Anni Chu Lo Kîr Leh Thuai Tûrin Ṭanpui Rawh!

“Tu hnênah nge kan kal ang? Nangin chatuana nunna thu i nei alâwm.”​—⁠JOH. 6:⁠68.

1. Zirtîr tam takin Isua an kalsan khân, Petera’n eng nge a sawi?

ṬUM khat chu Isua Krista thu zirtîrte zînga pakhat an pawm theih loh avângin, zirtîr tam takte chuan ani chu an kal bosan a. “Nangni pawhin kal bo in duh ve em?,” tiin a tirhkohte chu a zâwt a. Petera chuan: “Lalpa, tu hnênah nge kan kal ang? Nangin chatuana nunna thu i nei alâwm,” tiin a chhâng a ni. (Joh. 6:​51-69) Chutih lai chuan kal bona tûr hmun dang a awm lo. Juda sakhua chuan “chatuana nunna thu” a nei lo va, tûn laiah chutiang thu chu Babulon Khaw Ropui, khawvêl sakhuana dik lo lalramah hian hmuh theih a ni lo bawk. Pathian berâm huang ata vâk bo tawh chung pawha Jehova tihlâwm duh apiangte tân chuan, tûn hi ‘thawhharh hun’ leh berâm huanga kîr leh hun a ni tak zet a ni.​—⁠Rom 13:⁠11.

2. Upate khawih tûr chi thurûk leh kohhran chhûnga rorêl dân lam thil chungchângah eng nge rilrua vawn reng tûr chu?

² Jehova chuan Israel berâm bote a ngaihsakzia a lantîr a. (Ezekiela 34:​15, 16 chhiar rawh.) Chutiang bawkin, Kristian upate chuan berâm huang ata vâk bo berâm ang mite ṭanpui chu an châk a, chu chu an mawhphurhna a ni bawk. Anni chuan kohhran inkhâwm leh thu hrilhnaa tel tawh lo mi pakhat Bible zirpui tûrin thuchhuahtu pakhat ruat ta sela; mahse, ṭanpui ngaitu chuan thil sual khûnkhân tak a lo ti tawh a ni tih a zirpuituin hmu chhuak si sela, chu dinhmun chu eng anga chinfel tûr nge ni ta ang? Thuchhuahtu chuan chutiang chi upate khawih tûr thurûk leh kohhran chhûnga rorêl dân lam thila zilhna pêk ai chuan, upate hriattîr tûrin rawtna a siam thei a. Chutianga a hriattîr loh  chuan, thuchhuahtu ngei chuan upate a hriattîr tûr a ni.​—⁠Lev. 5:1; Gal. 6:⁠1.

3. Berâm 100 neitu chu pakhat bo a hmuh leh khân engtin nge a awm?

³ Thuziak hmasaah khân, berâm 100 nei mi pakhat chungchâng Isua sawi tehkhin thu chu sawi lan a ni tawh a. Berâm rual zîng ata pakhat a bo chuan, 99-te chu hnutchhiahin berâm bo chu a zawng a ni. A berâm bo a hmuh leh chuan chu pa chu a va lâwm tak êm! (Lk. 15:​4-7) Pathian berâm huang ata a kal bo hnua lo kîr leh hmuhna chuan chutiang bawkin min tilâwm a ni. Hmangaihnain a chêttîr avângin, upate leh kohhrana mi dangte chuan kohhran inkhâwm leh thu hrilhnaa tel tawh lova chu an tlawh mai thei. Anni pawhin chu mi chu berâm huanga lo kîr leh a, Pathian chhawmdâwlna te, vênhimna te, leh malsâwmna te a rawn neih leh chu an duh a ni. (Deut. 33:27; Sâm 91:14; Thuf. 10:22) Berâm huanga kîr leh tûra tuemaw ṭanpui theihna chanvo an neih chuan, eng nge an tih theih?

