Berâm Huang Ata Vâk Bote Chu Ṭanpui Rawh
Berâm Huang Ata Vâk Bote Chu Ṭanpui Rawh
“Mi lâwmpui rawh u, ka berâm bo kha ka hmu leh ta e.”—LK. 15:6.
1. Engtin nge Isua chu berâm vêngtu ṭha a nih?
JEHOVA Fapa mal neih chhun, Isua Krista chu “berâm Vêngtu ropui tak” tia koh a ni a. (Heb. 13:20) Pathian Lehkha Thu chuan a lo kal tûr thu sawi lâwkin, Israel “berâm bo” zawn tumtu Berâm Vêngtu danglam tak a nih thu a târ lang bawk. (Mt. 2:1-6; 15:24) Chu bâkah, berâm vêngtu tak tak chuan a berâmte vênhim nâna a nun a pêk ang bawkin, Isua chuan a inthawina hlâwkpuitu tûr berâm ang mite tlan nân a nun a pe a ni.—Joh. 10:11, 14, 15; 1 Joh. 2:1, 2.
2. Engin nge Kristian ṭhenkhat chu kohhran inkhâwmnaah leh thu hrilhnaah tel lohtîr?
2 Isua tlanna ngaihlu a, Pathian hnêna inpumpêk tawh mi ṭhenkhatte chuan Kristian kohhran an bêl tawh lo chu a lungchhiatthlâk hle. Lunghnualna te, hrisêl lohna te, a nih loh leh thil dangte chuan an ṭhahnemngaihna tikiamin, kohhran inkhâwmnaah leh thu hrilhnaah an tel tawh lo a ni. Amaherawhchu, Pathian berâm huanga awmte chauhvin Sâm 23-a Davida sawi thlamuanna leh hlimna chu an nei thei a. Entîr nân, ani chu: “LALPA chu mi vêngtu a ni a; ka tlachham lo vang,” tiin a zai a ni. (Sâm 23:1) Pathian berâm huang chhûnga awmte chu thlarau lamah engmah an thlachham lo; mahse, berâm huang ata vâk bote tân chuan chutiang chu a ni ve lo. Tute’n nge chutiang mite chu ṭanpui thei? Eng anga ṭanpui theih nge an nih? Berâm huanga lo kîr leh tûra ṭanpui tûrin eng nge tih theih awm?
Tute’n Nge Ṭanpui Thei Ang?
3. Engtin nge Isua’n Pathian ran tlatna hmun ata vâk bo berâmte chhan chhuak tûra thil tih ngai chu a târ lan?
3 Pathian ran tlatna hmun aṭanga berâm vâk bote chhan chhuak tûr chuan thawh rim a ngai a. (Sâm 100:3) Hetianga sawiin, Isua’n chu chu a târ lang a ni: “Mi tupawhin berâm za nei sela, an zînga pakhat vâk bo sela, sawmkua leh pakuate chu hnutchhiaha, tlânga han kalin, a bo chu a zawng lo vang em ni? Tih tak meuhvin ka hrilh a che u, a hmuh leh hlauh chuan, sawmkua leh pakua vâk bo lote chungah ai chuan, a chungah a lâwm zâwk ang. Chutiang bawkin hêng mi tête zînga pakhat boral pawh hi in Pa vâna mi duhzâwng a ni lo ve,” tiin. (Mt. 18:12-14) Tute’n nge berâm rual zîng ata vâk bote chu ṭanpui thei ang?
4, 5. Upate chuan Pathian berâm rualte chungah eng rilru put hmang nge an neih ngai?
4 Kristian upate’n berâm vâk bote ṭanpui tûr chuan, Pathian berâm rualte chu Jehova hnêna inpumpêk a kohhran zînga awm mite—‘Pathian ran tlatna hmuna berâm’ hlu takte ang an ni tih an hre reng tûr a ni. (Sâm 79:13) Chûng berâm duhawm takte chu duat taka enkawl an ngai a, chu chu hmangaihna nei berâm vêngtute chuan a mi malin an ngaihsak a ngai tihna a ni. Nêlawm taka anmahni va tlawhna chu a ṭangkai hle thei. Berâm vêngtute’n hmangaih taka fuihna an pêkte chuan thlarau lamah a siam ṭha theiin, berâm huang chhûnga lo kîr leh duhna a neihtîr lehzual thei a ni.—1 Kor. 8:1.
