Inchawimawi Tawnna Kawngah Hma I Hruai Em?
Inchawimawi Tawnna Kawngah Hma I Hruai Em?
“Inchawimawi tawnna kawngah chuan hma hruai ula.”—ROM 12:10, NW.
1. Khawvêl hmun tam takah eng nge hmuh a nih tawh loh?
KHAWVEL hmun ṭhenkhatah chuan, naupangte chuan upa zâwkte an zahna lantîr nân an awm tlân hunah an ṭhingṭhi ṭhîn a. Hetiang kawng hian, upa zâwkte aia sâng zâwkin an lang lo a ni. Chûng hmunahte chuan nupangte tâna upa zâwkte hnuchhawna awm chu zah lohna anga ngaih a ni bawk. Mi dangte zahna chu hnam hrang hrangte hian kawng chi hrang hrangin lantîr mah se, chutianga zahna lantîrna chuan Mosia Dân min hriat chhuahtîr a ni. Chutah chuan: “Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni,” tih thupêk a tel a ni. (Lev. 19:32) Lungchhiatthlâk takin, hmun tam takah chuan mi dangte zahna lantîra chawimawi chu hmuh a ni tawh lo. Tûn laiah chuan mi dangte zah lohna chu hmun tinah hmuh a ni tawh zâwk mah a ni.
2. Pathian Lehkha Thuin tute nge zah leh chawimawi tûra min hrilh?
2 Pathian Lehkha Thu chuan mi dangte zahna leh chawimawina chu a dah pawimawh hle a. Jehova leh Isua chu zah leh chawimawi tûrin min hrilh a ni. (Joh. 5:23) Kan chhûngte, kan rinpuite, leh kohhran pâwna mi ṭhenkhatte pawh zah leh chawimawi tûra tih kan ni bawk. (Rom 12:10; Eph. 6:1, 2; 1 Pet. 2:17) Jehova zahna kan lantîr dân kawng ṭhenkhat chu eng nge ni? Engtin nge kan Kristian unaute chungah chawimawina, a nih loh leh zahna thûk tak kan lantîr? Hêngte leh a kaihhnawih zawhna ṭhenkhat chu i lo ngaihtuahho vang u.
Jehova leh A Hming Chawimawi Rawh
3. Jehova chawimawi dân kawng pawimawh tak pakhat chu eng nge ni?
3 Jehova chawimawi dân kawng pawimawh tak pakhat chu a hming chunga zahna dik lantîr hi a ni. Tihah chuan “ama hming pu” kan ni si a. (Tirh. 15:14) Pathian engkimtithei, Jehova hming put chu chawimawina a ni ngei mai. Zâwlnei Mika chuan: “Hnam tinin mahni pathian ṭheuh an bia ang a; keini pawh LALPA kan Pathian chu kumkhuain kan bia ang,” a ti a. (Mik. 4:5) Kan put Jehova hming chawimawi thei tûrzâwnga nî tina nun tum tlatin, ‘LALPA kan Pathian chu kan bia’ a ni. Paula’n Rom khuaa Kristiante a hriat nawntîr angin, kan chanchin ṭha hrilh mila kan nun loh chuan, chu chuan Pathian a ‘tihmingchhiain,’ a zahawmna a tikiam a ni.—Rom 2:21-24.
4. Jehova chanchin hriattîr theihna chanvo chu engtin nge i thlîr?
4 Jehova chu kan thu hrilhna hmangin kan chawimawi bawk a. Tûn hma chuan, Jehova chuan Israel hnam zînga mite chu a thuhretute ni tûrin a ko va; mahse, an tlin si lo. (Is. 43:1-12) Anni chuan Jehova hnuchhawnin, “Israel-ho Mi Thianghlim chu an tivui ṭhîn.” (Sâm 78:40, 41) A tâwpah chuan, Jehova duhsakna chu an hloh ṭhak a ni. Mahse, tûn laia Jehova hming put theihna leh a hming hriattîr theihna chanvo kan neih avângin kan lâwm hle. Chu chu amah kan hmangaihna leh a hming tihthianghlim kan duh vânga ti kan ni. Kan Pa vâna mi chanchin leh a thiltum dik tak kan hriat avângin, engtin nge thu hril lova kan awm theih tehrêng ang? “Tihmâkmawh ka chungah a innghat a ni . . . chanchin ṭha hril suh ila, ka chung a pik dâwn si a,” titu tirhkoh Paula rilru ang chu kan pu ve a ni.—1 Kor. 9:16.
