‘Inremna Tûr Thilte Chu Um Rawh U’

KAWNG sial thar chu ṭha tak leh chhe thei lo tûr angin a lang a. Mahse, khua reiah a lo khîin, a lo khuar ta ṭhîn. Chu kawnga him taka zin theih nân leh kawng ṭha neih reng theih nân siam ṭhat a ngai a ni.

Chutiang bawkin, mi dangte nêna kan inlaichînna chu a châng chuan a chhe theiin, a khi hial thei a. Tirhkoh Paula chuan Rom khuaa Kristiante inkârah ngaih dân inang lo tak tak a awm tih a hria a ni. Chuvângin a Kristian ṭhiante chu: “Inremna tûr leh intihsâwt tawnna tûr thilte chu i ûm ang u,” tiin a zilh a. (Rom 14:​13, 19) Engvângin nge ‘inremna tûr thilte chu ûm’ a ngaih? Engtin nge huaisen tak leh hlawhtling takin remna kan ûm theih?

Engah Nge Remna Kan Um Ang?

Kawngpui khi lai chu siam ṭhat a nih loh chuan khuar hlauhawm takah a lo chang thei a. Chutiang bawkin, mi mal inkâra harsatna awmte kan insawi rem loh chuan a hlauhawm thei a ni. Tirhkoh Johana chuan: “Miin, ‘Pathian ka hmangaih e,’ tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?,” tiin a ziak a. (1 Joh. 4:20) Mi mal inkâra harsatna chinfel loh chuan a tâwpah Kristian chu a unau a huattîr thei a ni.

Isua Krista chuan mi dangte nêna kan inrem loh chuan Pathian kan biakna chu Jehova tân pawm theih a ni lo tih a târ lang a. Ani chuan a zirtîrte chu heti hian a zirtîr a ni: “Maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thil pêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tiin. (Mt. 5:​23, 24) A ni, remna kan ûm chhan ber chu Pathian Jehova tihlâwm kan duh vâng a ni. *

Philippi kohhrana dinhmun pakhat chuan remna kan ûm chhan tûr dang a târ lang a. Kristian unaunu pahnih, Euodii leh Suntuki inkârah a nihna sawi lan loh harsatna a chhuak a, chu chuan kohhran pum remna a tiderthâwng a ni. (Phil. 4:​2, 3) Mi mal inkâra harsatna chinfel loh chu tlâng hriatah a lang chhuak nghâl thei a. Kohhrana hmangaihna leh inremna awmtîr kan duhna chuan kan unaute nêna remna ûm tûrin min chêttîr a ni.

Isua chuan: “Remna siamtute chu an eng a thâwl e,” a ti a. (Mt. 5:⁠9) Remna ûmna chuan lungawina hlimawm tak min neihtîr a ni. Chu bâkah, remna chuan hrisêlna a awmtîr bawk; “rilru dam chu tîsa nunna a ni” si a. (Thuf. 14:30) Kawng lehlamah chuan, lung nih lohna pai rengna chuan natna min neihtîr thei a ni.

Kristian zawng zawng deuh thaw chuan remna ûm a ngai tih pawm ṭheuh mah se, harsatna kan neihte chinfel dân tûr i hre lo mai thei a. Chu mi kawnga min kaihruai thei Bible thu bulte i lo enfiah ang u.

 Dam Taka Sawihona Chuan Remna A Awmtîr Thei

Kawngpui khî chu khuh bova siam ṭhat theih a ni ṭhîn a. Unaute tlin lohna chhe tê tête ngaidama khuh bo mai chu kan thei em? He tih dân hi mi mal inkâra harsatna awm zawng zawng atân a hman theih ang; tirhkoh Petera chuan “hmangaihnain sual tam tak a khuh si ṭhîn” a ti si a.​—⁠1 Pet. 4:⁠8.

Amaherawhchu, kan harsatna chu a nasat êm avângin ngaihthah mai theih loh châng a awm thei a. Israel fate’n Ram Tiam an luah hnu lawka thilthleng kha ngaihtuah teh. “Rubena thlahte leh Gada thlahte leh Manase hnam zâtvete” chuan Jordan Lui” an kân hmain “maichâm lianpui langsâr tak” an siam a. Israel hnam dangte chuan chu maichâm chu milem biakna atâna hman a nih an ring a, an ngaihthah mai thei lo va, sipai chaknaa do tûrin an inbuatsaih a ni.​—⁠Jos. 22:​9-12.

Israel mi ṭhenkhat chuan an thil sual tih finfiahna ṭhahnem tâwk a awm tawhah ngaiin, an lama ṭangte an thih tlêm zâwk nân a rûka han beih mai chu an tum a. Amaherawhchu, hmanhmawh taka chêt han lâk ai chuan, Jordan thlang lama awm hnamte chuan an unaute nêna buaina sawiho tûrin palai an tîr a ni. Anni chuan: “Israelte Pathian chungah engnge maw in tihsual le, LALPA chungah vawiinah hian hel tuma maichâm siamin vawiinah hian LALPA chu in hawisan le?” tiin an zâwt a. A nihna takah chuan, maichâm satu hnamte chuan thil engmah an tisual lo. Mahse, chutiang puhna chu engtin nge an chhân lêt ang? Anmahni puhtute chu ṭawngkamin an bei lêt dâwn nge ni a, an be duh lo zâwk dâwn? Puha awmte chuan ṭawngkam nêm taka chhângin, an thiltih chu Jehova rawngbâwl châk vânga ti an nihzia fiah takin an hrilh a ni. An chhân lêt dân chuan Pathian nêna an inlaichînna a vên him bâkah nun a chhanhim bawk a. Dam taka sawihona chuan buaina a chingfelin, remna a awmtîr leh a ni.​—⁠Jos. 22:​13-34.