4. Galatia 6:​2, 5 aṭangin nge nge kan hriat thiam theih?

⁴ Jehova’n A berâmte a hmangaih a, kan tlin tâwk bâk a phût lo tih ngilnei taka hrilhin, mi chu kohhrana lo kîr leh tûrin an fuih thei a. Chûng Pathian thil phûtte zîngah chuan Bible zir te, Kristian inkhâwmnaa tel te, Lalram chanchin ṭha hrilh te a tel a ni. Galatia 6:​2, 5 chhiarin, Kristiante chu phurrit an inchhâwk tawn thei a; mahse, thlarau lam mawhphurhnaah chuan “mi tinin mahni phur an phur ṭheuh dâwn” tih hrilh hriat chu a ṭha mai thei a ni. Kan tân tuman Pathian laka rinawmna min vawnsak thei si lo va.

‘Dam Chhûng Khawsak Ngaihtuahna’ Chuan A Tichau Vem Ni?

5, 6. (a) Engvângin nge kohhran inkhâwm leh thu hrilhnaa tel tawh lo kan unaute’n an rilru veizâwng an sawi chhuah ṭha taka ngaihthlâksak chu a pawimawh? (b) Engtin nge kohhran inkhâwm leh thu hrilhnaa tel tawh lote chu Pathian mite nêna inkawm lohnain an chungah nghawng pawi tak a nei tih hmu thiam tûrin i ṭanpui theih ang?

⁵ Upate leh thuchhuahtu puitling dangte tâna kohhran inkhâwm leh thu hrilhnaa tel tawh lo kan unaute ṭanpui dân tûr hriat nân, chutiang mite’n an rilru veizâwng an sawi chhuah chu ngun taka an ngaihthlâksak a ngai a. “Dam chhûng khawsak ngaihtuah” avânga kohhran inkhâwma tel thei lo nupa tuak khat va tlawhtu upa pakhatah han inchan ta la. (Lk. 21:34) Anni chu sum leh pai lama harsatna emaw, chhûngkaw mawhphurhna pung chho zêl emaw chuan thlarau lam thiltihte a ngaihthahtîr tial tial pawh a ni thei. Anni chuan thlarau lama an mawhphurhna ṭhenkhat paih ṭhen ngai niin an hre mai thei a; mahse, mahni inkulh hranna chuan anmahni a ṭanpui dâwn lo tih i hrilh thei a ni. (Thufingte 18:1 chhiar rawh.) Anni chu: “In inkhâwm tawh loh hnuah in hlim zâwk em? In chhûngkaw nun chuan ṭhat lam a pan zâwk em? Jehova chunga lâwmna chu in chakna a la ni zêl em?” tiin remhre takin i zâwt thei a ni.​—⁠Neh. 8:⁠10.

⁶ Chutiang zawhnate ngaihtuahna chuan kohhran inkhâwm leh thu hrilhnaa tel tawh lote chu kohhran an belh tawh loh avângin thlarau lamah an tla hniamin, an hlim lo tawlh tawlh a ni tih hmu chhuak tûrin a ṭanpui thei a. (Mt. 5:3; Heb. 10:​24, 25) Chanchin ṭha hrilhnaa an tel lohna chuan an hlimna a la bo a ni tih hre thiam tûra ṭanpui theih an ni mai thei bawk. (Mt. 28:​19, 20) Chutiang a nih chuan, eng nge an tâna kawng finthlâk ber chu ni ta ang?

7. Berâm huang ata vâk bote chu eng ti tûrin nge kan fuih theih?

⁷ Isua chuan: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, . . . Chutichuan chûng thil lo thleng tûr zawng zawng chu pumpelh . . . tlâka ruat in nih theihna tûrin, eng lai pawhin ṭawngṭai chungin ngaihven rawh u,” a ti a. (Lk. 21:​34-36) Berâm huang ata vâk bo tawh chung pawha tûn hmaa an lo neih ṭhin hlimna nei lêt leh duhte chu, thlarau thianghlim dîl tûr leh an ṭawngṭaina mila thil ti tûra fuih theih an ni.​—⁠Lk. 11:⁠13.

