Kan Pa Vâna Mi Chu Mi Eng Ang Nge A Nih?

MI TAM takte chuan Isua’n a zirtîrte hnêna Lal Ṭawngṭaina a hrilh chu an sawi chhuak thei a. (Matthaia 6:​9-13) Chu ṭawngṭaina an sawi chhuah apiangin, Pathian chu “Kan Pa,” tiin an ko a ni. Mahse, amah hre chiang nia insawi thei mi eng zât tak awm ang maw?

Pathian hre chiang niin i inhre ve em? Pathian chu eng angin nge i hriat chian? Amah nêna inlaichînna nghet i neiin, amah chu i biain, leh i hlimna leh lungngaihna te chu i hrilh em? Pathian hria tih awmzia dik tak chu eng nge ni?

“A Hming Chu Jehova A Ni”

Nautê chuan a pa chu “A Pa,” tih ringawtin a hria pawh a ni thei a. Mahse, a lo ṭhan chhoh chuan, a pa hming leh a nihna dik takte pawh lo hriain a chhuang ta hle pawh a ni thei. Vâna mi Nunna Min Petu chungchâng ve hi le? A hming leh a hming awmzia chu i hria em?

Mi tam tak chuan Lal Ṭawngṭaina chu an chham nawn tlut tlut a, chutah chuan, “I hming zahawm rawh se,” tih thu a tel a ni. Mahse, “Chu hming chu eng nge ni?” tia zawh an nih hunah a chhânna chu an hre lo mai thei. Arsi bâwm chiai vân zau tak te, tlâng ropui tak te, leh nunna nei thil nung chi hrang hranga khat tuipui te​—⁠hêng zawng zawngte hian Pathian a awm a ni tih finfiahna a pe a ni. Mahse, chûng chuan a hming erawh min hriattîr lo. Chu hming hre tûr chuan, Bible kan râwn a ngai a ni. Chu chuan tâwi fel takin: “A hming chu Jehova a ni,” a ti.​—⁠Exodus 15:​3, New World Translation.

Pathian chuan a hming Jehova tia amah kan hriat chu a duh a ni. Engvângin nge? A hming chuan a nihna a ken tel vâng a ni a. A hming awmzia chu a ngial a ngana sawi chuan: “A Nihtîr” tihna a ni. Thu danga sawi chuan, ani chu a thiltumte tihhlawhtlin nân a ṭûl ang apiang a innihtîr ṭhîn. Hetiang kawng hian ngaih tuah rawh: A chhûngkaw enkawl nân, pa ber chu a chhûngkaw mamawh dân leh dinhmun azirin sum la lûttu, zilhna petu, rorêltu, palai, humhimtu, leh zirtîrtu a ni a. Chutiang bawk chuan, Jehova hming chuan Pathianin nakinah engpawh lo thleng se, a rawngbâwltu zawng zawngte malsâwmna atân a duhzâwng a hlen chhuak thei a ni tih min tiam a ni.

Hmangaihna nei tak Pathianin a hming awmzia nêna inrema chanvo chi hrang hrang a chelh dân i lo ngaihtuah ang u. Chu chuan Pathian Jehova nihna leh amah hnaih tûra kan tih tûrte hre thiam tûrin a ṭanpui ang che.

“Hmangaihna leh Remna Pathian”

Tirhkoh Paula chuan min Siamtu chu “hmangaihna leh remna Pathian,” tiin a ko va. (2 Korinth 13:11) Engvângin nge? Isua Krista chuan a hmain: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a lo sawi tawh a. (Johana 3:16) Mihringte a hmangaihna nasa tak avângin, Pathian chuan a Fapa mal neih chhun chu tlanna atân a pe a, amah ringtute tân tâwp nei lo nun leh sual rah chhuah natna  leh hrehawm tawrhna ata zalênna chu neih theihin a siam a ni. Chuvângin Paula chuan: “Sual man chu thihna a ni si a; Pathian thilthlâwnpêk erawh chu kan Lalpa Krista Isua zârah chuan chatuana nunna a ni,” tiin a sawi. (Rom 6:23) Chu chuan Pathian hmangaih tûr leh amah hnaih tûrin min chêttîr a ni lâwm ni?

Pathian chuan a hmangaihna chu mihring zawng zawngte chungah vai hmera a lantîr mai ni lovin, mi rinawmte chungah pawh a mi malin a lantîr bawk a ni. Hmân lai Israel thuâwih lo fote hnênah, Mosia chuan: “Aw mi â leh fing lote u, chutin maw, LALPA chu in thungrulh dâwn? A hringtu che, i pa a ni lâwm ni? A siam chia, a din nghet che,” a ti. (Deuteronomy 32:⁠6) Chu thu pawimawhna chu i hria em? Hmangaihna nei tak Pa ber a nih angin, Jehova chuan a mite an ṭha famkim lo tih hre reng chung pawhin a ngaihsak a. Tin, an mamawh tak sum leh pai lam, rilru lam, leh thlarau lam thil zawng zawngte chu a pe a ni.

