Jehova’n Tih Tak Zeta Ṭawngṭaina A Chhâng

“Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân.”​—⁠SAM 83:⁠18.

1, 2. Mi tam takte chuan eng thil nge an tawn a, eng zawhte nge zawh theih a nih?

KUM eng emawti kal ta khân, nu pakhat chu an vêng chhûnga chhiatna râpthlâk tak thleng chuan a tilungngai hle a. Ani chu Roman Katholic chhûngkuaa sei lian a ni a, ṭanpuina dîl tûrin tualchhûng puithiam hnênah a kal a; mahse, ani chuan biak pawh a lo be duh si lo. Chuvâng chuan Pathian hnênah: “Tunge i nih ka hre lo va . . . mahse, i awm ngei tih erawh ka hria. Khawngaih takin, nangmah hre tûrin min ṭanpui ta che!” tiin a ṭawngṭai a. Chu mi hnu lawkah chuan, Jehova Thuhretute chuan an va tlawh a, thlamuanna thu an hrilhin, a hriat châk êm êm thute chu an hrilh ta a ni. Thu dang tam tak bâkah, Pathianin hming a nei a, chu chu Jehova a ni tihte chu an zirtîr a. Chu mi a zirna chuan a rilru a khawih hle a ni. Ani chuan: “He Pathian hi a ni; ka naupan lai ata hriat ka lo châk êm êm ṭhina chu!” a ti.

² Mi tam takte chuan hetiang thiltawn hi an nei deuh vek a. Bible-a Sâm 83:18 an han chhiar hian, a vawi khatna atân Jehova hming chu an hmu chauh ṭhîn. Mizo Bible-ah chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin kan chhiar a ni. Mahse, Sâm 83-na ziak a nih chhan i ngaihtuah ngai em? Eng thilthlengin nge Jehova chu Pathian dik awmchhun a ni tih mi zawng zawngte chu pawm luihtîr ang? He fakna hla hian tûn laia kan tân eng thu nge a pai? He thuziakah hian hêng zawhnate hi kan ngaihtuah ang. *

Jehova Mite Chunga Phiarrûkna

3, 4. Sâm 83-na chu tu phuah nge ni a, eng hlauhawm chungchâng nge a sawi?

³ Sâm 83-na a chunga thuziakin a sawi dânin, chu fakna hla chu “Asapha fakna hla” a ni a. He fakna hla phuahtu hi Lal Davida lal laia rimawi tum thiam hming thang tak, Levia mi Asapha thlahte zînga mi a nih a rinawm hle. He fakna hlaah hian, a phuahtu chuan Jehova chu A lalchungnunna leh a hming hriattîr tûra hma la tûrin a ngên a. He fakna hla hi Solomona thih hnu lama phuah a ni ngei ang. Engvângin nge? Davida leh Solomona lal lai chuan, Tura lal chu Israelte hmêlma a la nih loh avângin. Sâm 83-na phuah a nih chuan, Tura khuaa awmte chuan Israelte chu an dovin, an hmêlmate lamah an ṭang tawh a ni.

⁴ Fakna hla phuahtu chuan Pathian mite tiboral tûra phiarrutu hnam sâwmte hming chu a târ lang a. Chûng hmêlmate chu Israelte hualvêlah an awm a, a hnuaia mi ang hian târ lan a ni: “Edom-ho leh Ismael-ho puan in te, Moab-ho leh Hagar-ho te; Gebal-ho leh Amon-ho leh Amalek-ho te; Philistia-ho Tura khuaa awmte nên: Asuri-ho pawh an lamah an ṭang ve a,” tiin. (Sâm 83:​6-8) Thilthleng chanchina a eng ber hi nge fakna hla phuahtuin a sawi chu? Ṭhenkhat chuan, Jehosaphata hun laia Amon te, Moab te, leh Seir Tlânga awm te ṭangrualin Israelte an beih chungchâng a sawina a nih an ring a. (2 Chro. 20:​1-26) Mi dangte erawh chuan, Israelin ram anga a din chhûng zawnga ṭhenawm ramte huat leh beih an tawhna chungchâng sawina a nih an ring thung.

