Nun Hlutna Ka Hre Ta

APRIL 16, 2007 ZING LAM A NI A. Virginia Polythechnic Institute and State University, a nih loh leh Virginia Tech tia an kohva awm in chhâwng thumnaa Noris Hall kil khata awm ka office-ah chuan hna thawkin ka bung nghâl char char a. Chutih lai tak chuan kan nî tin nun hlu tak avânga lâwm hliah hliah tûr kan nihzia hriatnawntîr ka ni leh ta a ni.

Ka office aṭanga in chhâwng hnihnaah ka lehkha thawn dawnte va lam tûra kal chhuah ka tum mêk lai chuan, professor pakhatin a computer a ṭhat loh avângin ṭanpui a rawn dîl a ni. A office-a kan luh dâwn ve leh, in chhâwng hnihna aṭang chuan silai puak ri zut zut mai chu kan hre ta. Eng thil nge thleng tih kan hriat loh avângin, a office chhûngah lût sawk sawkin, kawngka kan kalh a, kan chungah eng nge lo thleng dâwn tih hre lovin, mangang takin kan nghâk ringawt mai a ni. Office kil khatah kalin Jehova hnênah ka thinlung ka leihbua a, kan hmaa thil lo thleng thei engpawh laka min kaihruai tûrin ka ṭawngṭai a.

Chutianga kan nghah mêk lai chuan, kum 15 lai kal taa thilthleng chu ka rilruah a lo lang zut zut mai a. Chutih lai chuan motor siamna dâwr pakhatah khâwl lam khawihtu angin hna ka thawk a ni. Ka hnathawhpui pakhat ken thlêng dara awm petrol chu a alh ta phut mai a. Mangang lutuk a tih ngaihna hre lo chuan ka hmaiah tak a rawn theh phei ta mai! Mei alh leh mei khu chu ka hîp lût a, ka taksa chung lam chu nasa takin a kâng a. Helicopter hmanga kâng enkawlna hmuna hruai ka nih hnuah, ICU-ah thla thum leh a chanve lai ka awm a. Thla nga chhûng enkawl hrep ka nih hnuah chuan, inah ka haw ve thei ta a, ka dam khawchhuah avâng ringawt pawhin ka lâwm hliah hliah a ni. Chu ka thiltawn chuan nî tina kan nunna hi thil hlu tak anga thlîr dân min zirtîr a. Chu chuan ka nun chu min petu Pathian Jehova rawngbâwlnaah a Thuhretute zînga mi anga hman ka tumna chu a tinghet sauh bawk.​—⁠Sâm 90:12; Isaia 43:⁠10.

Ka hliamna avânga motor siam hna ka thawh theih tâk lohvah chuan, computer hman dân zirin Virginia Tech hmunah hna ka thawk a. Chuvâng chu a ni, chu mi zînga Horis Hall-a ka awm chhan chu ni.

Silai kah ri kan ngaihthlâk lai chuan, U.S. ram chanchina silaia tualthahna âtthlâk ber leh hlauhawm ber chu kan awmna in chhâwng hnuai chiahah a thleng a ni tih rêng kan hre pha lo. Chu tualthahna chu, silai chelektuin pawisawi lo mi 32 a thah hnua amah leh amah a inkahhlum hnuah a tâwp ta chauh va. Chu thilthleng a inṭan aṭanga minute 20 vêlah, police an lo thleng tih kan hre thei ta. Anni chu kan au va, hmun himah min hruai ta a ni.

He thiltawn râpawm tak hian nun a tawizia leh kan chunga thil lo thleng tûr kan hriat lohzia min zirtîr a ni. (Jakoba 4:14) Nunna Petu, Pathian Jehova rinchhan tlat leh, kan nî tin nun chu a thil min pêk hlu tak anga thlîr chu a va pawimawh tak êm!​—⁠Sâm 23:4; 91:⁠2. (w08 9/1)

[Phêk 29-naa Thlalâk Hawhtîrtu]

AP Photo/The Roanoke Times, Alan Kim