Isua Angin “Diabola Dodâl Rawh”
Isua Angin “Diabola Dodâl Rawh”
“Diabola dodâl rawh u, tichuan a tlân bosan ang che u.”—JAK. 4:7.
1. Isua’n leia a tawh tûr dodâlna eng nge a hriat a, chu chuan eng nge a rah chhuah dâwn?
ISUA KRISTA chuan Diabola dodâlna a tâwk dâwn tih a hria a. Chu chu Pathianin rûl leh a ṭawngtîrtu hnêna a thusawi: “Nang leh hmeichhia [Jehova inawpna pâwl vân lam pêng] hi ka indotîr ang che u a, i thlahte leh a thlahte pawh ka la indotîr bawk ang: chu mi [Isua Krista] chuan i lû a la tithitling ang a, nangin a ke artui i la tithitling ang,” tih aṭang hian a lang reng a ni. (Gen. 3:14, 15; Thup. 12:9) Isua ke artui tihthitlinna chuan leia a awm laia rei lo te chhûng tihhlum a nihna a kâwk a ni; Jehova chuan vân ropuina neiin a kaitho dâwn si a. Mahse, rûl lû tihthitlinna erawh chuan a din chhuah leh ngai lohna tûra Diabola tihhlumna a kâwk thung a ni.—Tirhkohte 2:31, 32; Hebrai 2:14 chhiar rawh.
2. Engvângin nge Isua’n hlawhtling takin Diabola a dodâl dâwn tih Jehova chuan a rin tlat theih?
2 Isua chuan a hnathawh tûr chu thawk zovin, leia a awm laiin Diabola chu a dodâl ang tih Jehova chuan a ring thlap a. Engvângin nge Jehova chuan chutiang chu a ni ngei ang tih a rin thlap theih? Kum chhiar sên loh kal ta khân vânah Isua siamin, hun rei tak chhûng a lo hre tawh a; he “mi themthiam” leh “thil siam zawng zawnga piang hmasa ber” hi thuâwih tak leh rinawm tak a ni tih a hria a ni. (Thuf. 8:22-31; Kol. 1:15) Chuvângin, Isua chu leia a tirh a, a thih thlenga Diabola thlêmna a tawh a phal khân, Pathianin a Fapa mal neih chhun chuan Diabola chu hlawhtling takin a dodâl dâwn tih a ring tlat a ni.—Joh. 3:16.
Jehova Chuan A Chhiahhlawhte A Humhim Ṭhîn
3. Jehova chhiahhlawhte chunga Diabola rilru put hmang chu eng nge ni?
3 Isua chuan Diabola chu “he khawvêl lal” tia kovin, A zirtîrte chu amah ang bawka tihduhdah an nih tûr thu a hrilh a. (Joh. 12:31; 15:20) Diabol-Setana thuneihna hnuaia awm he khawvêl hian Jehova rawngbâwl a, felna thu hril bawktu Kristian dikte chu a hua a ni. (Mt. 24:9; 1 Joh. 5:19) Ani chuan nakina Krista nêna vân lam Lalrama rorêltu tûr hriak thih a la bângte chu a do bîk a. Tin, lei paradis-a chatuana nunna beiseitu Jehova Thuhretu tam takte pawh a do bawk. Pathian Thu chuan: “In khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn,” tiin min vaukhân a ni.—1 Pet. 5:8.
4. Kan hun lai hian Pathian mite chuan Diabola chu hlawhtling takin an dodâl tih engin nge finfiah?
4 Pathian Jehova ṭanpuina dawng inawpna pâwl zînga mi kan nih angin, Diabola chu hlawhtling takin kan dodâl a. Hêngte hi han ngaihtuah teh: Kum 100 kal ta chhûng khân, mihring chanchina lal nunrâwng ber berte zînga ṭhenkhat chuan Jehova Thuhretute nuai bo vek chu an lo tum a. Mahse, Jehova Thuhretute chu an pung zêl a, tûnah chuan khawvêl puma kohhran 100,000 chuangah awmin, mi 7,000,000 an tling ṭêp tawh a ni. Anmahni tiduhdahtu lal nunrâwng takte chu nuai bovin an awm zâwk mah a nih chu!
