Jehova ‘Mit’ Chuan Engkim A Enfiah
Jehova ‘Mit’ Chuan Engkim A Enfiah
“Mihring fate hi [Jehova] mitin a en.”—SAM 11:4.
1. Tute nêna inhmêlhriat nge nuam i tih?
NANGMAH ngaihsak tak zettute chu engtin nge i ngaih? Nangmah an ngaih dân che i zawh châng pawh hian a nihna dik tak an hrilh ṭhîn che a. Ṭanpui i mamawh chângin, ṭanpui che an inpeih a. Zilh i ngaih hunah, hmangaihnain an zilh che a ni. (Sâm 141:5; Gal. 6:1) Chûng mite nêna inhmêlhriat chu a nuam hle a ni lâwm ni? Jehova leh a Fapa chu chutiang chu an ni. An ngaihsakna che chu mihringte ngaihsakna aiin a nasa zâwk a, anmahni chêttîrtu chu mahni hmasialna tel miah lo a ni a; anni chuan ‘nunna taktak vuan’ tûra ṭanpui che chu an duh a ni.—1 Tim. 6:19; Thup. 3:19.
2. Jehova’n a chhiahhlawhte chu eng ang khawpin nge a ngaihsak?
2 Fakna hla phuahtu Davida chuan Jehova min ngaihsakna nasatzia chu: “Mihring fate hi [Jehova] mitin a en a, an thiltihte a hmu,” tiin a sawi a. (Sâm 11:4) Tin, heti hian a ziak bawk a ni: “Ka thinlung hi i fiah a; zânah mi tlawh a; . . . engmah i hmu si lo va,” tiin. Ni e, Pathian chuan min en mai lovin, min fiah a ni. Chiang takin, Davida chuan Jehova amah a ngaihsakna nasatzia chu a hria a. Ani chuan sual ngaihtuahna emaw, phiarrûkna thinlung emaw a neih reng chuan Jehova rilru a tinâin, a lawm a hlawh dâwn lo tih a hria a ni. Davida tân Jehova a tak ang bawkin, i tân a tak ve em?
Jehova Chuan Thinlung A Hmu
3. Engtin nge Jehova chuan kan ṭhat famkim lohna chungah rilru put hmang inbûk tâwk tak a târ lan?
3 Jehova chuan chhûngrîla kan nihna—thinlunga kan nihna dik tak chu a ngaihsak ber a. (Sâm 19:14; 26:2) Hmangaih takin, kan tlin lohna neuh neuh chu a ngaihtuah reng lo. Entîr nân, Abrahama nupui Sari’n mihring taksa pua lo kal vântirhkoh hnêna thu dik hlel deuh a sawi khân, a hlauh leh a zahzum vâng a ni tih vântirhkoh chuan a hriat avângin, na vak lovin a zilh a ni. (Gen. 18:12-15) Thlahtu Joba chuan “Pathian ai amaha amah thiam a inchantîr” khân Jehova chuan Setana kut a tuar nasa tih hriain, mal a sâwm tho tho a ni. (Job. 32:2; 42:12) Chutiang bawkin, Zarephath hmeithaiin zâwlnei Elija a ânkhum khân Jehova chuan thinurah a la lo. Pathian chuan a fapa neih chu a chân avângin a lungngai hle a ni tih a hria a ni.—1 Lal. 17:8-24.
4, 5. Engtin nge Jehova chuan Abimeleka a dâwrnaah ngilneihna a lantîr?
4 Jehova chuan thinlung a fiah avângin, ring lotute lakah pawh ngaihtuahna a lantîr a ni. Philistia khawpui Gerar lal Abimeleka a dâwr dân hi ngaihtuah teh. Abimeleka chuan Abrahama leh Sari chu nupa an ni tih a hriat loh avângin, Sari chu nupui atân a la a. Amaherawhchu, Abimeleka’n a pâwl hmain Jehova’n a mumang lamah: “Hei hi thinlung ṭha tak pu chungin i ti a ni tih ka hria e, tichuan kei pawhin ka chunga i thil tihsual tûr chu ka khap che a ni: chuvângin a ni, amah i khawih ka phal loh ni. Chutichuan tûnah mi nupui kha pe kîr leh rawh; ani chu zâwlnei a ni si a, a ṭawngtaisak ang chia, tin, i dam dâwn nia,” tiin a hrilh a ni.—Gen. 20:1-7.
