Nakin Lawka Thilthleng Tûr Sawi Lâwkna
Nakin Lawka Thilthleng Tûr Sawi Lâwkna
MIHRINGTE nakin hun tûr leh leilung hmabâk tûr a sawinaah, tirhkoh Petera chuan: “[Pathian] thutiam ang chuan vân tharte leh lei thar, a chhûnga felna awmte chu kan beisei a ni,” tiin a ziak a. (2 Petera 3:13) “Vân tharte leh lei thar” chungchânga thutiam chu atîrin zâwlnei Isaia kal tlanga pêk a ni. (Isaia 65:17; 66:22) Chu hrilh lâwkna chu la chhuakin, Petera chuan a hun laia a la thlen famkim pumhlûm lohzia a târ lang a ni.
A hnuah, C.E. 96 vêla tirhkoh Johana hnênah pêk Thu Puan chhuahna chuan “lei thar” chu Pathian Rama malsâwmnate nên a thlun zawm a. (Thu Puan 21:1-4) Isua leh tirhkoh Paula’n Pathian Ram a lo thlen hmaa thil thleng tûr an sawite chu a thleng famkim tawh a ni. Chuvângin, Pathian Ramin khawvêl thar a rawn thlentîr thuai chu kan beisei thei ta. Chu khawvêl thar chu eng ang nge a nih ang? Bible-a Isaia lehkhabu hian min hrilh a ni.
Khawvêl Thara Malsâwmna Awm Tûrte
Khawvêl Puma Remna leh Biakna Dika Inpumkhatna. “A khandaihte chu leilehna hmâwr zumahte an chher ang a, an feite chu theikung ahchhumna chem kawmahte an chher ang: hnam dangin hnam dang chungah khandaih an lek tawh lo vang a, indo dân pawh an zir tawh hek lo vang.”—Isaia 2:2-4.
Mihring leh Ramsate Inkâra Remna. “Chinghnia chu berâm no nên an awm dûn tawh ang a, keitê chu kêl no nên an bawk dûn tawh bawk ang; bâwng no leh sakeibaknei vânglai leh ran châwmthaute chu an awmho tawh ang a; naupang têin a hruai duah duah ang. Tin, sebâwng leh savawm an tla ang a; an notête chu an bawk za dial dial tawh ang: tin, sakeibaknei chuan bâwngpa angin buhpâwl a ei tawh ang. . . . Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang: tuite hian tuifinriat a khuh reng angin, leilung hi LALPA hriatnain a khat zo vek dâwn a ni.”—Isaia 11:6-9.
Mi Tin Tâna Ei Tûr Hnianghnâr Tak. “He tlângah hian sipaihote LALPA chuan mi tinrêngte tân thil thautein ruai a ṭheh ang, uainte a fê nêna inchiah reng, thil thau takte thlînga khat, uainte a fê nêna inchiah reng ṭha taka thlit fai chu.”—Isaia 25:6.
Thihna A Awm Tawh Lo. “Thihna chu [Pathianin] a lem hlen ta; Lalpa PATHIAN chuan mi zawng zawng hmai ata chu mittuite a hru fai ang a; a mite hmingchhiatna chu leilung luah zawng zawng ata a la bo vang: LALPAN chu chu a sawi tawh si a.”—Isaia 25:8.
Mitthite An Tholeh. “I mitthite chu an nung leh ang a; ka mi ruangte chu an tho leh ang. Vaivuta awmte u, harh ula, hlim takin zai rawh u. . . . Lei hian mitthite chu a paih chhuak dâwn si a.”—Isaia 26:19.
Rorêltu Fel Messia. “A mita a hmuh angin ro a rêl lo vang a, a benga a hriat angin a zilhhau hek lo vang: retheite chu fel takin ro a rêlsak zâwk ang a, leia mi thuhnuairawlhte atân chuan thlei bîk nei lovin a zilhhau bawk ang.”—Isaia 11:3, 4.
Mitdelte leh Bengngawngte Tihdamna. “Mitdelte mit chu tihmenin a awm ang a, bengngawngte beng chu tihvârin a awm ang.”—Isaia 35:5.
Ram Chhia Chu Lei Ṭhatna Hmunah A Chang. “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang. A pâr vul chûk ang a, lâwm tak leh hla sain a hlim ang.”—Isaia 35:1, 2.
Lei Thar. “Vân tharte [vân lam sawrkârna thar] leh lei thar [mi fel pâwl thara awmte] ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang. Nimahsela ka thil siamah chuan kum khuain lâwmin hlim rawh u. . . . Tin, [Pathian thutiam khawvêl thara awmte chuan] inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a: thing dam chhûng nîte ang hian ka mite dam chhûng nîte chu a awm dâwn si a, ka mi thlante chu rei tak an thawh chhuah chungah chuan an lâwm dâwn a ni. A thlâwnin an thawk rim lo vang a, vânduaina mai tûrin fa an hring hek lo vang; LALPA malsâwm mi thlahte an ni si a, an fate chu an hnênah an awm reng ang. Tin, heti hi a ni ang a, annin mi koh hma pawhin ka chhâng ang a; thu an la sawi lai mêk pawhin ka bengin ka hria ang.” “Vân tharte leh lei thar ka la siam tûr chu ka hmaah a awm reng dâwn angin, in thlahte leh in hming chu a awm reng bawk dâwn a ni, LALPAN a ti.”—Isaia 65:17-25; 66:22.
Nakin Hun Ropui Tak Hrilh Lâwkna
Isaia lehkhabu chauh hi nakina malsâwmna lo awm tûrte sawi lâwkna lehkhabu awmchhun a ni lo. Bible bu pum pui hi Pathianin Krista kuta a Lalram hmanga thil ropui tak a tihhlawhtlin tûrte hrilh lâwknain a khat tlat a ni. * Chutiang paradis dinhmuna nun chu i duh ang em? Chutah chuan i nung thei a nih chu! Pathianin nakin hun atâna hun ṭha siam a tumte chungchâng zawng chhuakin, chuta i tel theih dân chu zir rawh. Jehova Thuhretute chuan lâwm takin an ṭanpui thei ang che. (w08 10/1)
[Footnote]
^ par. 15 Pathian Ram leh a thil tihhlawhtlin tûrte chungchâng hriat belh nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu phêk 76-85-na chu en ang che.
[Phêk 8-naa milem]
Lei pum pui hi paradis a ni ang
[Phêk 9-naa milem]
Mitthite an nung leh ang