Tita, Philemona, leh Hebraite Hnêna Lehkha Thawnte Aṭanga Thu Pawimawh Hrilhfiahna
Jehova Thu Chu A Nung
Tita, Philemona, leh Hebraite Hnêna Lehkha Thawnte Aṭanga Thu Pawimawh Hrilhfiahna
VANTLANG kum chhiar 61-a Rom khuaa a tân hmasak berna ata a chhuah hnu lawkah, tirhkoh Paula chuan Kret thliarkâr a va tlawh a. Chuta kohhran dinhmun chu a hriat avângin anmahni tichak tûrin Tita chu a hnutchhiah a. A hnuah, Paula chuan Tita hnênah a rawngbâwlnaa kaihruaina pe tûr leh Paula thuneihna hnuaia thawk a nihzia hriattîr tûrin lehkha a thawn a, chu chu Makedonia aṭanga a ziah a nih ngei a rinawm.
C.E. 61-a a tânna aṭanga a chhuah hma lawk khân, Paula chuan Kolossa khuaa awm Kristian unaupa, Phillemona hnênah lehkha a thawn a. Chu chu ṭhian ṭha hnêna thil ngenna, mi mal lehkha thawn a ni.
Paula chuan C.E. 61 vêlah, Judai rama Hebrai ringtute hnênah Juda sakhuana aia Kristianna a chungnun zâwkzia târ langtu lehkha a thawn bawk a. Hêng lehkha thawn pathumahte hian kan tâna zilhna thu ṭangkai takte a tel a ni.—Heb. 4:12.
RINNAAH CHAK TAKIN AWM RENG RAWH
(Tit. 1:1–3:15)
Paula chuan Tita chu ‘khaw tina upate ruat tûra’ kaihhruaina a pêk hnuah, “rinnaah chuan an dik [“chak,” NW] theihna tûrin na takin zilhhau rawh,” tiin a hrilh a. Kret thliarkâr kohhrana awm zawng zawngte chu ‘Pathian ngaihsak lohna bânsan a, rilru fel tak pua awm tûrin’ a fuih a ni.—Tita 1:5, 10-13, 14; 2:12, 13.
Paula chuan Kret thliarkâra awm unaute chu thlarau lama an chak reng theihna tûrin zilhhauna thu a pêk belhchhah a. Tita chu “zawhna âtthlâk te, . . . Dân thua insualna te chu hawisan zêl” tûrin a zirtîr bawk.—Tita 3:9.
Bible Chungchânga Zawhnate Chhânna:
1:15—Engtin nge “engkim” chu “mi thianghlimte tân . . . a thianghlim” theih a; mahse, “mi bawlhhlawh leh ring lote tân” a bawlhhlawh theih? A chhânna hre tûr chuan Paula’n heta “engkim” a tih awmzia chu kan hriat phawt a ngai a ni. Ani chuan Pathian thuin a dem thilte chungchâng a sawina ni lovin, ringtute’n anmahni chhia leh ṭha hriatna azira thutlûkna chi hrang hrang an siam theihte chungchâng a sawina a ni zâwk. Pathian tehnate nêna inmila thil ngaihtuahtu tân chuan chûng thilte chu a thianghlim a. Chhia leh ṭha hriatna thiang nei lo leh ngaihtuahna bawlhhlawh neite tân chuan chutiang chu a ni ve lo. *
3:5—Engtin nge hriak thih Kristiante chu “siamtharna silna” leh ‘thlarau thianghlima chhandam’ an nih? Anni chu Pathianin tlanna atâna Isua thisen chhuak hmanga a sil, a nih loh leh a tihthianghlim avângin “siamtharna silna” hmanga chhandam an ni a. Pathian thlarau lam faa hrin “thil siam thar” an nih avângin, anni chu ‘thlarau thianghlima chhandam’ an ni.—2 Kor. 5:17.
Kan Zir Tûrte:
1:10-14; 2:15. Kristian upate chuan kohhrana thil dik lo awmte chu huai takin an siam ṭha tûr a ni.
2:3-5. Kum zabi khatna angin, tûn laia Kristian unaunute chu “an awm dân rênga Pathian zah mite niin, hêktute leh uain heh mite ni lova, ṭha lam zirtîrtute” an ni tûr a ni. Chutiang kawng chuan, anni chu kohhrana “la nula deuhte” a mi mala zirtîrnaah ṭangkai tak an ni thei.
3:8, 14. ‘Thil ṭha tih zêl ngaihtuahna’ chuan, Pathian rawngbâwlnaah rah ṭha chhuah tûr leh khawvêl suaksual laka inla hrang reng tûra min ṭanpui avângin “a ṭhain a sâwt a ni.”
‘HMANGAIHNA ṬANCHHANA’ NGENNA
(Philm. 1–25)
Philemona chu “hmangaihna leh rinna” kawnga entawn tlâk a nih avânga fak a ni a. Kristianpuite tihahdamtu a nihna chu Paula tân ‘hlimna leh thlamuanna’ a ni.—Philm. 4, 5, 7.