5. Engtin nge Jehova rinna chu amah zahna nên a inkûngkaih?
5 Fakna hla phuahtu Davida chuan: “I hming hre tute chuan an ring ang che; nang zawngin, LALPA, nangmah zawngtute chu i kalsan ngai si lo,” a ti. (Sâm 9:10) Jehova kan hriat chian a, a hmingin a hril telte zahna kan lantîr chuan, hmân laia a chhiahhlawh mi rinawmte angin amah kan rinchhan ang. Hetianga Jehova rinna leh rinchhanna neih chu amah kan chawimawi theih dân kawng dang leh chu a ni. Pathian Thu chuan Jehova rinchhanna leh amah zahna a thlunzawm dân hi chhinchhiah ang che. Hmân lai Israelte’n Amah an rinchhan loh khân, Jehova chuan Mosia hnênah: “Hêng mipuite hian eng chen nge min ngaihnêp ang a, an zînga chhinchhiahna ka tih ṭhin chung pawhin eng chen nge mi rin loh dâwn?” tiin a zâwt a. (Num. 14:11) Chuvângin, harsatna kan tawh laia Jehova’n min vênhim leh min chhawmdâwl kan rin tlat chuan, chu chu amah zahna kan lantîr tihna a ni bawk.
6. Engin nge Jehova zahna thûk tak lantîr tûra min chêttîr?
6 Isua chuan Jehova zahna chu thinlung aṭanga lo chhuak a ni tûr a ni tih a târ lang a. Tih tak zeta Pathian be lo tute a biaknaah Isua chuan Jehova chu: “He miteho hian an kain mi chawimawi a, an thinlung erawh chuan mi hlat si,” tia sawi angin a târ lang a. (Mt. 15:8) Jehova zahna dik tak chu thinlunga tih tak zeta amah hmangaihna aṭanga lo chawr chhuak a ni. (1 Joh. 5:3) Jehova thutiam: “Mi chawimawi apiangte chu ka chawimawi ang,” tih chu thinlungah kan vawng reng bawk.—1 Sam. 2:30.
Hmahruaitute’n Mi Dangte Zahna An Lantîr
7. (a) Engvângin nge mawhphurhna chelh unaupate chuan an enkawlna hnuaia awmte chu an chawimawi ang? (b) Engtin nge Paula chuan a rinpuite a zahna a lantîr?
7 Tirhkoh Paula chuan a rinpuite chu: “Inchawimawi tawnna kawngah chuan hma hruai ula,” tiin a fuih a. (Rom 12:10, NW) Kohhrana mawhphurhna chelh unaupate chuan an enkawlna hnuaia awmte chawimawina lantîrna kawngah entawn tûr an siam, a nih loh leh ‘hma an hruai’ tûr a ni. He mi chungchângah hian, mawhphurhna rit chelhtu chuan tirhkoh Paula chu an entawn tûr a ni. (1 Thessalonika 2:7, 8 chhiar rawh.) Paula’n a va tlawh kohhrana awm unaute chuan amah pawhin a tih duh loh thil chu a tihtîr ngai dâwn lo tih an hria a. Ani chuan a rinpuite zahna a lantîr a, an zahna a dawng lêt a ni. Paula chuan: “Chutichuan, mi zir tûrin ka ngên a che u,” a tih khân, mi tam takin thinlunga duh tak chungin amah an entawn a ni tih kan hre chiang thei a ni.—1 Kor. 4:16.
