I Pa Vâna Mi I Hria Em?

ENG angin nge i pa chu i hriat chian? He zawhna hi chhûngkaw inhmangaih taka seilian i nih chuan mak i ti mai thei. ‘Ka pa chu ka hre chiang ngei alâwm!’ tia i chhân a rinawm. Dik takin, mi tam zâwkte chuan pate duhzâwng leh duh lohzâwng chu an hria a, chhûngkua a ngaihsak dân pawh an hre bawk a ni.

Amaherawhchu, i pa mizia atâna i rin loh tak hmuh châng i nei mai thei. Entîr nân, fapa chuan rîkrum thil a lo thlen hma chuan a pa chu zai dam tak leh nunnêm tak niin a hre mai thei a. Thâwk leh khatah, a pa chu chhûngkaw humhimna kawnga mi tum ruh tak a ni tih a hmu a ni.

A nih leh eng angin nge min Siamtu chu i hriat chian ve le? A chungchângah: “Amah a vângin kan nung, kan che, kan awm a ni si a,” tia hrilhhriat kan ni. (Tirhkohte 17:28) Kan nunna chu Pathian min pêk a ni a; chutiang kawng chuan ani chu nunna nei zawng zawngte tân Pa a ni a. (Isaia 64:⁠8) Chu chu Pathian i lo thlîr ṭhin dân pawh a ni thei a, thil ṭha leh inâwm tak zawng a ni. Amaherawhchu, kan hlâwkpui atân leh kan hlimna atân a chanchin hriat tûr leh hmuh chhuah tûr tam tak a awm.

Leia i pa chunga i rilru put hmang leh amah i zahna chu amah i hriat chian dânah a innghat a. Chutiang bawkin, Pathian chu i hriat chian poh leh amah nêna in inlaichînna chu a nghet zual ang. Amah i hriat chian a, a duhzâwng tih dân i zir phawt chuan, nuna harsatna i tawhte chhel taka hmachhawn thei tûrin a ṭanpui ang che.

Pathian chu eng ang mi nge a nih? A miziate chuan a chunga i rilru put hmang chu engtin nge a nghawng ang? Amah i hriatna chuan mawhphurhna engemawte i chungah a nghat em? Hêng zawhnate chhânna hi a dawta thuziakah i hmu ang. (w08 9/1)

[Phêk 3-naa thu lâk chhuah]

Mi dangte i hriat chian dânin an chunga i rilru put hmang tûr a hril thei