Kohhran enkawltu zawng zawngte tâna entawn tûr ṭha siamin, Paula chuan Onesima chungchânga rilru tina hma thei tak thil chu thupêk hmang lovin, ‘hmangaihna ṭanchhana’ fuihin, a chingfel a ni. Philemona hnênah chuan: “Ka sawi aia nasa zâwk mahin i ti ang tih ka hriat avângin, i âwih ringin i hnênah ka ziak a nih hi,” a ti.—Philm. 8, 9, 21.
Bible Chungchânga Zawhnate Chhânna
10, 11, 18—Engtin nge tûn hmaa mi “ṭangkai lo” Onesima chu tûna “a ṭangkai” tâk? Onesima chu Kolossa khuaa Philemona in ata Rom khuaa tlân chhia bâwih awm ṭha duh lo a ni a. Ani chuan mêl 900 laia hlaa a tlân chhiat theih nân a pu sum ṭhenkhat a rûksak a rinawm hle bawk. Dik tak chuan, Philemona tân mi ṭangkai lo a ni. Mahse, Rom khuaah chuan Paula chuan Onesima chu Kristian ni tûrin a ṭanpui a. Tûna thlarau lam unau a lo nih tâkah chuan, tûn hmaa mi “ṭangkai lo” tak chu a lo “ṭangkai” ta a ni.
15, 16—Engvângin nge Paula chuan Philemona hnênah Onesima chu chhuah zalên tûra a ngen loh? Paula chuan a hnathawh tûr ‘Pathian ram thu hrilh leh Lal Isua Krista thu zirtîr’ chauh thawh chu a duh a. Chuvângin, sal neih nêna inkûngkaih khawvêl lam thila inhnamhnawih loh chu a thlang a ni.—Tirh. 28:31.
Kan Zir Tûrte:
2. Philemona chuan a in chu Kristian inkhâwmna hmun atân a pe phal a. Thlawhhma rawngbâwlna atâna inhmuh khâwm nâna kan in hman phal chu chanvo hlu a ni.—Rom 16:5; Kol. 4:15.
4-7. Rinna leh hmangaihna kawnga entawn tlâk kan unaute fakna kawngah hma kan hruai tûr a ni.
15, 16. Kan nuna thil duhawm lo tak lo thlengte chu nasa taka lungkham phah nân kan hmang tûr a ni lo. Onesima chunga a thlen angin, thil duhawm lo chu thil ṭha takah a inher chhuak thei a ni.
21. Paula chuan Philemona’n Onesima a ngaihdam a beisei. Min tilungni lotu unaute ngaidam tûra beisei kan ni ve bawk.—Mt. 6:14.
“PUITLIN LAM I PAN ANG U”
(Heb. 1:1–13:25)
Isua inthawina chu Dân thiltihte aia a chungnun zâwkzia târ lan nân, Paula chuan Isua chu Kristianna Dintu a nihna te, puithiam a nihna te, a inthawina te, leh thuthlung thar chungchâng te ṭhatzia chu a sawi uar a. (Heb. 3:1-3; 7:1-3, 22; 8:6; 9:11-14, 25, 26) He hriatna hian Hebrai Kristiante chu Judate kuta an tawrh tihduhdahnate hmachhawn tûrin a ṭanpui ngei ang le. Paula chuan Hebrai mi a rinpuite chu ‘puitlin lam pan’ tûrin a fuih a ni.—Heb. 6:1.
Kristian tân rinna chu eng anga pawimawh nge ni? Paula chuan: “Rinna lovin [Pathian] lâwmzâwng mi nih rual a ni lo,” tiin a ziak a ni. Hebrai mite chu: “Kan hmaa intlânsiakna tûr awmah hian chhel takin i tlân zêl ang u,” tiin a fuih a. Chutah chuan rinnaa tlân tûr a ni.—Heb. 11:6; 12:1, 2.
Bible Chungchânga Zawhnate Chhânna:
2:14, 15—Setana chu “thihna thuneitu” tia kohna chuan a duh apiang chu a tiboral hlen thei tih a târ lang em? Târ lang lo ve. Amaherawhchu, Eden huana suahsualna kawng a zawh ṭan aṭangin, Adama sualin mihring fate chunga sual leh thihna a thlen avângin, a dâwt sawi chuan thihna a thlen a ni. (Rom 5:12) Chu bâkah, lei lama Setana ṭhuihhruaite chuan Isua chunga an lo tih tawh angin, Pathian chhiahhlawhte chu thi hial khawpin an tiduhdah a. Mahse, chu chu Setana chuan a duh apiang tihboral nân thiltihtheihna pumhlûm a nei tihna erawh a ni lo. Chutiang chu ni se chuan, Jehova betute chu hmân ata a tiboral phiar tawh ang. Jehova chuan a mite chu a huhovin a vênghim tlat a, Setana’n a nuai bo ṭhak a phal ngai lo. Pathian chuan kan zînga ṭhenkhat chu Setana beihna hnuaia kan thih a phal a nih pawhin, kan chunga chhiatna lo thlengte chu a sût thei a ni tih kan ring tlat thei a ni.
