Jehova Chuan Kan Ṭhatna Tûrin Min Enfiah

“A lama rilru dik tak putute chunga a chakzia tilang tûrin khawvêl zawng zawngah [Jehova] mit chu a lêng ruai ruai ṭhîn.”​—⁠2 CHRO. 16:⁠9.

1. Engvângin nge Jehova’n min enfiah?

JEHOVA chu Pa ber ṭha famkim a ni a. Ani chuan min hriat chian êm avângin, kan “rilrua suangtuah” te pawh a hre hial a ni. (1 Chro. 28:⁠9) Amaherawhchu, kan tlin lohna zawng tûr maia min enfiah a ni lo. (Sâm 11:4; 130:⁠3) Ani chuan amah nêna kan inlaichînna tichhe thei emaw, chatuana nun beiseina kan neih tiderthâwng thei emaw thil eng pawh laka min vênhim chu a duh a ni.​—⁠Sâm 25:​8-10, 12, 13.

2. Jehova’n tute tân nge a chakna a hman?

² Jehova chu engkim tithei a ni a, thil zawng zawng a hmu a ni. Chu mi avâng chuan, a mi rinawmte’n an koh apiangin a ṭanpui thei a, harsatna an tawh laiin a chhawmdâwl thei a ni. “A lama rilru dik tak putute chunga a chakzia tilang tûrin khawvêl zawng zawngah [Jehova] mit chu a lêng ruai ruai ṭhîn,” tih 2 Chronicles 16:9 chuan a sawi. Jehova chuan rilru dik tak putu, thinlung thianghlim tak leh tih tak zeta a rawngbâwltute tân a chakna a hmang tih hi chhinchhiah rawh. Mi bum hmangte emaw, mi vêrvêkte emaw chungah chuan chutiang ngaihsakna chu a lantîr lo.​—⁠Jos. 7:​1, 20, 21, 25; Thuf. 1:​23-33.

Pathian Nên Lêng Dûn Rawh

3, 4. ‘Pathian nêna lêng dûn,’ tih chu eng tihna nge ni a, Bible entîrna engte’n nge hre thiam tûra min ṭanpui?

³ Mi tam takte tân chuan kan lei leh vân zau tak Siamtu nêna thlarau lama lên dûn chu ngaihtuah phâk a ni lo. Mahse, chu tak chu a ni, Jehova’n kan tih atâna a duh chu. Bible hun lai chuan, Enoka leh Nova chu “Pathian nên an lêng dûn” a. (Gen. 5:24; 6:⁠9) Mosia chuan “hmuh theih lohva chu a hmuh avângin a tuar ṭan ṭan a ni.” (Heb. 11:27) Lal Davida chu inngaitlâwm takin a Pa vâna mi nên an lêng dûn a. Ani chuan: “LALPA chu ka hmâah ka awmtîr fo va: ka ding lama a awm avângin ka nghîng lo vang,” a ti.​—⁠Sâm 16:⁠8.

⁴ Jehova kut chu vuanin amah nên kan lêng dûn tak tak thei lo ngei mai. Mahse, entîr neiin chutiang chuan kan ti thei a ni. Engtin nge? Fakna hla phuahtu Asapha chuan: “I hnênah ka awm fo va: ka kut ding lam hi i lo chelh ṭhîn a. Nangin i remruatnain mi hruai ang a, chu mi hnuah chuan ropuinaah khian mi lâwm ang,” tiin a ziak a ni. (Sâm 73:​23, 24) Mawlmang taka sawi chuan, a Thu Bible leh “bawi rinawm, fing tak” kal tlanga kan dawn min zilhna thute kan zawm tlat hian Jehova nên kan lêng dûn tihna a ni.​—⁠Mt. 24:45; 2 Tim. 3:⁠16.