5. Sâm 83-na chuan tûn laia Kristiante chu engtin nge a ṭanpui?

 ⁵ Eng pawh chu lo ni se, Pathian Jehova chuan he fakna hla hi Israel ram pum dinhmun hlauhawma a din laiin a thâwk khum a. He fakna hla hian, an chanchin tluan chhuaka tihboral tum hmêlmate beihna tâwk reng tûn laia Pathian chhiahhlawhte a thlamuan bawk a ni. Nakin lawka Magog rama Goga’n thlarau leh thutaka Pathian chibai bûktute tiboral tûra a sipaite a kohkhâwmna hnuhnûng ber a lo thlen hun chuan he fakna hla hian keini pawh mi tichak ve ngei ang.​—⁠Ezekiela 38:​2, 8, 9, 16 chhiar rawh.

A Thil Ngaih Pawimawh Ber Chu

6, 7. (a) Sâm 83-na ṭantirh lamah fakna hla phuahtu chu eng atân nge a ṭawngṭai? (b) Eng nge fakna hla phuahtu ngaih pawimawh ber chu?

⁶ Fakna hla phuahtuin ṭawngṭaia a rilru veizâwng a sawi chhuah hi han ngaithla teh: “Aw Pathian, ṭawng lovin awm suh ang che: Aw Pathian, ngawi reng suh la, awm hle hle lul suh ang che. Ngai teh, nangmah dotute chu an sa mur mur a: nangmah hawtute chu an dâk hrâw hrâw a. I mite hi vervêk takin an phiar a, . . . Thu khat vuain an inrâwn a; i chungah a chhe lama ti tûrin thu an intiam hlawm a,” tih hi.​—⁠Sâm 83:​1-3, 5.

⁷ Eng nge fakna hla phuahtuin a ngaih pawimawh ber? Amah leh a chhûngte himna chu a lungkham hle ngei ang a. Mahse, ṭawngṭainaa a ngaih pawimawh ber chu Jehova hming tihchhiatna leh A hmingpu hnamin a tawrh vauna hi a ni. He khawvêl hlui ni hnuhnûnga hrasatnate kan hmachhawn rual hian, chutiang thlîr dân inbûk tâwk chu i nei ve ang u.​—⁠Matthaia 6:​9, 10 chhiar rawh.

8. Hnamte’n Israel an phiarrûk chhan ber chu eng nge ni?

⁸ Fakna hla phuahtu chuan Israel hmêlmate thusawi chu la chhâwngin: “Hawh u, an hnam hloh khawpin i tiboral ang u! Israel-ho hming rêng rêng hi hriat renga a awm tawh lohna tûrin,” a ti a. (Sâm 83:⁠4) Chûng hnamte chuan Pathian mi thlante chu an va haw tak êm! Mahse, phiarrûk chhan dang an nei a ni. Israelte ram chu an ît a, uangthuang takin: “Pathian awmnate chu i luahsak ang u,” an ti a. (Sâm 83:12) Chutiang deuh bawk chu tûn laiah a thleng em? Thleng e!

‘I Chênna Hmun Thianghlim’

9, 10. (a) Hmân lai chuan, Pathian awmna hmun thianghlim chu eng nge ni? (b) Tûn laia hriak thih a la bângte leh “berâm dang” chuan eng malsâwmnate nge an dawn?

⁹ Hmân lai chuan, Ram Tiam chu Pathian chênna hmun thianghlim anga sawi a ni a. Aigupta aṭanga chhan chhuah an nih hnua Israelte’n hnehna hla an sak kha hre chhuak leh rawh: “Nangin i khawngaihnain mipui i tlante kha i hruai a: i chênna thianghlimah chuan i chaknain i hruai ta a,” tih chu. (Ex. 15:13) A hnuah, chu “chênna thianghlimah” chuan puithiamte rawngbâwlna biak in leh Davida lal thlahte’n Jehova lalṭhutthlênga ṭhua ro an rêlna a khawpui Jerusalem chu a tel a ni. (1 Chro. 29:23) Isua chuan chhan ṭha tak neiin Jerusalem chu “Lal ropui tak khawpui” tiin a ko a ni.​—⁠Mt. 5:⁠35.