5. Engtin nge Isaia 54:17 thu chu Jehova chhiahhlawhte chungah a thlen dik?
5 Hmân laia Israel pung khâwmte hnênah Pathian chuan: “Nangmah beina tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang. Chu chu LALPA chhiahhlawhte rochan chu a ni a, an felna chu ka hnên ata a ni,” tih a tiam a. (Is. 54:17) Chu thutiam chu hêng ‘ni hnuhnûnga’ awm khawvêl puma Jehova mite tân chuan a rin tlâk a ni. (2 Tim. 3:1-5, 13) Diabola chu kan dodâl zêl a, Pathian mite nuai bo tûra hriam chher rêng rêng chu a hlawhtling lo; Jehova chu kan lamah a ṭang si a.—Sâm 118:6, 7.
6. Daniela hrilh lâwkna chuan Diabola rorêlna chunga thilthleng tûr eng nge min hrilh?
6 He kalhmang suaksual zawng zawng tâwpna lo thleng thuai tûrah hian, Setana rorêlna pêng tinrêngte chu nuai bo vek a ni ang. Thlarau thâwk khuma awm zâwlnei Daniela chuan: “Chûng [kan tûn lai huna awm] lalte nîah chuan vân Pathianin [vânah] ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; [tûna rorêl mêk] hêng ram zawng zawngte hi a tihkeh sawmin a tiral zawk ang a, kumkhuain a ding reng ang,” tiin a sawi lâwk a ni. (Dan. 2:44) Chu mi a lo thlen hun chuan, Setana leh mihring ṭha famkim lote rorêlna chu a bo vang. Diabola rorêlna zawng zawng chu chatuan atân a bo hlen tawh ang a, dodâltu nei lo Pathian Ram chuan leilung zawng zawngah ro a rêl ang.—2 Petera 3:7, 13 chhiar rawh.
7. Engtin nge Jehova chhiahhlawhte chuan a mi malin Diabola chu hlawhtling takin an dodâl thei tih kan hriat theih?
7 Jehova inawpna pâwl chu humhim a ni ang a, thlarau lamah a duah hluah hluah ang tih rinhlelh rual a ni lo. (Sâm 125:1, 2 chhiar rawh.) Chutiang chu kan ni ve ang em? Bible chuan Diabola dodâlna kawngah Isua ang bawkin kan hlawhtling thei tih min hrilh a. Tirhkoh Johana kal tlanga Krista min pêk hrilh lâwkna chuan Setana dodâlna kârah pawh lei lam beiseina nei “mipui tam tak” chu he kalhmang tâwpnaah an dam khawchhuak ang tih a târ lang. Bible sawi dân chuan, anni chu: “Kan Pathian lalṭhutphaha ṭhua hnênah leh, Berâm No [Isua Krista] hnênah chhandamna,” tiin an au a ni. (Thup. 7:9-14) Hriak thihte chu Setana hneh anga sawi an ni a; tin, an ṭhian “berâm dang” pawh chuan ani chu hlawhtling takin an dodâl a. (Joh. 10:16; Thup. 12:10, 11) Mahse, chutianga do hlawhtling tûr chuan taihmâk chhuah leh ‘mi sual laka chhandam’ ni tûra tih tak zeta ṭawngṭai a ngai a ni.—Mt. 6:13.