Tihtlûkin An Awm Em Ni?

8, 9. Tihtlûka awm chu upain engtin nge a chhûtpui theih?

⁸ Mihringte an ṭhat famkim loh avângin, mi mal inngeih lohnate chuan mi chu a titlu thei a. Ṭhenkhat chu kohhrana mi zahkai tak pakhatin Bible thu bulte kalha thil a tih an hriatna chuan a titlu thei a ni. Mi chu chutiang thil avânga kohhran inkhâwm leh thu hrilhnaa tel tawh lo a  nih chuan, amah va tlawhtu upa chuan Jehova’n tumah a titlu lo tih a hrilh thei a. Chuvângin, engah nge miin Pathian leh A mite nêna inlaichînna a neih chu a tihchah ang? Chu ai mahin, “lei chung zawng zawng Rorêltu chuan” thil awm dân chu a hria tih leh buaina chu dik takin a ching fel ang tih ring tlat chungin Pathian rawng chu a bâwl zawm zêl zâwk tûr a ni lâwm ni? (Gen. 18:25; Kol. 3:​23-25) Mi chu khawi emaw laiah tlu tak tak se chuan, thawh pawh tum hlek lovin a tlûkna ngaiah a awm lui reng hauh lo vang.

⁹ Thlarau lama anmahni ṭanpui nân, upa chuan mi ṭhenkhatin khua reiah anmahni tlûktîrtu dinhmun chu an ngaih pawimawh vak tawh loh thu a hrilh thei a. Chutiang dinhmun chu awm pawh a awm tawh lo thei bawk. Kan mi ṭanpui chu zilhna a tawh avânga tlu a nih chuan, ṭawngṭaina nêna ngun taka ngaihtuahna chuan chu zilhna tâwk tûrin thiam lohna a nei a, chu chu tlûk phah nâna hmang tûr a lo nih lohzia a hriat chhuahtîr thei a ni.​—⁠Sâm 119:165; Heb. 12:​5-13.

Zirtîrna Engemaw Chu An Tlûk Chhan A Ni Em?

10, 11. Bible zirtîrna ṭhenkhat pawm thei lote ṭanpui nân eng ang chhût dân nge ṭangkai mai thei?

¹⁰ Bible zirtîrna a engemaw ber an pawm theih loh avângin mi ṭhenkhat chuan Pathian berâm huang an chhuahsan thei a. Aigupta sal tânna aṭanga chhuahtîr Israelte khân, an tâna “[Pathian] thiltihte chu an theihnghilh” a, “a remruat chu an nghâk peih lo” a ni. (Sâm 106:13) Kohhran inkhâwm leh thu hrilhnaa tel tawh lova chu “bawi rinawm, fing tak” chuan thlarau lam chaw ṭha tak a pe chhuak tih hriatnawntîr chu a ṭangkai mai thei. (Mt. 24:45) Chûngte hmang chuan a ni, atîra thutak a zirna chu. Chutiang a nih si chuan, engah nge thutaka awm leh chu a tum loh vang?​—⁠2 Joh. 4.

¹¹ Upa chuan Pathain berâm huang ata vâk bote ṭanpui a tum hunah Isua thu zirtîr pakhat an hnâwl avânga kal bosan zirtîrte chungchâng chu a hrilh thei ang a. (Joh. 6:​53, 66) Anni chuan Krista leh a hnungzuitu mi rinawmte nêna an inkawm tâk loh avângin, thlarau lam thil an hlutna leh an hlimna chu an hloh a ni. Kristian kohhran bêl tawh lote chuan hmun dangah thlarau lam chaw hnianghnâr taka eina tûr an zawng hmu em? Zawng hmu lo, a awm loh miau avângin!