5 Pathian berâm rual vêngtute chuan berâm vâk bote zawng chhuak tûr leh anmahni ṭanpui tûrin mawhphurhna an nei a. Tirhkoh Paula chuan hmân lai Ephesi khuaa Kristian upate hnênah: “Pathian kohhranho, a [Fapa] thisena a leite chu châwm tûrin, nangmahni leh in hote zawng zawng chungah chuan fîmkhur rawh u, thlarau thianghlimin an chunga hotuah a siam che u hi,” tia sawiin berâm vêng tûra an mawhphurhna chu a hriatnawntîr a ni. (Tirh. 20:28) Chutiang bawkin, tirhkoh Petera pawhin hriak thih upate hnênah: “In zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilrua duh tak zâwkin, in chante chungah intilal hek lovin, pâwlho entawnan insiam zâwkin ho rawh u,” tih fuihna thu hi a pe bawk.—1 Pet. 5:1-3.
6. Engvângin nge Pathian berâmte chuan tûn laiah berâm vêngtute enkawlna an mamawh bîk?
6 Kristian berâm vêngtute chuan “berâm vêngtu ṭha” Isua an entawn a ngai a. (Joh. 10:11) Ani chuan Pathian berâmte chu a ngaihsak êm êm a, Simon Petera hnêna ‘A berâmte enkawl’ tûra a tih khân, berâmte enkawl a pawimawhzia a târ lang a ni. (Johana 21:15-17 chhiar rawh.) Diabola chuan Pathian hnêna inpumpêkte rinawmna tihchhiat tuma ṭan a khawh lehzual avângin, berâmte chuan tûn laiah chutianga enkawlna an mamawh lehzual a. Setana chuan tisa lama chak lohna chu hmang ṭangkaiin, Jehova berâmte thil sual ti tûra thlêm nân he khawvêl hi a hmang a ni. (1 Joh. 2:15-17; 5:19) Kohhran inkhâwm leh thu hrilhnaa tel tawh lote chu an derthâwng bîk a, chuvâng chuan ‘thlarauva awm’ tûra fuihna zâwm tûrin ṭanpui an ngai a. (Gal. 5:16-21, 25) Chutiang berâmte ṭanpui tûr chuan ṭawngṭaia Pathiana innghah te, a thlarau kaihhruaina te, leh a Thu thiam taka hman te a ngai a ni.—Thuf. 3:5, 6; Lk. 11:13; Heb. 4:12.
7. Upate tân berâm ang mite ngaihsak chu eng anga pawimawh nge ni?
7 Hmân lai Israel rama berâm vêngtu chuan, a berâmte khalh nân tiang sei tak a hmâwr kawm chu a hmang a. Berâmte a huanga an luh emaw, an chhuah emawin, a vêngtuin a chhiar theih nân chutiang ‘tiang hnuaiah’ chuan an kal ṭhîn a ni. (Lev. 27:32; Mik. 2:12; 7:14) Chutiang bawk chuan, Kristian berâm vêngtu chuan a ngaihsakna hnuaia awm Pathian berâmte chu a hre chiang tûr a ni. (Thufingte 27:23 khaikhin rawh.) Chuvângin, berâm vênna chu upate sawiho ṭhin thil pawimawh takte zînga mi a ni a. Chutah chuan berâm vâk bote ṭanpui tûra ruahmanna siam a tel a ni. Jehova chuan amah ngeiin a berâmte chu a zawng chhuak ang a, an mamawh angin a ngaihsak ang tih a sawi. (Ezek. 34:11) Chuvângin, upate’n chutiang bawka berâm vâk bote a huanga kîr leh tûra hma an lâk hian Pathian chu a lâwm a ni.