¹⁰ Tûn lai huna Pathian hmun thianghlim chu eng nge ni? C.E. 33-ah hnam thar “Pathian Israelte” chu a lo piang a. (Gal. 6:16) Isua Krista hriak thih unaute hmanga din, chu hnam chuan tisa lam Israelte’n Pathian hming hriatpuitu ni tûra an tih tûr an hlen loh chu a rawn hlen ta a ni. (Is. 43:10; 1 Pet. 2:⁠9) An hnênah Jehova chuan hmân lai Israelte hnêna thu a tiam ang bawk chu a tiam a ni: “An Pathian ka ni ang a, anni pawh ka mite an ni ang,” tiin. (2 Kor. 6:16; Lev. 26:12) Kum 1919-ah, Jehova chuan “Pathian Israelte” zînga a la bângte chu dinhmun duhawm takah a hlângkai a, thlarau lam paradis an chenna thlarau lama rawngbâwlna hmun, chutih hun laia “ram” chu an luah ta a ni. (Is. 66:⁠8) Kum 1930 chho bâwr vêl aṭangin “berâm dang” mi maktaduai têlte chuan a va fin a. (Joh. 10:16) Tûn  laia hêng Kristiante hlimna leh thlarau lama hausakna chuan Jehova lalchungnunna dikzia chiang takin a finfiah a ni. (Sâm 91:​1, 2 chhiar rawh.) Chu chuan Setana chu a va tithinrim tak êm!

11. Pathian hmêlmate thiltum ber chu eng nge la ni chho zêl?

¹¹ He tâwpna hun chhûng zawng hian Setana chuan leia ama duhzâwng titute chu hriak thih a la bângte leh an ṭhian berâm dang te dodâl tûrin a chawk tho reng a. Chutiang dodâlna chu Europe Khaw Thlang lama Nazi hrân lai leh Europe Khaw Chhak lama Soviet Union Communist sawrkâr hnuaiah a thleng a ni. Chu chu ram dang tam takah pawh a thleng bawk a, a la thleng leh zêl ang, a bîk takin Magog rama Goga beihna hnuhnûng ber chhûngin a la thleng ang. Chu beihnaah chuan, dodâltute chuan tûn hmaa hmêlmate’n an lo tih ṭhin tawh angin, Jehova mite in leh lo leh an thil neihte chu an la chhuhsak mai thei a. Amaherawhchu, Setana tum ber chu Pathian min pêk hming mite’n an hriat tawh loh nâna min keh darhtîr hi a ni reng a ni. Engtin nge Jehova chuan chutianga a lalchungnunna chona chu a chhân lêt? Fakna hla phuahtu thusawi chu han en leh ta i la.

Tûn Hmaa Jehova Hnehnate

12-14. Megido khaw bula eng hnehna chanchin pahnih nge fakna hla phuahtuin a ziah?

¹² Jehova’n hmêlma hnamte remruatna a tisukuk thei a ni tih fakna hla phuahtuin a rinzia chu chhinchhiah rawh. Ani chuan Israelte’n hmân lai Megido khaw bula awm Megido phaizâwla hmêlmate nasa taka an hnehna thil thleng pahnih chu he fakna hlaah hian a telh a ni. Nipuiah chuan, chu phaizâwl kal tlanga kawi ngi ngiaia Kison Lui luanna hnu hma chu a hmuh theih a. Thlasik ruahpui a sûr hnuah erawh chuan, lui tui chuan phaizâwl chu a chîm vek a ni. Chuvâng chu a ni thei ang, chu lui chu “Megido tui” tia koh a nih bawk chhan chu.​—⁠Ro. 4:13; 5:⁠19.

¹³ Megido phaizâwl lehlam pangah chuan More tlâng a awm a. Chu chu rorêltu Gideona hun laia Midian-hote, Amalek-hote, leh khaw chhak fateho zawng zawng Pathian mite do tûra an punkhâwmna hmun a ni. (Ro. 7:​1, 12) Gideona sipai tlêm tête chu a tâwpah 300 lek an ni a; mahse, Jehova ṭanpuinain hmêlma sipai rual tam tak chu an hneh a ni. Engtin nge? Pathian kaihhruaina zuiin, anni chuan an meichher chhitte hliahkhuhtu hlum bêl kengin hmêlmate riah hmun chu zânah an hual a. Gideona’n a han hriattîr chuan, an hlum bêl ken chu an vaw keh a, vawi lehkhatah an meichher chhitte chu a lo lang ta thut mai a. Chutih ve leh, an tawtawrâwtte chu hâmin: “LALPA leh Gideona ngûnhnâm” tiin an au dûr dûr a. Chu chuan hmêlmate chu a tichiai a, anmahni a inthah tawntîr bawk a; a dam chhuakte chu Jordan Lui râl leh lamah an tlân chhe ta a ni. Chutah Israel mi dangte chuan hmêlmate chu an ûmpui ve a. A vaiin, hmêlma sipai 1,20,000 chu an that a ni.​—⁠Ro. 7:​19-25; 8:⁠10.