5 Jehova chuan Pathian dik lo betu Abimeleka chu rawng taka dâwr thei reng a ni a. Mahse, Pathian chuan he mi ṭumah hi chuan thinlung ṭha tak pua thilti a ni tih a hmu a ni. Chu mi chu ngilnei taka pawmin, Jehova chuan ngaihdam nia, “dam” theih dân tûr a hrilh a ni. Chutiang Pathian chu a ni lâwm ni i biak duh chu?
6. Eng kawngtein nge Isua chuan a Pa a entawn?
6 Isua chuan a Pa chu kawng engkimah a entawn a, a zirtîrte ṭhatna lai chu enin, a sualna ngaihdam a peih reng a ni. (Mk. 10:35-45; 14:66-72; Lk. 22:31, 32; Joh. 15:15) Isua rilru put hmang chu Johana 3:17-a a thu nên a inmil a ni: “Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theihna tûrin a tîr a ni zâwk e,” tih hi. Ni e, Jehova leh Isua min hmangaihna chu a thûkin, a ngai reng a ni. Nunna kan neih an duh tih a lang a. (Job. 14:15) Chutiang hmangaihna chuan Jehova’n min fiah chhan, min thlîr dân, leh a thil hmuhte anga thil a tih dân a târ lang a ni.—1 Johana 4:8, 19 chhiar rawh.
Hmangaihna Mit Nêna Enfiah
7. Eng rilru puin nge Jehova’n min enfiah?
7 Chutiang a nih chuan, Jehova chu vân aṭanga kan sualna man tuma min enthla rengtu police anga ngaih chu a va sual dâwn em! Setana zâwk chu a ni, min hêktu leh mahni hmasiala min puhtu chu ni. (Thup. 12:10) Ani chuan engmah awm si lovin, rilru chhia pu-ah min puh hial a! (Job. 1:9-11; 2:4, 5) Pathian chungchângah fakna hla phuahtu chuan: “LALPA, nangin khawlohnate i chhinchhiah chuan, Aw, LALPA, tunge ding ang le?” tiin a ziak a. (Sâm 130:3) Tumah an ding lo vang tih chu a chhânna a ni tlat! (Thur. 7:20) Jehova chuan a fa duh takte hlauhawm laka vênhim duh pa ber ngilnei tak leh zahngai tak angin min en zâwk a ni. Ani chuan kan intihnat loh nân kan ṭhat famkim lohna leh kan chak lohnate min hriattîr fo a ni.—Sâm 103:10-14; Mt. 26:41.
8. Engtin nge Jehova chuan a chhiahhlawhte chu a zirtîra a thunun?
8 Pathian min hmangaihna chu Bible leh “bawi rinawm, fing tak” pêk thlarau lam chawa awm kaihhruaina leh thununna hmanga târ lan a ni a. (Mt. 24:45; Heb. 12:5, 6) Jehova chuan Kristian kohhran leh ‘mihringte hnêna thilpêkte’ hmangin min ṭanpui bawk a. (Eph. 4:8) Chu bâkah, pa ang maia zirtîrna min pêkte kan dawnsawn dân a thlîr reng a, min ṭanpui chhoh zêl dân kawng a dap a ni. Sâm 32:8 chuan: “Fing taka awmtîr chein i kalna tûr kawng chu ka entîr ang chia: ka mita en reng chung chein rem ka ruatsak zêl ang che,” a ti. A nih chuan Jehova thu kan ngaihthlâk reng chu a va pawimawh tak em! Kan tâna Zirtîrtu leh Pa a nihzia hriain, a laka kan inngaihtlâwm a ngai a ni.—Matthaia 18:4 chhiar rawh.