Thil Sual Khûnkhân Tak Vâng Em Ni?

12, 13. Berâm huang ata vâk bo tuemawin, sual khûnkhân tak a tihzia a pawm chuan, eng anga ṭanpui theih nge ni ang?

¹² Ṭhenkhat chuan thil sual khûnkhân tak an tih avângin, thu hrilh leh inkhâwm chu an bânsan a. Anni chuan upate hnêna an inpuan chuan hnawhchhuah an nih mai an hlau pawh a ni thei. Mahse, Bible kalhzâwnga an thiltih an bânsan a, an inchhîr tak zet chuan kohhran aṭanga hnawhchhuah an ni lo vang. (2 Kor. 7:​10, 11) Anni chu lawm luh leh an ni zâwkin, upate chuan an mamawh thlarau lama ṭanpuina chu an pe ang.

¹³ Kohhran inkhâwm leh thu hrilhnaa tel tawh  lo mi pakhat ṭanpui tûra ruat thuchhuahtu puitling i nih a, i mi ṭanpui tûr chuan thil sual khûnkhân tak a tih thu hrilh che sela, eng nge i tih tûr chu ni ta ang? A hmaa kan sawi tâk angin, nangmah va inrawlh ai chuan, upate hriattîr tûrin ani chu hrilh rawh. Chutianga a tih duh loh chuan, chûng thilte chungchânga Pathian kaihhruaina nêna inmila thil tiin, Jehova hming leh kohhran thlarau lam ṭhatna i ngaihtuahzia i târ lang ang. (Leviticus 5:1 chhiar rawh.) Upate chuan lo kîr leh a, Pathian duhzâwng mila nung duhte ṭanpui dân chu an hria a ni. Hmangaih taka zilhhau pawh a ngai mai thei. (Heb. 12:​7-11) Miin Pathian lakah thil sual a tihzia a pawm a, a thil sual tih a bânsana a inchhîr tak zet chuan, upate’n amah an ṭanpui ang a, Jehova ngaihdamin a awm thei ang.​—⁠Is. 1:18; 55:7; Jak. 5:​13-16.

Fapa Tlân Bo Kîr Leh Chuan Hlimna A Thlen

14. Nangma ir-âwm chhuakin, Isua tehkhin thua fapa tlân bo chanchin chu sawi rawh.

¹⁴ Berâm huang ata vâk bo tuemaw ṭanpui tumtu chuan, Luka 15:​11-24-a chhinchhiah Isua tehkhin thu chu a sawi hmuh thei a. Chu tehkhin thu-ah chuan, tlangvâl pakhat chuan a ro chan chu nawmchen nâna hmangin a tlak ral a. A tâwpah chuan a nun kawng ṭha lo chu a ning ta a. A ril a ṭâmin, in lam a ngai a; tichuan, in lama haw tûrin a rilru a siam ta! Hla taka a la awm laiin, a pa chuan a hmu a, a tlân a, a ir a chuktuah a, a fâwp ngawih ngawih a, a hlim hle a ni. He tehkhin thu ngaihtuahna hian tawlh bo tuemaw chu berâm huanga lo kîr leh tûrin a chêttîr thei a. Rei lo têah he khawvêl hi tihboral a nih dâwn avângin, ani chu a lo ‘kîr leh’ thuai tûr a ni.

15. Engvângin nge ṭhenkhat chu kohhran aṭanga an tawlh bo?

¹⁵ Kohhran aṭanga tawlh bo a tam zâwkte chu fapa tlân bo ang an ni ve lo. Ṭhenkhat chu tuipui kama lawng inhûng zawi zawia a tawlh hlat hret hret angin, zawi zawiin an tawlh bo a ni. Ṭhenkhat chuan lungkhamnain a tlâk buak hneh êm avângin, thlarau lam thil chu an hmaih a. Mi dang lehte erawh chu kohhran chhûnga tuemaw thiltih avângin an tlu a, a nih loh leh Bible zirtîrna ṭhenkhat an pawm theih loh avângin an tlu bawk. Mi ṭhenkhat chu Bible kalh nungchang ṭha lovah an inhnamhnawih a. Mahse, hêng dinhmun nêna inkûngkaiha pêk thurâwnte hi chhan dang avânga berâm huang ata kal bote pawh a tlai lutuk hmaa lo kîr leh tûra ṭanpui nân i hmang ṭangkai thei a ni.