¹⁴ More tlâng hmâr lam mêl li vêla hla Megido phaizâwl leh lamah chuan, Tabor Tlâng a awm a. Chutah chuan Rorêltu Baraka chuan a hmain Israel sipai 10,000 chu Kanaan mi Hazor lal Jabina sipai lal Sisera kaihhruaite bei tûrin a lo hruai khâwm a. Kanaan sipaite chuan a ke ruala vir thîr hriam hlauhawm tak invuahna indo tawlailîr 900 an nei a. Israel sipai râl thuam ṭha nei lote chu Tabor Tlânga an han kal khâwm chuan, Sisera sipaite chu phaizâwla pungkhâwm tûra thlêm an lo ni ta a. Tichuan, “LALPAN Sisera leh, a tawlailîr zawng zawng leh, a sipaiho zawng zawngte chu . . . a tibuai ta nuai hlawm a.” Ruahpui vânâwn sûr thut chuan Kison Lui tui tilianin tawlailîr kete chu chirhdiakah a tântîr a nih a rinawm. Israelte chuan an zain an that ta vek a ni.​—⁠Ro. 4:​13-16; 5:​19-21.

15. (a) Fakna hla phuahtu chuan Jehova chu eng ti tûrin nge a ngen? (b) Pathian indona hnuhnûng ber hming chuan eng nge min hriat chhuahtîr?

¹⁵ Fakna hla phuahtu chuan Jehova chu a hun laia Israelte timang tûra vautu hnamte  chungah chutiang bawka thil ti ve tûrin a ngên a. Heti hian a ṭawngṭai a ni: “Anniho chu Midian-ho chunga i tih ang te, Kison luia Sisera chunga i tih ang te, Jabina chunga i tih ang te khân ti ve ang che: chu mite chu Endor khuaah an boral a; lei atân êkdûr ang mai an lo nih tâk kha,” tiin. (Sâm 83:​9, 10) Pathianin Setana khawvêl a dona tâwp ber chu Har–​Magedon, (“Megido Tlâng” tihna) a nih loh leh Armageddon tia koh a ni chu hriatthiam awm tak a ni a. Chu chuan Megido bula thleng indonate chu min hriat chhuahtîr a ni. Hmân laia chutianga Jehova hnehnate chuan Armageddon indonaah hnehna a chang ngei dâwn a ni tih min rinnghehtîr a ni.​—⁠ Thup. 16:​13-16.

Jehova’n Thiam A Chhan Nân Ṭawngṭai Rawh

16. Engtin nge tûn laiah hian dodâltute chu ‘zahnaa an khah’?

¹⁶ Hêng ‘ni hnuhnûng’ chhûng zawng hian Jehova chuan a mite chu tihboral tumna zawng zawng ata a humhim tlat a. (2 Tim. 3:⁠1) Chu mi avâng chuan dodâltute chu zahnain an khat a ni. Sâm 83:16 chuan chu mi chu: “Aw LALPA, i hming an zawn theih nân an hmêl chu zahnain tikhat ang che,” tiin a sawi lâwk a ni. Ram dang dangah, dodâltute’n Jehova Thuhretute ngawihtîr an tumna chu a hlawhchham ṭhak ṭhak zêl a. Chûng ramahte chuan, Pathian dik awmchhun betute nghehna leh chhelna chuan thinlung dik tak putute hnêna thu hrilh theihna kawng a hawng a, mi tam takte chuan ‘Jehova hming an zawng’ a ni. Tûn hmaa Jehova Thuhretute nasa taka tihduhdahna ram engemaw zâtah chuan lâwm taka Jehova faktu a sîng têl leh a nuai têl an awm tawh a ni. Jehova tân hnehna a va ni tak êm! A hmêlmate tân chuan thil zahthlâk a va ni tak êm!​—⁠Jeremia 1:19 chhiar rawh.

