Tuin Nge Nakin Hun Tûr Hre Thei?

“Kei hi Pathian ka ni a, . . . keiin a tâwp tûr chu atîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn.”​—⁠Isaia 46:​9, 10.

TUN hun mumal lo takah hian, politics lam, sum leh pai lam, leh khawtlâng nun lam zirtute chuan nakin hun tûr hriat tumin hmân lai thilthleng chanchin leh tûn lai huna mite rilru sûkthlêk dân chu an zir a. Mi dangte chuan an chunga thil lo thleng tûrte hriat an duh êm avângin, arsi-a ai enna emaw, dawithiamna emaw hmanga hriat an tum a ni. Chûng mite chu an rah chhuah avângin an lunghnual fo. He khawvêl, kan chhûngkua, leh keimahni mi mal chunga thilthleng tûr chu hriat theih loh hulhual a ni em? Tuemaw hian kan nakin hun tûr a hre lâwk thei tak zet em?

A chunga kan lâk chhuah tâk zâwlnei Isaia hnêna a thusawiah, Pathian Engkimtithei Jehova chuan nakin hun tûr a sawi lâwk theihzia a sawi chhuak a. Pathian chuan Isaia kal tlangin hmân lai Israelte chu an sal tânna Babulon ata a chhuahtîr tûr thu leh Jerusalem leh a biak in an sak ṭhat leh tûr chungchâng a sawi lâwk a ni. Chu hrilh lâwkna chu eng ang chiahin nge a thlen famkim? A hma kum 200 vêlah, Isaia chuan Babulon latu tûr chu a hming nên lam a sawi lâwk a ni​—⁠Kura tiin. Chu bâkah, Kura chuan khawpui vênghimtu Euphrates Lui chu la pêngin a bei dâwn tih pawh dik takin a sawi lâwk bawk. Tin, Kura chuan khawpui chhûng luhna tûr kawngkhâr hrâwl pui puite chu inhawngsain a va hmu dâwn tih pawh a sawi lâwk bawk a, chu chu Kura tân khawpui lâk a awlsam phah a ni.​—⁠Isaia 44:24–45:⁠7.

Pathian nêna khaikhin chuan, mihringte hian nakin hun tûr hriat theihna kan nei lo va. Lal fing Solomona chuan: “Atûk lama thil lo awm tûr chhuang suh, chu mi nî chuan eng nge a rawn chhuahpui dâwn i hre si lo,” tiin a ziak a ni. (Thufingte 27:⁠1) Chu a thil ziah chu tûn thleng pawhin a la dik reng a. Mihring tumahin an nakin hun tûr chu an hre lâwk thei lo. Engvângin nge Pathianin a hriat theih bîk? Mihring mizia leh a rilru ngaihtuahnate pawh tiama a thil siam zawng zawngte a hriat thiam vek vâng a ni. A duh phawt chuan Pathianin mi mal leh a hnam puma an thiltih tûr chu a hre thlap thei a. Chu bâkah, thil lo thlengte sawhkhâwk tûr thunun tûrin thiltihtheihna tiam chin nei lo chu a nei bawk. A zâwlnei hmanga thil engemaw lo thleng tûra a sawi lâwk tawh chuan, ani chu “mahni chhiahhlawh thu tingheta, mahni palaite remruat hlensaktu,” a ni ṭhîn. (Isaia 44:26) Jehova chauhvin chutiang chuan a ti thei a ni.

Isaia chu Messia lo pian hma kum 700 aia tama mi a ni a. Chutichung pawhin, ani chuan Messia lo kal tûr chungchâng a hrilh lâwk a ni. Amaherawhchu, kum zabi 18-na hnu lamah chuan Bible sawisêltute chuan Isaia bu chu Pathian thâwk khum ni lovah an puh a. Isaia hrilh lâwknate hi thil lo thleng tûr sawina ni lovin, a lo thlen hnua ziak mai a ni an ti a ni. Chu chu a dik em? Kum 1947 khân Tuipui Thi kianga pûk pakhatah Isaia lehkhabu copy chu hmân lai kutziak lehkha zial dangte ruala laih chhuah a ni a. Mi thiamte chuan chu lehkhabu copy chu hrilh lâwk Messia, a nih loh leh Krista a pian hma kum za aia tama ziak a nih an ring a ni. Ni e, Bible hian nakin hun tûr a sawi ngei a nih chu!

 Isaia leh Bible ziaktu dangte chuan nakin hun tûr chu anmahni hriatthiamna ringawt rinchhanin an ziak thei lo vang. Chutih ahnêkin, anni chuan “thlarau thianghlim tirhin Pathian hnên ata an sawi zâwk ṭhîn” a ni. (2 Petera 1:21) A dawta thuziakah chuan, Isaia sawi lâwk Isua nun chanchin chipchiar tak ṭhenkhat chu kan sawi lang ang a. Tichuan, Isua leh a zirtîrte’n kan tûn lai hun leh a piah lama thilthleng tûr an sawite chu kan ngaihtuah bawk ang. (w08 10/1)