet a ni,” tiin a sawi.​—⁠Is. 35:​5, 6.

Mamawh Châkkhai Pêkna

17. Jehova’n eng nge tihsak min tiam a, chu thutiam chu eng tihna nge?

¹⁷ Jehova chuan tisa lam mamawh pêk min tiam a. (Matthaia 6:​33, 34 leh Hebrai 13:​5, 6 chhiar rawh.) Chu chu kan tisa lam mamawh mak tak maia pêk kan beisei tihna emaw, hna thawk lovin kan awm tûr tihna emaw a ni lo. (2 Thes. 3:10) Chu thutiam awmzia chu, kan nuna Pathian Ram kan zawn hmasak a, kan nî tin ei tûr zawnga hna thawh kan inhuam bawk chuan nun atâna kan mamawhte min pe tûrin Jehova kan rinchhan thei tihna a ni. (1 Thes. 4:​11, 12; 1 Tim. 5:⁠8) Ani chuan kan beisei loh lam tak aṭangin kan mamawh chu min pe thei a, chu chu unaute kal tlanga ṭanpuina emaw, hna thawh tûr emaw pêkna pawh a ni thei.

18. Mamawh huna ṭanpui kan nih theih dân târ langtu thiltawn pakhat sawi rawh.

¹⁸ Thuziak hmasa inṭanna lama nu mal ṭan chanchin kan sawi tâk kha han ngaihtuah leh ta ila. A fanu nêna hmun danga an han pêm chuan, hna thawh tûr hmuh harsa a ti hle a. Ani chuan: “Zîng lamah in tin ka kal a, chawhnu lamah hna zawngin ka chhuak ṭhîn a ni. Bâwnghnute lei tûra ka kal chhuah ni chu ka theihnghilh thei ngai hauh lo vang. An thlai zawrh laite chu ding meuhvin ka en a; mahse, leina tûr pawisa ka nei dêr si lo. Khatiang khân ka la lunghnual ngai lo rêng rêng. Ina ka’n haw chuan, choka lama kan bathlârah thlai chi hrang hranga khat ip engemaw zât a lo inhûng thluah mai a. Kan nufa tâna a thla têl kan rin tham zet a ni lehnghâl. Ka tihngaihna hre lo chu ka ṭap chhuak ta ringawt a, Jehova hnênah lâwmthu ka hrilh ta mawlh mawlh mai a ni,” tiin a sawi. He unaunu hian chûng thlai awmna ip lo dahtu chu a huana thlai chîngtu kohhrana unaupa pakhat a ni tih a hre ta thuai a. A hnuah: “Kha mi ni khân i chunga ka lâwm êm êm bâkah, a hmangaihna min hriatnawntîr nâna i ngilneihna hmangtu Jehova hnênah pawh lâwmthu ka sawi mawlh mawlh bawk a ni,” tiin chu unaupa chu lehkha a thawn a ni.​—⁠Thuf. 19:⁠17.

19. Hrehawm nasa takah Jehova chhiahhlawhte chuan eng rin tlatna nge an neih ang a, tûnah hian eng nge tih kan tum tlat ang?

¹⁹ Bible hun lai leh tûn lai huna Jehova thiltihte chuan min Ṭanpuitu anga amah kan rin nachhan tûr min pe a ni. Nakin lawka Setana khawvêl chunga hrehawm nasa tak a lo thlen hunah chuan Jehova ṭanpuina chu tûn hma zawng aia nasain kan mamawh ang a. Mahse, Jehova chhiahhlawhte chuan amah chu an ring tlat thei ang. An chhan chhuahna a hnai a ni tih hriain, hlim takin an hawi chhuak dâwn a ni. (Lk. 21:28) Chu mi hun a lo thlen hma chuan, kan chungah fiahna eng pawh lo thleng se, kan Pathian inthlâk danglam ngai lo, Jehova chu min “Chhanhimtu” a ni ngei tih ring tlat chungin amah rinchhan chu i tum tlat ang u.  (w08 9/15)

[Footnote-te]

Kan Hre Chhuak Em?

• Engtin nge Jehova chuan a hun lo taka thite a chhanhim theih?

• Engvângin nge thlarau lama vênhimna chu thil pawimawh ber a nih?

• Tisa lam mamawh min pe tûra Jehova thutiam awmzia chu eng nge ni?

[Zirlai Atâna Zawhnate]