Tuna Hun Khirh Takte

BIBLE chuan mihringte’n “hun khirh takte” an tawn tûr thu a lo sawi lâwk a. Chu hun chu ‘ni hnuhnûng’ angin a sawi a ni. (2 Timothea 3:​1-5; 2 Petera 3:​3-7) Isua Krista chuan a zirtîrte’n “khawvêl tâwpna” chungchâng an zawhna a chhân lai khân he hun bawk hi a sawi a. (Matthaia 24:⁠3) Tûnah hian he ni hnuhnûng chhûngah kan awm mêk em? Bible sawi lâwk leh tûn hnaia thilthlengte hi khaikhin la, chu mi hnuah nangmah ngeiin thutlûkna siam ang che.

Bible sawi lâwk: khawvêl puma indona​—⁠Luka 21:10; Thu Puan 6:⁠4.

Tûn hnaia thilthleng: “Kum zabi 20-naa indona leh a kaihhnawih thil avânga mitthi zât chu, Krista pian hun aṭanga inṭan a hma kum zabi zawng zawnga thi zât belhkhâwm aiin a lêt thumin a tam zâwk a ni.​—⁠Worldwatch Institute.

Bible sawi lâwk: ṭâmna leh natna​—⁠Luka 21:11; Thu Puan 6:5–8.

Tûn hnaia thilthleng: Kum 2004 khân leia mi maktaduai 863 laiin ei tûr ṭha an hmu lo anga chhût a ni a, chu chu kum 2003 aiin maktaduai 7-in a pung tihna a ni.​—⁠United Nations Food and Agriculture Organization.

Mi tlûklehdingâwn khat vêl lai chu khawpuia vêng ṭawp lai leh michhe vêngah chuan an chêng a; vaibêlchhetak 26-te chuan inthiarna leh bawlhhlawh paihna ṭha an nei lo va; vaibêlchhetak 11-te chuan tui in tûr thianghlim an nei lo bawk.​—⁠Worldwatch Institute.

Kum 2005 khân mi maktaduai 500-te chuan malaria an vei a; maktaduai 40-te chuan HIV-AIDS natna an vei a; nuai 16-te chu T.B. natna avângin an thi hial a ni.​—⁠World Health Organization.

Bible sawi lâwk: lei tihchhiatna​—⁠Thu Puan 11:⁠18.

Tûn hnaia thilthleng: “Mihring thiltihte avângin ramsa leh thlai chi hrang hrang tam takte tihmangna a thleng ṭêp tawh a.” “Nunna châwm nâna leilung hna thawh ṭhin hmun thuma ṭhena hmun hnih vêl chu khawvêl  pumah a tla hniam tih hmuh chhuah a ni.”​—⁠Millennium Ecosystem Assessment.

“Mihringte thiltih avânga lo awm boruak chhiate chuan Leilung sik leh sa chu nasa takin a khawih pawi ṭêp tawh a, chu chu lei atân thil hlauhawm tak a ni ang.”​—⁠NASA, Goddard Institute for Space Studies.

Bible sawi lâwk: Pathian Ram chanchin ṭha lei pum puia hrilh chhuah​—⁠Matthaia 24:14; Thu Puan 14:​6, 7.

Tûn hnaia thilthleng: Kum 2007 chhûng khân Jehova Thuhretu 69,57,854 te chuan ram 236-ah Pathian Ram chanchin ṭha hrilh nân dârkâr vaibêlchhetak 14 lai an hmang a ni.​—⁠2008 Yearbook of Jehovah’s Witnesses.

A chunga kan hmuh tâk angin Bible chuan chanchin ṭha lo tam tak kârah thil a êng zâwnga thlîr chhan tûr a awm thu a sawi lâwk a. Isua chuan Pathian Ram “chanchin ṭha” chungchâng a sawi a ni. Chu Pathian Ram chu eng nge ni? Engvângin nge chu chuan mihringte hnênah hma lam hun ṭha zâwk beiseina a pêk? Engtin nge Pathian Ram chuan a nghawng ang che? (w08 8/1)

[Phêk 5-naa thu lâk chhuah]

Bible chuan tûn laia khawvêl awm dân kan hmuhte hi a sawi lâwk