5. Engtin nge Jehova chuan a mi rinawmte chu pain a fa duat takte anga a enkawl a, ani chu engtin nge kan thlîr ang?

⁵ Jehova chuan amah nêna lêng dûnte chu a ngainat avângin, anni chu pain a fa duat tak a enkawl angin, anmahni a ngaihsakin, a zirtîr a ni. Pathian chuan: “Fing taka awmtîr chein i kalna tûr kawng chu ka entîr ang chia: ka mita en reng chung chein rem ka ruatsak zêl ang che,” a ti. (Sâm 32:⁠8) Hetiang hian inzâwt rawh: ‘Jehova chuan hmangaih takin min enkawl a ni tih hre chunga a finna thute ngaithlain, a kut vuana amah nêna lêng dûn ang maiin ka inmitthla em? Min awmpui reng tih ka hriatna chuan ka ngaihtuahna te, ka thusawi te, leh ka thiltih te chu a thunun em? Tin, thil ka tih sual hian, Jehova chu Pathian inla hrang leh khirh lutuk ang ni lovin, inlam lêtte chu amah nêna inlaichînna nei leh tûra ṭanpui duh Pa ber zahngai thei tak leh hmangaihna nei tak angin ka thlîr em?’ tihte hi.​—⁠Sâm 51:⁠17.

6. Jehova chuan mihring nu leh pate aiin eng dinhmun ṭha zâwk nge a neih?

⁶ A châng chuan, Jehova’n kawng sual kan  zawh ṭan hma pawhin min ṭanpui mai thei a. Entîr nân, ani chuan kan thinlung chhe lailet dêr chuan thil ṭha lote a duh ṭan tih a lo hmu thei a ni. (Jer. 17:⁠9) Chutiang dinhmunah chuan, a “mitin” kan chhûngril lam kan ngaihtuahna thûk ber pawh a enfiah theih avângin, mihring nu leh pate aia rangin thil a rawn ti thei a ni. (Sâm 11:4; 139:4; Jer. 17:10) Zâwlnei Jeremia lehkha ziaktu leh a ṭhian ṭha tak Baruka nuna thil thleng pakhat Jehova chhân lêt dân hi ngaihtuah ta i la.

Baruka Tâna Pa Dik Tak Chu

7, 8. (a) Tunge Baruka chu ni a, a thinlungah eng châkna ṭha lo nge a neih ṭan? (b) Engtin nge Jehova chuan Baruka chungah pa anga ngaihsakna a lantîr?

⁷ Baruka chu Judate hnêna Jehova rorêlna chanchin puan chhuahna hna khirh tak thawhna kawnga Jeremia thawhpuitu mi rinawm leh lehkha ziak mi a ni a. (Jer. 1:​18, 19) Mi challang chhûngkua aṭanga lo chhawr chhuak a nih rinawm tak, Baruka chuan engtik aṭang emaw chuan mahni tân “thil ropui” a zawng ṭan a. Nihna sâng ûm emaw, hausak tum rûkna emaw a nei ṭan a ni thei ang. A enga pawh chu lo ni se, Jehova chuan Baruka thinlungah chu ngaihtuahna hlauhawm takin bu a khuar ṭan a ni tih a hmu a. Jehova chuan Jeremia kal tlanga thusawiin, dinhmun chu a chingfel nghâl a, Baruka hnênah chuan: “Ka chung a va pik ta êm! LALPA chuan ka tuarnaah lungngaihna mi belhchhah ta si a: ka rûm hi ka chauhpui a, hahdamna rêng ka hmu zo lo, i ti a,” tiin a sawi a. Tin, Pathian chuan a hnênah chuan: “Mahni tân thil ropui i zawng em ni? Zawng lo mai rawh,” tiin a sawi belh a ni.​—⁠Jer. 45:​1-5.

⁸ Jehova chuan Baruka chu hau na deuh mah se, thinrima ti a ni lo va, pa anga a ngaihsakna dik tak vânga ti a ni. Baruka chuan atâna hlauawm thei châkna ṭha lo a nei chung pawhin, thinlung suaksual a nei lo tih Pathianin a hmu thei a ni. Jehova chuan Judai ram leh Jerusalem chu tihchhiat a ni ṭêp tawh tih a hria a, chu hun khirh taka Baruka a tlûk chu a duh lo a ni. Chuvângin, Pathian chuan a chhiahhlawh chu dinhmun dik tak hre tûra a lo harh chhuah theih nân ‘tîsa zawng zawng chunga thil ṭha lo thlentîr’ a tum thu a hrilh nawn a, Baruka’n a thusawi a ngaihthlâk chuan chhanhim a ni dâwn tih a hrilh belh a ni. (Jer. 45:⁠5) Pathian chuan: ‘Baruk, a tak ramah chêng rawh. Judai ram leh Jerusalem suaksual tak chunga thil lo thleng thuai tûr chu i rilruah vawng la. Rinawm taka awmin, nung ta che! Chutichuan, ka chhamhim ang che,’ tia hrilh ang vêl a ni. Jehova thusawi chuan Baruka thinlung chu a khawih a ni ngei ang; a ngaihtuahna siam ṭhain, a hnu kum 17-a lo thleng Jerusalem tihchhiatnaa a dam khawchhuah avângin.