Diabola Dodâlna Kawnga Entawn Tûr Ṭha Famkim
8. Isua thlêm nâna Diabola hman thlêmna hmasa ber chu eng nge ni a, engtin nge Krista’n a chhân lêt?
8 Diabola chuan Isua rinawmna chu tihchhiatsak a tum a. Thlalêrah khân, Setana chuan Isua chu Jehova thu âwih lo tûrin a thlêm a. Amaherawhchu, Isua chuan Setana dodâlna kawngah entawn tûr ṭha famkim a siam a ni. Ni 40 leh zan 40 chhûng engmah ei lova a awm hnu chuan, Isua chu a ril a ṭâm hle ngei ang. Setana chuan: “Pathian Fapa i nih chuan hêng lung hi chhanga chang tûrin thu pe rawh,” a ti a. Mahse, Isua chuan Pathian pêk thiltihtheihna a neih chu mahni hlâwkpui atân a hmang duh lo. Hman ahnêkin, Isua chuan: “‘Mihring hi chhang chauhvin an nung lo vang a, Pathian kaa thu tin chhuakin an nung zâwk ang,’ tih ziak a ni,” a ti a ni.—Mt. 4:1-4; Deut. 8:3.
9. Engvângin nge Diabola’n kan tisa châkna pângngaite remchânga hman a tumna chu kan do vang?
9 Tûn laiah pawh, Diabola chuan Jehova chhiahhlawhte tisa châkna pângngai tak chu remchânga hman dân a zawng a. Chuvângin he khawvêl bawlhhlawh taka hluar êm êm mipat hmeichhiatna lama thlêmna chu do kan tum tlat tûr a ni. Pathian Thu chuan: “A nih leh, mi fel lote chuan Pathian ram an luah lo vang tih in hre lo em ni le? Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte . . . emawin Pathian ram an luah lo vang,” tiin tlang takin a sawi dawt a ni. (1 Kor. 6:9, 10) Chuti chu, nungchang bawlhhlawh taka nung a, insiam ṭha duh lote chu Pathian khawvêl tharah nun phal an ni lo vang tih a chiang hle.
10. Matthaia 4:5, 6 târ lan angin, Isua rinawmna tihchhiatsak nâna Setana hman thlêmna dang chu eng nge ni?
10 Thlalêra Isua tawh thlêmna pakhat chungchângah, Bible chuan: “Diabolan khaw thianghlimah chuan a hruai lût a, Pathian biak in chhîp zumah chuan a dah a, tin, a hnênah, ‘Pathian Fapa i nih chuan tla thla rawh; “I chung thuah zawng a vântirhkohte chu thu a pe ang a, an kutin an dâwm ang chia, chutilochuan i kein lung i chhuih hlauh dah ang e,” tih ziak a ni si a,’ a ti a,” tiin a sawi. (Mt. 4:5, 6) Hei hi Isua tân Messia a nihzia lantîrna ropui tak a ni dâwn tih a sawi hmuhna a ni. Mahse, a nihna takah chuan Pathian pawmpuina leh ṭanpuina tel lo thiltih chapothlâk tak leh tihâwm lo tak a ni ang. Tûn ṭumah pawh, Isua chuan Bible châng la chhuakin: “‘Lalpa i Pathian fiah suh,’ tih ziak a ni ve bawk e,” tiin a chhâng a, Jehova chunga a rinawmna chu a vawng leh a ni.—Mt. 4:7; Deut. 6:16.
11. Engtin nge Setana chuan min thlêm theih a, eng ang sawhkhâwk nge a thlen theih?
11 Setana chuan kawng chi hrang hranga chawimawina zawng tûrin min thlêm thei a. Ani chuan khawvêl mite silhfên leh inchei dân entawn tûr emaw, rinhlelh kai intihhlimnaa tel tûr emawin min thlêm thei bawk. Mahse, Bible zilhna thute ngaihthaha khawvêl kan entawn chuan, vântirhkohte’n chutiang thil kan tihna aṭanga lo awm rah ṭha lote laka min hum chu kan beisei thei ang em? Lal Davida chu Bat-sebi chungthua a thil sual tih chungchângah inchhîr mah se, a thiltih sawhkhâwk lak ata hum a ni lo. (2 Sam. 12:9-12) Kawng dik lo, khawvêl ṭhiana insiamna ang chite hmangin Jehova chu i fiah suh ang u.—Jakoba 4:4; 1 Johana 2:15-17 chhiar rawh.