4:9-11—Engtin nge ‘Pathian chawlhnaa kan luh’? Thil siam ni rukna tâwpah, Pathian chuan lei leh mihringte chungchânga a thiltum chu a hlawhtling dâwn tih ring tlat chungin a thil siamna hna chu a chawlh san a. (Gen. 1:28; 2:2, 3) Mahni thiam inchantîr tumna thiltihte bânsanin leh chhandamna atâna Pathian ruahmanna siam chu pawmin, ‘chu chawlhnaah chuan kan lût’ a ni. Mahni ṭhatna tûr zawn aia Jehova ring chunga thuâwih taka a Fapa hnung kan zui hian, nî tin hahdamna leh malsâwmna kan dawng a ni.—Mt. 11:28-30.
9:16—Tunge thuthlung thar atâna ‘thuro chhiahtu’ chu? Jehova chu thuthlung thar Siamtu a ni a, Isua chu ‘thuro chhiahtu’ a ni thung. Isua chu thuthlung Palai a ni a, a thihna hmangin chu thuthlung tihnun nâna ngai inthawina chu a pe a ni.—Lk. 22:20; Heb. 9:15.
11:10, 13-16—Abrahama chuan eng “khua” nge a nghah? Hei hi khua tak tak ni lovin, entîr neia hman a ni. Abrahama chuan Krista Isua leh a rorêlpui mi 1,44,000 te hmanga din “vân Jerusalem” chu a lo nghâk reng a. Vân ropuina chang hêng rorêlpuite hi “khaw thianghlim, Jerusalem thar,” tia koh an ni. (Heb. 12:22; Thup. 14:1; 21:2) Abrahama chuan Pathian Ram rorêlna hnuaia nun chu a nghâk a ni.
12:1, 2—Isua’n ‘nghaisakna ban a tawrh’ chhan ber a “hmaa hlimna awm” chu eng nge ni? Chu chu Jehova hming tihthianghlimna te, a lalchungnunna thiam chantîrna te, leh thihna ata mihring fate chhuah zalênna te pawh tiamin, a rawngbâwlnain a tihhlawhtlin tûrte hmuh avânga hlimna a ni. Isua chuan a lâwmman dawn tûr, Lalber anga ro a rêl hun leh Puithiam Lala a ṭan hun tûr pawh a nghâkhlel ve bawk.
13:20—Engvângin nge thuthlung thar chu ‘chatuana’ awm tûr anga sawi a nih? Chhan pathum a nei a, chûngte chu: (1) A danga thlâk a ni ngai lo vang a, (2) a thil tihhlawhtlinte chuan chatuan a daih ang; tin, (3) “berâm dang” chuan chu thuthlung chu Armageddon hnuah pawh an la hlâwkpui zêl ang.—Joh. 10:16.
Kan Zir Tûrte:
5:14. Pathian Thu, Bible zirtu taima tak kan ni tûr a ni a, kan thu zirte chu kan nunpui bawk tûr a ni. ‘Chhia leh ṭha fiah tûra kan hriat theihnate sawizawi’ dân kawng dang rêng a awm lo.—1 Kor. 2:10.
6:17-19. Pathian thutiam leh a chhechham rin tlatna chuan thutak kawng pênsan lo tûrin min ṭanpui ang.
12:3, 4. Kan hmachhawn theih fiahna emaw, dodâlna emaw ho tê tête avânga ‘thlarau lama inthlahdah leh hah’ aiin, puitlin lam panin kan ṭhang chho tûr a ni a, fiahnate pawh kan tuar thei lehzual sauh tûr a ni. Fiahnate chu ‘thisen chhuak khawp,’ a nih loh leh thih thleng raka do chu kan tum tlat tûr a ni bawk.—Heb. 10:36-39.
12:13-15. “Khâkna zung,” a nih loh leh kohhrana thiltihte sawisêl chîng tupawhin ‘kan kete tâna kawng ngîl kan siamna’ tûr a dan chu kan phal tûr a ni lo.
12:26-28. Pathian siam ni lo kuta siam “thil siamte”—“vân” suaksual pawh tiama he khawvêl kalhmang zawng zawngte—chu tihnghîn a, tihboral tûr an ni a. Chu mi lo thlen hunah chuan, Lalram leh a thlâwptute sawina “thil nghîng lote” chauh chu an bâng ang. Lalram chungchâng ṭhahnemngai taka hrilh leh a thu bulte mila nun chu a va pawimawh tak êm!
13:7, 17. Kohhrana hotute thu âwih tûr leh an laka intulût tûra he fuihna thu rilrua vawn rengna chuan thawhho duhna rilru lantîr reng tûrin min ṭanpui ang. (w08 10/15)
[Footnote]