Chatuan Nunna Atân Eng Nge Pêk I Inhuam?
Chatuan Nunna Atân Eng Nge Pêk I Inhuam?
“Miin a nun aiah engnge a pêk ang?”—MT. 16:26.
1. Engvângin nge Isua chuan Petera zilhna chu a hnâwl?
TIRHKOH Petera chuan a ngainat êm êm an Hruaitu, Isua Krista’n nakin lawka hrehawm tuara a thih tûr thu ‘chiang taka’ a sawi a han hriat chuan mak a ti ngei mai! Ani chuan duhsakna rilru a pu a ni tih hriat takin, Isua chu: “Lalpa, Pathianin khawngaih che rawh se; chûng chu i chungah a thleng tawp lo vang,” tiin a zilh a. Zirtîr dangte pawhin a ngaih dân chu an ṭâwmpui ve a rinawm hle a ni. Isua’n Petera chu hnuchhawn a, a zirtîr dangte lam hawi pahin Petera hnênah: “Setan, ka hnungah kal rawh; ka tân tlûkna i ni e; Pathian thilte ngaihtuah lovin mihring thilte i ngaihtuah zâwk a nih hi,” a ti a.—Mk. 8:32, 33; Mt. 16:21-23.
2. Engtin nge Isua chuan zirtîr dik takte laka thil beisei chu a sawi?
2 Isua thu sawi belhte chuan Petera chu a zilhna thu Isua’n a hnâwl ṭhak chhan hre thiam tûrin a ṭanpui thei ngei ang. Isua chuan “mipuiho chu a zirtîrte nên a ko va,” an hnênah chuan: “Tupawhin mi zui a duh chuan, mahni hrehawm pawisa lovin, a [nghaisakna ban] puin mi zui rawh se. Tupawh a nun humhim duh apiangin a chân ang a; tupawh keimah avâng leh chanchin ṭha avânga a nun chân apiangin a humhim ang,” a ti a ni. (Mk. 8:34, 35) Isua chuan a nun chu inthawina atân a pe ṭêp tawh mai ni lovin, amah zuitute pawhin Pathian rawngbâwlnaa an nun pe tûra inpeih tûrin a beisei tih a chiang hle. Chutianga an nun an pêk chuan, lâwmman ropui tak an dawng ang.—Matthaia 16:27 chhiar rawh.
3. (a) Isua’n a thu ngaithlatute hnênah eng zawhna nge a zawh? (b) Isua zawhna pahnihna chuan a thu ngaithlatute chu eng nge a hriat chhuahtîr mai theih?
3 Chu mi ṭumah vêk chuan, Isua’n zawhna rilru la tak pahnih a zâwt a ni: “Miin khawvêl hi apumin nei sela, a nun chân si sela a tân engnge sâwt ang? Miin a nun aiah engnge a pêk theih ang?” tiin. (Mk. 8:36, 37) Zawhna hmasa zâwk chhânna chu mihringte tân thil hriatsa reng a ni a. Miin khawvêl pum pawh nei mah se, a nun a chân chuan chu chu a sâwtpui thei lo. Miin sum leh pai leh a thil neihte a chen theih chauhvin, chûng chu a tân a ṭangkai a ni. Isua zawhna pahnihna: “Miin a nun aiah engnge a pêk theih ang?” tih chuan a thusawi ngaithlatute chu Joba hun laia Setana puhna: “Miin a neih zawng zawng a nunna atân a pe phal ang chu!” tih chu a hriat chhuahtîr mai thei. (Job. 2:4) Jehova be lo mi ṭhenkhat tân chuan Setana thusawi chu a dik mai thei a. Mi tam takte chuan, an nun theih nân engpawh tiin eng thu bul pawh an phatsan ang. Mahse, Kristiante chuan thlîr dân dang daih an nei thung a ni.