17. Mihringte’n eng dinhmun khirh tak nge an hmachhawn a, eng thute nge nakin lawkah kan hriat chhuah dâwn?

¹⁷ Dodâltute chuan min la tiduhdah zêl dâwn tih chu kan hre ngei mai. Dodâlna chu tâwk mah i la, chanchin ṭha chu kan hril zawm zêl a. (Mt. 24:​14, 21) Mahse, chûng dodâltute tâna inchhîra chhandam nih theihna hun remchâng tûna inhawng mêk chu nakin lawkah a inkhâr thuai ang. Jehova hming tihthianghlimna chu mihringte chhamdamna aiin a pawimawh hle zâwk a ni. (Ezekiela 38:23 chhiar rawh.) Pathian mite tiboral tûra leia hnam tinte an kal khâwm hunah chuan, hêng fakna hla phuahtu ṭawngṭaina thute hi kan hre chhuak ngei ang: “Kumkhuain mualpho leh mangang takin awm sela; a ni, tihzaha awmin boral rawh se,” tih hi.​—⁠Sâm 83:⁠17.

18, 19. (a) Jehova lalchungnunna dodâl tum tlattute chu engin nge nghâk reng? (b) Engtin nge Jehova lalchungnunna thiam chhantîrna hnuhnûng ber chuan a nghawng che?

¹⁸ Jehova lalchungnunna dodâl tum tlattute chu tâwpna zahthlâk takin a hmuak reng a ni. Pathian Thu chuan “chanchin ṭha âwih lo mite” chuan “chatuana boralna chu” an tâwk ang tih a târ lang​—⁠chu chanchin ṭha an âwih lohna chu a ni, Armageddon-a tihborâl an nih chhan chu. (2 Thes. 1:​6-10) An boralna leh thutaka Jehova betute dam khaw chhuahna chu, Jehova hi Pathian dik awmchhun a nihzia  chiang taka târ langtu a ni ang. Khawvêl tharah chuan chu hnehna chu theihnghilh a ni ngai lo vang. ‘Mi fel leh fel lote thawhlehnaa’ telte chuan Jehova thiltih ropui takte chu an la zir ang. (Tirh. 24:15) Khawvêl tharah, anni chuan Jehova lalchungnunna hnuaia nun a finthlâkzia chiang takin an la hmu ang a. Tin, an zînga mi inngaitlâwmte chuan, Jehova chu Pathian dik awmchhun a ni tih an ring nghâl thuai bawk ang.

¹⁹ Kan Pa vâna mi duhawm takin amah chibai bûktu mi rinawmte tâna a buatsaih nakin hun tûr chu a va ropui tak êm! Jehova hnêna fakna hla phuahtu ṭawngṭaina: “[I hmêlmate chu] kumkhuain mualpho leh mangang takin awm sela; a ni, tihzaha awmin boral rawh se: nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tih chu a tâwp ber atâna chhâng thuai tûra Jehova hnêna ṭawngṭai tûra chêttîrin i awm a ni lâwm ni?​—⁠Sâm 83:​17, 18. (w08 10/15)

[Footnote]

Kan Hrilhfiah Thei Em?

• Sâm 83-na ziak a nih lai khân Israelin eng dinhmun nge a tawh?

• Sâm 83-na ziaktuin eng nge a ngaih pawimawh ber?

• Tûn laiah tute’n nge Setana huat hlawh?

• Engtin nge Jehova chuan Sâm 83:​18-a ṭawngṭaina chu a tâwpa a chhân ang?

[Zirlai Atâna Zawhnate]

[Phêk 19-naa map]

(A lan dân tûr dik tak hriat nân, a lehkhabu en rawh)

Engtin nge hmân lai Megido kianga indona thlengte chuan kan nakin hun tûr nên inkûngkaihna a neih?

Kison Lui

Haroseth

Karmel Tlâng

Jezreel Phaizâwl

Megido

Taanak

Gilboa Tlâng

Harod Tuichhunchhuah

More Tlâng

En-dor

Tabor Tlâng

Galili Tuipui

Jordan Lui