Israel mi dangte chuan thil khûnkhân tak an tih hmain Rubena thlahte, Gada thlahte, leh Manase hnam zâtvete chu an buaina an sawipui phawt a ni. Pathian Thu chuan: “I rilruah thinur hmanhmawh suh, mi âte ṭâng laiah a châm ṭhîn, thinurna hi,” a ti. (Thur. 7:⁠9) Pathian Lehkha Thu anga mi mal inkâra harsatna chinfel dân chu dam tak leh tlang takin sawihona neih hi a ni. Min tilungni lotu va pan lova lungnih lohna kan pai reng chuan Jehova malsâwmna kan beisei thei tak zet ang em?

Kawng lehlamah chuan, kan Kristian unau pakhatin kan chunga lungnih lohna a neih avânga rawn panin, dik lo takin min puh hial ta se, engtin nge ni ang? Bible chuan: “Chhânna nêmin thinur a tikiang ṭhîn,” a ti. (Thuf. 15:⁠1) Mi dang tilungni lotu Israel hnamte chuan an dinhmun chu thuhnuairawlh tak, fiah tak siin an hrilhfiah a, chu chuan an unaute nêna thinur taka an intihbuaina tûr chu a pumpelhtîr a ni. Buaina avângin kan unau kan be hmasa emaw, ani’n min lo bia emaw pawh ni se, heti hian kan inzâwt tûr a ni, ‘Eng ṭawngkam, awphawi, leh taksa kenkawh dân hian nge remna awmtîr thei ber ang?’ tiin.

I Lei Fing Takin Hmang Rawh

Jehova chuan kan rilru veizâwng kan sawi chhuah a ngai tih a hria a. Amaherawhchu, mi mal inkâra harsatna awm kan chinfel loh chuan, mi dang hnêna hrilh kan lo duh ngei ang a. Chutiang thinurna pai rengna chuan awlsam takin ṭawngkam êlsên tak a hring thei a ni. Lei hman dik lohna chungchângah, Thufingte 11:11 chuan: “Mi suaksualte kâ erawh chuan [khua] a tichhia,” a ti. Chutiang bawkin, kan Kristian unau pakhat chanchin insûm hlek lova sawina chuan  khua anga sawi theih kohhran chhûnga remna awm chu a tibuai thei a ni.

Mahse, remna ûm kan tih hian kan unaute chanchin kan sawi lo hulhual tihna erawh a ni lo. Tirhkoh Paula chuan rinnaa a unaute chu: “Thu ṭha lo rêng in kâan chhuak suh se,” tiin a zilh a. Tichuan, heti hian a sawi zawm a ni: “A ṭûlzia ang zêla siam ṭha tûrin thu ṭha apiang chhuak zâwk rawh se . . . Inkhawngaih tawna lainatna neiin awm ula, . . . inngaidam tawn rawh u,” tiin. (Eph. 4:​29-32) I ṭawngkam chhuak emaw, i thiltih emaw avânga lungni lo unaupa’n a biak che chuan, tûn hmain i chungchâng a chhe lam engmah a sawi loh chuan ngaihdam dîla remna siam chu a awlsam zâwk dâwn lâwm ni? Chutiang bawkin, kan Kristian unaute nêna kan inbiak huna mi siam ṭha thei ṭawngkam hman ṭhinna chuan harsatna a lo chhuah huna remna siam chu a tiawlsam lehzual ang.​—⁠Lk. 6:⁠31.

‘Thu Khat Vuain’ Pathian Rawng Bâwl Rawh U

Kan mihring ṭhat famkim lohna avângin, min tilungni lotute pumpelh a, mahni inkulh hran mai kan châk ṭhîn. Mahse, chu chu kawng finthlâk a ni lo. (Thuf. 18:⁠1) Jehova hming lamtu mi inlungrual tak kan nih angin, “thu khat vuaa” a rawng bâwl chu kan tum tlat a ni.​—⁠Zep. 3:⁠9.

Mi dangte ṭawngkam leh nungchang mawi lo takte chuan biakna dik atâna kan ṭhahnemngaihna chu a tichau ngai tûr a ni lo. Isua chuan a inthawinain biak ina inthawinate a luahlan hmaa lehkhaziaktute a dem nghek hnuah, hmeithai rethei takin “a intunnunna tûra a neih chhun tê” chu biak in thawhlâwm bâwma a thlâk lai chu a hmu a. Isua’n ani chu thlâk lohtîr a tum em? Tum ahnêkin, chutih hun laia Jehova kohhran rinawm taka a ṭanpuina avângin a fak zâwk mah a ni. (Lk. 21:​1-4) Mi dangte thil fel lo tih chuan Jehova biakna ṭanpui tûra a mawhphurhna ata chu hmeithai chu a bân chuang lo.

Kristian unaupa emaw, unaunu emawin thil dik lo leh fel lo tak ti nia kan hriat chuan, engtin nge kan tih ang? Chu chu Jehova hnêna thinlung zawng zawnga a rawng kan bâwlna kan khawih pawitîr ang em? Nge ni a, tûn laia Pathian kohhran zînga awm remna humhim tûr chuan mi mal inkâra harsatna awmte chingfel tûrin huaisen takin hma kan la zâwk dâwn?

Pathian Thu chuan: “A theih phawt chuan nangmahni lam tal, mi zawng zawng nên inremin awm rawh u,” tiin min zilh a. (Rom 12:18) Chutianga tih chu tum tlatin, nunna kawngah chuan i kal zêl ang u.  (w08 11/15)

[Footnote]

[Phêk 12-naa milem]

Eng ṭawngkam, awphawi, leh taksa kenkawh dân hian nge remna awmtîr thei ber ang?