12. Matthaia 4:8, 9-a chhinchhiah thlêmna chu eng nge ni a, Pathian Fapa chuan engtin nge a chhân lêt?
12 Thlalêra Diabola hman thlêmna dang lehah chuan Isua hnêna politics lama thu neihna pêk tiamna a tel a. Setana chuan Isua hnênah khawvêl ram zawng zawng leh a ropuina chu a entîr a, tichuan a hnênah: “Bawkkhupin chibai mi bûk la, hêng zawng zawng hi ka pe vek ang che,” a ti a. (Mt. 4:8, 9) Jehova chan tûr liau liau chibai bûkna rûksak tumna leh, Isua chu Pathian chunga rinawm lo tûra thlêmna a va ni êm! Chibai bûk nih a duhna a ngaihtuah ngut ngut avângin, he tûn hmaa vântirhkoh rinawm tak hi sual tak, duhâm tak, leh thlêmtu sual tak Diabol-Setana a lo ni ta a ni. (Jak. 1:14, 15) Amaherawhchu, chu mi nêna inkalh takin, Isua chuan a Pa vâna mi chunga rinawm a tum tlat a, chuvângin: “Setan, kal bo daih rawh! ‘Lalpa i Pathian chibai bûk la, ama rawng chauh bâwl rawh, tih ziak a ni,” a ti a ni. Chutiang chuan, Isua chuan Diabola chu chiang fiah takin a dodâl leh a. Pathian Fapa chuan Setana khawvêla mi nih a duh si lo va, chu mi suala chu chibai a bûk lo chiang ngawt ang!—Mt. 4:10; Deut. 6:13; 10:20.
“Doabola Dodâl Rawh U, Tichuan A Tlân Bosan Ang Che U”
13, 14. (a) Isua hnêna khawvêl ram zawng zawng a entîr khân, Diabola chuan eng nge pêk a tum? (b) Engtin nge Setana’n min tihchhiat a tum?
13 Diabola chuan khawvêl ram zawng zawng leh a ropuina chu Isua entîrin, mihring tuma la neih ngai lo thu neihna pêk a tum a. Ani chuan Isua hnêna a thil hmuhtîr hian leia politics hruaitu thiltithei ber nih duhna a neihtîr a beisei a ni. Tûn lai hian Diabola chuan khawvêl lalramte chu pêk min tiam lo va; mahse, kan mitte, bengte, leh rilru ngaihtuahnate hmanga kan thinlung tihkhaw loh chu a tum a ni.
14 Diabola chuan he khawvêl hi a thunun tlat a. Chuti chuan, a chhûnga awm chanchin thehdarhnate pawh a thunun a ni. Chuvângin, khawvêl mite thil en te, thil ngaihthlâkte, leh lehkha chhiar te hi nungchang bawlhhlawhna leh tharum thawhnaa a khat pawh hi mak kan ti hran lo. He khawvêla thil fakmawinate hian kan mamawh loh thil tam tak lei châkna min neihtîr a tum reng a ni. Chutiang thilte hmang chuan, Diabola chuan kan mitte, bengte, leh rilru ngaihtuahnate duhzâwng tak hausak âtchilhna lamah min thlêm reng ṭhîn. Mahse, Bible thu bulte kalhtu thlîr tûrte, ngaihthlâk tûrte, leh thil chhiar tûrte kan hnâwl hian, a nihna takah chuan: “Setan, kal bo daih rawh!” kan ti a ni. Hetiang hian, Setana khawvêl bawlhhlawh tak hnâwl tlatna kawngah Isua kan entawn a. Setana khawvêla mi kan nih lohzia chu kan hnathawhna hmun te, school te, kan vêng chhûngah te, leh kan chhûngkhatte laka Jehova Thuhretute leh Krista hnung zuitu kan nihzia huaisen taka kan inhriattîrnaah pawh hian a lang chiang hle a ni.—Marka 8:38 chhiar rawh.