4. Engvângin nge Isua zawhna chuan Kristiante tân awmze thûk zâwk a neih?
4 Isua leia lo kal chhan chu khawvêla hrisêlna, hausakna, leh dam reina te kan neih theih nân a ni lo. Khawvêl thara chatuana nun theihna hun remchâng min hawnsak tûra lo kal a ni a, chu beiseina chu kan hlut hle a ni. (Joh. 3:16) Kristian chuan Isua zawhna hmasa zâwk awmzia chu, “Miin khawvêl hi apumin nei sela, chatuana nun a beiseina chân si sela a tân engnge sâwt ang?” a tihna a ni tih a hre thiam ang. A chhânna chu, A sâwt lo rêng rêng, tih a ni. (1 Joh. 2:15-17) Isua zawhna a pahnihna chhâng tûra min ṭanpui tûrin, heti hian kan inzâwt tûr a ni, “Khawvêl thara chatuan nunna ka chan ngei theih nân tûnah hian eng anga inpêk nge ka inhuam?” tiin. Kan nun kawng hmanga chu zawhna kan chhân dân chuan, kan rilrua chu beiseina a nasat dân a târ lang a ni.—Johana 12:25 nên khaikhin rawh.
5. Engtin nge chatuan nunna thilthlâwnpêk chu kan neih theih ang?
5 Isua chuan chatuan nunna kan thawk chhuak thei a tihna erawh chu a ni lo ngei mai. He khawvêla rei lo te chhûng nunna pawh ni se, nunna hrim hrim hi thilthlâwnpêk a ni. Chu chu kan lei theih a ni lo va, dawng thei tûr pawhin tih theih engmah kan nei lo. Chatuan nunna thilthlâwnpêk neih theih dân kawng awmchhun chu “zawngtute hnêna lâwmman pêk hmang” Jehova leh ‘Krista Isuaa rinna neih’ hi a ni a. (Heb. 11:6; Gal. 2:16) Nimahsela, ‘thiltih tel lo rinna chu a thih’ avângin, rinna chu thiltiha lantîr tûr a ni. (Jak. 2:26) Chuvângin, Isua zawhna kan han chhût ngun lehzual hian, he khawvêla chân kan inhuam zât leh kan rinna a nunzia lantîr nâna Jehova rawngbâwlnaa tih kan inhuam chin chu ngun takin kan ngaihtuah tûr a ni.
“Krista . . . Chuan Mahni Lâwmna A Zawng Si Lo”
6. Isua’n eng nge a ngaih pawimawh ber?
6 Isua chuan a hun laia khawvêlin a pêk theih thilte aiin, thil pawimawhte chu ngaihsak zâwkin mahni nawmsakna tûra thlêmna chu a hnâwl a ni. A nun chu mahni inpêkna leh Pathian thuâwihna nun a ni a. Mahni lâwmna zawn aiin, ‘Pathian thil lâwmzâwng apiang a ti fo’ zâwk a ni. (Joh. 8:29) Pathian tilâwm tûrin Isua chuan eng chena inpêk nge a inhuam?
7, 8. (a) Isua chu eng angin nge a inpêk a, eng ang lâwmman nge a dawn? (b) Eng zawhna nge kan inzawh ang?
7 Ṭum khat chu Isua chuan a zirtîrte hnênah: “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zawka a lo kal ang khân,” a ti a. (Mt. 20:28) A hmaa, Isua’n a zirtîrte hnêna ‘a nun a pêk’ dâwn tawh thu a hrilh khân, Petera chuan mahni inkhawngaih tûrin a fuih a ni. Chuti chung pawhin, Isua chu thlêm thlûkin a awm lo. A nun ṭha famkim chu mihringte tân inhuam takin a pe a. Mahni hmasial lo a nun kawng avângin, Isua nakin hun tûr chu a him a ni. Ani chu kaihthawh a ni a, ‘Pathian kut ding lama chawimawia a awm’ avângin. (Tirh. 2:32, 33) Chutiang chuan kan tân entawn tûr ropui tak a lo ni ta a ni.