9. Eng miziate nge kan pumpelh ang a, engvângin nge?
9 Kawng leh lamah chuan chapona te, rinna tlâkchhamna te, a nih loh leh “sual bumnaa” tihkhauhvin i awm ngai lo vang u. (Heb. 3:13; Jak. 4:6) Chutiang miziate chu ngaihtuahna ṭha lo emaw, châkna ṭha lo emaw aṭangin a lo inṭan ṭhîn a. A tâwpah phei chuan Bible zilhna inâwm takte pawh a hnâwl hial thei a ni. Chu aia chhe zâwk mahin, ani chu a rilru put hmang ṭha lo leh nun kawng ṭha lo a neih ngheh êm avângin Pathian hmêlmaah a insiam thei a—chu chu dinhmun hlauhawm tak a va ni êm! (Thuf. 1:22-31) Adama leh Evi te fatîr Kaina chanchin chu i lo ngaihtuah ang u.
Jehova Chuan Engkim A Hmuin Chutiang Mil Chuan Thil A Ti
10. Engvângin nge Jehova chuan Kaina thil hlan chu a pawm loh va, engtin nge Kaina chuan a chhân lêt?
10 Kaina leh Abela’n Jehova hnêna thil hlan tûr an rawn ken khân, Ani chuan an thilpêk chauh ni lovin, pe tûra anmahni chêttîrtu pawh chu a ngaihven a. An thinlung chu hriain, Pathian chuan rinnaa Abela thil hlan chu a pawm a; mahse, kawng engemaw taka rinna a tlâkchham deuh avângin Kaina thil hlan erawh a pawm lo. (Gen. 4:4, 5; Heb. 11:4) Kaina chuan thilthleng aṭanga inzira a rilru put hmang thlâkthleng aiin, a unaupa chungah nasa takin a thin a lo ur ta zâwk a ni.—Gen. 4:6.
11. Engtin nge Kaina chuan a thinlung chu a chhe lailet der a ni tih a lantîr a, chu mi aṭang chuan kan tân zir tûr eng nge awm?
11 Jehova chuan Kaina rilru put hmang hlauhawmzia a hmuhin, thil a tih ṭhat chuan lawm a hlawh tûr thu chu Kaina hmangai takin a hrilh a. Lungchhiatthlâk takin, Kaina chuan amah Siamtu zilhna chu hnâwlin, a unaupa chu a that a ni. Kaina rilru chhiatzia chu Pathianin: “I unau Abela kha khawiah nge a awm tâk?” tia a zawhna zahpah lo taka: “Ka hre lo. Ka nau vêngtu ka ni em ni?” tia a chhân dân aṭangin a lang chiang lehzual a ni. (Gen. 4:7-9) Pathian ngeiin ṭawngkama zilhna a pêk ngaihsak lo tûr khawpin thinlung chu a va chhe lailet thei tak êm! (Jer. 17:9) Chuvâng chuan chutiang chanchin aṭanga inzirin ngaihtuahna leh châkna dik lote chu i hnâwl nghâl vat ṭhîn ang u. (Jakoba 1:14, 15 chhiar rawh.) Bible ṭanchhan zilhna kan dawng a nih chuan, Jehova min hmangaihzia târ langtu anga thlîrin i lâwm hle ang u.
Sual Inthup Reng A Awm Lo
12. Engtin nge Jehova chuan thil sual tih chu a rêl?
12 Ṭhenkhat chuan an thilsual tih lai miin an phâwk loh phawt chuan, hrem lohva chhuah an inring a. (Sâm 19:12) Chutianga sual inthup reng thei a awm lo. “Kan chanchin kan thlenna tûra mithmuhah chuan engkim saruak leh inhawngsain a awm . . . a ni.” (Heb. 4:13) Jehova chu kan rilru chhûngril ber enfiah ṭhîn rorêltu a ni a, thil sual tihte chu rorêl dikna ṭha famkim lantîr tûrzâwngin a chhâng lêt ṭhîn. Ani chu “Pathian lainatnaa khat, mi khawngaih thei tak, thin nel tak, ngilneihna leh thu tak ngah” a ni. Mahse, ‘thiltisual luite,’ a nih loh leh rilru put hmang suaksual tak leh phiarrûk hmang sim duh lote chu a “chhuah mai ngai lo. (Ex. 34:6, 7; Heb. 10:26) Chu chu Akana leh Anania leh Saphiri te chungthu a rêl dânah a lang a ni.