9. Paragraph-a awm zawhnate khi engtin nge kan chhân ang?

⁹ Baruka chanchin i ngaihtuah laiin, a hnuaia zawhnate leh Bible chângte hi ngaihtuah bawk ang che: Jehova’n Baruka a dâwr dân chuan Jehova chungchâng leh a chhiahhlawhte chunga a rilru put hmang eng nge a târ lan? (Hebrai 12:9 chhiar rawh.) Kan awmna hun khirh takte han thlîr hian, Pathianin Baruka a zilhna thu leh Baruka chhân lêt dân aṭangin eng nge kan zir theih? (Luka 21:​34-36 chhiar rawh.) Jeremia entawnin, Kristian upate chuan Jehova’n a chhiahhlawhte a ngaihsakna chu engtin nge an lantîr theih?​—⁠Galatia 6:1 chhiar rawh.

Fapaa Lang Pa Hmangaihna Chu

10. Engtin nge Isua chu Kristian kohhran Lû a nihna chelh thei tûra thuam a nih?

¹⁰ Kristian hun hma chhûng khân, Jehova’n a mite a hmangaihna chu a zâwlneite leh a chhiahhlawh rinawmte kal tlanga târ lan a ni ṭhîn a. Tûn laiah chuan Kristian Kohhran Lû, Isua Kristaah a lang chhuak deuh ber a ni. (Eph. 1:​22, 23) Chuvângin, Thu Puan bu-ah chuan, Isua chu berâm no “mit pasarih nei” anga sawi a ni a, “chûng mit pasarihte chu Pathian Thlarau pasarih, lei chung zawng zawnga tirh chhuahte chu an ni.” (Thup. 5:⁠6) Ni e, Pathian thlarau thianghlim famkimin a ṭanpui avângin, Isua chuan hriatthiam theihna ṭha famkim a nei a ni. Ani pawhin chhûng lama kan nihna dik tak chu a hmuin, a hriat lohva inthup thil engmah a awm lo.

11. Krista’n eng chanvo nge a chelh a, engtin nge kan chunga a rilru put hmang chu a Pa rilru put hmang ang a nih?

 ¹¹ Mahse, Jehova ang bawkin, Isua pawh chu vân aṭanga kan sualna man tuma min enthla rengtu police ang a ni lo. Ani chuan hmangaihna mitin min enfiah a. Isua nihna zînga pakhat “Chatuan Pa” tih chuan amaha rinna nei zawng zawngte hnêna chatuan nunna a pêk tûr chu min hriat chhuahtîr a. (Is. 9:⁠6) Chu bâkah, Kristian kohhran Lû a nih angin, Krista chuan inhuamna nei thlarau lama mi puitlingte, a bîk takin upate chu a mamawhte hnêna thlamuanna emaw, zilhna emaw pe tûrin a chêttîr thei a ni.​—⁠1 Thes. 5:14; 2 Tim. 4:​1, 2.

12. (a) Asia Minor-a kohhran pasarihte hnêna lehkha thawnte chuan Isua chungchâng eng nge a târ lan? (b) Engtin nge upate chuan Pathian berâmte chungah Krista rilru put hmang chu an lantîr?