8 Tirhkoh Paula chuan Rom khuaa Kristiante chu ‘mahni lâwmna zawng lo’ tûra fuihin, “Krista pawh chuan mahni lâwmna a zawng . . . lo” tih a hriat nawntîr a ni. (Rom 15:1-3) Chutiang a nih chuan, Paula fuihna thu chu eng chenin nge kan nunpui ang a, Krista entawnin eng chena inpêk nge kan inhuam?
Jehova Chuan A Ṭha Ber Kan Pêk A Duh
9. Kristianin Pathian hnêna a inpumpêk hian, a nihna takah chuan eng nge a tih?
9 Hmân lai Israel ramah, Mosia Dân chuan Hebrai bâwihte chu sal an nih a kum sarihnaah emaw, Jubili kumah emaw chuan chhuah zalên tûrin a phût a. Nimahsela, duh thlan tûr dang an nei. Bâwih chuan a pu a ngainat chuan, a dam chhûng zawngin a pu ina bâwih anga awm chu a thlang thei a ni. (Deuteronomy 15:12, 16, 17 chhiar rawh.) Pathian hnêna kan in pumpêk khân chutiang bawk duhthlanna kan siam a. Mahni rilru duhzâwng zui lo va, Pathian duhzâwng tih chu mahni duh thuin kan pawm a ni. Chutianga tiin, Jehova kan hmangaihna nasa tak leh chatuana a rawngbâwl kan duhzia kan lantîr a ni.
10. Eng kawngin nge Pathian ta kan nih a, chu chuan kan ngaihtuahna leh thiltih chu engtin nge a thunun ang?
10 Jehova Thuhretute hnênah Bible i zir mêk emaw, chanchin ṭha hrilhnaah i tel emaw, a nih loh leh Kristian inkhâwmnaah i tel emaw a nih chuan, fak tlâk i ni. Jehova hnêna inpumpêk thuai tûra chêttîra i awm kan beisei a, Ethiopia mi lianin Philipa hnêna zawhna a siam: “Baptisma channa tûr engin nge mi dâl kher?” tih chu i zawh ve ngei kan beisei bawk. (Tirh. 8:35, 36) Chutih hunah chuan, Pathian nêna in inlaichînna chu Paula’n: “Mahni ta . . . in ni lo va, mana lei in ni tawh asin,” tia lehkha a thawn Kristiante neih inlaichînna ang a ni tawh ang. (1 Kor. 6:19, 20) Kan beiseina chu vân lam emaw, lei lam emaw pawh ni se, Jehova hnêna kan inpumpêk tawh phawt chuan, a ta kan ni. Chutiang a nih chuan, mahni hmasial taka châkna kan neihte thunun tlat leh ‘mihring bâwiha luh tawh loh’ chu a va pawimawh tak êm! (1 Kor. 7:23) Jehova chhiahhlawh rinawm tak leh a duh ang anga min hman theih nih chu chanvo hlu a va ni êm!
11. Eng inthâwina nge Kristiante chu hlân tûra tih an nih a, Mosia Dân hnuaia inthâwinain a entîr angin, chu mi awmze dik tak chu eng nge ni?
11 Paula chuan a rinpuite chu: “Inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u,” tiin a fuih a. (Rom 12:1) Chûng thute chuan Juda mi Kristiante chu Isua hnungzuitu an lo nih hmaa Pathian biak nâna an hlan inthawinate chu a hriat chhuahtîr mai thei a ni. Anni chuan Mosia Dân hnuaia Jehova maichâma hlan rante chu a ṭha ber a ni tûr a ni tih an hre ngei ang a. Sawisêl kai engpawh chu pawm theih a ni lo. (Mal. 1:8, 13) Kan taksa chu “inthawina nung” anga kan hlan hian, chutiang bawkin sawisêl a kai tûr a ni lo. Jehova hnênah chuan kan duhzâwngte kan tih vek hnua a chuang bâng la awmte ni lovin, a ṭha ber kan pe a ni. Pathian hnêna kan inpumpêk hian, kan chakna te, kan sum leh pai leh thil neih te, leh kan theihna te pawh tiamin, kan “nun” chu kan pe pumhlûm a ni. (Kol. 3:23, 24) Chu chu engtin nge kan nunpui?