Nunah hian hun khirh leh hun hlimawm tam tak kan tâwn tlang ṭheuh va, a châng chuan kan lungngaiin, kan lunghnual hial ṭhîn. Kan dinhmun leh buainate hriat thiamna nêna en thiam tûra tuemawin min ṭanpui chu kan ngai a ni. Tuin nge min ṭanpui thei ang? Jehova chuan a Thu, Bible hmangin zilhna duhawm tak leh ngaihsakna min pe a. Chu Lehkhabu Thianghlim chuan hetiang khawpa hrehawm kan tawrh chhan leh hlawhtling taka tawrh chhuah dân min hrilhfiah a ni. Pain a tlûk avânga intina palh a fapa chu hmangaih taka a ṭanpui angin, Jehova chuan min hmangaihna nasa tak avâng chuan kan mamawh ṭanpuina min pe tûrin a intihniam a tih theih a ni. A chunga rinawmte lakah chuan Jehova kut chu tihtâwiin a awm lo.​—⁠Isaia 59:⁠1.

Pathian hmangaihna chu “ṭawngṭaina ngaithlatu” a nihnaah pawh hian a lang bawk. (Sâm 65:⁠2) Chu chu engtin nge a nih theih? Tirhkoh Paula chuan heti hian a hrilhfiah a ni: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin. (Philippi 4:​6, 7) Pathian hnêna tih tak zeta ṭawngṭaiin leh a Thua kaihhruaina min pêkte zâwmin nang ngei pawhin “thlamuanna, rilru rêng rênga hriat sên loh” chu i nei ve thei a ni.

“Hriatna Famkim Nei” Pathian

Bible chuan Pathian Jehova chu “hriatna famkim nei” angin a sawi a. Chutiang a nih avângin mihringte zia leh an mamawh chu tu dang ai pawhin a hria a ni. (Joba 36:⁠4) A chhiahhlawh Mosia kal tlangin, a ni chuan “mihring hi chhang chauhvin an nung lo va, LALPA kâa thu tin chhuakin an nung zâwk a ni,” tih a puang a. (Deuteronomy 8:3; Matthaia 4:⁠4) Chu mi awmzia chu kan nuna lungawina dik tak nei tûr chuan, khawvêl lama hausakna ni lovin, thil dang mamawh kan nei a ni.

Siamtu chuan a Thu, Bible kal tlangin, kaihhruaina leh zilhna hlu takte min pe a. Bible kan zir a, a zilhna thute kan nunpui hian, ‘Jehova kâa thu tin chhuak’ chu kan hlâwkpui a ni. Entîr nân, Kristian hmeichhia Zuzanna-i chuan an chhûngkaw nun chu heti hian a sawi a ni: “Bible chhiar dunna te, Kristian inkhâwma tel dun te, leh mi dangte  hnêna kan rinna hrilhna te hian kan inneihna chu a tinghet a ni. Thlarau lama Pathian kaihhruaina avângin, thiltum inang kan neiin, inlaichînna nghet tak kan nei bawk,” tiin.

Pathian pêk thlarau lam zilhna leh kaihhruaina te chu hlâwkpui i duh em? Bible zir ziahna leh a zilhna thute nunpuina aṭangin, Pathian pêk thlarau lama malsâwmna tam tak i dawng ang.​—⁠Hebrai 12:⁠9.

“Chhandamtu Pathian”

Tûn lai khawvêl hi innghirnghonain a khat a. Nakin huna thil lo thleng tûr hre thei tumah kan awm lo. Indona rama chêng i nih chuan, remna i thlahlel hle ang. Khawvêl hmun dang tam takahte chuan, mite chu dân bawhchhiatna leh tharum thawhna te, ei leh bâr lama ngelngheh lohna te, leh firfiaka chehote thiltihte hlau rêng rêngin an khawsa a ni. Hêng zawng zawng ata hi tuin nge min humhim thei ang? Tûn hma zawng aia nasain, mihringte chuan vênhim leh chhan chhuah an mamawh a ni.

Bible chuan: “LALPA [Jehova] hming chu kulhpui a ni a, mi fel chu a tlân lût ṭhîn a, a him ṭhîn,” a ti. (Thufingte 18:10) Pathian hming hriatna leh a hminga innghahna chuan amah ringtute chhan chhuah nâna thil a lo tih tawhte leh a la tih tûrte min ngaihtuahtîr thei a ni. Pathian Jehova chuan a mite a chhan chhuak thei a ni tih rinhlelh rual lohva chiangin a târ lang tawh a. Entîr nân, Pharaoa indo tawlailîrte leh a sipaihote tiboralin, Israelte chu a chhan chhuak a. Jehova chu Pathian rinawm leh hrehawm tuarte hretu leh an tâna thil tihsak duhtu Pathian a ni.​—⁠Exodus 15:​1-4.