¹² Krista’n berâmte nasa taka a ngaihsakzia chu Asia Minor-a kohhran pasariha awm upate hnêna a lehkha thawnah a lang a. (Thup. 2:1–3:22) Chûng a lehkha thawnahte chuan, Isua chuan kohhran tina thilthlengte a hriatzia leh a hnungzuite a ngaihsakzia a târ lang a ni. Tûn laiah pawh chutiang bawk chuan a ngaihsak a, Thu Puan bu-a inlârna chu ‘Lalpa ni’ chhûnga thleng famkim a nih avângin a ngaihsak lehzual zâwk a ni. * (Thup. 1:10) Krista hmangaihna chu kohhran thlarau lam berâm vêngtu anga thawk upate kal tlanga târ lan a ni fo va. Ani chuan hêng ‘mihringte hnêna thilpêkte’ chu a mamawh huna thlamuanna te, fuihna te, a nih loh leh zilhna te pe tûrin a chêttîr thei a ni. (Eph. 4:8; Tirh. 20:28; Isaia 32:​1, 2 chhiar rawh.) An hna thawh chu Krista’n a mi mala a ngaihsakna che târ lanna angin i thlîr em?

A Hun Taka Ṭanpuina

13-15. Engtin nge Pathian chuan kan ṭawngṭaina a chhân mai theih? Entîrna pe rawh.

¹³ Ṭanpuina dîla nasa taka ṭawngṭaiin, a chhânna chu thlarau lama Kristian mi puitling tak rawn tlawhna leh fuihna che aṭangin i dawng tawh ngai em? (Jak. 5:​14-16) A nih loh leh ṭanpuina chu Kristian inkhâwmnaa thusawi aṭangin emaw, kan thu leh hla chhuaha thuziak pakhat khat aṭangin emaw i dawng mai thei a. Jehova chuan hetiang kawng hian ṭawngṭaina chu a chhâng fo ṭhîn. Entîr nân, upa pakhatin thu a sawi zawh chuan, chawlhkâr engemaw zât kal ta rorêl dik lohna nasa tak tâwktu unaunu chuan a va pan a. Chu unaunu chuan a buaina avânga phunnawi aiin, a thusawia Bible ṭanchhan thute a ngaihhlutzia a sawi chhuak zâwk a ni. Chûng thute chuan a dinhmun a mil a, nasa takin a thlamuan a ni. Chu inkhâwmnaa a tel avâng chuan a va lâwm tak êm!

¹⁴ Ṭawngṭaina kal tlanga dawn ṭanpuina chungchângah, lung ina tâng mi pathum, tân ina Bible thutak hmu a, baptisma chang lo thuchhuahtu lo ni tate entîrna hi han ngaihtuah teh. Tharum thawhna thilthleng avângin, chuta tâng zawng zawngte chu khuahkhirh belhchhah an ni a. Chu chuan helna a chawk chhuak a ni. Lung in tângte chuan lungawi lohna lantîr nân a tûka zîng chaw an eina thlêng pêk kîr loh chu an tum a. Baptisma chang lo thuchhuahtu pathumte chuan harsatna an tâwk ta. Helnaa an tel ve chuan Rom 13:​1-a Jehova fuihna thu chu an bawhchhia a ni ang a. An tel ve lo a nih chuan, an tânpuite tihduhdah an tuar dâwn bawk si a ni.

¹⁵ An pathuma an inbiak pawh theih loh avângin finna dîlin an ṭawngṭai a. A tûkah chuan, an pathum chuan thu tlûkna inang chiah chu an siam a ni​—⁠zîng chaw lâk loh mai  chu. A hnua a vêngtute’n thlêng an rawn seng chuan, an pathum chuan pêk tûr an nei lo va. “Ṭawngṭaina ngaithlatu” chuan a awmpui avângin an va lâwm tak êm!​—⁠Sâm 65:⁠2.

Inrin Tâwkna Nêna Nakin Hun Hmachhawnin

16. Engtin nge thu hrilhna chuan Jehova’n berâm ang mite a ngaihsakzia a târ lan?

¹⁶ Khawvêl pum huap thu hrilhna pawh hi Jehova’n hmun tina awm mi rilru ṭhate a ngaihsakzia finfiahna dang leh a ni a. (Gen. 18:25) Jehova chuan chanchin ṭha la thlen lohna hmuna awmte pawh ni se, berâm ang mite hmu tûrin a chhiahhlawhte chu vântirhkoh hmangin a kaihruai fo a ni. (Thup. 14:​6, 7) Entîr nân, Pathian chuan Ethiopia mi lian zawng chhuak a, Pathian Lehkha Thu hrilhfiah tûrin kum zabi khatnaa chanchin ṭha hriltu Philipa chu vântirhkoh hmangin a kaihruai a ni. Eng nge a rah chhuah? Chu pa chuan chanchin ṭha chu a pawmin, baptisma chang Isua zuitu a lo ni ta a ni. *​—⁠Joh. 10:​14, 15; Tirh. 8:​26-39.