I Hun Fing Takin Hmang Rawh
12, 13. Jehova hnêna a ṭha ber kan pêk theih dân kawng khat chu eng nge ni?
12 Jehova hnêna a ṭha ber kan pêk theih dân kawng khat chu kan hun fing taka hman hi a ni a. (Ephesi 5:15, 16 chhiar rawh.) Chutianga ti tûr chuan mahni kan inthunun a ngai a ni. Khawvêl thununna leh kan rochun ṭhat famkim lohna chuan hun chu mahni hlimna leh mi mal hlâwkna atân chauhva hman duhna min neihtîr thei. Ni e, chawlh hahdamna nuam leh kan Kristian mawhphurhnate min hlentîr thei hnathawh pawh tiamin, “engkim tân hian hun ruat a awm” a ni. (Thur. 3:1) Mahse, inpumpêk tawh Kristian tân chuan inbûk tâwk taka awm leh hun fing taka hman chu a ngai a ni.
13 Paula’n Atheni khua a tlawh ṭum khân, “Atheni khuaa mi zawng zawng chu, an khuaa mikhual awmte pawh, an hman châng apiangin thu thar tawh phawt chu sawiin emaw, a ngaithla talin emaw an awm chawt ṭhîn rêng” a ni tih a hmu a. (Tirh. 17:21) Chutiang bawkin, tûn laiah mi tam takte chuan hun an khawh ral a ni. Tûn laia rilru kuaipêngtute zîngah chuan TV en te, video game khelh te, Internet khawih te a tel a. Rilru kuaipêngtu leh hun khawhralna thilte chu a tam tial tial a ni. Chûngte laka kan tlâwm chuan, kan thlarau lam mamawh kan ngaihthah thei a. “Thil ṭha bîkte,” a nih loh leh thil pawimawh zâwk, Jehova rawngbâwl nêna inkûngkaih thilte ti thei lo tûr khawpa buai lutuk angin kan lo inhre hial thei a ni.—Phil. 1:9-11.
14. Eng zawhnate’n nge ngun taka kan ngaihtuah phu?
14 Chuvângin, Jehova hnêna inpumpêk tawh a chhiahhlawh pakhat i nih angin heti hian inzâwt rawh, ‘Ka nî tin hun duanah hian Bible chhiar nân te, rilrua ngun taka chhût nân te, leh ṭawngṭai nân te hun ka duang tel em?’ tiin. (Sâm 77:12; 119; 1 Thes. 5:17) ‘Kristian inkhâwm atâna inbuatsaih nân hun ka insiam em? Inkhâwmnaah chhânnate pein mi dangte ka tichak em?’ (Sâm 122:1; Heb. 2:12) Pathian Thu chuan Paula leh a ṭhiante chu “Lalpaah huai taka thu sawiin . . . rei fe an awm,” a ti. (Tirh. 14:3) Pioneer ang emawa thu hrilh rawngbâwlnaa hun tam zâwk, a nih loh leh “rei fe” i tel theih nân, i dinhmun chu i siam rem thei ang em?—Hebrai 13:15 chhiar rawh.
15. Engtin nge upate chuan an hun fing taka an hman?
15 Tirhkoh Paula leh mi rinawm dangte’n Antiokei khua an tlawh khân, chuta mite fuih nân “rei fe an awm” a. (Tirh. 14:28) Hmangaihna nei tak upate pawhin tûn laiah mi dangte tihchak nân hun tam tak an hmang a ni. An thlawhhma rawngbâwlna bâkah, upate chuan berâmte vêngin, berâm bote zawngin, dam lote ṭanpuiin, leh kohhrana mawhphurhna dang tam takte chu enkawlin an thawk rim a ni. Baptisma chang unaupa i nih chuan, hêng mawhphurhnate chang ve thei tûra ṭan la tûrin i dinhmun hian a zir em?