8. (a) Isua’n a zirtîrte zahna a lantîr dân kawng pawimawh tak pakhat chu eng nge ni? (b) Engtin nge tûn laia upate chuan Isua entîrna an zui theih?
8 Mawhphurhna nei unaupain a enkawlna hnuaia awmte zahna a lantîr dân kawng dang chu an laka thil a ngen chhan leh kaihhruaina a pêk chhan hrilh hriat hi a ni a. Chutianga tiin Isua a entawn a ni. Entîr nân, buh sengnaa thawktu tûr dîl belh tûra a zirtîrte a tirh khân, Isua chuan heti hian a chhan a hrilh a ni: “Buh seng tûr a tam hle si a, nimahsela a thawktute an thlêm: chutichuan, a buh seng tûra thawktu tûrte tîr tûrin buh neitupa hnênah chuan ngên rawh u,” tiin. (Mt. 9:37, 38) Chutiang bawkin, a zirtîrte hnêna “ngaihvên rawh u,” tih a hrilh pawh khân, heti hian a chhan a hrilh a ni: “Eng niah nge in Lalpa a lo kal dâwn in hre si lo,” tiin. (Mt. 24:42) Isua chuan a zirtîrte hnênah an tih tûr a hrilh mai ni lovin, an tih chhan tûr pawh a hrilh tel fo va. Chutiang chuan, a zirtîrte zahna leh chawimawina a lantîr a ni. Kristian upate tâna entawn tûr ṭha a va ni êm!
Jehova Kohhran leh A Kaihhruaina Chu Zah Rawh
9. Khawvêl puma Kristian kohhran leh chu mi aiawhtute zahna lantîr chu eng târ lanna nge a nih? Hrilhfiah rawh.
9 Jehova zah leh chawimawi tûr chuan, khawvêl puma Kristian kohhran leh chu mi aiawhtute kan zah chu a ngai bawk a. Bâwih rinawm pâwl hnên aṭanga Bible-a zilhnate kan zawm hian, Jehova ruahmanna siam kan zahzia kan lantîr tihna a ni. Kum zabi khatnaa Kristian kohhranah tirhkoh Johana chuan thlarauva ruatte chunga zahna tla chhamte chu a hau a ni. (3 Johana 9-11 chhiar rawh.) Johana thute chuan kohhran enkawltute chauh ni lovin, an zirtîrna leh kaihhruainate zah lohna pawh a awm tel tih a târ lang. Kristian a tam zâwkte chutiang an lo ni lo chu a lâwmawm hle. Tirhkohte an dam lai chuan, unaute chuan a huhovin hmahruaitute zahna thûk tak an lantîr niin a lang.—Phil. 2:12.
10, 11. Kristian kohhranah mi ṭhenkhatin thuneihna engemaw chen an neih chu thil inâwm tak a nih chhan Bible aṭangin hrilhfiah rawh.
10 Ṭhenkhat chuan Isua’n “nangni zawng zawng chu unau in ni” tia a sawi avângin Kristian kohhranah thuneitu bîk an awm tûr a ni lo tih ngaih dân an nei mai thei. (Mt. 23:8) Amaherawhchu, Hebrai leh Grik Pathian Lehkha Thu-ah hian Pathianin thuneihna a pêk chelektu mi tam takte chanchin a chuang a. Hmân lai Hebraite zînga chhûngkaw puipate, rorêltute, leh lalte chanchin chuan Jehova’n a aiawhtu mihringte kal tlangin kaihhruaina a pe ṭhîn tih finfiahna tam tak a pe a ni. Mite’n Pathian ruat chutiang mite an chawimawi loh hian, Jehova chuan anni chu a zilh ta ṭhîn a ni.—2 Lal. 1:2-17; 2:19, 23, 24.