17. Engvângin nge nakin hun tûr chu nasa taka kan lungkham loh vang?

¹⁷ Tûn lai khawvêl tâwpna a hnaih rual rualin, sawi lâwk ‘nau veina’ chu a awm chhunzawm zêl ang. (Mt. 24:⁠8) Entîr nân, mamawh pung chho zêl te, sik leh sa nasa taka inthlâkna te, a nih loh leh sumdâwnna lama ngelngheh lohna te avângin ei leh in mante chu nasa takin a sâng chho va. Hna thawh tûr hmuh a harsa sâwtin, hnathawktute chu dârkâr tam tak thawk tûra nawr an ni thei a. Eng pawh chu lo thleng se, thlarau lam thil dah hmasa zâwktu leh an ‘mit tifîm’ rengtute zawng zawng chuan nasa taka an lungkham a ngai lo. Pathianin anmahni a hmangaih a, a enkawl dâwn tih an hria a ni. (Mt. 6:​22-34) Entîr nân, B.C.E. 607-a Jerusalem tâwpna râpthlâk takah Jehova’n Jeremia a chhawmdâwl dân hi lo ngaihtuah ta i la.

18. Engtin nge Jehova’n Jeremia a hmangaihna chu Jerusalem hual a nih chhûng khân a târ lan?

¹⁸ Babulon hovin Jerusalem an hual hun tâwp lamah, Jeremia chu Vêngtu Hung Chhûnga tântîr a ni a. Engtin nge ei tûr a neih theih? Tâng ni lo se chuan, mahniin a inzawn mai tûr. Mahse, tih theih a neih tâk lohvah chuan a hual vêla awmte chu amah châwm tûrin a rin a ngai a; chûng zînga a tam zâwkte chu amah hawtu an ni lehnghâl! Chutichung pawhin, Jeremia chuan mihring ni lovin, amah enkawl tûra tiamtu Pathian chu a rinchhan tlat a ni. Jehova chuan a thutiam chu a hlen em? Tehrêng mai! Ani chuan Jeremia’n nî tin “chhang hlâwm khat, khawpuia chhang a awm chhûng chu” dawng tûrin ruahmanna a siamsak a ni. (Jer. 37:21) Jeremia, Baruka, Ebedmeleka, leh mi dangte chu chutih hun laia thleng ṭâm te, hrilêng te, leh thihna lakah an dam khawchhuak a ni.​—⁠Jer. 38:2; 39:​15-18.

19. Thil lo thleng tûrte kan hmachhawn pahin, eng nge tih kan tum tlat ang?

¹⁹ Ni e, “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn.” (1 Pet. 3:12) I Pa vâna mi enkawlna avângin i lâwm em? I ṭhatna tûrin i chungah a mit a lên vêl tih hriat chu i thlamuanpui em? I thlamuanpui a nih chuan, eng thil pawh lo thleng se, Pathian nêna lên dun chu tum tlat ang che. Jehova chuan a mi rinawm zawng zawngte chu pa hmangaihna mitin a en reng a ni tih kan hre chiang thei a ni.​—⁠Sâm 32:8; Isaia 41:13 chhiar rawh. (w08 10/15)

[Footnote-te]

Kan Hrilhfiah Thei Em?

• ‘Pathian nên kan lêng dûn’ tih engtin nge kan lantîr theih?

• Engtin nge Jehova chuan Baruka a hmangaihna chu a târ lan?

• Kristian kohhran Lû a nih angin, engtin nge Isua chuan a Pa miziate a târ lan?

• Hêng hun khirh tak chhûng hian eng kawngtein nge Pathian kan rinchhanzia kan târ lan theih?

[Zirlai Atâna Zawhnate]

[Phêk 14-naa milem]

Engtin nge Jehova’n a hun taka ṭanpuina a pêk theih?