8. Eng kawngin nge upate chuan berâm chu mi mala ngaihsakna an pêk theih?
8 Kan unau tuemaw a dam loh hunah, Pathian berâm vêngtu va tlawhna chuan hlimna leh chakna a pe thei a. Thlarau lama dam lo berâm chu mi mal ngaihsakna pêk a nih hunah, chutiang chu a ni ve thei a ni. Upate chuan mi mal ngaihsakna lantîr nân thil chi hrang hrang an tihpui thei a; chûng zîngah chuan Bible chhiarsak te, thuziak pakhat ennawnpui te, inkhâwma thusawi pawimawh lai sawipui te, leh kohhran inkhâwm leh thu hrilhnaa tel tawh lote ṭawngṭaipui te a tel thei a. Chutiang mite kohhran inkhâwma an lo tel leh chuan kohhrana mite lâwm dân tûr chu upate chuan an hrilhfiah thei a ni. (2 Kor. 1:3-7; Jak. 5:13-15) Va tlawh te, phone-a biak te, a nih loh leh lehkha thawn te chuan thil a va ti thei tak êm! Berâm rual zîng ata vâk bo berâm ṭanpuina chuan Kristian berâm vêngtu chu hlimna nasa tak a pe thei bawk.
Inṭawiâwm Tawn A Ngai
9, 10. Berâm vâk bo ngaihtuah chu upate chauh tih tûr a ni lo tih engvângin nge i sawi theih?
9 Ni hnuhnûng hun khirh taka kan awm avângin, kan rinpui pakhat chu kohhran aṭangin a tawlh bo tih pawh hre lo khawpin kan buai thei a ni. (Heb. 2:1) Mahse, Jehova berâmte chu a tân an hlu êm êm a. Mihring taksa pêng tinte’n hlutna an neih ṭheuh angin, anni chu an hlu ṭheuh a ni. Chuvângin, kan unaute chu kan veiin, kan inngaihsak tawn tak zet tûr a ni. (1 Kor. 12:24, 25) Chutiang rilru put hmang chu i nei em?
10 Berâm vâk bo zawn leh ṭanpuinaah upate chuan hma hruai mah se, kan unau tawlh bote ngaihtuah chu Kristian upate chauh tih tûr a ni lo. Mi dangte chuan hêng berâm vêngtute hi an ṭawiâwm ve thei a ni. Berâm huanga lo kîr leh tûra ṭanpui ngai kan unaute hnênah fuihna leh thlarau lama ṭanpuina kan pe theiin, kan pe tûr a ni bawk. Chutiang ṭanpuina chu eng anga pêk tûr nge ni ang?
11, 12. Engtin nge thlarau lama ṭanpui ngai tuemaw ṭanpui theihna chanvo i neih ve theih?
11 Ṭhenkhatah chuan, ṭanpuina dîltu kohhran inkhâwm leh thu hrilhnaa tel tawh lote Bible zirpui tûrin, upate chuan thiltawn ngah lalram thuchhuahtute chu an ruat thei a. Chu miin a tum ber chu an “hmangaihna hmasa ber” nei lêt tûra ṭanpui hi a ni. (Thup. 2:1, 4) Hêng kan unaute hian kohhran inkhâwma an tel loh hlâna an hmaih tâk thute sawipuiin, anni chu thlarau lamah an tichak thei a ni.
12 Upate’n thlarau lama ṭanpui ngai unau pakhat chu Bible zirpui tûra an tih che chuan, Jehova’n i thawh rimna kaihruai tûr leh malsâwm tûrin ṭawngṭai rawh. “I hnate chu LALPA kawltîr rawh, tichuan i thil ruahmante chu tihnghehin a awm ang.” (Thuf. 16:3) Chûng thlarau lama ṭanpui ngaite sawipui atâna i hman tûr Bible chângte leh rinna tichak thei thute chu ngun takin ngaihtuah rawh. Tirhkoh Paula entîrna ṭha tak chu ngaihtuah bawk ang che. (Rom 1:11, 12 chhiar rawh.) Ani chuan Rom khuaa Kristiante chu an nghehna tûra thlarau lam thilpêk engemaw a pêk theihna tûrin hmuh a châk a. Rinnaa inthlamuan tawn hlân chu a nghâkhlel bawk a ni. Pathian berâm zîng ata vâk bo berâmte ṭanpui kan tum hunah, chutiang rilru put hmang chu kan nei ve tûr a ni lâwm ni?