16. ‘Rinna chhûngte zînga mi chunga thil ṭha kan tih deuh ber’ theih dân kawng ṭhenkhat chu eng nge ni?
16 Mi tam takte chuan leilung chhiatna emaw, mihringte avânga chhiatna thleng dangte emaw avânga tuarte ṭanpuina aṭangin hlimna an hmu a. Entîr nân, Bethel-a rawngbâwl kum 60 pêl tawh unaunu pakhat chu, chutiang chhiatna tâwkte ṭanpui tûrin vawi tam tak, ram hla tak takah a zin chhuak a. Engvângin nge a chawlh neihte chu chutianga a hman? Ani chuan heti hian a sawi: “Themthiamna nei lêm lo mah i la, a ṭûl ang ang thawh chu chanvo hlu tak a ni a. An thil neihte nasa taka chântu kan unaute rinna chak tak ka han hmuh hian nasa takin chakna ka dawng ve a ni,” tiin. Chu bâkah, khawvêl puma mi sâng têlte chuan Kingdom Hall leh Assembly Hall te an sakpui a ni. Chutiang thiltiha telin, mahni hmasial lo takin ‘rinna chhûngte zînga mi chungah thil ṭha kan ti deuh ber a ni.’—Gal. 6:10.
“Kei Kumkhuain . . . In hnênah Ka Awm Zêl Ang”
17. Chatuana nunna atân a mi mal takin eng nge i pêk phal?
17 Pathian laka inla hrang mihringte chu an boral ṭêp tawh a. Chu mi a lo thlen hun tûr chiah chu kan hre lo. Mahse, “hun hi tihtawin a awm” tih leh “he khawvêl awm dân hi a boral mêk” tih erawh kan hria a ni. (1 Korinth 7:29-31 chhiar rawh.) Chu chuan Isua zawhna siam: “Miin a nun aiah engnge a pêk ang?” tih chu awmzia a neihtîr lehzual a ni. “Nunna taktak” kan neih theih nân Jehova thil min phût apiang chu kan ti ngei ang. (1 Tim. 6:19) Isua’n amah ‘zui zêl’ tûr leh ‘lalram zawng hmasa zâwk’ tûra min fuihna zawm chu a pawimawh tak zet a ni.—Mt. 6:31-33; 24:13.
18. Eng nge kan rin tlat theih a, engvângin nge?
18 Isua zui chu thil awlsam tak a ni reng lo va, Isua vaukhân lâwk ang ngeiin, ṭhenkhat chuan he khawvêlah hian an nunna pawh an chân hial a ni. Mahse, Isua ang bawkin ‘mahni inkhawngaih’ tûra thlêmna chu kan pumpelh a. Kum zabi khatnaa hriak thih a hnungzuitute hnêna a thutiam chu kan ring tlat a ni: “Ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tih chu. (Mt. 28:20) Chuti chu, kan hun leh kan thiamnate chu rawngbâwlna thianghlim atân a ṭangkai thei ang berin i hmang ang u. Chutianga kan tih chuan, hrehawm nasa taka min dam khawchhuahtîr tûr emaw, khawvêl thara min kaitho tûr emawa Jehova kan rin tlatzia kan lantîr a ni ang a. (Heb. 6:10) Chutiang chuan nunna thilthlâwnpêk kan hlutzia kan lantîr a ni ang. (w08 10/15)
Eng Nge Kan Chhânna Chu?
• Engtin nge Isua chuan Pathian leh mihringte rawngbâwlsak a inhuam nasatzia a lantîr?
• Engvângin nge mi chuan mahni inphatna a lantîr ang a, chu chu eng anga tih tûr nge?
• Hmân lai Israel ramah chuan, eng ang inthawina chauh nge Jehova pawm tlâk a nih a, chu chuan engtin nge tûn laiah min kaihhruai?
• Eng kawngtein nge kan hun chu fing taka kan hman theih?
[Zirlai Atâna Zawhnate]
[Phêk 28-naa milem]
Lâwm nachâng hria Israelte chuan biakna dik ṭanpui nân a ṭha ber an pe