Lei Paradis Kan Hma Lawkah A awm!

“Kan Pa vâna mi, i hming zahawm rawh se. I ram lo thleng rawh se, i duhzâwng vâna an tih angin leia mi’n ti rawh se.” ​—⁠Matthaia 6:​9, 10.

LAL Ṭawngṭaina tia hriat he ṭawngṭaina lâr tak hian mihringte tân beisei tûr a pe a ni. Engtin nge a pêk?

Lal Ṭawngṭainain a târ lan angin, Pathian Ram chuan vâna Pathian duhzâwng tih a nih mêk angin, leiah pawh a tihtîr dâwn a. Tin, Paradis din thar leh chu Pathian duhzâwng a ni. (Thu Puan 21:​1-5) Pathian Ram chu eng nge a nih chiah a, engtin nge leiah Paradis a rawn din thar leh ang?

Sawrkâr Dik Tak

Pathian Ram chu sawrkâr dik tak a ni a. Eng ang sawrkâr pawh siam tûr chuan, a awptu te, dân te, leh khua leh tuite an awm a ngai a ni. Pathian Ram chuan chûng thil ngaite chu a nei kim vek em? Bible-in a hnuaia zawhna pathumte a chhân dân hi lo chhinchhiah ang che:

Pathian Rama rorêltute chu tute nge? (Isaia 33:22) Pathian Jehova chuan chu Ramah chuan a Fapa, Isua Krista chu hotuah a ruat a. (Matthaia 28:18) Jehova kaihhruaina hnuaiah Isua chuan tiam chin neiin “chi tina mi te, ṭawng tina mi te, mi tina mi te, hnam tina mi te” chu amah nêna ‘leia rorêl tûrin’ a thlang a ni.​—⁠Thu Puan 5:​9, 10.

Pathian Ram chuan eng dânte nge a khua leh tuite zawm atân a zam? Dân emaw, thupêk emaw ṭhenkhat chuan khua leh tuite hnênah thil engemaw an tih a phût ṭhîn a. Isua chuan chûng dânte zînga a pawimawh ber chu: “Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni. Chu chu thu pêk ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi,” tia sawiin a târ lang a ni.​—⁠Matthaia 22:​37-39.

 Dân dangte chuan Pathian Ram khua leh tuite hnênah an tih loh tûrte a târ lang thung a. Entîr nân, Bible chuan: “Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte emaw, rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang,” tiin chiang takin a sawi a ni.​—⁠1 Korinth 6:​9, 10.

Tute nge Pathian Ram khua leh tuite chu? Isua chuan Pathian Ram khua leh tuite chu berâm nên a tehkhin a. Heti hian a sawi: “Berâm dang ka nei . . . ka aw pawh an hria ang; chutichuan pâwl khatin an awm ang a, vêngtu pakhat nên,” tiin. (Johana 10:16) Pathian Ram khua leh tui ni tûrin mi chuan Berâm Vêngtu Ṭha Isua a zui thu sawi mai lovin, a thupêkte a zâwm bawk tûr a ni. Isua chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang,” tiin a sawi.​—⁠Matthaia 7:⁠21.

Chuvângin, Pathian Ram khua leh tuite chuan Isua ang bawkin Pathian hming, Jehova chu an lamin, an chawimawi bawk a. (Johana 17:26) Anni chuan “he ram chanchin ṭha hi” hril tûra Isua thupêk chu an zâwm bawk. (Matthaia 24:14; 28:​19, 20) Tin, hmangaihna dik tak an inlantîr tawn bawk a ni.​—⁠Johana 13:⁠35.

‘Lei Tichhetute Tihchhiatna’

Tûn laia khawvêl dinhmunte hian Pathian Ramin leiah hian inthlâkthlengna nasa tak a rawn thlentîr thuai dâwn a ni tih a entîr a. Chu chu engtin nge kan hriat? Kum sânghnih liamtaah khân Isua chuan “Pathian ram a lo hnai tawh” tih târ langtu pêng tam tak nei chhinchhiahna hlâwm khat a lo sawi tawh a. (Luka 21:31) Thuziak hmasa lama târ lan tawh ang khân, tûnah chuan chûng chhinchhiahna hmêl hmangte chu khawvêl pum puiah a lang chiang tawh hle a ni.

A dawtah eng nge lo thleng ang? Isua chuan: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” tiin a chhâng a ni. (Matthaia 24:21) Hei hi mihringte thlentîr chhiatna a ni lo. “Lei tichhetute tihchhiat ve thung” nâna Pathian thiltih a ni zâwk. (Thu Puan 11:18) Mahni hmasialna avânga lei tichhe ṭêp tawh mi suaksualte chu “leilung ata tihboral an ni ang.” Pathian pawm tlâka a rawngbâwltu mi ṭha famkimte chu “chutah chuan an awm reng” dâwn a ni.​—⁠Thufingte 2:​21, 22.