13. Kohhran inkhâwm leh thu hrilhnaa tel tawh lote chu eng nge i sawipui theih?
13 I zirpui laiin, heti hian i zâwt thei a ni, “Engtin nge thutak i zir?” tiin. Kohhran inkhâwm leh thu hrilhnaa tel tawh lo chu inkhâwmna te, thu hrilhna te, leh inkhâwmpui tea a lo neih tawh thiltawn hlimawm takte sawi chhuak tûra fuihin, tûn hmaa Jehova rawngbâwlnaa hun hlimawm tak a neihte hre chhuak leh tûrin ṭanpui rawh. Jehova rawngbâwlnaa in neih dun mai theih hun hlimawm takte chu sawipui la; Jehova i hnaih avânga hlimna i neih chu hrilh ang che. (Jak. 4:8) Pathianin a mite kan nih anga kan mamawh a ngaihsak dân—a bîk takin hrehawm kan tawh laia thlamuanna leh beiseina min pêk avânga i lâwmna chu sawi lang rawh.—Rom 15:4; 2 Kor. 1:3, 4.
14, 15. Kohhran inkhâwm leh thu hrilhnaa tel tawh lote chu tûn hmaa an lo dawn eng malsâwmnate nge hriat nawntîr a ṭangkai mai theih?
14 Kohhran inkhâwm leh thu hrilhnaa tel tawh lote hnêna a inhman ṭhat laia a dawn malsâwmna ṭhenkhat hriat chhuahtîr chu a ṭangkai hle thei a. Entîr nân, Pathian leh a thiltumte hriatna lama kan ṭhang chho zêl hi malsâwmna a ni. (Thuf. 4:18) ‘Thlarauva a awm’ lai khân, sual tûra thlêmna do chu a tân a awlsam zâwk ngei ang. (Gal. 5:22-26) Thlêmna do theih avânga lo awm chhia leh ṭha hriatna thiang chuan Jehova chu ṭawngṭaia a pantîr theih bâkah, ‘thinlung leh ngaihtuahnate vêngtu rilru rêng rênga hriat sên loh Pathian thlamuanna’ a neihtîr ang. (Phil. 4:6, 7) Chûngte chu rilrua vawng reng chungin, tih tak zeta ngaihsakna lantîr la, thlarau lama i unaute chu berâm huanga lo kîr leh tûrin fuihna ṭha tak pe ang che.—Philippi 2:4 chhiar rawh.
15 Upa niin berâm tlawhna neiah han inchan ta la. Kohhran inkhâwm leh thu hrilhnaa tel tawh lo nupa tuak khat chu Pathian Thu aṭanga thutak an zir tirh lai hun ngaihtuah lêt tûrin i ṭanpui thei a. Chutih lai chuan, an tân thutak chu a ropuiin, a khirh lo va; chu chuan lung a tiâwiin, thlarau lamah mi a va tizalên tak êm! (Joh. 8:32) Pathian Jehova, a hmangaihna, leh a thiltum ropui takte chungchâng an zir lai khân an thinlung chu lâwmnain a va khat tak êm! (Luka 24:32 nên khaikhin rawh.) Anmahni chu Jehova hnêna inpumpêk Kristiante neih amah nêna inlaichînna ṭha leh ṭawngṭai theihna chanvo ropui takte chu hriatnawntîr rawh. Kohhran inkhâwm leh thu hrilhnaa tel tawh lote chu “fak tlâk Pathian chanchin ṭha ropui” chhâng lêt leh tûrin tih tak zetin fuih ang che.—1 Tim. 1:10, 11.
