Messia Chungchâng Hrilh Lâwkna

JUDA hnamte chuan Isaia leh zâwlnei dangte’n Messia chungchâng hrilh lâwkna an ziakte chu an hriat avângin, a lo thlen tak tak hun tûr chu hun rei tak chhûng an lo beisei tawh a. Mahse, Isua leia a awm lai chuan Juda mi tam takte chuan a lo thlen tawh ngei “an beisei” a ni. (Luka 3:15) Chhinchhiah tlâk takin, Bible hrilh lâwknaahte chuan Messia nun chanchin tam tak a tel a. Mihring tumah hian chutiang thilthleng tûrte chu an sawi lâwk thei lo vang a, Isua leia a awm chhûngin a chungah an thlen famkimtîr thei bawk hek lo vang.

Messia Pian Dân Tûr Chanchin. Isaia chuan Messia, a nih loh leh Krista chu nula thianghlim hrin a ni dâwn tih a sawi lâwk a. Tirhkoh Matthaia chuan Isua pian dân tûr dinhmun mak tak a sawi hnuah, heti hian a ziak a ni: “Lalpan zâwlnei kaah, ‘Ngai teh, nula thianghlim chu a rai ang a, fapa a hring ang,’ . . . tia a sawi kha a lo thlen theihna tûrin chûng zawng zawng chu a lo awm a ni,” tiin. (Matthaia 1:​22, 23; Isaia 7:14) Isaia chuan Krista chu Davida thlah​—⁠Jesaia fapa Davida thlah​—⁠a nih tûr thu chiang takin a sawi lâwk bawk a. Isua chu Davida thlah a ni tak zet a ni. (Matthaia 1:​6, 16; Luka 3:​23, 31, 32) Chuvângin, Isua a pian hmain vântirhkoh Gabriela chuan Isua nu Mari hnênah: “Pathianin a hnênah a thlahtu Davida ṭhutphah chu a pe ang,” tiin a hrilh a ni.​—⁠Luka 1:​32, 33; Isaia 11:​1-5, 10; Rom 15:⁠12.

Messia Nun Dân Chanchin. Nazaret khua inkhâwmna inah, Isua chuan Isaia hrilh lâwkna a chhiar a, chutah chuan hêng thute hi a tel a ni: “Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm,” tih hi. Chu hrilh lâwkna chu a chungchâng sawina a nihzia sawiin, Isua chuan: “He Pathian Lehkha Thu hi vawiinah hian in hriatah a lo thleng ta,” a ti. (Luka 4:​17-21; Isaia 61:​1, 2) Isaia chuan tihdam ngaite chunga Isua lantîr ngilneihna te, thuhnuairawlhna te, leh inngaihtlâwmna te a sawi lâwk bawk. Matthaia chuan: “Mi tam takin amah an zui a, an zain a lo tidam vek a, a chanchin  puan loh tûr an hnênah a ti tlat a: zâwlnei Isaian, . . . ‘A hnial lo vang a, a au hek lo vang . . . Luang sâwp a titliak fithla lo vang,’ . . . tia a sawi kha a lo thlen theihna tûrin,” tiin a ziak a ni.​—⁠Matthaia 8:​16, 17; 12:​10-21; Isaia 42:​1-4; 53:​4, 5.

Messia Hrehawm Tawrh Dân Chanchin. Isaia chuan Messia chu Israel mi tam zâwkte’n an pawm loh tûr thu leh an tâna “tlûkna lung” a nih zâwk mah tûr thu a sawi a. (1 Petera 2:​6-8; Isaia 8:​14, 15) Dik takin, Isua’n thilmak tam tak a ti chung pawhin, mite chuan “amah an ring si lo: ‘Lalpa kan thusawi tuin nge ring? Lal kut pawh tu hnênah nge a lan?’ tih zâwlnei Isaia thusawi kha a thlen nân.” (Johana 12:​37, 38; Isaia 53:⁠1) Judate’n Messia an rin loh chhan chu, Messia chuan Rom awpna ata anmahni chhuah zalên a, Davida lalram leia din nghâl thuai tûra rinna lâr tak, dik si lo an neih vâng a ni. Isua chu hrehawm tuara a thih avângin, Juda mi a tam zâwkte chuan Messia angin an pawm thei lo va. Mahse, a nihna takah chuan, Isaia chuan Messia’n Lal a nih hmaa hrehawm a tawrh tûr chungchâng a lo sawi lâwk tawh a ni.