13. Engtin nge ngaihtuahna sual chuan Akana chu thil sual a tihtîr?
13 Pathian thupêk chiang tak chu kalhin, Akana chuan Jeriko aṭanga thil hluihlâwn ṭhenkhat chu lain, a riahhmunah a thukru a, a chhûngte pawh an inhnamhnawih ngei a rinawm. A sualna hai lan a nih chuan Akana chuan: “Pathian chungah chuan thil ka lo tisual ta ngei mai,” tia a chhân avângin a thiltih sual khûnkhânzia a hria a ni tih a târ lang a ni. (Jos. 7:20) Kaina ang bawkin, Akana chuan thinlung ṭha lo chu a nei a. Akana thil sual tih chhan ber chu duhâmna vâng a ni a, chu chuan mi bum hmang a nihtîr a ni. Jeriko khua aṭanga lâk hluihlâwnte chu Jehova ta a nih avângin, Akana thiltih chu Pathian thil rûksak ang a ni a, chu chu amah leh a chhûngte’n an thih phah a ni.—Jos. 7:25.
14, 15. Engvângin nge Anania leh Saphiri te chuan Pathian hremna an phu a, kan tâna zir tûr chu eng nge ni?
14 Anania leh a nupui Saphiri te chu Jerusalem khuaa Kristian kohhran hmasa mi leh sa an ni a. C.E. 33 Pentekost hnuah chuan ram hla aṭanga lo kal ringtu thar Jerusalema châmbângte tisa lam mamawh ṭanpui thawhlâwm an nei a. Chu chu mahni phal zât zât thawh theiha siam a ni. Anania chuan a lo a hralh a, a lo hralh man aṭhen azâr a thawh ve a. Mahse, a nupui hriatpuiin, a vaia thawh vek angin a insawi a ni. An nupa chuan kohhrana chawimawina engemaw bîk tak dawn an duh a ni tih a chiang hle. Mahse, an thiltih chu mi bum hmang thiltih dân verther tak a ni. Kawng mak takin Jehova chuan chu inbumna chu tirhkoh Petera a hriattîr a, ani chuan Anania hnênah chutianga a bum chhan chu a zâwt a ni. Anania chu tluin a thi ta nghâl a. Chu mi hnu lawkah chuan Saphiri pawh chu a thi zui ve ta a ni.—Tirh. 5:1-11.
15 Anania leh Saphiri te chu rei lote chhûng thlarau lamah an chak lo thut mai an ni lo. Tirhkohte bum tumin an phiarru a, dâwt an sawi a ni. Chu aia pawi lehzual chu ‘thlarau thianghlim leh Pathian an bum’ hi a ni. Jehova thil chinfel dân chuan vervêkna lak ata kohhran vênghim tûra a inpeihzia a târ lang chiang hle. Dik takin, “Pathian nung kuta tlûk chu thil râpthlâk tak a ni” ngei mai!—Heb. 10:31.
Englai Pawhin Rinawmna Vawng Reng Rawh
16. (a) Engtin nge Setana chuan Pathian mite tihchhiat a tum? (b) Diabola’n i awmna hmunah mite tihchhiat nân eng ang tih dân nge a hman?
16 Setana chuan min tichhe tûr leh Jehova lawm min hlawh lohtîr tûrin theih tâwp a chhuah a ni. (Thup. 12:12, 17) Diabola ngaihtuahna suaksualte chu nungchang bawlhhlawhna leh tharum thawhnaa khat khawvêlah hian chiang takin a lang a. Computer leh electronic khâwl dangte hmangin zahmawh lam leh saruak lemte chu awlsam taka hmuh theih a ni. Setana beihnaah i tlâwm ngai lo vang u. “Kawng ṭha famkimah chuan fing takin ka awm ang a: . . . ka in chhûngah thinlung ṭha famkim puin ka awm ang,” tia ziaktu fakna hla phuahtu Davida rilru ang chu i ṭawmpui zâwk ang u.—Sâm 101:2.