“Ka Fapa, Inah Hian Ka Lâwm Lût A Che!”

16-18. (a) Engtin nge upa pakhat chuan kum tam tak chhûng kohhran inkhâwm leh thu hrilhnaa tel tawh lo unaupa chu a ṭanpui? (b) Engvângin nge he unaupa hi kohhran inkhâwm leh thu hrilhnaa a tel loh va, eng anga ṭanpui nge a nih a, engtin nge kohhranin a lo dawn sawn?

¹⁶ Kristian upa pakhat chuan: “Kan tualchhûng upate chu kohhran inkhâwm leh thu hrilhnaa tel tawh lote tlawhna kawngah an taima hle a. Bible zirpuia thutak hre tûra ka ṭanpui unaupa pakhat chungchâng chu ka ngaihtuah a ni. Kum 25 vêl chu kohhran inkhâwm leh thu hrilhnaah tel tawh lovin, dinhmun khirh tak a hmachhawn a; chuvângin, Bible-a thlarau lam thu bulte nunpuinain amah a ṭanpui theih dân ka hrilhfiah a ni. A hnuah chuan, Kingdom Hall-ah rawn inkhâwm ṭanin, berâm huanga lo kîr leh a tumna tinghet tûra Bible zirna neihpui chu a rem ti ta a ni,” tiin a sawi.

¹⁷ Chu unaupa chu atîra kohhran inkhâwm leh thu hrilhnaa a tel loh chhan chu eng nge ni? Ani chuan heti hian a sawi: “Thlarau lam thil aiin khawvêl thil ka ngaihsak ṭan a. Tichuan, Bible ka zir tawh lo va, rawngbâwlnaah tel lovin, leh inkhâwmte chu ka thlahthlam a ni. Ka hriat loh hlânin Kristian kohhran zînga mi ka lo ni ta lo va. Mahse, lo kîr leh tûrin chu upa chuan tih tak zeta ngaihsakna ka chunga lantîrin min ṭanpui a ni,” tiin. He unaupa buainate hian Bible zirpui a remtih hnu aṭangin ziaawm lam a pan a ni. Ani chuan, “Kha tih laia ka nuna thil kim lo chu Jehova  leh a inawpna pâwl aṭanga hmangaihna leh kaihhruaina ka dawng lo kha a ni tih ka hre chhuak a ni,” a ti.

¹⁸ Kohhran chuan he unaupa hi engtin nge a lo dawn sawn? Ani chuan: “Isua Krista sawi fapa tlân bo ang mai niin ka inhria. Unaunu tar pakhat, kum 30 kal ta aṭanga tûn thlenga rinawm taka Jehova rawng la bâwl reng chuan, ‘Ka Fapa, inah hian ka lâwm lût a che!’ min ti a. Chu chuan ka rilru a khawih hle mai. Ina lo kîr leh ka ni tak zet a ni. Tin, chu upa leh kohhran pumin ka chunga an lantîr hmangaihna te, ngainatna te, leh ngaihsakna te avângin lâwmthu ka sawi duh a. Jehova leh ṭhenawmte an hmangaihna chuan berâm huanga lo kîr leh tûrin min ṭanpui tak zet a ni,” tiin a sawi.

Anni Chu Hma La Thuai Tûrin Fuih Rawh!