Isaia lehkhabu chhûngah hian, Messia chuan: “Ka hnungzâng hi vawtute hnênah ka dawh a, . . . Mualphonaah leh chilah ka hmai ka hup lo,” tiin a lo sawi lâwk a. Matthaia chuan Isua chungthu rêl a nih laia thilthleng chu heti hian a ziak a ni: “A hmaiah chil an chhâk a, an hnek a; ṭhenkhat chuan . . . an bêng a,” tiin. (Isaia 50:6; Matthaia 26:67) “Ani chu hnehchhiahin a awm a, nimahsela a inngaitlâwm a, a kâ pawh a âng lo,” tiin a ziak bawk. Chuvângin, Pilata’n Judate hêkna chungchânga Isua a zawh khân, a ni chuan “kam khat mahin a chhâng lo va; chutichuan Rom Awptu chuan mak a ti hle” a ni.​—⁠Isaia 53:7; Matthaia 27:​12-14; Tirhkohte 8:​28, 32-35.

Messia Thih Dân Chanchin. Isaia hrilh lâwkna chu Isua thih leh a hnu lam thleng khân a thleng famkim chho zêl a. Isaia chuan: “A thlân chu mi sualte hnên lamah an ruatsak a, a thih hnu chuan mi hausa hnên lamah a awm a,” tiin a sawi lâwk a ni. (Isaia 53:⁠9) Engtin nge he inkalh taka lang hrilh lâwkna hi a thlen famkim theih ang? Isua a thih khân, ani chu suamhmang pahnih ruala khenbeh a ni a. (Matthaia 27:38) Mahse, mi hausa Arimathai khuaa mi Josefa chuan Isua ruang chu ama thlân thar lung kerkuakah chuan a zalh a ni. (Matthaia 27:​57-60) A tâwp berah chuan, Isua thihna chuan Isaia hrilh lâwkna zînga pawimawh ber pakhat a tithleng famkim a ni. Messia chungchâng sawiin, Isaia chuan: “Ka chhiahhlawh fel tak chuan a hriatnain mi tam tak chu thiam a chantîr ang a, an khawlohnate chu a phurhsak ang,” a ti a. Dik takin, Isua thihna chuan mi rinawm zawng zawngte sual phurrit chu paih chhuahsak theih nân tlanna a pe a ni.​—⁠Isaia 53:​8, 11; Rom 4:⁠25.

Thleng Famkim Ngei Ngei Tûr Hrilh Lâwknate

Pathian Lehkha Thu hmanga Messia nihna hriat fiah theih nân, tirhkohte leh Isua ngei chuan Bible bu dang aiin Isaia lehkhabu chu an la chhuak zing êm êm a. Amaherawhchu, Isaia lehkhabu chu nakin hun sawi lâwkna lehkhabu awmchhun a ni lo. Hebrai Pathian Lehkha Thua hrilh lâwkna tam tak dangte chu Isua-ah te, a Lalram-ah te, leh nakina Lalramin a awmtîr tûr thil ṭha-ah te hian a thleng famkim ang. * (Tirhkohte 28:23; Thu Puan 19:10) Hêng hrilh lâwknate thlen famkimna tûr chu eng anga chiang nge a nih? Isua chuan Juda mi a thu ngaithlatute hnênah: “Dân thu emaw, zâwlneite thu emaw tiboral tûra lo kal ka nih ring suh u; tiboral tûra lo kal ka ni lo va, tifamkim tûra lo kal ka ni zâwk.  Tih tak meuhvin ka hrilh a che u, lei leh vân hi a boral hma loh chuan Dân thua mi chhun han te tak tê emaw, thai han te tak tê emaw, pakhat mah a boral tawp lo vang, a zaa a thlen kim hma loh zawng,” a ti a ni.​—⁠Matthaia 5:​17, 18.

Isua pawhin a hun laia thleng famkim leh nakina lo la thleng famkim tûr Bible hrilh lâwknate chu a sawi bawk a. (Daniela 9:27; Matthaia 15:​7-9; 24:15) Chu bâkah, Isua leh a zirtîrte ngei pawhin an hun hnu lama thilthleng tûrte chu an sawi lâwk a, chûng zînga tam takte chu tûn hunah a thleng famkim mêk a ni. A dawta thuziak hian hêngte leh Bible hrilh lâwkna lo la thleng famkim tûr dangte a sawi lang ang. (w08 10/1)

[Footnote]

[Phêk 4-naa milem]

‘Nula thianghlim chuan . . . fapa a hring ang’

[Phêk 5-naa milem]

“Mualphonaah . . . ka hmai ka hup lo”