15. Engvângin nge Setana dodâl tûra engtik lai pawha harhvân reng a ngaih?
15 Ṭum thum ngawt Pathian laka Isua rinawmna tihchhiatsak a tumna a hlawhchham hnuah, “Diabola chuan a kalsan ta a.” (Mt. 4:11) Amaherawhchu, Setana chuan Isua a thlêmna chu bânsan mai a tum lo: “Tin, Diabolan [thlalêra] a thlêmna tûr tinrênga a thlêm zawh chuan a remchân hun atân a kalsan ta a,” tia hriattîr kan ni si a. (Lk. 4:13) Diabola kan do hlawhtlin theih hunah, Pathian Jehova hnênah lâwmthu kan sawi tûr a ni. Mahse, Diabola chuan atâna hun remchâng dangah min thlêm leh dâwn avângin Pathian ṭanpuina kan dîl zawm zêl tûr a ni—chu chu thlêmna tawh kan inbeisei lai a ni kher dâwn si lo va. Chuvângin, engtik lai pawha harhvâng rengin, kan hmachhawn tûr fiahna chu engpawh lo ni se Jehova hnêna rawngbâwlna thianghlim hlân hrâm hrâm reng tûrin kan inpeih reng tûr a ni.
16. Jehova chuan chakna thiltithei tak eng nge min pêk a, engvângin nge chu mi dîla kan ṭawngṭai ang?
16 Diabola dodâlna kawnga min ṭanpui tûrin, lei leh vâna chakna thiltithei ber—Pathian thlarau thianghlim—dîlin kan ṭawngṭai tûr a ni a, chu chu kan dawng reng tûr a ni bawk. Chu chuan keimahni chakna rinchhana kan tih theih loh tûr thilte min tihtîr thei a ni. Isua chuan a hnungzuitute hnênah Pathian thlarau hmuh theih a nihzia chu heti hian a tiam a ni: “Chutichuan nangni [ṭhat famkim lohna avânga engemaw chena] mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!,” tiin. (Lk. 11:13) Chuvângin, Pathian thlarau thianghlim dîlin i ṭawngṭai zêl ang u. Diabola dodâl kan tum tlatna chu he chakna thiltithei berin min thlâwp chuan, hnehtu chan kan chang thei ang. ‘Diabola ngamthlêmnate kan do zawh nân,’ hunbi nei leh tih tak zeta ṭawngṭai bâkah, Pathian hnêna mi thlarau lam râlthuam famkima kan inthuam a ngai a ni.—Eph. 6:11-18.
17. Diabola dodâl tûrin Isua chu eng hlimnain nge ṭanpui?
17 Thil dang engemaw chuan Isua chu Diabola dodâl tûrin a ṭanpui a, chu chuan keini pawh min ṭanpui ve thei a ni. Bible chuan: “[Isua] chuan a hmaa hlimna awm avâng chuan mualphona chu . . . a tuar a, Pathian lalṭhutphah ding lamah khian a han ṭhu ta a,” a ti. (Heb. 12:1, 2) Jehova lal chungnunna thlâwp tlatin, a hming thianghlim chawimawiin, leh a lâwmman chatuana nunna chu kan hmaa dah tlatin, chutiang bawk hlimna chu kan nei ve thei a ni. Setana leh a hnathawh zawng zawngte chatuan atâna nuai bo vek a nih a, ‘thuhnuairawlhte’n ram an luah a, remna chêna an hmuingîl’ hunah chuan kan va hlim dâwn êm! (Sâm 37:11) Chuvângin, Isua ang bawkin Diabola chu dodâl reng ang che u.—Jakoba 4:7, 8 chhiar rawh. (w08 11/15)
Engtin Nge Kan Chhân Ang?
• Jehova chuan a mite a vênghim tih finfiahna eng nge awm?
• Engtin nge Isua chuan Setana dodâlna kawngah entawn tûr a siam?
• Eng kawngin nge Diabola i dodâl theih?
[Zirlai Atâna Zawhnate]
[Phêk 29-naa milem]
Isua chuan Setana pêk tum khawvêl ram zawng zawngte a hnâwl