11 Chutiang bawkin, kum zabi khatnaa Kristiante chuan tirhkohte thuneihna chu an pawm a. (Tirh. 2:42) Entîr nân, Paula chuan a unaute hnênah kaihhruaina a pe a ni. (1 Kor. 16:1; 1 Thes. 4:2) Nimahsela, ani pawh a chunga thuneihtute lakah inhuam takin a intulût a ni. (Tirh. 15:22; Gal. 2:9, 10) Paula chuan Kristian kohhrana thuneihna thlîr dân dik a nei tih a chiang hle.
12. Bible-a entîrnate aṭangin thuneihna chungchângah eng thil pahnih nge kan zir theih?
12 He mi aṭang hian thil pahnih kan zir a. A pakhatna chu “bawi rinawm, fing tak” tân, a Governing Body kal tlanga thuneihna neitu tûrte ruat leh chutianga ruatte chunga thuneihna nei tûra unaupa ṭhenkhatte ruat chu Pathian Thu nên a inkalh lo, tih hi a ni. (Mt. 24:45-47; 1 Pet. 5:1-3) A pahnihna chu thuneihna chelh tûra ruatte pawh tiamin, kan zain kan chunga thuneitute chu kan zah tûr a ni, tih hi a ni bawk. A nih chuan, khawvêl pum puia Kristian kohhrana thuneihna chelhtute chu eng kawng ṭhenkhatin nge zahna leh chawimawina kan lantîr theih?
Bial Kantute Zah leh Chawimawiin
13. Engtin nge tûn laia Kristian kohhran aiawhtute chungah zahna kan lantîr theih?
13 Paula chuan: “Unaute u, in zînga thawkrim leh, Lalpaa in hotua awm leh, zilhtute che u chu hre tûr leh, an hnathawh vânga hmangaiha ngaihlu êm êm tûrin kan ngên che u a ni. Inremin awm rawh u,” tiin a ziak. (1 Thes. 5:12, 13) Bial kantute chu “thawkrim” te zînga chhiar ngei tûrte an ni a. Chuvângin, anni chu i “ngaihlu êm êm” ang u. Chutianga tih theih dân kawng khat chu an zilhna leh fuihnate thinlung zawng zawnga zawm hi a ni. Chûng enkawltute’n bâwih rinawm pâwl aṭanga kaihhruainate min han pek hian, “chung lam aṭanga finna lo chhuak” chuan mi “tihnuam” tak ni tûrin min chêttîr ang.—Jak. 3:17.
14. Engtin nge kohhran chuan bial kantute an zah tak zetzia a lantîr a, chu chuan eng nge a rah chhuah?
14 Mahse, tûn hmaa kan tih ṭhin dân ni lo va thil ti tûra tih ni ta ila, engtin nge ni ang? Zahna lantîr tûr chuan, “Chutiang chuan kan ti ve ngai lo,” a nih loh leh, “Chu chu hmun dangah a ṭangkai mahna; mahse, kan kohhranah a ṭangkai ve lo vang,” tia a hnial kalh duhna do a ngaih châng a awm mai thei a ni. Chutianga hnial kalh ai chuan, kaihhruaina zawm chu kan tum tlat zâwk a. Kohhran chu Jehova ta a ni a, Isua chu kohhranho Lû a ni tih hriat rengna chuan chutianga kaihhruaina zâwm tûrin min ṭanpui ang. Bial kantu hnên aṭanga kaihhruaina lâwm taka dawn a nih a, chu kaihhruaina kohhranin a zui hunah, zahna tak tak chu a lang a ni. Tirhkoh Paula chuan Korinth khuaa unaute chu anmahni va tlawhtu kohhran upa, Tita pêk kaihhruaina te zah taka an lo zawm avângin a fak a ni. (2 Kor. 7:13-16) Tûn laiah pawh, bial kantute hnên aṭanga kan dawn kaihhruainate inhuam taka kan zawmna chuan, thu hrilh rawngbâwlnaah hlimna nasa tak min neihtîr a ni.—2 Korinth 13:11 chhiar rawh.