19, 20. Engtin nge kohhran inkhâwm leh thu hrilhnaa tel tawh lote chu berâm huang chhûnga lo kîr leh thuai tûrin i fuih theih ang a, engtin nge Pathianin kan tlin phâk bâk min phût lo tih i kawhhmuh theih?

¹⁹ Ni hnuhnûngah kan awm a, he khawvêl tâwpna hi a lo thleng thuai tawh dâwn. Chuvângin, kohhran inkhâwm leh thu hrilhnaa tel tawh lote chu Kristian inkhâwma tel nghâl thuai tûrin fuih rawh. Setana chuan Pathian nêna an inlaichînna tihchhiat a tum a, nuna phurritte chu biakna dik kalsanna hmanga paih chhuah theih a nih rintîr a tum bawk tih hrilh ang che. Isua hnungzuitu rinawm tak an nih chauhvin, chawlh hahdamna dik tak an nei thei dâwn tih i tiam thei a ni.​—⁠Matthaia 11:​28-30 chhiar rawh.

²⁰ Kohhran inkhâwm leh thu hrilhnaa tel tawh lote chu Pathianin kan tihtheih tâwk bâk min phût lohzia hrilh nawn ang che. Lazara unaunu Mari chu Isua a thih hma lawka hriak man to a thih avânga sawisêl a nih khân, Isua chuan: “Engmah tih suh u . . . A tih theih tâwk a ti a ni,” a ti a. (Mk. 14:​6-8) Ani chuan biak ina thawhlâwm tlêm tê thawhtu hmeithai rethei tak chu a fak bawk. Chu hmeithai pawh chuan a tih theih tâwk a ti ve si a. (Lk. 21:​1-4) Kan zînga a tam zâwkte chu Kristian inkhâwmnaah kan tel theiin, Lalram thu hrilhnaah kan tel thei bawk. Jehova ṭanpuina nên chuan, tûna kohhran inkhâwm leh thu hrilhnaa tel tawh lo tam takte pawhin chutiang chuan an ti ve thei ang.

21, 22. Jehova lama hawi kîr lehte hnênah eng nge i tiam theih?

²¹ Berâm huang ata vâk bo berâm ang mi chuan a unaute hmuh leh a hreh a nih chuan, fapa tlân bo ina a lo kîr leh huna hlimna awm kha i hriat nawntîr thei a. Kohhrana lo kîr lehte chuan chutiang bawk hlimna chu an awmtîr a ni. Anni chu Diabola do va, Pathian hnaih tûra tûna hma la nghâl tûrin fuih ang che.​—⁠Jak. 4:​7, 8.

²² Jehova lama hawi kîr lehte chu hlim taka lawm luh an ni ṭhîn. (ṬH. 3:40) Tûn hmaa Pathian rawngbâwlnaa an thiltawn chuan hlimna nasa tak a pe a ni tih rinhlelh rual a ni lo. Rei rial lova berâm huang chhûnga lo kîr lehte chu malsâwmna chhiar sên lohvin a nghâk reng a ni. (w08 11/15)

Engtin Nge Kan Chhân Ang?

• Engtin nge thil engemaw avânga tlu a, kohhran inkhâwm leh thu hrilhnaa tel tawh lo Kristian chu i ṭanpui ang?

• Bible zirtîrna chungchânga thlîr dân hran neih avânga Pathian berâm huang chhuahsan tuemaw chu eng chhût dânin nge ṭanpui mai thei?

• Kohhrana lo kîr leh hrehtu tuemaw chu eng anga ṭanpui theih nge ni?

[Zirlai Atâna Zawhnate]

[Phêk 19-naa milem]

Kohhran inkhâwm leh thu hrilhnaa tel tawh lo kan unaute thusawi chu ngun takin ngaihthlâksak rawh

[Phêk 21-naa milem]

Isua tehkhin thua fapa tlân bo chanchin ngaihtuahna chuan ṭhenkhat chu berâm huanga kîr leh tûrin a chêttîr thei