An Chungah Hmangaihna Lantîr Zêl Rawh
16. Thlarau lama ṭanpuina pêkte chu a ṭangkai hle tih târ langtu entîrna pakhat pe rawh.
16 Hêng rawtna kan pêk tâkte hi a hman tlâk tak tak em? Hman tlâk e. Entîr nân, kum 12-a Lalram thuchhuahtu lo ni ṭan ṭhalai pakhat chu kum 15 mi a nihin kohhran inkhâwm leh thu hrilhnaah a tel ta lo va. Mahse, a hnuah chuan thar thawh lehin, kum 30 chuang hunbi kimin rawng a bâwl tawh a ni. Thlarau lama a in tuai thar leh chhan chu Kristian upa pakhatin ṭanpuina a pêk vâng a ni a. Chu thlarau lama ṭanpuina avângin a va lâwm tak êm!
17, 18. Pathian berâm huang ata vâk bo tuemaw ṭanpui tûrin eng miziate nge i neih ngai?
17 Kohhran inkhâwm leh thu hrilhnaa tel tawh lote chu lo kîr leh tûra Kristiante ṭanpuina pêktîrtu chu hmangaihna hi a ni a. Isua chuan a hnungzuitute chungchângah: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a sawi a ni. (Joh. 13:34, 35) Ni e, hmangaihna chu Kristian dikte chhinchhiahna a ni a. Chu hmangaihna chu Kristian baptisma chang tawh, kohhran inkhâwm leh thu hrilhnaa tel tawh lote chungah pawh lantîr tûr a ni lâwm ni? Tehrêng mai! Mahse, an mamawh ṭanpuina pe tûr chuan Pathian mize chi hrang hrang neih a ngai thei a ni.
18 Pathian berâm huang ata vâk bo tuemaw ṭanpui thei tûr chuan eng miziate nge i neih ngai thei ang? Hmangaihna bâkah, khawngaihna te, ngilneihna te, thuhnuairawlhna te, leh dawhtheihna te i lantîr a ngai thei ang. Dinhmun azirin ngaihdam peih tak nih pawh a ngai tel mai thei a ni. Paula chuan: “Pathian mi thlan, mi thianghlim leh duh takte angin lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u. Tin, chûng zawng zawng chungah chuan hmangaihna inbel rawh u, chu chu phuar famkimna a ni,” tiin a ziak a ni.—Kol. 3:12-14.
19. Kristian berâm huang chhûnga berâm ang mite lo kîr leh tûra ṭanpuina engpawh chuan engvângin nge thawh rim a phu?
19 A dawta zir tûr thuziak chuan Pathian berâm huang aṭanga mi ṭhenkhat an vah bo chhante chu a sawi ang a. Lo kîr lehte dawn sawn an nih dân tûr pawh a târ lang bawk ang. Chu thuziak chu zira, he thuziak i ngaihtuah hian, berâm ang mite Kristian huang chhûnga an lo kîr leh beiseia i ṭanpuina engpawh chuan thawh rim a phu tih hre tlat ang che. He khawvêlah hian, mi tam takte chuan hausak nân an nun pumhlûm chu an hmang a; mahse, nunna pakhat chauh pawh hi khawvêl puma sum leh pai awm zawng zawngte ai pawhin a hlu zâwk a. Chu chu Isua’n berâm bo tehkhin thu a sawiah a târ lang a ni. (Mt. 18:12-14) Jehova duh tak berâm ang mi vâk bote berâm huanga lo kîr leh tûra tih tak zet leh hmanhmawh taka i ṭanpui lai hian, chu chu i rilruah vawng tlat ang che. (w08 11/15)
Engtin Nge Kan Chhân Ang?
• Berâm huang ata vâk bo berâm ang mite chungchângah Kristian berâm vêngtute chuan eng mawhphurhna nge an neih?
• Tûna kohhran bêl tawh lote chu engtin nge i ṭanpui theih?
• Berâm huang ata vâk bote ṭanpuinaah eng miziate’n nge ṭanpui thei che?
[Zirlai Atâna Zawhnate]
[Phêk 15-naa milem]
Kristian berâm vêngtute chuan Pathian berâm huang ata vâk bote chu hmangaih taka ṭanpui an tum