“Mi Zawng Zawng Chawimawi Rawh U”
15. Kan Kristianpuite chunga zahna kan lantîr theih dân kawng ṭhenkhat chu engte nge ni?
15 Paula chuan: “Putar deuhte chu hau suh la, pa angin thlêm zâwk rawh; rawlthar deuhte chu unau angin; pitar deuhte chu nu angin, nula deuhte chu thianghlim takin farnu angin. Hmeithai, hmeithai taktakte chu chawimawi rawh,” tiin a ziak a. (1 Tim. 5:1-3) Ni e, Pathian Thu chuan Kristian kohhrana awm zawng zawngte chawimawi tûrin min fuih a ni. Mahse, nang leh i unau inkârah harsatna lo chhuak ta se, engtin nge ni ang? Chu chu a chunga zahna lantîr loh phah nân i hmang ang em? Nge, Pathian chhiahhlawh a nih anga a neih thlarau lam mize ṭhate pawmin, i rilru i thlâk zâwk dâwn? A bîk takin thuneihna neitute chuan an “chante chungah intilal . . . lovin,” an unaute zahna an nei reng tûr a ni. (1 Pet. 5:3) Dik takin, a mi leh sate zînga awm hmangaihna hmanga chhinchhiah Kristian kohhranah chuan, inchawimawi tawnna tûr hun remchâng tam tak kan nei a ni.—Johana 13:34, 35 chhiar rawh.
16, 17. (a) Engvângin nge thu kan hrilhnate chauh ni lo va, dodâltute pawh kan zah chu a pawimawh êm êm? (b) Engtin nge ‘mi zawng zawng kan chawimawi’?
16 Kristian kohhran zînga mite chung chauhva zahna lantîr kan ni lo. Paula chuan a hun laia Kristiante hnênah: “Remchâng hun kan neihzia ang zêlin mi zawng zawng chungah thil ṭha i ti ang u,” tiin a ziak a. (Gal. 6:10) Kan hnathawhpui emaw, school kalpui emawin min cheibâwl ṭhat loh chuan, he thu bul nunpui hi a harsa thei ngei ang. Chutiang hunah chuan, he thu hi kan hriat reng a ngai a ni: “Thil ṭha lo titute avângin intilungngai suh,” tih hi. (Sâm 37:1) He fuihna thu nunpuina hian min dodâltute pawh zah taka chhâng lêt tûrin min ṭanpui ang. Chutiang bawkin, thu hrila kan chhuah hunah, mahni inngaihtlâwmna chuan ‘thuhnuairawlh tak leh ṭih dêk chunga’ chhâng lêt tûrin min ṭanpui thei bawk. (1 Pet. 3:15) Kan lan dân leh kan thawmhnaw hâkte thleng pawhin thu kan hrilhna te kan zahzia a târ lang thei a ni.
17 Kan rinpuite emaw, kohhran pâwna mite emaw nêna indâwr tawn pawh ni ila, he fuihna thu nunpui tlat chu kan duh a ni: “Mi zawng zawng chawimawi rawh u. Unauhote chu hmangaih rawh u. Pathian ṭih dêk rawh u. Lalber chu chawimawi rawh u,” tih hi.—1 Pet. 2:17. (w08 10/15)
Engtin Nge Kan Chhân Ang?
• Engtin nge Jehova chungah zahna dik kan lantîr theih?
• Engtin nge kohhran upate leh bial kantute chungah zahna dik kan lantîr theih?
• Engtin nge kohhran chhûnga mi tinte chungah zahna dik kan lantîr theih?
• Engtin nge thu kan hrilhnate chungah zahna dik kan lantîr theih?
[Zirlai Atâna Zawhnate]
[Phêk 21-naa milem]
Kum zabi khatnaa Kristiante chuan governing body enkawlna chu an zah
[Phêk 24-naa milem]
Ram tina upate chuan Governing Body ruat bial kantute chu an zahin, an chawimawi