Kan chatuan hma bâk chu Chhandamtu anga Pathian Jehova rinnaah a innghat bawk. Harsatna tam tak tâwktu hmân lai Israel Lal Davida chuan chutiang rinna chu: “Nang chu mi chhandamtu Pathian i ni,” tia Jehova chungchâng a ziak khân a lantîr a ni. (Sâm 25:⁠5) Petera chuan: “Lalpa chuan amah ngaihsaktute chu thlêmna ata chhan chhuah dân . . . a hria,” tiin rinnghehna nên a sawi a ni.​—⁠2 Petera 2:⁠9.

Pathianin a ṭanpuina zawngtu hnênah: “Ka hming a hriat avângin hmun sângah ka hlâng ang,” tiin a tiam a, chu chu ka vênghim ang a tihna a ni. (Sâm 91:14) Tûn laia Pathian chhiahhlawhte chuan chu thutiam rin tlâkzia chu mahni ngeiin an tawng a ni. Poland rama awm Henryk-a chuan dodâlna leh tihduhdahna kârah kum 70 chhûng rinawm takin Jehova rawng a bâwl tawh a. Kum 16 mi lek a nih laiin, a pa chu Auschwitz concentration camp-a tântîr a ni. Henryk-a leh a unaupa erawh chu Nazi-hovin naupangte an siam ṭhatna hmuna dah an ni a. Chu mi hnuah chuan, concentration camp chi hrang hranga thawn kual a ni. Chûng lai hun chungchângah chuan, Henryk-a chuan: “Ka hrehawmna zawng zawngah Jehova chuan  min kalsan ngai lo. Thihna chu hmaichhanah vawi tam tak tâwk mah ila, rinawm reng tûrin ani chuan min ṭanpui reng ṭhîn,” a ti. Ni e, Jehova chuan a chhiahhlawhte hnênah an tawrh theih nâna mamawh rinna leh chakna a pe reng ṭhîn a ni.

Rei lo têah, Pathian chu amah ring a, a chhan chhuahna beiseitu zawng zawngte tân Chhandamtu a ni ang a. Heti hian a puang a ni: “Keimah ngei hi, LALPA chu ka ni: keimah lo chu chhandamtu rêng rêng an awm lo,” tiin. (Isaia 43:11) Ani chuan ‘Pathian Engkimtitheia ni ropuia indonaah’ mi suaksual zawng zawng leilung ata tiboralin, mi tluangte chu a chhan chhuak ang. (Thu Puan 16:​14, 16; Thufingte 2:​21, 22) Jehova chuan: “Thuhnuairawlhte erawh chuan ram hi an luah ang a: remna chênin an hmuingîl ang,” tih min tiam bawk.​—⁠Sâm 37:⁠11.

“Pathian Fate” Ni Ang Che

Zâwlnei Malakia hun laiin, Israelte chuan Jehova chu an Pa niin an chhâl a. Mahse, a hnêna chawimawina leh inpêkna lamah erawh, chhang bawlhhlawh leh ran kebai leh a silawngte a hnênah an hlân a ni. Chuvâng chuan a ni, Jehova chuan an hnênah: “Kei hi pa ka nih chuan mi chawimawina chu khawiah nge?” tiin a zâwt a ni.​—⁠Malakia 1:⁠6.

Israel mi rinawm lote thil tihsual ang chuan tisual ve suh. Pathian Jehova chungchâng zira amah hnaih hlauh zâwk tûrin kan fuih che a. Zirtîr Jakoba chuan: “Pathian hnaih rawh u, tichuan anin a hnaih ang che u,” tiin a fuih bawk che a ni.​—⁠Jakoba 4:⁠8.

Pa anga Jehova neihna chuan kan chungah mawhphurhna ṭhenkhat a nghat a. I nun kawng engkima a tehnate rinawm taka zawmna hmanga Pathian chawimawi i tum chuan, chutianga ṭan i lâkna chu a theihnghilh ngai lo vang. Ani chuan ‘thihna a awm leh thei tawh lo vang a, lungngaih te, ṭah te, nat te pawh a awm tawh hek lohna’ a thutiam khawvêl thara hruaitu tûr kawng ngîl zawh tûrin a ṭanpui ang che. (Thu Puan 21:⁠4) Chutih hunah chuan, thuâwih mihring zawng zawngte chu “chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn” a ni.​—⁠Rom 8:21. (w08 9/1)

[Phêk 5-naa thu lâk chhuah]

Pathian chuan “A Nihtîr” tih awmze nei a hming, Jehova tia kan hriat a duh

[Phêk 6-naa thu lâk chhuah]

“Ka hrehawmna zawng zawngah Jehova chuan min kalsan ngai lo.”​—⁠HENRYK-A

[Phêk 7-naa thu lâk chhuah]

“Bible chhiar dunna te, Kristian inkhâwma tel dunte, leh mi dangte hnêna kan rinna hrilhna te hian kan inneihna chu a tinghet.”​—⁠ZUZANNA-I