Pathian Jehova chuan chutiang thil tih rup nachhan tûr ṭha tak chu a nei a. Engvângin nge? He entîrna hi ngaihtuah teh: In luah tûr nei ṭeuh angah han inchan ta la. I in luahtu ṭhenkhatte chu an hawih hâwmin an ṭha hle a; an in luah mante chu pein, an enkawl ṭha hle a ni. Amaherawhchu, i in luahtu dangte chu buaina siam hmang leh mahni hmasial tak an ni a; in luah mante pe duh lovin, an enkawl ṭha lo hle thung. Chutianga awm lo tûra hriattîr an ni fo chung pawhin, an sim duh chuang lo. Eng nge i tih tâk ang? A neitu i nih angin, chûng in luahtu ṭha lote chu i hnawt chhuak ngei ang.

Chutiang bawkin, Pathian Jehova chuan lei leh a chhûnga awmte Siamtu a nih angin, lei luah tûrte thlang tûr chuan dikna a nei a. (Thu Puan 4:11) Jehova chuan a duhzâwng ngaihthahtute leh mi dangte dikna neih tibuaitu mi suaksualte he lei ata tihboral chu a thiltum a nih thu a sawi a ni.​—⁠Sâm 37:​9-11.

Paradis Din Thar

Isua Krista kut hnuaia awm Pathian Ram chuan lei chungah ro a rêl thuai dâwn. Isua’n he inṭanna thar hi ‘engkim siamtharna’ tiin a ko va. (Matthaia 19:28) Eng ang dinhmun nge lo thleng ang? A hnuaia Bible thu tiamte hi chhinchhiah ang che:

Sâm 46:⁠9. “Ani chuan indonate chu kâwlkil thlengin a tireh ṭhîn.”

 Isaia 35:⁠1. “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”

Isaia 65:​21-23. “Ka mi thlante chu rei tak an thawh chhuah chungah chuan an lâwm dâwn a ni. Athlâwnin an thawk rim lo vang a, vânduaina mai tûrin fa an hring hek lo vang.”

Johana 5:​28, 29. “A hun a thleng dâwn ta, chutih hunah chuan thlâna awm zawng zawngin [Isua] aw an hria ang a, an chhuak vek ang.”

Thu Puan 21:⁠4. “An mit ata mittui zawng zawng [Pathianin] a hrufai ang a; thihna awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”

Kan Rin Theih Chhan

Bible thutiamte chu i ring em? Bible chuan mi tam takin an rin loh tûr thu a sawi a. Heti hian a sawi: “Ni hnuhnûngahte chuan nuihsantute chu anmahni châkna anga awmin, nuihsan chungin an lo kal ang a, ‘A lo kal lehna thutiam chu khawiah nge? Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,’ an la ti ang,” tiin. (2 Petera 3:​3, 4) Mahse, chutianga nuihsantute chuan thil tihsual lian tak an nei a ni. Bible sawi i rin theih chhan pali chauh lo ngaihtuah ta ila:

(1) Hun kal tawhah Pathian chu lei chungchângah a lo inrawlh tawh a. Nova dam laia Tuilêt chu entîrna langsâr tak a ni.​—⁠2 Petera 3:​5-7.

(2) Pathian Thu chuan tûn laia khawvêl pum huap dinhmun chu dik takin a sawi lâwk.

(3) Thil engkim hi ‘siam tirh aṭangin a awm pângngai angin a awm zêl’ lo. Kan lei hian tûn hma zawng aia nasain khawtlâng lam te, nungchang lam te, leh chhehvêl boruak lamah te chhiatna a tâwk a ni.

(4) “Ram chanchin ṭha” hi leilung tluan chhuaka hrilh a ni mêk a, chu chuan “tâwpna” a hnai tawh hle tih a târ lang a ni.​—⁠Matthaia 24:⁠14.

Jehova Thuhretute chuan Pathian Ram rorêlna hnuaia chatuana nunna chungchâng i hriat belh theih nân an hnêna Pathian Thu, Bible zir tûrin an sâwm che a ni. (Johana 17:⁠3) Ni e, hma lam hun duhawm takin mihringte hi a hmuak a. Chu hun chu a lo thleng thuai dâwn! Chu hma lam hun duhawm tak chu i tân a ni ve em? (w08 8/1)

[Phêk 7-naa thu lâk chhuah]

Thil a awm pângngai angin a awm reng dâwn titute chuan thil tihsual lian tak an nei

[Phêk 8-naa milem]

Hma lam hun duhawm tak chu i tân a ni ve em?