17. (a) Engvângin nge Jehova chuan a tâwpah sual inthupte chu a hai lan ṭhin? (b) Eng nge tih kan tum tlat ang?
17 Tûn laiah, Jehova chuan hmân laia tih châng a neih angin sual nasa tak leh inbumna te chu mak takin a phawrh chhuak tawh lo va. Chuti chung pawhin, thil engkim a hmu a, a hun ruatah chuan thil inthupte chu a hai lang a ni. Paula chuan: “Mi ṭhenkhat sual chu a langsâr a, an tuar nghâl bawk ṭhîn, ṭhenkhat erawh chu a lang lawk lêm lo,” a ti. (1 Tim. 5:24) Jehova’n thil sual tih a hai lan chhan ber chu hmangaihna vâng a ni a. Ani chuan kohhran a hmangaih a, kohhran thianghlimna chu vênhim a duh a ni. Chu bâkah, thil sual ti a, tûna inchhîr tak zette chungah zahngaihna a lantîr bawk. (Thuf. 28:13) Chuvângin, Pathian lama thinlung ṭha famkim vawng reng a, thununna ṭha lo zawng zawng hnâwl chu i tum tlat ang u.
Thinlung Ṭha Famkim Vawng Rawh
18. Lal Davida’n a fapa chu Pathian lama eng rilru put hmang nei tûrin nge a duh?
18 Lal Davida chuan a fapa Solomona hnênah: “I pa Pathian hi hria la, thinlung ṭha famkim leh rilru phûr takin a rawng bâwl ang che: LALPA chuan thinlung a en ṭhîn a, rilrua suangtuah zawng zawngte hi a hre vek a ni,” a ti a. (1 Chro. 28:9) Davida chuan a fapa chu Pathian rin mai aia tam ti tûrin a duh a ni. Solomona chuan Jehova’n a chhiahhlawhte a ngaihsakna nasa tak avânga lâwm tûrin a duh a. Chutiang chuan Jehova chungah i lâwm ve em?
19, 20. Sâm 19:7-11 sawi angin, engin nge Davida chu Pathian hnaih tûra ṭanpui a, engtin nge Davida chu kan entawn theih?
19 Jehova chuan rilru put hmang dik neite chu a lama hîpin an awm ang tih leh a mize duhawm takte an hriatna chuan amah nêna inlaichînna neih duhna a pe dâwn tih a hria a. Chuvâng chuan, Jehova’n amah leh a mize ropui takte kan hriat chu a duh a ni. Engtin nge kan hriat theih ang? A Thu zirna leh a malsâwmnate kan dawnna aṭangin kan hre thei a ni.—Thuf. 10:22; Joh. 14:9.
20 Pathian Thu chu ngaihhlutna leh tih tak zetna thinlungin nî tin i chhiar em? Bible thu bulte nupui a hlutna chu i hmu em? (Sâm 19:7-11 chhiar rawh.) Chutiang a nih chuan, Jehova i rinna leh amah i hmangaihna chu a ṭhang chho zêl ang. Tichuan, ani chuan a hnaih lehzual ang che a, i kut chelha kalpui ang maia sawi theih a ni ang. (Is. 42:6, 7; Jak. 4:8) Ni e, nunna kawngka zîm i zawh lai hian Jehova chuan malsâwm chein leh thlarau lama vênghim chein, a hmangaihna che chu a târ lang ang.—Sâm 91:1, 2; Mt. 7:13, 14. (w08 10/15)
Engtin Nge Kan Chhân Ang?
• Engvângin nge Jehova’n min enfiah?
• Engin nge mi ṭhenkhatte chu Pathian hmêlma nihtîr?
• Engtin nge Jehova chu kan tân a tak tih kan lantîr theih?
• Engtin nge Pathian lama thinlung ṭha famkim kan neih reng theih?
[Zirlai Atâna Zawhnate]
[Phêk 10-naa milem]
Engtin nge Jehova chuan fate ngaihsak tak pa ang maia min enkawl?